SÓPWUN 15

“Apéchékkúla Ekkewe Mwichefel”

Chón afalafal mi sáifetál ra álisi chón ekkewe mwichefel le núkúchar lón ar lúkú

A lóngólóng wóón Féffér 15:36–16:5

1-3. (a) Ié we chienen Paul minefé le sáifetál, me i met sókkun aramas? (b) Met sipwe káé lón ei sópwun?

ATUN ra fetál seni telinimw ngeni telinimw, ewe aposel Paul a nennengeni emén alúwél únúkkún. Iten átena, Timoty. Ese mwáál a 20 som ierin, me i emén mi achocho me tinikken. Atun ra sái seni Listra me Ikonium, Timoty a likitaaló telinimwan we. Met epwele fis lón ar sái? Paul a fen silei met epwe féri pokiten a fen iei oruuen an sái lón an angangen misineri. A silei pwe epwe wor chómmóng osukosuk me weires repwe chuuri. Epwe met meefien ena alúwél Timoty ren met epwe fis ngeniir?

² Paul a lúkúlúkú Timoty, eli lap seni án Timoty pwisin lúkúlúk wóón i. Minne a fis ngeni Paul me mwan a alúkúlúkú ngeni pwe a lamot an epwe wor emén chienan mi fich lón an sái. Repwe chuuri me apéchékkúla chón ekkewe mwichefel. Ina popun a lamot ar repwe úppós le féri ena angang, me a lamot ngeniir me rúúemén ar repwe tipeeúfengen lón ar ekiek. Epwe pwata Paul a meefi pwe a lamot ena? Eú popun, eli ren ewe tipefesen a fis lefiler me Parnapas.

³ Lón ei lesen, sipwe káé met sipwe féri atun a wor tipefesen. Sipwe pwal káé pwata Paul a filaatá Timoty an epwe chienan lón an sái lón an angangen misineri. Sipwe pwal alapaaló ach káé ussun ewe angang mi aúchea ekkewe chónemmwen mi wisen sáifetál lón ei fansoun ra eáni.

“Sipwele Liwinsefál me Chuuri Pwiich Kewe” (Féffér 15:36)

4. Met Paul a mochen féri lón an oruuen sái lón an angangen misineri?

⁴ Lón ewe sópwun me mwan, sia káé ifa ussun Paul, Parnapas, Juta, me Sailas ra apéchékkúla chón ewe mwichefel lón Antiok ren ar apwóróusa ngeniir pwóróusen ewe kefil ewe mwichen soupwúngúpwúng a eáni ussun ewe mettóch sirikomsais. Met Paul a féri mwirin? A ereni Parnapas ussun eú mineféén kókkótun sái. A erá: “Sipwele liwinsefál me chuuri pwiich kewe lón meinisin ekkewe telinimw ikewe sia arongafeili ie án Jiowa we kapas, me ppii iká ifa ussur.” (Féf. 15:36) Alon Paul na ese wewe ngeni ar repwe chék ló chuuri chienan kewe minefé. Ewe puken Féffér a pwáári popun án Paul we oruuen sái lón an angangen misineri. Áeúin, epwe sópweeló le ereni chón ekkewe mwichefel met ewe mwichen soupwúngúpwúng a fen filaatá. (Féf. 16:4) Oruuan, pokiten Paul i emén chón afalafal mi sáifetál, iwe a úppós le apéchékkúla chón ekkewe mwichefel, me álisiir le anúkúchara ar lúkú. (Rom 1:11, 12) Ifa ussun án Jiowa we mwicheich lón ei fansoun a áppirú ewe mwichen soupwúngúpwúng lón fansoun ekkewe aposel le apéchékkúla ekkewe mwichefel?

