Ié ewe Jesus Kraist?

1. Ié a fératá Jesus me ia a feito me ie?

Jesus ese usun aramas, pun a fen nonnom lón láng usun emén chónláng mwen an uputiw wóón fénúfan. (Johannes 8:23) I mwánichien férien Kot kewe meinisin, me a pwal álillis lón fférútáán mettóch meinisin. I ewe emén mi pwisin fférútá me ren Kot me a fich an epwe iteni Néún Kot “Aleman.” (Johannes 1:14) A pwal iteni “ewe Kapas” pun a Chón Aweni Awen Kot.​—Álleani Än Salomon Fos 8:22, 23, 30; Kolose 1:15, 16, TF.

2. Pwata Jesus a feitiw fénúfan?

Kot a tiinatiw Néún we wóón fénúfan ren an siwili manawan lón láng me walong lón án emén fépwúl leenien ménúkol esaamwo tori mwán itan Maria, ewe fin Jus. Ina minne, semen Jesus esap chón fénúfan. (Lukas 1:30-35) Jesus a feitiw fénúfan pwe epwe (1) asukula aramas ewe enlet usun Kot, (2) isetiw eú leenien áppirú fán itach ren ifa usun sipwe féri letipen Kot pwal mwo nge fán weires, me (3) fangoló manawan mi unuséch usun eú méén kepich are ‘méén manau.’​—Álleani Mateus 20:28.

3. Pwata a lamot ngenikich eú méén kepich?

Eú méén kepich, ina eú liwin fán iten an epwe angasaaló emén seni máló. (Ekistos 21:29, 30) Máló me chinnap esap ikkena kinikinin letipen Kot fán iten aramas seni lepoputáán. Pwata sia silei ena? Kot a ereni ewe áeménún mwán, Atam, pwe ika epwe féri met ewe Paipel a eita ngeni “tipis,” iwe, epwe máló. Ina popun ika Atam ese tipis, esap máló. (Keneses 2:16, 17; 5:5) Me ren ewe Paipel, máló a “tolong” wóón fénúfan ren Atam. Ina minne, Atam a ngeni mwirimwirin kewe tipis me ewe liwinin tipis, máló. A lamot ngenikich eú méén kepich pwe epwe angasakicheló seni ewe liwinin tipis, máló, sia álemwiri seni Atam.​—Álleani Rom 5:12; 6:23.

Ié epwe tongeni awora ewe méén kepich pwe epwe angasakicheló seni máló? Lupwen sia máló, sia watiw pwisin liwinin tipisich. Aramas rese unuséch rese tongeni ménatiw tipisin ekkewe ekkóch.​—Álleani Kölfel 49:7-9.

4. Pwata Jesus a máló?

Jesus ese usuch, pun i mi unuséch. Iwe, ese lamot an epwe pwisin máló fán iten an tipis pun ese mwo tipis fán eú. Nge, Jesus a fen máló fán iten tipisin aramas. Kot a pwári an tong mi kkóló ngeni aramas ren an tiinaato Néún we le máló fán itach. Jesus a pwal pwári an tong fán itach ren an álleasochisi Seman we me fangoló manawan fán iten tipisich.​—Álleani Johannes 3:16; Rom 5:18, 19.

Katol ei video Pwata Jesus A Máló?

5. Met Jesus a féfféri iei?

Atun Jesus a nom fénúfan, a echikara ekkewe mi samau, amanawatá ekkewe mi máló me angasaaló aramas seni ar riáfféú. Ina popun a fen pwári met epwe féri lón mwachkkan fán iten aramas meinisin mi álleasochis. (Mateus 15:30, 31; Johannes 5:28) Mwirin án Jesus máló, Kot a amanawasefáli ngeni manaw lón láng. (Efisos 1:20) Iwe, Jesus a witiwit lepeliefichin Jiowa tori ewe fansoun epwe ngeni i ewe wis King le nemeni unusen fénúfan. (Ipru 10:12, 13) Iei, Jesus a nennemenem usun emén King lón láng, me ekkewe chón tapweló mwirin ra esilefeili ena pwóróus allim wóón unusen fénúfan.​—Álleani Taniel 7:13, 14; Mateus 24:14.

Ekiseló chék, Jesus epwele áeá an manaman usun emén King le asopwaló riáfféú meinisin me arosaló chókkewe mi efisatá. Meinisin mi eáni lúkúlúk wóón Jesus ren ar álleasochisi i, repwe pwapwaiti manawer lón paratis wóón fénúfan.​—Álleani Kölfel 37:9-11.