Popun An A Péútúló Leenier We

NENGENI met a fis iei. Atam me Efa ra towu seni lón ewe leeni Eten mi lingéch. Ka silei pwata?

Popun, pún ra féri och mettóch mi fókkun ngaw. Iwe, Jiowa a apwúngúúr. Ka silei ewe mettóch mi ngaw Atam me Efa ra féri?

Ra féri och mettóch Kot a ereniir ar resap féri. Kot a ereniir pwe ra tongeni mwéngé seni iráán ewe leeni. Nge, a apasa pwe resap mwéngé seni uwaan ewe efóch irá, pún ika repwe mwéngé seni, repwe máló. Itá úrúrún resap ocheei féún ena irá. Sia silei pwe mei mwáál ach sipwe angeimwááli pisekin emén, ika met? Iwe, met a fis?

Lón eú rán, lupwen Efa a chék áláemén lón ewe leeni, emén serepenit a fós ngeni. Mwa met! A ereni Efa an epwe ocheei ewe féún irá Kot a apasa pwe resap ocheei. Lupwen Jiowa a fératá ekkewe serepenit, ese fériir pwe repwe tufichin fós. Iwe, weween pwe emén a afósa ewe serepenit. Ié ena?

Esap Atam. Iwe, ese mwáál i emén me lein ekkewe chónláng Jiowa a fen fériir me lóóm lóóm mwen an fératá fénúfan. Ekkena chónláng, sise tongeni kúner. Ena emén chónláng a wiliti emén mi fókkun lamalam tekia. A poputá le ekieki pwe i epwe sou nemenem usun Kot. Iwe, a mochen pwe aramas repwe álleasochisi i, nge esap Jiowa. I ewe chónláng mi afósa ewe serepenit.

Ei chónláng a otupu Efa. Iwe, Efa a lúkú ena chónláng lupwen a ereni pwe ika a ocheei ewe féún irá epwe tipachem usun chék Kot. Ina popun, a ocheei ewe féún irá, iwe, Atam a pwal ocheei. Atam me Efa ra álleasolapa Kot, ina minne, a péút seniir leenier we mi lingéch.

Nge eú rán, Kot epwe wisen aota pwe unusen ewe fénúfan epwe usun lingéchún ewe leeni Eten. Mwirin, sipwe káé ifa usun kopwe tongeni álillis lón ei angang. Nge iei, sipwe ppii ika met a fis ngeni Atam me Efa.