A Arapoto Ach Ngaselo Ren Än Kot We Mwu!

“Muom epwe feito, letipom epwe pwonueta, won fonufan usun chok lon lang.”​—MT. 6:10.

1. Ifa itelapen än Jises afalafal?

LUPWEN Jises Kraist a eäni an Afalafal woon ewe Chuuk, a kapachelong eü iotek mi menlapei itelapen ewe pworaus a afalafala. A äiti ngeni nöün kewe chon käeö pwe repwe iotek ngeni Kot: “Muom epwe feito, letipom epwe pwonueta, won fonufan usun chok lon lang.” (Mt. 6:9-13) Jises a “fetalfeil lon ekkewe telinim lapalap o telinim kisikis, a afalafalfeili ewe kapas allim usun muun Kot.” (Luk 8:1) Kraist a pesei nöün kewe chon käeö: ‘Nge oupwe akkom küttafichi ewe mwu me än Kot pwüng.’ (Mt. 6:33) Atun kopwe käeö ei lesen, kütta ifa ussun kopwe äeä ewe pworaus lon om angangen afalafal. Awewe chök, ekieki mwo ifa ussun kopwe tongeni pölüweni ekkeei kapas eis: Ifa lamoten pworausen ewe Mwu? A lamot pwe aramas repwe ngaselo seni met? Epwe ifa ussun än Kot we Mwu epwe angasalo aramas?

2. Ifa lamoten pworausen ewe Mwu?

² Jises a oesini: “Iwe, ei kapas allim usun ewe mu epwe esineifeili won unusen fonufan, pwe epwe pwar ngeni einang meinisin. Iwe, a ina sopolon.” (Mt. 24:14) A fokkun lamot ewe kapas allim ussun än Kot we Mwu. Iwe, ina ewe pworaus a lamot seni meinisin woon fönüfan! Lon lap seni 100,000 mwichefelin Chon Pwäratä Jiowa woon unusen fönüfan, orun fisu million chon angang ngeni Kot ra fiffiti ewe angangen afalafal le esile ngeni aramas pwe a fen poputä nemenemen ewe Mwu. Förütiuen an nemenem, ina eü kapas allim pun a wewe ngeni pwe Kot a fen isetä eü nemenem lon läng pwe epwe nemenalo fönüfan. Fän nemenemen ewe Mwu, epwe pwönütä letipen Jiowa woon fönüfan ussun an a fis lon läng.

3, 4. Met epwe fis lupwen epwe pwönütä letipen Kot woon fönüfan?

³ Met epwe fis ngeni aramas lupwen letipen Kot epwe pwönütä woon? Jiowa epwe “tolu seni meser chonun meser meinisin, o esap chuen wor malo, esap pwal chuen wor kechiu, are akurang, are metek.” (Pwar. 21:4) Aramas resap chüen sessemwen are mälo pokiten ra alemwiri tipis me rese unusöch. Jiowa epwe chechchemeni ekkewe mi mälo, iwe, epwe wor ar tufichin küna manau esemuch pun ewe Paipel a pwonei: “Epwe fis ewe manausefal ren ekkewe mi pung pwal ekkewe rese pung.” (Fof. 24:15) Esap chüen wor maun, semwen, are echik, iwe, ewe fönüfan epwe siwil ngeni eü paratis. Pwal mwo nge ekkewe man mi mwocho iei repwe kinamwefengen lefiler me aramas.​—Kölf. 46:9; 72:16; Ais. 11:6-9; 33:24; Luk 23:43.

⁴ Pokiten ekkena sokkun feiöch mi amwarar ra popu seni nemenemen ewe Mwu, än ewe Paipel oesini a kapas ussun manau lon ena fansoun ren ekkeei kapasen aurur: “Nge ir ekkewe mi mosonoson repwele fonueni ewe fonu, o repwe pwapwaesini chommongun ar pisek.” Nge epwe fet chon efisatä fitikoko? Ewe Paipel a oesini: “A ekis chok fansoun, o ir ekkewe mi ingau resap chuen nom.” Iwe nge, “ekkewe ra witi ewe SAMOL repwe fonueni ewe fonu.”​—Kölf. 37:9-11.

