Ngaselo Lon Eu Otot Sefo Mi Pwung
“Repwe pwapwaesini ar feioch me kinamwe mi somwola.”—KÖLFEL 37:11.
1, 2. (a) Ifa usun an Jiowa angasalo aramas lon ach ei fansoun epwe sokko seni an angasalo aramas me lom? (b) Jiowa epwe atolonga noun kewe aramas lon menni sokkun otot?
JIOWA, I emon Koten ngaselo. Fan chommong me lom, a angasalo noun kewe aramas. Nge a chok fansoun mwochomwoch ar ra ngas, pun Jiowa ese unusen apwonueta an kewe kapwung ngeni unusen an Satan we otot lon ekkena fansoun. Nge arapakan chok lon ach ei fansoun, an Jiowa angasalo noun kewe chon angang epwe lapalap seni meinisin. Iwe, lon ena fansoun, epwe unusen ataielo an Satan otot won unusen fonufan, iwe, epwe atolonga noun kewe chon angang lon eu otot sefo mi pwung.—2 Piter 2:9; 3:10-13.
2 Jiowa a pwonei: “Ekiselo chok, nge ekkewe mi ingau resap chuen nom . . . Nge ekkewe chon tipetekison repwe fonueni ewe fonu, o pwapwaesini ar feioch me kinamwe mi somwola.” (Kol Fel 37:10, 11) Ifa ukukun ttamen? “Ekkewe chon pwung repwe fonueni ewe fonu o nonnom won tori feilfeilo chok.” (Kol Fel 37:29; Mattu 5:5) Iwe nge, me mwen an epwe fis, ei otot epwe kuna fitikoko watte usun chok esaamwo fis fan eu me lom.
Ewe “Riaffou mi Lapalap”
3. Ifa usun Jises a awewei ewe “riaffou mi lapalap”?
3 Lon 1914 a poputa “ekkewe ranin le sopwolon” an ei otot. (2 Timoti 3:1-5, 13) A fen lo 83 ier seni ena fansoun, iwe, epwe sopwolo ei otot lupwen epwe fis minne Jises a fen oesini, a era: “Epwe fis riaffou lapalap, usun chok esaamwo fis seni le poputaan fonufan tori ikenai, o esap pwal usun chok mwirin.” (Mattu 24:21) Ewer, epwe fen watten riaffou lap seni ewe Oruuen Maunen Fonufan, atun 50 million aramas ra malo. Eu fansoun siwillap a chok arapoto!
4. Met popun Jiowa epwe apwungu “Papilon mi Lapalap”?
4 Lupwen ewe “riaffou mi lapalap” epwe war, epwe muttir fisita, “lon eu chok kulok.” (Pwarata 18:10) Epwe poputa ren an Kot apwungu lamalam chofona meinisin, minne Paipel a eita ngeni “Papilon mi Lapalap.” (Pwarata 17:1-6, 15) Papilon lom a ur ren lamalam chofona. Lon ach ei fansoun, Papilon a usun chok Papilon lom, iwe, a liosueta lamalam chofona meinisin. A usun chok emon fin-lisou pun a chiechi ngeni ekkewe muun fonufan. A apochokkulata ar kewe maun pwal efeiochu ekkewe sounfiu lon ir me ruu pekin, weween, aramas mi choni eu chok lamalam ra nnifengennir. (Mattu 26:51, 52; 1 Jon 4:20, 21) A tunalo fofforingauen ir kewe mi chonir me a pwal eriaffou chon Kraist mi enlet.—Pwarata 18:5, 24.
5. Ifa usun ewe “riaffou mi lapalap” epwe poputa?
5 Ewe “riaffou mi lapalap” epwe poputa lupwen ekkewe muun fonufan repwe toki “Papilon mi Lapalap”. “Repwe oput ewe fin-lisou; repwe awoungaualo o aselelo i; repwe ochei fitukan; o repwe kenalo ren ekkei.” (Pwarata 17:16) Iwe mwirin, chienan kewe me lom repwe “kechiueiti me ngungures.” (Pwarata 18:9-19) Nge noun Jiowa kewe chon angang ra witiwiti langattam fansoun, iwe, repwe apasa: “Mwareiti Jah, . . . pun a fen apungu ewe fin-lisou mi lap, ewe mi alimengaualo fonufan ren an we lisou, o a pwal liwini ngeni neminewe chchaan noun kewe chon angang.”—Pwarata 19:1, 2.
