Ewe Ttitin Jerusalem

Ló fansoun Esra we, a wor emén chón Israel itan Nehemia, emén chón angang ngeni King Artaksasta. I a nónnóm Persia lón ewe telinimw Susa. Pwiin Nehemia we a feito seni Juta fán och pwóróus ese múrinné: ‘Ekkewe aramas mi liwiniti Jerusalem, ra tongeni feiengaw. Ekkewe asamalap me ttit chón Papilon ra ataretiw, resaamwo fférsefál.’ Nehemia a fókkun letipengaw. A mochen ló Jerusalem pwe epwe álisiir, ina popun a iótek pwe ewe king epwe tongeni mut ngeni an epwe ló.

Eú rán, ewe king a esilla pwe Nehemia a wololilen. Iwe a ereni: ‘Úsaamwo kúna fán eú óm kopwe iei ussun. Met óm osukosuk?’ Nehemia a ereni: ‘Pwata úsapw wololilen lupwen ái we telinimw, Jerusalem, a tatakkis?’ Ewe king a eisini: ‘Met ka mochen úpwe féri fán itom?’ Nehemia a mwittir iótekilong lón letipan. Mwirin, a erá: ‘Kese mochen mut ngeniei ái úpwe ló Jerusalem pwe úpwe aúsefáli ttitin we.’ King Artaksasta a ereni Nehemia pwe a tongeni ló Jerusalem, me a pwal nochchei túmúnún lón an sáittam. A pwal seikaatá Nehemia an epwe governor lón Juta me awora ngeni ekkewe irá epwe áeá ngeni asamalapen ewe telinimw.

Lupwen Nehemia a wareiti Jerusalem, a chekifichi ttitin ewe telinimw. Mwirin a emwichafengeni ekkewe souasor me sounemenem me ereniir: ‘Ese fókkun éch ei. Mi lamot sipwe angang wóón.’ Chókkana ra tipeeú ngeni, me ra poputá férsefáli ewe ttit.

Nge ekkóch me lein ekkewe chón Israel mi oputer ra ámángawer me apasa: ‘Emén foks a tongeni ataietiw ewe ttit oua aúetá.’ Ekkewe chón angang rese pwal áfánni ar kapasen ákkápii me ra chék sópweeló ar angangen kaú tori án ewe ttit a tekiatá me péchékkúleló.

Ekkewe chón oputer ra akkóta ar repwe maunei Jerusalem seni me lón ekkewe leeni meinisin ia ra nóm ie. Lupwen ekkewe chón Jus ra rong ussun ar na kókkót, ra fókkun niwokkus. Nge Nehemia a ereniir: ‘Ousap niwokkus. Jiowa a nónnóm rech.’ Nehemia a eleenia chón mmas ar repwe túmúnú ekkewe chón angang, iwe ekkewe chón oputer rese chúen tongeni mauner.

Lón chék úkúúkún 52 rán, ewe ttit me ekkewe asamalap ra wesiló. Nehemia a uweato meinisin ekkewe chón Lifai ngeni Jerusalem fán iten ewe efinún. A akkóter lón ruu kúmiin chón kél. Ra feitá wóón ekkewe laté ngeni wóón ewe ttit ren ewe Asamalapen Konik, nge mwirin ra karisfesen me pwelli ewe telinimw. Ra ettik rappwa, pisekin kaktai, me arp me kél ngeni Jiowa. Esra a fiti eú kúmi, nge Nehemia a fiti ewe pwal eú kúmi, tori ar ra chufengen me ren ewe imwenfel. Meinisin ekkewe aramas, mwán, fefin, me semirit, ra eáni asor ngeni Jiowa me ra fiti ewe apwapwa. Aramas ra tongeni rong me towaw léúwer mi apwapwa.