Minne A Fis Wóón ewe Chuuk Karmel

Ewe mwúún Israel a wor chómmóng néúr king mi ngaw, nge Ahap emén me lein ekkewe mi kon ngaw. A pwúlúweni emén fefin mi fókkun ngaw mi fel ngeni Paal. Itan Isipel are Jesepel. Ahap me Isipel ra ouraló ewe fénú ren ar fel ngeni Paal me nieló néún Jiowa kewe soufós. Met Jiowa a féri? A tiinaaló ewe soufós Elias an epwe ereni Ahap eú pwóróus.

Elias a ereni King Ahap pwe pokiten an féfféringaw, iwe esap púng rán lón Israel. Ren lap seni úlúngát ier, ese uwa ar kewe atake me ekkewe aramas ra echik. Mwirin och fansoun, Jiowa a tiinaalósefál Elias ren Ahap. Ena king a erá: ‘En emén aramasangaw! Meinisin ekkeei tipisum.’ Elias a pélúweni: ‘Esap ngang úa efisi ei pwás. En popun pwe ke fel ngeni Paal. Sipwe ánneta iká ié ewe Kot mi enlet. Oupwe ochufengenni ekkewe aramas me néún Paal kewe soufós wóón ungen ewe Chuuk Karmel.’

Ekkewe aramas ra chufengen wóón ewe chuuk. Elias a erá: ‘Oupwe filaatá met oupwe féri. Iká Jiowa i ewe Kot mi enlet, oupwe álleasochisi. Nge iká Paal ewe kot mi enlet, iwe oupwe álleasochisi. Sipwele ppii ién ewe Kot mi enlet. Néún Paal kewe 450 soufós repwe ammólnatá ar asor me kéri ar we kot, me ngang úpwe ammólnatá ái asor me kéri Jiowa. Ewe mi pélúweni ren ekkei, ina i ewe Kot mi enlet.’ Ekkewe aramas ra tipeeú ngeni.

Néún Paal kewe soufós ra ammólnatá ar asor. Lón unusen ewe rán ra kéri ar we kot me erá: ‘Paal, kopwe pélúwenikem!’ Atun Paal ese pélúweniir, Elias a ámángawer ren an erá: ‘Oupwe léúwommóng le kékké. Eli a annut, mi lamot emén epwe féngúni.’ Atun a lekuniol, néún Paal kewe soufós ra chúen kékkéri, nge ese pélúweniir.

Elias a watá an we asor wóón ewe róngen asor me a ninatiw konik wóón. Mwirin a iótek: ‘Jiowa kese mochen mut ngeni ekkeei aramas ar repwe silei pwe en ewe Kot mi enlet.’ Mwittir chék, Jiowa a tiinatiw ekkei seni láng me a kenaaló ewe asor. Ekkewe aramas ra púchér me erá: ‘Jiowa i ewe Kot mi enlet!’ Elias a erá: ‘Ousap mut ngeni néún Paal kewe soufós ar repwe sú.’ Lón ena chék rán, néún Paal kewe 450 soufós ra ninniiló.

Atun a wor eú kúkkúnún kuchu a pwá asen ewe mataw, Elias a ereni Ahap: ‘Epwe fis eú mélúmél. Kopwe angei wóóm we woken me feiló lón imwom.’ A kirocholó fán láng ren ekkewe kuchu, a enien ásepwál, me a púngúmmong rán. Iwe, a wesiló ewe pwás. Ahap a mwittir ssá wóón waan we woken. Ren álillisin Jiowa, Elias a fen kon mwittir le ssá lap seni ewe woken! Nge itá a ina muchún án Elias kewe osukosuk? Sipwe ppii.