5. Ifa ussun ewe Mwichen Soupwúngúpwúng lón ei fansoun a emmweni me apéchékkúla ekkewe mwichefel?

⁵ Lón ei fansoun, Kraist a néúnéú ewe Mwichen Soupwúngúpwúng án Chón Pwáraatá Jiowa, le emmweni ekkewe mwichefel. Ekkena mwán mi túppwél mi kepit ra apéchékkúla me awora emmwen ngeni chiener kewe Chón Kraist lón meinisin ekkewe mwichefel wóón unusen fénúfan ren ar mak ngeniir taropwe, awora ekkewe puk mi print, akkóta ekkewe mwiich, me pwal ekkewe ekkóch mettóch. Ena Mwichen Soupwúngúpwúng a pwal mochen silei pwóróusen eú me eú ekkewe mwichefel. Ina popun, ra tiinaaló ekkewe chónemmwen mi wisen sáifetál pwe repwe chuuri chón ekkewe mwichefel. Ewe Mwichen Soupwúngúpwúng a ewisa ngeni fitengéréú mwán mi ásimaw mi lipwákéch wóón unusen fénúfan ar repwe chónemmwen mi wisen sáifetál.

6, 7. Ikkefa ekkóch angang ekkewe chónemmwen mi wisen sáifetál ra eáni?

⁶ Ekkewe chónemmwen mi wisen sáifetál lón ei fansoun ra nefótófót wóón ar áfánni me apéchékkúla meinisin ekkewe mwichefel ra chuuriir. Ifa ussun? Ren ar áppirú met ekkewe chón afalafal mi sáifetál lón fansoun ekkewe aposel ra féri ussun chék Paul. A ereni Timoty, chienan we chón afalafal mi sáifetál: “Kopwe afalafala ewe kapas, kopwe tinikken le esilefeili lón fansoun kinamwe me fansoun weires. Kopwe féri angangen apwúng, fén, pesepes, fán unusen óm mosonottam me lipwákéch le asukul. . . . Sópweeló le afalafala ewe kapas allim.”—2 Tim. 4:2, 5.

⁷ Ren án ewe chónemmwen mi wisen sáifetál epwe apwénúetá ena wokisin, iir me pwúlúwan we, iká mi pwúpwúlú, ra fiti chón ewe mwichefel lón ekkewe sókkopaten alen afalafal. Pokiten ekkena mwán iir chón asukul mi lipwákéch me aúcheani ewe angangen afalafal, iwe ar leenien áppirú a amwékútú chiener kewe Chón Kraist. (Rom 12:11; 2 Tim. 2:15) Ekkewe chónemmwen mi wisen sáifetál ra silleló ren ar eáni ewe tong ese pwisin achéchééi. Ra pwapwa le áeá ar fansoun me péchékkúl le angang fán iten ekkewe ekkóch, me ra sáifetál inaamwo iká a ngaw ásepwál, me ra pwal mwo nge sái ngeni ekkewe leeni mi efeiengaw. (Fil. 2:3, 4) Ekkewe chónemmwen mi wisen sáifetál ra pwal apéchékkúla, asukula, me éúréúra eú me eú ekkewe mwichefel ren ar kewe afalafal mi lóngólóng wóón Paipel. Meinisin chón ewe mwichefel ra feiéch ren ar ekieki ussun napanaper kewe me ar leenien áppirú ussun ar lúkú.—Ipru 13:7.

“Eú Watteen Songfengen” (Féffér 15:37-41)

8. Met meefien Parnapas ren án Paul etiwa?

⁸ Parnapas a tipeeú le fiti Paul le ló ‘chuuri pwiir kewe.’ (Féf. 15:36) Ra fen tipeeúfengen le angangfengen, me ra fen sissilei chiener kewe Chón Kraist lón ekkewe mwichefel. (Féf. 13:2–14:28) Ina popun, eli a fen éch ar repwe pwal mwinsefál, nge a ppiitá eú osukosuk. Féffér 15:37 a erá: “Parnapas a fókkun mochen uwei Jon, ewe mi iteni Mark.” Parnapas ese akkomw angei meefien Paul iká mi éch án Mark epwe fitiir. Nge a fen “fókkun mochen” apachaalong tettelin pwiin na Mark lón ar sái lón ar angangen misineri.