A Toki Noun Kot kewe Chon Angang
6, 7. Pwata noun Jiowa kewe chon angang repwe lukuluk lupwen repwe kuna sossot lon ewe “riaffou mi lapalap”?
6 Mwirin ar ra ataielo lamalam chofona, ekkewe muun fonufan repwe kulliti noun Jiowa kewe chon angang. Satan, “Kok seni ewe fonuen Makok” a apasa lon ewe oesini: “Upwe topworalong lon eu fonu esap tit, upwe pwal maun ngeni aramas mi imweimw fan kinamwe me lukulukoch.” Satan a ekieki pwe epwe mecheres an epwe akkufur, iwe, epwe tokir ren “eu mwichemongun sounfiu . . . , usun chok kuchu ra pwoluelo ewe fonu.” (Isikiel 38:2, 10-16) Noun Jiowa kewe aramas ra silei pwe resap kkuf ren Satan pun ra apilukuluku Jiowa.
7 Lupwen Farao me noun kewe sounfiu ra mefi pwe ra asera noun Kot kewe chon angang orun ewe Setin Par, Jiowa a angasalo noun kewe aramas ren och manaman me a nnielo ekkewe sounfiun Isip. (Ekistos 14:26-28) Le polen ewe “riaffou mi lapalap,” lupwen ekkewe muu ra ekieki pwe ra fen liapeni noun Jiowa kewe chon angang, I epwe cherisefallir: “Lon ewe ran . . . ai song epwe sasewu. Pun lon ekimongun letipei, pwal lon watten ai lingeringer ua pwarata.” (Isikiel 38:18, 19) Lon na fansoun, muchuloon ewe “riaffou mi lapalap” epwe chok arapoto!
8. Met sokkun esissin epwe fis me mwen an Jiowa epwe apwungu ekkewe chon fofforingau, iwe, met sopwolon?
8 Iwe, lon eu fansoun mwirin poputaan ewe “riaffou mi lapalap” nge me mwen an Jiowa epwe apwonueta an kapwung won lusun ei fonufan, epwe fis esissin lon lang. Nengeni met epwe fis. “Iwe, esissinen ewe Noun-Aramas [Kraist] epwe pwa lon lang, nge einangen fonufan meinisin repwele chok lolilen. O repwe kuna an ewe Noun-Aramas feffeito lon kuchuun lang ren manaman, pwal ren ling mi lapalap.” (Mattu 24:29, 30) “Ekkoch esissin repwe pwata lon ewe akkar, lon ewe maram, o pwal lon ekkewe fu . . . aramas repwe meserochelo ren ar niuokkus, o pwal ren ar lolileniesini ekkewe mettoch repwe feito ngeni fonufan.”—Luk 21:25, 26.
“Ami Amanau A Fen Arapoto”
9. Pwata noun Jiowa kewe chon angang repwe ‘sacheta’ lupwen epwe fis ekkewe esissin mi sokkolo?
9 Ewe oesini lon Luk 21:28 epwe weneiti ena fansoun. Jises a apasa: “Iwe, are ekkeei mettoch epwe fisita, oupwe neta o sacheta pun ami amanau a fen arapoto.” Chon oput Kot repwe chechech ren niuokkus pun repwe silei pwe ekkena esissin ra popu seni Jiowa. Nge noun Jiowa kewe chon angang repwe pwapwa pun repwe silei pwe ar amanau a chok arapoto.
10. Ifa usun an Kot we Kapas a awewei sopwolon ewe “riaffou mi lapalap”?
10 Lon na fansoun Jiowa epwe ataielo an Satan we otot: “Upwe apwungu Kok ren matter me nimanau, pwal ren uttomong me utten fau. Upwe apwungatiu ekkei me primston won Kok me noun mwichen sounfiu meinisin . . . Murin repwe silei pwe Ngang mi Jiowa.” (Isikiel 38:22, 23) Iteiten kinikinin an Setan we otot repwe morolo. Aramas meinisin mi tunalo Kot repwe nninnilo. Epwe fis lon Armaketon le muchuloon ewe “riaffou mi lapalap.”—Jeremaia 25:31-33; 2 Tesalonika 1:6-8; Pwarata 16:14, 16; 19:11-21.
