Emén Slave mi Álleasochisi Kot

Josef, i emén me lein néún Jekop kewe kúkkún. Pwiin Josef kewe watte ra kúna pwe semer we a sani Josef lap seniir meinisin. Óm lúkú nge met meefier ussun ena? Ra fókkun lólówóiti me oputa Josef. Atun Josef a kan ttan, a ereni pwiin kewe ussur. Ra ekieki pwe weween an kana ttan pwe eú rán repwe chapetiw mwen mesan. Iwe iei, a fókkun lapóló ar oputa i!

Eú rán, pwiin Josef kewe ra túmúnú néúr kewe siip kkan ngeni ewe telinimw itan Sikem. Jekop a ereni Josef an epwe ló ppii iká ifa ussur. Pwiin Josef kewe ra nennelói an a pweppwereto iwe ra eráfengen lefiler: ‘A war ewe chón ttan. Ou etto sipwe nieló!’ Ra turufi me oturaalong lón eú pwaang mi alóllóól. Nge Juta, emén me lein pwiin kewe a erá: ‘Sisap nieló! Sipwe fen améméló pwe epwe emén slave.’ Iwe ra améméló Josef fán iten 20 féún moni silifer ngeni ekkewe chón amémé seni Mitian mi sái ngeni Isip.

Mwirin, pwiin Josef kewe ra otuolong úfan lón chchaan emén siike me ra tiinaaló úfan we ngeni semer we, me ereni: ‘Esap iei úfen noum we?’ Iwe, Jekop a ekieki pwe emén manmwacho a nieló Josef. A fókkun letipechou. Ese wor emén a tongeni oururu.

Atun Josef a tori Isip, ra améméló pwe epwe slave ngeni emén néúwis mi watte wisan itan Potifar. Nge Jiowa a eti Josef. Potifar a kúna pwe Josef a mmen sipeéch lón an angang me a pwal wenechar. Ekiseló mwirin, Josef a wisen túmúnú meinisin minne án Potifar.

Pwúlúwen Potifar we a kúna pwe Josef a átéch me péchékkúl. Iteiten rán a ereni Josef an epwe kon ren. Met Josef epwe féri? Ese fókkun mochen me a ereni: ‘Aapw! Ese fókkun pwúng ena. Nei we masta a lúkúlúk wóói, me en pwúlúwan. Iká úa kon reom, úpwe tipis ngeni Kot!’

Eú rán, pwúlúwen Potifar we a sótun echchimwa Josef an epwe kon ren. A turufi úfan, nge Josef a sú seni. Atun Potifar a war, neminna a ereni pwe Josef a kirikiringaw ngeni. Nge a kapas chofona. Potifar a fókkun song, iwe a oturaalong Josef lón kalapus. Nge Jiowa ese likitaaló Josef.