Jiowa A Mosonottam Ngeni Sona

Lón ewe telinimwen Ninifa lón Asiria, ekkewe aramas ra fókkun ngaw. Jiowa a ereni ewe soufós Sona an epwe feiló Ninifa me éúréúrer ar repwe siwili féfférúr mi ngaw. Nge Sona a sú me rikiló wóón efóch al. A fiti efóch siip me sáiló ngeni Tarsus.

Atun ewe siip a nóm lemataw, a fis eú mélúmél mi eniweniw, me ekkewe ssáló ra fókkun niwokkus. Ra iótek ngeni néúr kewe kot me eis: ‘Pwata a fis ei?’ Mwirin, Sona a ereniir: ‘Tipisi. Jiowa a ereniei och mettóch úpwe féri nge úa sú. Oupwe oturueitiw lemataw, iwe epwe kaúló ewe mélúmél.’ Ekkewe ssáló rese mochen, nge Sona a ereniir pwe repwe chék oturatiw. Atun ra oturatiw lemataw, a kaúló ewe mélúmél.

Sona a ekieki pwe epwele máló. Atun a kokotiw lón ewe sáát, a iótek ngeni Jiowa. Mwirin, Jiowa a tiinaaló emén watteen iik an epwe oromaaló Sona, nge ese ocheei. Me lón luken ewe iik, Sona a iótek: ‘Úa pwon pwe úpwe álleasochisuk fansoun meinisin.’ Jiowa a túmúnú Sona lón luken ewe iik ren úkúúkún úlúngát rán, iwe mwirin ewe iik a kusufaawu Sona ngeni winifénú.

Pokiten chék Jiowa a seláni manawen Sona, itá a wewe ngeni pwe esap chúen feiló Ninifa? Aapw. Jiowa a pwal erenisefál an epwe feiló ikena. Nge lón ei atun, Sona a álleasochis. A feiló ikena me ereni ekkena aramas mi fókkun ngaw: ‘Mwirin 40 rán, Ninifa epwe taló.’ Iwe, a fis och mettóch ese fen ekieki pwe epwe fis. Ekkewe chón Ninifa ra aúseling me ra siwili féfférúr. Ewe kingen Ninifa a ereni néún kewe aramas: ‘Oupwe kéri Kot, me áier. Eli epwe siwili an ekiek le atai Ninifa.’ Atun Jiowa a kúna pwe ekkewe aramas ra áier, ese chúen atai Ninifa.

Sona a song pwe ewe telinimw ese kataló. Ekieki mwo ei: Jiowa a fen mosonottam me úméúméch ngeni Sona, nge Sona ese pwáári úméúméch ngeni ekkewe aramasen Ninifa. Nge a fen towu seni ewe telinimw me móót fán núrún efóch irá mi téé chéén me a chék otumwutumw. Mwirin a pe ewe irá, iwe Sona a song. Iwe Jiowa a ereni: ‘Ka fen aúcheani ewe irá lap seni ekkewe chón Ninifa. Úa pwáári úméúméch ngeniir, me ra kúna manaw.’ Ifa ewe lesen? Ekkewe chón Ninifa ra aúchea lap seni och irá.