Ekkewe Engol me Rúúemén Spai

Ekkewe chón Israel ra ló seni ewe Chuuk Sinai me sáiló lón ewe fénúpéén Paran ngeni eú leeni itan Kates. Me ikena Jiowa a ereni Moses: ‘Kopwe tiinaaló 12 mwán, emén seni eú ekkewe einang pwe repwe cheki ewe leeni Kenan, ewe fénú úpwe ngeni ekkewe chón Israel.’ Iwe, Moses a filaatá 12 mwán me ereniir: ‘Oupwe feiló Kenan me ppii iká ewe fénú a éch le fót mwéngé. Oupwe ppii iká ekkewe aramas ra péchékkúl are apwangapwang me iká ra nónnóm lón tento are telinimw.’ Ekkewe 12 spai, kapachelong Josua me Kalep ra feiló Kenan.

Mwirin 40 rán, ekkewe spai ra liwinsefál, nge ra uwou fik, kreip, me eú sókkun féún irá itan pomegranate. Ekkewe spai ra erá: ‘A mmen múrinné enan fénú, nge ekkewe aramas ra péchékkúl me ekkewe telinimw ra tekia ttitin.’ Mwirin Kalep a erá: ‘Sia tongeni okkufuur. Sa ló iei chék!’ Ka silei pwata Kalep a erá ena? Pokiten i me Josua ra lúkúlúk wóón Jiowa. Nge ekkewe engol spai ra erá: ‘Aapw! Ekkewe aramas ra watte me mwánemmong! Kich sia ussun chék nifichifichimas me únúkkúr.’

Ekkewe chón Israel ra niwokkus. Ra poputá le ngúnúngúnúngaw me ra eráfengen lefiler: ‘Etto sipwe filaatá emén néúch souemmwen me liwiniti Isip. Pwata sipwele fen feiló lón ena leeni repwe nikicheló?’ Josua me Kalep ra erá: ‘Ousap álleasolapa Jiowa, me ousap niwokkus. Jiowa epwe túmúnúkich.’ Nge ekkewe chón Israel rese mochen aúseling. Ra fen mwo nge mochen nieló Josua me Kalep!

Met Jiowa a féri? A ereni Moses: ‘Inaamwo úa féri mettóch meinisin fán iten ekkewe chón Israel, nge ra chúen álleasolapaei. Iwe repwe nónnóm lón ewe fénúpéén úkúúkún 40 ier, me ikena repwe máló. Néúr kewe chék semirit me Josua me Kalep repwe nónnóm lón ewe fénú ngang úa pwon pwe úpwe ngeniir.’