11. Pwata Jiowa epwe angasalo noun Jiowa kewe chon angang lon “ewe riaffou mi lapalap”?
11 Fitu million chon fel ngeni Jiowa won unusen fonufan repwe ngaseseni ewe “riaffou mi lapalap”. Ir chon ewe “mwich mi lapalap” mi feito “seni muu meinisin me einang meinisin me aramas meinisin me kapas meinisin.” Pwata repwe ngaselo lon eu lapalap mi fokkun amwarar? Pun ra “angang ngeni Kot le ran me lepwin.” Iwe, repwe manau lupwen epwe sopwolo ei fonufan me repwe tolong lon eu fonufan sefo mi pwung. (Pwarata 7:9-15) Iwe, repwe kuna pwonuetaan an Jiowa we pwon: “Kopwe apilukuluk won Jiowa o alleasochisi an kewe alluk. I epwe atekioketa pwe kopwe fonueni ewe fonu, nge en kopwe nennengeni, lupwen ekkewe aramasangau repwe poutmwaalilo.”—Kol Fel 37:34.
Ewe Otot Sefo
12. Ir kewe mi manauou seni Armaketon repwe eani menni apilukuluk allim?
12 Ina epwe eu fansoun mi fokkun apwapwa—epwe rosolo fofforingau meinisin me epwe poputa ewe fansoun mi lingoch seni meinisin lon uruwoon aramas! (Pwarata 20:1-4) Ir kewe repwe manau seni Armaketon repwe kilisou ngeni Jiowa pun repwe tolong lon eu otot mi lingoch me limelimoch, forien Kot, eu fonufan sefo mi wiliti eu paratis! (Luk 23:43) Iwe, resap chuen malo fan eu! (Jon 11:26) Enlet, seni ena fansoun feffeilo, epwe wor ar apilukuluk allim mi amwarar pwe repwe manau ukukun ttamen ewe fansoun Jiowa epwe manau!
13. Ifa usun Jises epwe forisefalli an angangen achikarata ekkewe mi semmwen, ewe a poputa fansoun an a nonnom won fonufan?
13 Jiowa a seikata Jises pwe epwe King lon lang, iwe, Jises epwe wisen mammasa ekkewe feioch watte chokewe mi ngaselo repwe pwapwaiti. Lupwen a nonnom won fonufan, a achikara ekkewe mi mesechun me selingepung me “iteiten sokkun samau me apwangapwang.” (Mattu 9:35; 15:30, 31) Lon ewe otot sefo, epwe poputasefal le achikara aramas won unusen fonufan. Lon wisan we wisen chon Tupuni Kot, epwe apwonueta ewe pwon, a era: “[Kot] epwe tolu seni meser chonun meser meinisin, o esap chuen wor malo, esap pwal chuen wor kechiu, are akurang, are metek, pun ekkewe mettochun lom ra fen morelo.” (Pwarata 21:4) Esap chuen wor lamoten an epwe wor tokter are chon peiasini soma!—Aisea 25:8; 33:24.
14. Epwe ifa usun noun Jiowa kewe chon angang mi fen malo repwe ngaselo?
14 Ekkewe chon angang ngeni Kot mi tuppwol me lom mi fen malo repwe pwal ngaselo. Lon ewe otot sefo, repwe ngaselo seni fotekin malo. Jiowa a alukuluku: “Epwe fis manausefal ren ekkewe mi pwung pwal ekkewe rese pwung.” (Fofor 24:15) Neman, “ekkewe mi pwung” repwe manausefal akkom me alisata choufetalin Paratis. Epwe fokkun amwarar pwe ekkewe mi manau seni Armaketon repwe rongorong porausen ekkewe chon tuppwol mi malo lom lom lupwen repwe manausefallita!—Jon 5:28, 29.