9. Pwata Paul ese tipeeú ngeni Parnapas?

⁹ Paul ese tipeeú ngeni. Pwata? Ei wokisin a erá: “Nge Paul ese sani ar repwe uwei [Mark], pún a kúna an ló seniir me lón Pamfilia me ese etiir lón ewe angang.” (Féf. 15:38) Mark a fen fiti Paul me Parnapas lón ar áeúin sái lón ar angangen misineri, nge ese fitiir tori wesilóón ar na sái. (Féf. 12:25; 13:13) Atun ra chúen nóm Pamfilia, Mark a ló seniir lón ar angang me liwiniti leenian we lón Jerusalem. Ewe Paipel ese affata iká pwata a ló seniir, nge me ren Paul pwe ese pwúng án Mark ló seniir, me eli Paul a ekieki iká a tongeni lúkúlúkú Mark.

10. Met a fis mwirin án Paul me Parnapas rese tipeeúfengen?

¹⁰ Inaamwo iká Paul ese tipeeú ngeni, nge Parnapas a chúen fókkun mochen uwei Mark. Paul ese siwili an ekiek. Féffér 15:39 a apasa: “Ren ena, a fis eú watteen songfengen lefiler, iwe ra káimufesen.” Parnapas a uwei Mark me ra sáiló ngeni Saipros, leenian we. Nge, Paul a sái lón an angangen misineri. Ei wokisin a erá: “Paul a filaatá Sailas, me a ló mwirin án pwiin kewe ra iótek pwe Jiowa epwe pwáár ngeni an kirekiréch mi somwoló.” (Féf. 15:40) Iir me rúúemén ra sái “ngeni Siria me Silisia, me apéchékkúla ekkewe mwichefel.”—Féf. 15:41.

11. Ikkefa ekkewe napanap mi aúchea epwe álisikich le chiechisefál ngeni emén mi wor met sia tipefesen wóón?

¹¹ Ei pwóróus, eli a áchchema ngenikich pwe kich sise unuséch. Paul me Parnapas ra fen kefilitá pwe repwe wisen tupuni ewe mwichen soupwúngúpwúng. Me eli mwirin och fansoun, Paul a kefilitá pwe epwe chóni ena mwichen soupwúngúpwúng. Inaamwo iká Paul me Parnapas iir Chón Kraist mwán mi múrinné, nge lón ena fansoun, rese tongeni nemeni ar song. Itá ra mut ngeni ena mettóch an epwe atai ar chiechifengen? Aapw. Inaamwo iká Paul me Parnapas rese unuséch, nge iir mwán mi tipetekison me ra achocho le áppirú Jises. Ese mwáál, mwirin och fansoun ra omusomusfengen me chiechiéchsefál. (Efi. 4:1-3) Ekiseló mwirin, Paul me Mark ra pwal angangfengensefál.a—Kol. 4:10.

12. Ikkefa ekkewe napanap a lamot ekkewe chónemmwen mi wisen sáifetál repwe pwáári ren ar repwe áppirú Paul me Parnapas?

¹² Paul me Parnapas ra songfengen lón ena atun, nge rese kan ina ussun. Parnapas i emén mi fókkun kirekiréch me álilliséch pwe iwe chienan kewe Chón Kraist rese pwal mwo nge kér ngeni itan we Josef, nge ra eita ngeni Parnapas, ewe mi wewe ngeni “emén mi apéchékkúla ekkewe ekkóch.” (Féf. 4:36) Paul a pwal silleló ren an kirekiréch me chúngú aramas. (1 Tes. 2:7, 8) A lamot ekkewe mwán mi ásimaw lón ei fansoun, kapachelong ekkewe chónemmwen mi wisen sáifetál repwe áppirú Paul me Parnapas. Repwe tipetekison, kirekiréch, tongei me chúngú chiener kewe Chón Kraist lón ewe mwichefel me pwal pwisin lefiler.—1 Pit. 5:2, 3.

“Ra Kapaséch Ussun I” (Féffér 16:1-3)

13, 14. (a) Ié we Timoty, me ifa ussun Paul a chuuri? (b) Pwata Paul a ingeló ren Timoty? (c) Ifa ewe angang a kewis ngeni Timoty?

