Pwiin Josef Kewe Ra Oputa I

NENGENI úkúkún letipechoun me ápilúkúlúkúngawen ena alúwél. Ina i Josef. Pwiin kewe ra kerán améméló ngeni ekkena aramas mi sái ngeni Isip. Josef epwe wiliti chón angang ngeni aramas me ikena ie. Pwata pwiin kewe ra féri ei mettóch mi ngaw? Popun, pún ra lólówóiti Josef.

A fókkun watte án semer we Jakop tongei Josef. A pwáraatá an echeni ren an liffang ngeni eché úf mi ttam, nge a fókkun ling. Lupwen pwiin kewe 10 watte ra kúna úkúkún watteen án Jakop tongei Josef, ra poputá le lólówóiti me oput Josef. Nge mi pwal wor eú popun ar oput i.

Josef a eáni ruu ttan. Lón iir me ruu, pwiin kewe ra chapetiw ngeni. Lupwen Josef a apwóróusa ngeni pwiin kewe ekkeei ttan, a lapóló ar oput.

Iwe, eú rán, lupwen pwiin Josef kewe watte ra túmúnú néún seman kewe siip, Jakop a ereni Josef pwe epwe ló ppii ika ifa usur. Lupwen pwiin Josef kewe ra kúna an a pweppwereto, ekkóch leir ra apasa: ‘Sipwe nieló!’ Nge Rupen, ewe mwánichi, a apasa: ‘Aapw, ámi ousap féri ena!’ Nge ra turufi Josef me oturalong lón eú ito mi péén. Iwe, ra mómmót pwe repwe ekieki ika met repwe féri ngeni.

Lón ei atun ekkóch re Ismael ra pwereto. Juta a ereni pwiin kewe: ‘Sipwe améméló ngeni ekkewe chón Ismael.’ Iwe, ina ewe mettóch ra féri. Ra améméló Josef wóón úkúkún 20 féún silifer. A kkóló sorongawer me kirikiringawer!

Met ekkewe pwipwi repwe ereni semer we? Ra nieló emén siike, iwe ra otuolong fán fite úfen Josef we mi ling lón chchaan ewe siike. Mwirin, ra waló ewe úf lón imwer we me ngeni semer we Jakop, iwe ra apasa: ‘Ám aua kúna ei mettóch. Nengeni mwo, ika esap fen úfen Josef we.’

Jakop a kúna pwe iwe úfan we. A kétá: ‘Ese mwáál emén manmwacho a nieló Josef.’ Iwe, ina ewe mettóch pwiin Josef kewe ra mochen an epwe ekieki. Jakop a fókkun letipechou. A kan kechiw fitu rán. Nge Josef ese máló. Sipwe ppii met epwe fis ngeni lón ewe fénú a feiló ie.