15. Awewei ekkoch ekkewe lapalap aramas repwe kuna lon ewe otot sefo.
15 Ir meinisin mi manau repwe kuna minne ewe chon makkei kol fel a apasa usun Jiowa: “Kopwe fen suukalo poum me apwonueta mochenin iteiten monumanau meinisin.” (Kol Fel 145:16) Esap chuen wor echik: Fonufan epwe itepok me ruuepeksefal me epwe uwa chommong. (Kol Fel 72:16) Esap chuen wor ir kewe esor imwer: “Iwe, repwe aueta imwer o nonnom lon,” me emon me emon epwe mommot “lon an tanipin wain, nge esap wor emon epwe eniuokusu.” (Aisea 65:21, 22; Mika 4:4) Esap chuen wor niuokkus: Esap chuen wor maun, fofforun mwanesol, are atai alluk. (Kol Fel 46:8, 9; Proverbs 2:22) “Iei unusen fonufan a kinamwelo, nge chon ra chieta kol fan pwapwa.”—Aisea 14:7.
16. Pwata pwung epwe pwoluelo ewe fonufan sefo?
16 Lon ewe otot sefo, an Satan angangen michi aramas epwe rosolo. Iwe nge, “chon fonufan repwe kaeo minne a pwung.” (Aisea 26:9; 54:13) Ren an aramas kakkaeo minne mi popu seni Kot iteiten ier meinisin, “an chon fonufan silei Jiowa epwe alollol ussun chok alollolun matau.” (Aisea 11:9) Ewe sokkun ekiek me foffor mi apochokkul epwe nom lon letipen aramas meinisin. (Filipai 4:8) Anchangei pwe ekkewe aramas meinisin won unusen fonufan repwe ngaselo seni atai alluk, lamalam tekia, lolowo—eu mwicheichin pwipwi seni ekis meinisin ikewe aramas meinisin repwe uwani uwan an Kot ngun mi fel ie. Enlet, pwal mwo nge iei ewe mwich mi lapalap ra lapalapeni ekkena lapalap.—Kalesia 5:22, 23.
Pwata A Kon Ttam An Jiowa Witiwit?
17. Pwata Jiowa a witiwit langattam fansoun me mwen an epwe asopwalo fofforingau?
17 Iwe nge, pwata a langattam fansoun an Jiowa witiwit mwen an epwe amoielo fofforingau me angasalo noun kewe aramas lon ewe otot sefo? Ekieki mwo met epwe fis akkom. Akkaein, epwe lamot an epwe annetata pwe Jiowa, I ewe emon mi unusen tekia me pwungun an nemenem. Ren an mutata nafochun fansoun, a pwarata nge ese chuen wor tipemwaramwar pwe an aramas nemenem lukun an nemenem ra chok ngau. (Jeremaia 10:23) Iwe, iei a wor an Jiowa pwung an epwe siwili an aramas nemenem ren nemenemen an we Muun lang fan Kraist.—Taniel 2:44; Mattu 6:9, 10.
18. Inet mwirimwirin Eperiam kewe repwe ita alemwiri ewe fonuen Kenan?
18 Minne a fis lon ekkeei senturi meinisin a usun chok minne a fis lon ranin Eperiam. Jiowa a ereni Eperiam pwe mwirimwirin kewe repwe alemwiri ewe fonuen Kenan—nge ra witiwit ukukun fopuku ier “pun esaamwo tori otun ai upwe apwungu an ekkewe chon Amor fofforingau.” (Keneses 12:1-5; 15:13-16) Ese mwaal ewe kapas “chon Amor” a niosueta ekkewe chon Kenan. Iwe, orun ruanu senturi epwe lo me mwen an Jiowa epwe atufichi noun kewe aramas ar repwe akkufu Kenan. Nge tori ena fansoun Jiowa a mut ngeni ekkewe muun Kenan ar repwe feffeita. Iwe, met sopwolon?
19, 20. Ifa lapalapen ekkewe chon Kenan?
19 Ewe Bible Handbook, makkeien Henry H. Halley, a apasa pwe lon Megiddo, ekkewe chon kaeo aramasen lom lom ra kuna eu imwenfelin Astoret, emon finen kot-puluwen Paal. A makkei: “Arap ngeni ena imwenfel a wor eu leenien peias, ikkewe am aua kuna chommong rume ie, nge ir mi masou ren inisin ekkewe monukol aramas ra asoresini lon ei imwenfel . . . Ekkewe soufosun Paal me Astoret, ir wesewesen chon nielo semirit.” “Iei pwal eu foffor mi annou, ina met ra eita ngeni ‘asorun longolong.’ Lupwen epwe kauta eu imw, repwe asoresini emon semirit me anomu inisin we lon ewe tikot.”