5. Met epwe fis ngeni ei ototen fönüfan ikenäi?

⁵ Ren an epwe fis ekkeei mettoch meinisin, ewe mwuun läng epwe amoielo ei ototen fönüfan, fengen me ekkewe mwu mi tipefesen, ekkewe lamalam, me ekkewe ototen sopai. Ewe soufos Taniel a oesini: “Iwe, lon fansoun mwün ekewe king [iir kewe mi nonnom iei], ewe Koten läng epwe aüetä eu mwü [lon läng] esap tongeni tala, esap pwal wor eu mwü epwe tongeni akufu. Iwe, ei mwü epwe ataela o arosala ekewe lusun mwü [lon ei fansoun], nge epwe püsin nom tori feilfeilachök.” (Tan. 2:44) Än Kot we Mwu, eü mineföön nemenem lon läng, epwe nemenem woon eü mineföön kokkotun aramas woon fönüfan. Epwe wor eü “lang sefo o pwal fonufan sefo, ikewe pung epwe nonnom ie.”​—2 Pit. 3:13.

A Lapolo Lamoten eü Alen Ngaselo Iei

6. Met ewe Paipel a apasa ussun ngaüoloon ei fönüfan mi ngaü?

⁶ Lupwen Setan, Atam, me If ra ü ngeni Kot pokiten ar mochen pwisin filatä minne a pwüng me mwääl, ina poputään än aramas aleni ewe alen efeiengaü. Mwen ewe Noter, lap seni 1,600 ier mwirin ar ü ngeni Kot, “än aramas föföringau a fokun wattela won fonüfan, nge ekiekin leluker a chök ngauala fansoun meinisin.” (Ken. 6:5) Orun 1,300 ier mwirin, pokiten Salomon a küna ngangaüoloon chon fönüfan, a makkei: “Iwe, üa ekieki pwe chokewe ra fen mäla ra feiöch seni chokewe mi chüen manau. Nge chokewe resamwo uputiu o küna ekkewe föföringau mi fis won fanüfan ra feiöch seniir meinisin.” (SalAf. 4:2, 3) Mwirin 3,000 som ier, sia tori ach ei fansoun, ikewe a chök sopwosopwolo ngangaüoloon fönüfan ie.

7. Pwata a lamot lap seni loom eü alen ngaselo ren Kot?

⁷ Inaamwo ika a enlet pwe a nomottam föfföringaü, nge a lamot lap seni loom pwe än Kot we Mwu epwe angasalo aramas. A fen lapolo ngaüoloon fönüfan lon ekkewe 100 ier ra lo, iwe, a pwal ngangaüolo. Awewe chök, ewe mwicheich Worldwatch Institute a repotei: “Mäloon aramas a lapolo woon fän ülüngät lon ekkewe maun mi fiffis seni 1900 tori 1999 lap seni lon ekkewe maun meinisin seni fansoun Jises tori ewe ier 1899.” Seni 1914 lap seni 100 milion aramas ra mälo lon maun! Eü puken aweween pworaus a esissillatä pwe orun 60 milion aramas ra mälo lon ewe Oruuen Maunen Fönüfan. Pokiten iei ekkoch mwuun fönüfan ra pwal mwo nge nöüni kensi pakutang, mei tufich ngeni aramas ar repwe nielo fite, fite million aramas. Iwe, inaamwo ika a lapolo sile lon pekin science me safei, nge iteiten ier orun nimu milion semirit ra mälo seni echik.​—Ppii sopwun 9 lon ewe puk What Does the Bible Really Teach? (Ifa Wesewesen Äitien Paipel?)

8. Met fite ngeröü ierin än aramas nemenem a ännetatä?

⁸ Aramas ra resin achocho le aükatiu föfför ingaü, nge ese fis. Än ei fönüfan kewe mwicheichen nemenem, sopai, me lamalam rese fen awora minne a lamot ngeni aramas, weween, kinamwe, wöüöch, me pöchökkülen inis. Rese fen pwäkini ekkewe osukosuk watte mi tottori aramas, nge ra fen alapalo are apachaatä pwal ekkoch osukosuk. Pwüngün pwe fite ngeröü ierin än aramas nemenem a ännetatä enletin ekkewe kapas: “Aramas resap püsin nemeni manauer, resap pwal tongeni akota mine repwe föri.” (Jer. 10:23) Ewer, “eman aramas a nemeni aramas o ariaföüür.” (SalAf. 8:9) Pwal och, “masouen lang me fonufan meinisin ra chok ngungufengen.”​—Rom 8:22.

