Ekkewe Oesini Ussun Fansoun Mwach

EWE aposel Piter a mak ussun pworausen mwachkkan fän iten aramas me ewe fönüfan, a erä: “Nge usun an [än Kot] we pwon, sia witiwiti lang sefo o pwal fonufan sefo, ikewe pung epwe nonnom ie.” (2 Piter 3:13, TF) Ewe äeüin oesini ussun “eü läng mi fö me eü fanüfan mi fö” a mak lon ewe puken Aisea. (Aisea 65:17; 66:22) Makkeien Piter ussun ena oesini a pwäratä pwe esaamwo unusen pwönütä lon an we fansoun.

Mwirin, lon ewe ier 96, ewe Pwarata me ren ewe aposel Jon a erä pwe ewe “fönüfan sefö” a riri ngeni ekkewe feiöch epwe kawor fän än Kot we Mwu. (Pwarata 21:1-4) Alon Jises me Paul ussun napanapen fönüfan me mwen warotoon Mwuun Kot we ra pwönütä iei. Ina minne, sia lükü pwe arapakkan chök, ena Mwu epwele wato ewe läng sefö me ewe fönüfan sefö. Epwe fet napanapen ena otot sefö? Ewe puken Aisea a äiti ngenikich.

Ekkewe Feiöch lon ewe Otot Sefö

Kinamwe me Tipeeüfengen lon Ach Feffel woon Unusen Fönüfan. “Iwe, repwe amani nöür ketilas o awili ngeni pisekin tuw pwül, nge wokur siles repwe awili ngeni naifen otot. Ekewe mwü resap chüen maunfengen, resap pwal chüen kaiö maun.”​—Aisea 2:2-4.

Kinamwe Lefilen Aramas me Man. “Eman wolif me eman apanen sip repwe chiechifengen, eman man itan lepart me eman apanen kuuch repwe nonomfengen, eman apanen kow me eman laion me eman man mi öümanau repwe kinamwefengen Iwe, eman kow me eman pear repwe mongöfengen, apaner repwe nonomfengen, nge eman laion epwe mongö fetilipwas usun eman kow. . . . Esap wor eman epwe afeiengaua eman ika ataela och won chukun Kot mi pin, pun än chon fanüfan silei ewe Samol mi Lapalap epwe alolol usun chök alololun matau.”​—Aisea 11:6-9.

Chommong Möngö fän iten Meinisin. “Won ewe chuk Sion ewe Samol mi Unusen Manaman epwe amolätä eu kametip fän iten aramas meinisin won fanüfan, eu kametip ia epwe wor ie sokopaten mongö mi anö, pwal wain mi mürina.”​—Aisea 25:6.

Esap Chüen Wor Mälo. “Iwe, Kot ewe Samol mi Lapalap epwe aükätiu mäla, pwe esap chüen wor tori feilfeilachök. Epwe talü chönün mas seni won mesen aramas meinisin o angei seni nöün aramas kana ar itengau ekis meinisin won fanüfan. Iei alon [Jiowa].”​—Aisea 25:8.

Manausefälin Ekkewe mi Mälo. “Nge iir mi mälo senikem repwe manau, inisiir epwe manausefäl. Iir mi möür fän pwül repwe nelo me pupuchor fän pwapwa. . .  Ewe fönüfan epwe amanaua chokkewe mi mälo me loom loom.”​—Aisea 26:19.

Messaia Emön Sou Kapwüng mi Pwüng. “Iwe, esap eäni apwüng ren künan mesan, esap pwal apwüngala och ren rongeen selingan. Nge epwe apwüngü chon wöüngau fän pwüng, epwe pwal peni chon tipetekison won fanüfan.”​—Aisea 11:3, 4.

Chon Mesechun me Chon Selingepüng Repwe Chikarsefäl. “Mürin, mesen chon mesechun repwe nela, nge selingen chon selingepüng repwe sukula.”​—Aisea 35:5.

Fönüpöön Epwe Uwaöch. “Iwe, ewe fanüapö me ewe fanüpwas repwe pwapwa, ewe fanüapö epwe mwänek o afisätä pön irä usun chök ekewe rous. Epwe fokun ämärätä irä, epwe mwänek fän pwapwa me köl.”​—Aisea 35:1, 2.

Eü Fönüfan Sefö. “Nengeni, üpwe föri eu läng mi fö [eü mineföön nemenem lon läng] me eu fanüfan mi fö [eü mineföön mwichen aramas mi pwüng]. Iwe, esap chüen wor eman epwe chechemeni ekewe mettochun lom o ekieki usun. Nge oupwe chök pwapwa o mwänek fochofoch ren mine üpwe föri. . . . Iwe, [chokewe mi nonnom lon ewe otot sefö Kot a pwonetiu] repwe aüetä imwer o nonom lon, repwe pwal fotuki irän wain o ochei uan. Esap fis pwe repwe aüetä imwer, nge eman lükür epwe nom lon. Esap pwal fis pwe repwe fotuki irä, nge eman lükür epwe mongö seni. Pun ierin manauen nei aramas epwe usun chök ierin manauen efoch irä, nge nei chon fil repwe pwapwaiti feiöchün angangen pöür fansoun langatam. Esap chüen fis pwe ra resin angang weires o foleni nöür pwe repwe mäkai. Pun ngang ewe Samol mi Lapalap üpwe afeiöchüür me mwirimwirir kana. Iwe, üpwe apwönüetä ar iotek mwen resamwo tüngor, nge lupwen ra chüen fos, üpwe aüselingeer.” “Pun usun föriei we läng mi fö me ewe fanufan mi fö repwe nonom fochofoch fän mesei, iei usun mwirimwirimi kana me itemi repwe nonom fochofoch.”​—Aisea 65:17-25; 66:22.

Oesini Ussun Mürinnöön Fansoun Epwe Feito

Esap chök ewe puken Aisea a oesini ussun feiöchün ewe fansoun epwe feito. Mei wor chommong oesini lon ewe Paipel ra kapas ussun ekkewe mettoch mi amwarar Kot epwe föri me ren an we Mwu fän Kraist.a Ka mochen nonnom fän ena sokkun napanapöchün fönüfan? Ewer, ka tongeni! Kopwe pwisin kaeo met ewe Paipel a wesewesen apasa ussun än Kot kewe kokkot mi mürinnö ren mwachkkan, me ifa ussun kopwe tongeni feiöchüni feiöchün. Chon Pwäratä Jiowa repwe pwapwa le älisuk.

[Footnote]

[Sasing lón pekin taropwe 4]

Aramas repwe kinamwefengen lefiler me pwal ngeni ekkewe man

[Sasing lón pekin taropwe 5]

Ekkewe mi mälo repwe manausefäl

[Sasing lón pekin taropwe 6]

Unusen ewe fönüfan epwe wiliti eü paratis