¹³ Lón án Paul we oruuen sái lón an angangen misineri, a ló chuuri ekkewe mwichefel lón Kalesia mi nóm fán nemenien mwúún Rom. Ekiseló mwirin, “a wareiti Terpe, mwirin a ló ngeni Listra.” Ei wokisin a pwal erá: “Emén chón káé a nóm ikena itan Timoty, néún emén fin Jus mi lúkú nge seman emén re Krik.”—Féf. 16:1.b

¹⁴ A ffat pwe Paul a fen chuuri chón án Timoty we famili lón an we áeúin sái ngeni ena leeni ina epwe lón ewe ier 47. Iwe iei, lón án Paul oruuen sái ina epwe ruu iká úlúngát ier mwirin, a fókkun ingeló ren ewe alúwél Timoty. Pwata? Pokiten chienen Timoty kewe “chón lúkú lón Listra me Ikonium ra kapaséch ussun i.” Ese chék iteúéch me ren chienan kewe Chón Kraist lón leenian we, nge pwal tori ekkewe mwichefel mi kkan ngeniir. Ei wokisin a erá pwe chienan kewe Chón Kraist lón Listra me pwal Ikonium, ina epwe 20 mwail towawfeseniir, ra kapaséch ussun i. (Féf. 16:2) Fán emmwenien ewe ngún mi fel, ekkewe mwán mi ásimaw ra ewisa ngeni ewe alúwél Timoty eú wis mi fókkun aúchea, an epwe álisi Paul me Sailas lón ar angangen sáifetál.—Féf. 16:3.

15, 16. Met a efisi án Timoty epwe itéch?

¹⁵ Met a efisi án Timoty epwe itéch inaamwo iká i chék emén alúwél? Itá seni tipácheman, átéchún, are lipwákéchún? Fán chómmóng, aramas ra kan ingeló ren ekkena esin napanap. Pwal mwo nge ewe soufós Samuel a apwúngaló emén ren napanapan me lúkún. Iwe nge, iei met Jiowa a áchchema ngeni: “Ngang üsap nenengeni usun aramas ra nenengeni. Aramas ra nenengeni lapalapen mesen eman, nge ngang üa nenengeni leluken aramas.” (1 Sam. 16:7) Ina popun, Timoty a itéch me ren chienan kewe Chón Kraist esap ren napanapan me lúkún, nge ren napanapan kewe mi múrinné.

¹⁶ Fitu ier mwirin, ewe aposel Paul a makkeei ussun ekkóch napanapen Timoty kewe, napanapen Chón Kraist. A áweweei ussun napanapen Timoty kewe mi múrinné, an tong ese pwisin achéchééi, me an tinikken le féri wisan kewe. (Fil. 2:20-22) Timoty a pwal silleló ren an eáni “lúkú ese wor likótuputupun.”—2 Tim. 1:5.

17. Ifa ussun ekkewe sáráfé lón ei fansoun ra tongeni áppirú Timoty?

¹⁷ Lón ei fansoun, chómmóng sáráfé ra áppirú Timoty ren ar ámááraatá ekkewe napanap mi múrinné. Iká ina, iwe repwe itéch me ren Jiowa me néún kewe aramas, pwal mwo nge seni chék lekúkkúnúr. (SalF. 22:1; 1 Tim. 4:15) Ra pwáári pwe rese eáni lúkú mi likótuputup, me rese eáni ruu sókkun manaw. (Kölf. 26:4) Iwe mwirilóón, chómmóng sáráfé repwe tongeni ussun Timoty le álilliséch ngeni ewe mwichefel. Ra efisi án meinisin lón ewe mwichefel repwe pwapwa atun ra wiliiti chón afalafal, fangoló manawer ngeni Jiowa, me papatais.

Ar “Lúkú A Péppéchékkúleló” (Féffér 16:4, 5)

18. (a) Ikkefa ekkewe feiéch Paul me Timoty ra pwapwaiti lón ar angangen misineri? (b) Ifa ussun ekkewe mwichefel ra kúna feiéch?

