A Fet Nonnomur lon ewe Tänipiin Ichen?

Jiowa a ngeni Atam me If chommong mettoch mi mürinnö. Keneses 1:28

Jiowa a föratä ewe äemönün fefin, If, iwe, a ngeni Atam pwe pwülüwan.​—Keneses 2:21, 22.

Jiowa a föriir pwe epwe unusöch inisiir me ekiekiir, nge ese wor teriir.

Ra nonnom lon Paratis lon ewe tänipiin Ichen, eü leeni mi fokkun lingemwarar ren ekkewe chanpupu, irään möngö, me man.

Jiowa a fos ngeniir me asukuler. Ika ra aüselinga i, repwe manau lon Paratis woon fönüfan tori feilfeilo chök.

Kot a apasa pwe resap möngö seni efoch me lein ekkewe irä. Keneses 2:16, 17

Jiowa a eppii ngeni Atam me If efoch irä lon ewe tänipi me a ereniir pwe ika repwe möngö seni, repwe mälo.

Emön me lein ekkewe chonläng a ü ngeni Kot. Ena chonläng mi ngaw, ina i Setan ewe Tefil.

Setan ese mochen pwe Atam me If repwe älleasochisi Jiowa. Iwe, a nöünöü emön serepenit le ereni If pwe ika a ocheei ewe föün irä mi pinepin, iwe, esap mälo, nge epwe usun chök Kot. Nge ina eü kapas chofona.​—Keneses 3:1-5.