20 Halley a apasa: “A kan kapachelong lisou-mwaal lon ewe fel ngeni Paal, Astoret, me ekkewe ekkoch koten Kenan: a fiffis lon ar kewe imwenfel. . . . Ren ar lisou mwaal ekkewe chon Kenan repwe fel . . . me mwirin, repwe nielo nour kewe mwanichi are finichi usun eu asor ngeni ekkena kot. A usun ita nge ewe muun Kenan a lapalapeni lapalapen Sotom me Komora. . . . Epwe wor pwungun ena sokkun aramas mi annou me akkachofesa ar repwe nomottam? . . . Ekkewe sou kaeo aramasen lom lom, ekkewe mi tu pwulun lemolun ekkewe telinimwen chon Kenan ra ekieki ika pwata Kot ese fen muttir nirelo.”—Alollo ngeni 1 Kings 21:25, 26.
21. Ifa usun chon Kenan me aramas ikenai ra wewe chok?
21 “A fen unus” fofforingauen ekkewe chon Ammon. Ina minne a fen wor an Jiowa we pwung an epwe kitetirelo. Iwe, a pwal usun chok ikenai. Ei fonufan a ur ren fofforun akkachofesa, manau mi limengau, me an aramas oputa allukun Kot kewe. Iwe, pokiten sia kan oputa an ekkewe chon Kenan lom asoresini semirit, epwe met ach ekiek usun asorun manauen ekkewe fite million aluwol me fopul lon ekkewe maun mi fiffis won ei fonufan, nge a lap seni minne mi fis lon Kenan? Enlet, a wor an Jiowa we pwung an epwe amuchalo ei otot mi ngau.
A Apwonueta Pwal Och Mettoch
22. Met an Jiowa we mosonottam a atufichi lon ach ei fansoun?
22 An Jiowa mosonottam lon ekkeei ranin le sopwolon a apwonueta pwal och mettoch. A mutata fansoun pwe epwe ionifengenni me asukula ewe mwich mi lapalap, iwe, ra fen tori ukukun nimu million som. Fan an Jiowa emmwen, ra foratiu eu mwicheich mi chok feffeita. Mwan, fefin, me semirit ra kaeo pwe repwe pwal asukula aramas usun ekkewe poraus mi enlet lon Paipel. Ren ar kewe mwich me puken awewei Paipel, ra kaeo usun an Jiowa kewe al mi tong. (Jon 13:34, 35; Kolose 3:14; Ipru 10:24, 25) Pwal eu, ra lipwakochulo lon pekin taiku, electronics, peres, me pwal ekkoch sokkun angang fan iten ar repwe alisata ewe angangen afalafala ewe “kapas allim.” (Mattu 24:14) Neman ena sokkun tufichin asukul me taiku repwe lamot lon ewe fonufan sefo.
23. Pwata sia feioch pun sia manau lon ach ei fansoun?
23 Ewer, ikenai, Jiowa a ammolnata noun kewe chon angang ar repwe manau seni “ewe riaffou mi lapalap” lon eu otot sefo mi pwung. Mwirin, esap chuen wor Satan me an we otot mi ngau, esap pwal wor semmwen, letipeta, me malo. Ren mwasangasang me pwapwa, noun Kot kewe aramas repwe poputa le aueta eu paratis, ikewe iteiten ran repwe “unusen pwapwa” ie. Sia fokkun feioch pwe sia manau lon ei fansoun sopwolon ei otot, pwe sipwe tongeni silei me angang ngeni Jiowa, me weweiti pwe sipwe ‘neta o sacheta pun ach amanau a chok arapoto’!—Luk 21:28; Kol Fel 146:5.
Enniwili Poraus ren Kapas Eis
◻ Meta ewe “riaffou mi lapalap,” iwe, ifa usun epwe poputa?
◻ Pwata esap fisoch an Kok toki noun Jiowa kewe chon angang?
◻ Ifa usun ewe “riaffou mi lapalap” epwe muchulo?
◻ Ikkefa ekkewe feioch epwe kawor lon ewe fonufan sefo?
◻ Pwata Jiowa a witiwit langattam fansoun me mwen an epwe asopwalo ei otot?
[Sasing lón pekin taropwe 16]
Unusen fonufan epwe wiliti eu paratis