¹⁸ Paul me Timoty ra angangfengen ren fite fite ier. Lón ar angangen misineri, ra féri met ewe mwichen soupwúngúpwúng a ewisa ngeniir. Ei wokisin a apasa: “Lupwen ra fetálfeil lón ekkewe telinimw, ra atoura ngeniir minne a fen kapwúngúló me ren ekkewe aposel me ekkewe mwán mi ásimaw lón Jerusalem pwe repwe apwénúretá.” (Féf. 16:4) A ffat pwe ekkewe mwichefel ra álleasochisi ewe emmwen seni ekkewe aposel me ekkewe mwán mi ásimaw lón Jerusalem. Mwirilóón ar álleasochis, “án chón ekkewe mwichefel lúkú a péppéchékkúleló me ra chóchchómmóngoló iteiten rán.”—Féf. 16:5.

19, 20. Pwata a lamot án Chón Kraist repwe álleasochisi ‘chókkewe mi wisen emmwen’?

¹⁹ Lón ei fansoun, atun sia pwal tipemecheres le álleasochisi ekkewe emmwen seni ‘chókkewe mi wisen emmwenikich,’ iwe Jiowa epwe efeiéchú ekkewe mwichefel. (Ipru 13:17) Pokiten napanapen ei fénúfan a sissiwil, iwe a lamot sipwe aúseling me álleasochisi ekkewe emmwen mi feito seni “ewe chón angang mi túppwél me tipáchem.” (Mat. 24:45; 1 Kor. 7:29-31) Ach féri ena epwe álisikich le akkapéchékkúla ach lúkú me túmúnú pwisinkich seni limengawen ei fénúfan.—Jem. 1:27.

²⁰ Ewer, ekkewe chónemmwen mi wisen sáifetál lón ei fansoun, kapachelong chón ewe Mwichen Soupwúngúpwúng, iir rese unuséch ussun chék Paul, Parnapas, Mark, me ekkewe ekkóch mwán mi ásimaw mi kepit lón fansoun ekkewe aposel. (Rom 5:12; Jem. 3:2) Iwe nge, pokiten ewe Mwichen Soupwúngúpwúng a fókkun álleasochisi án Kot we Kapas me túmúnúfichi ar repwe áppirú án ekkewe aposel leenien áppirú, iwe ra ánneta ngeni pwisin iir pwe ra alúkúlúk. (2 Tim. 1:13, 14) Mwirilóón, ekkewe mwichefel ra péchékkúletá me núkúchar lón ar lúkú.

TIMOTY A ANGANG WEIRES LE ‘ESILEFEILI EWE KAPAS ALLIM’

Aposel Paul a fókkun aúcheani án Timoty angang weires. Mwirin án iir me rúúemén angangfengen ren ina epwe úkúúkún 11 ier, Paul a tongeni makkeei ei ussun Timoty: “Ese wor emén rei epwe ussun i le enletin chúngú nónnómumi. . . . I a fitiei le angang lón esilefeilin ewe kapas allim ussun chék emén naw ngeni seman.” (Fil. 2:20, 22) Timoty a fókkun angang weires lón ewe angangen afalafal, ina minne a fókkun aúchea me ren Paul me a isettiw leenien áppirú mi múrinné fán itach.

Semen Timoty i chón Krik, me inan we i emén fin Jus, me eli Timoty a mámmááritá lón Listra. Seni leménúkolun Timoty, inan we Iunis me inan we chinnap Lois ra kan asukula masouen ekkewe Taropwe mi Pin. (Féf. 16:1, 3; 2 Tim. 1:5; 3:14, 15) Eli iir me úlúmén ra wiliiti Chón Kraist atun Paul a áeúin chuuri Listra.

Atun Paul a liwinsefál fite ier mwirin, eli a fen 20 ierin Timoty, me “chienan kewe chón lúkú lón Listra me Ikonium ra kapaséch ussun i.” (Féf. 16:2) Fán emmwenien án Kot we ngún mi fel, a makketiw ekkóch “oesini” ussun ena alúwél, iwe fán tipeeúin ekkena oesini, Paul me ekkewe mwán mi ásimaw ra ewisa ngeni eú wis mi aúchea. (1 Tim. 1:18; 4:14; 2 Tim. 1:6) Timoty a fiti Paul lón ewe angangen misineri. A wewe ngeni an epwe likitaaló chón an we famili, me a lamot an epwe sirikomsais ren an esap áchepeteki ekkewe chón Jus epwe chuuriir.—Féf. 16:3.

