Jiowa A Apéchékkúla Elias

Isipel a rong met a fis ngeni néún Paal kewe soufós, me a fókkun song. A tiinaaló och pwóróus ren Elias: ‘Lesor, kopwe ninniiló ussun chék néún Paal kewe soufós.’ Elias a fókkun niwokkus me a sú ngeni eú fénúpéén. A iótek: ‘Jiowa, úse chúen tongeni likiitú ngeni. Kopwe chék mut ngeniei ái úpwe máló.’ Pokiten Elias a fókkun pekkus, iwe a annutoló fán efóch irá.

Emén chónláng a féngúni me ereni fán pwetete: ‘Kopwe pwáátá me mwéngé.’ Elias a kúna eféú pilawa mi kumosumos wóón ekkóch faw mi pwich me eú rumeen konik. A mwéngé me ún iwe a annutsefál. Ewe chónláng a féngúnisefál me ereni: ‘Kopwe mwéngé. Mi lamot kopwe péchékkúl ngeni óm sái.’ Iwe Elias a pwal mwéngé. Mwirin a sái ren úkúúkún 40 rán me 40 pwiin tori an a tori ewe Chuuk Horep. Me ikena ie, Elias a tolong lón eú pwaang me annut. Nge Jiowa a kapas ngeni ren an erá: ‘Elias, met ka ffér ikkeei?’ Elias a pélúweni: ‘Ekkewe chón Israel ra atai ar pwon ngonuk. Ra atai óm kewe róngen asor me nieló noum kewe soufós. Iwe iei ra pwal mochen nieiló.’

Jiowa a ereni: ‘Kopwe feiló me útá wóón ewe chuuk.’ Akkomw, eú ásepwál mi péchékkúl a enito ren ewe pwaang. Mwirin, a wor eú chechchechin fénú me mwirin eú ekkei. Iwe, Elias a rong eú méngúngú mi pwetete. A pwélúoló mesan ren úfan we me útá lúkún ewe pwaang. Mwirin Jiowa a eisini pwata a sú. Elias a erá: ‘Pún ngang chék lusun.’ Nge Jiowa a erá: ‘Kese ákkáláemén. A wor 7,000 lón Israel iir mi chúen fel ngeniei. Kopwe feiló me epiti Elisa pwe epwe siwiluk le soufós.’ Mwittir chék, Elias a feiló me féri met Jiowa a ereni. Óm ekiek Jiowa epwe pwal álisuk atun ka féri met a mochen kopwe féri? Ewer, epwe fókkun álisuk. Iwe iei, sipwele ppii eú pwóróus a fis atun ewe fansoun pwás.