Timoty a sái ngeni chómmóng leeni. A fiti Paul me Sailas lón Filipai, a fiti Sailas lón Perea, me a ló ngeni Tesalonika wóón pwisin an. Atun Timoty me Paul ra chufengensefál lón Korint, a apwóróusa ekkewe pwóróus mi apwapwa ussun án chón Tesalonika pwáári tong me túppwél pwal mwo nge fán weires. (Féf. 16:6–17:14; 1 Tes. 3:2-6) Atun Paul a rong ussun ekkewe osukosuk chón ewe mwichefel lón Korint ra kúna, a ekiekin tiinaaló Timoty an epwe álisiir. (1 Kor. 4:17) Seni Efisus, Paul a tiinaaló Timoty me Erastus ngeni Masetonia. Nge atun Paul a mak ngeni chón Rom, Timoty a nóm lón Korint. (Féf. 19:22; Rom 16:21) Ikkena chék ekkóch me lein ekkewe leeni Timoty a ló ngeniir lón an féri wisan.

Ussun itá Timoty a meefi pwe ese fich ngeni ena wis, pokiten iei met Paul a makkeei ngeni. “Kosap fókkun mut ngeni emén an epwe esiitok pokiten óm alúwél.” (1 Tim. 4:12) Nge Paul a fókkun lúkúlúkú Timoty pwe iwe a tongeni tiinaaló ngeni eú mwichefel mi chómmóng ar osukosuk, me a ereni: “Kopwe allúkú ngeni ekkewe ekkóch ar resap eáni afalafal mi sókkóló.” (1 Tim. 1:3) Paul a pwal ewisa ngeni Timoty an epwe seikaatá ekkewe mwán lón ewe mwichefel ar repwe wisen chónemmwen me chónálillisin mwichefel.—1 Tim. 5:22.

Paul a fókkun tongei Timoty pokiten a eáni ekkena napanap mi fókkun múrinné. Ewe Paipel a áiti ngenikich pwe ena alúwél i chiechien Paul mi fókkun pacheéch ngeni, i emén mi túppwél, tong, me a ussun emén naw ngeni Paul. Paul a tongeni makkeei pwe a chemeni ssúrún chénún mesen Timoty, an fókkun mochen kúna, me a ióteki. Paul a ussun emén semelap mi tong ngeni Timoty, a pwal ngeni Timoty kapasen emmwen ussun ekkewe ‘samaw mi kan tottori,’ eli osukosuken lukan.—1 Tim. 5:23; 2 Tim. 1:3, 4.

Atun án Paul áeúin kalapus lón Rom, Timoty a nóm ren. Ren ekis fansoun, Timoty a pwal likiitú lón kalapus. (Filim. 1; Ipru 13:23) Sia silei pwe iir me rúúemén ra fókkun pacheéchfengen pwe atun Paul a mirititi pwe epwele máló, a makkeei ngeni Timoty: “Kopwe achocho ngeni óm kopwe mwittirito rei.” (2 Tim. 4:6-9) Ewe Paipel ese affata iká Timoty mi tikeri néún na chón káit me chienan na mi áchengicheng me mwen an máló.

MARK A PWAPWAITI CHÓMMÓNG WIS

Néún Mark we Puken Kapas Allim a apwóróusa pwe chókkewe mi aresini Jises ra pwal sótun turufi “emén alúwél” mi súló “fán an seleló.” (Mark 14:51, 52) Pokiten Mark, ewe mi pwal iteni Jon Mark, i chék a wisen makkeei ena pwóróus lón ewe Puken Kapas Allim, iwe eli fen pwisin i ena alúwél. Iká ina, iwe eli Mark a nóm ren Jises lón ekkóch atun.

Ina epwe mwirin 11 ier, atun Erot Akripa a eriáfféwúmwááli ekkewe Chón Kraist, “ekkóch” chón ewe mwichefel lón Jerusalem ra chufengen pwe repwe iótek lón imwen Meri we, inen Mark we. Ina ewe imw aposel Piter a ló ie mwirin án emén chónláng angasaaló seni ewe imwen fétek. (Féf. 12:12) Ina minne, eli Mark a mámmááritá lón eú imw ekkewe Chón Kraist ra áeá le mwichfengen ekiseló mwirin. Ese mwáál, a silefichi néún Jises kewe chón káé me ra isettiw leenien áppirú mi múrinné fán itan.

Mark a fiti chómmóng chónemmwen lón ewe mwichefelin Chón Kraist lón fansoun ekkewe aposel lón ar angang. Ussun ewe áeúin angang a fiti, ina an eti Parnapas tettelin pwiin we me aposel Paul lón wiser we lón Antiok Siria. (Féf. 12:25) Atun Parnapas me Paul ra sái lón ar áeúin angangen misineri, Mark a pwal fitiir. Ra akkomw ló Saipros me mwirin ra ló Eisia Minor. Me ikena ie, Mark a liwiniti Jerusalem nge ese ffat popun. (Féf. 13:4, 13) Mwirin án Parnapas me Paul tipefesen wóón Mark ussun met a mak lón Féffér sópwun 15, Mark me Parnapas ra sópweeló ar angangen misineri lón Saipros.—Féf. 15:36-39.

Ussun iir meinisin ra ataweei ar tipefesen me mwen ewe ier 60 are 61, atun Mark me Paul ra pwal angangfengen sefál lón Rom. Paul a kalapus lón ena leeni me iei met a mak ngeni ewe mwichefelin Kolose: “Aristarkus, chiechiei chón kalapus, a tiinaaló an kapwong ngenikemi, pwal Mark, tettelin pwiin Parnapas we (ewe áúa fósun ámi oupwe etiwa iká a etto remi).” (Kol. 4:10) Iwe, Paul a ekiekin tiinaaló Jon Mark seni Rom ngeni Kolose pwe epwe álisi ewe mwichefel ikkena ie.

Ina epwe lefilen ewe ier 62 me 64, Mark me ewe aposel Piter ra angangfengen lón Papilon. Ussun met sia káé lón Sópwun 10 lón ei puk pwe ra ámááraatá ar chiechiéchfengen pwe iwe Piter a erá ussun ena alúwél “nei we Mark.”—1 Pit. 5:13.

Ina epwe lón ewe ier 65, atun ewe aposel Paul a oruuen kalapus sefál lón Rom, a mak ngeni chienan we Timoty, ewe a nóm Efisus: “Kopwe lukeato Mark pún a mmen álilliséch ngeniei lón ái angang ngeni Kot.” (2 Tim. 4:11) Ese mwáál, atun Mark a rong ussun ena, a mwittir ló seni Efisus me ló ngeni Rom. Esap pwata iwe Parnapas, Paul, me Piter ra fókkun aúcheani!

Ewe watteen feiéch Mark a eáni, ina an makkeei ewe Puken Kapas Allim fán emmwenien án Jiowa we ngún mi fel. Ekkóch ra erá pwe lape ngeni ekkewe pwóróus Mark a makkeei, a angei seni ewe aposel Piter. Ussun a pwúng ena pokiten Mark a apachaalong chómmóng pwóróus mi tichik chókkewe chék mi pwisin kúna minne a fis ra silei, áwewe chék ren Piter. Iwe nge, ussun Mark a makkeei ena Puken Kapas allim lón Rom, nge esap lón Papilon atun a nóm ren Piter. Mark a néúnéú chómmóng fósun Latin me a chiyakúúni ekkewe kapasen Ipru eli epwe weires ngeni ekkewe esap iir chón Jus ar repwe weweiti.

a Ppii ewe pwóór, “Mark A Pwapwaiti Chómmóng Wis.”

b Ppii ewe pwóór, “Timoty A Angang Weires le ‘Esilefeili ewe Kapas Allim.’”