9. Ikkefa ekkewe napanapen fönüfan Chon Kraist ra silei repwe fis lon ekkeei “ran le sopolon”?

⁹ Ewe Paipel a oesini ussun ach ei fansoun: “Fansoun weires epwe waroto lon ekkewe ran le sopolon.” Mwirin an kapas ussun napanapen ekkewe ränin le sopwoloon fän nemenemen aramas, ewe oesini a apasa: “Ekkewe aramas ingau, pwal ekkewe chon likotuputup, repwe chok alapalo ar fofor-ingau.” (Älleäni 2 Timoti 3:1-5, 13.) Ina ewe mettoch Chon Kraist ra silei epwe fis, pun “fonufan meinisin a nonnom fan nemenien ewe mi ingau.” (1 Jon 5:19) Iwe nge, iei ewe kapas allim, pwe Kot epwe angasalo iir kewe mi tongei i. Repwe ngaselo seni ei ototen fönüfan, ewe a mwittir ngangaüolo.

Emön Chök Epwe Angasakichelo

10. Pwata Jiowa chök epwe angasakichelo?

¹⁰ Lupwen kopwe afalafala ewe kapas allim, aweweei pwe Jiowa chök epwe angasakichelo. I chök a wor an manaman me an mochen angasalo nöün kewe chon angang seni fansoun weires. (Fof. 4:24, 31; Pwar. 4:11) Sia tongeni lükü pwe fansoun meinisin, Jiowa epwe angasalo nöün kewe aramas me apwönüetä an kewe kokkot, pun a pwonei: “Minne üa filätä epwe pwönüetä.” Minne a apasa “esap liwinto [ren] fän pön.”​—Älleäni Aisea 14:24, 25; 55:10, 11.

11, 12. Ifa ewe mettoch Kot a alükülükü ngeni nöün kewe chon angang?

¹¹ Jiowa a alükülükü pwe epwe angasalo nöün kewe chon angang lupwen epwe apwüngü ekkewe mi ngaü. Lupwen a tinalo ewe soufos Jeremaia pwe epwe fos ngeni ekkewe chon tipis watte fän pwora, Kot a apasa: “Kosap niuokusitiir.” Pwata? “Ngang üpwe etuk o tümwünuk.” (Jer. 1:8) Pwal ina chök ussun, lupwen Jiowa epwele atai Sotom me Komora, a tinalo rüüemön chonläng pwe repwe etekinawü Lot me an famili. “Mürin, ewe Samol mi Lapalap a apüngätiu . . . ütten primston me ekkei won Sotom me Komora.”​—Ken. 19:15, 24, 25.

¹² Pwal mwo nge woon unusen fönüfan, Jiowa a tongeni angasalo iir kewe mi föfföri letipan. Lupwen a nielo ekkewe aramas mi ngaü lon ewe Noter, “a chök amanaua Noa ewe chon afalafala usun pwüng me pwal füman aramas.” (2 Pit. 2:5) Iwe, Jiowa epwe pwal angasalo ekkewe mi pwüng lupwen a ataielo ei ototen fönüfan mi ngaü. Ina minne an we Kapas a apasa: “Oupwe kütta ewe Samol mi Lapalap, ämi meinisin mi tipetekison me lon ewe fonü . . . Oupwe föri minne a pwüng o atekisonakemi. Eni oua tongeni sü seni ewe apwüng lon ränin an ewe Samol mi Lapalap lingeringer.” (Sef. 2:3) Pokiten kitetterin ewe ototen fönüfan, ‘ekkewe chon pwüng repwe fönüeni fönüfan, nge ekkewe mi ngaü repwe pöküolo seni.’​—SalF. 2:21, 22.

13. Ifa ussun nöün Jiowa kewe chon angang mi fen mälo repwe ngaselo?

¹³ Iwe nge, chommong nöün Kot kewe chon angang ra fen mälo pokiten semwen, kawet, me met kan. (Mt. 24:9) Ifa ussun repwe ngaselo? Ussun sia fen käeö, “epwe fis ewe manausefal ren ekkewe mi pung.” (Fof. 24:15) A ifa me watteen aururuun letipach ach sipwe silei pwe esor och mettoch epwe tongeni pinei Jiowa seni an epwe angasalo nöün kewe chon angang!

Eü Mwu mi Pwüng

14. Pwata sia lükü pwe Mwuun Kot, ina än Kot we nemenem mi pwüng?

¹⁴ Lon om angangen afalafal, kopwe tongeni aweweei pwe än Jiowa we Mwu, ina eü nemenem mi pwüng. A enlet pun a napanapeni napanapen Jiowa kewe mi amwarar, ussun choweän pwüngöch, pwüng, me tong. (Tut. 32:4; 1 Jon 4:8) Kot a anomu ewe Mwu lon pöün Jises Kraist, ewe emön mi lipwäköch le nemeni fönüfan lap seni meinisin. Jiowa a pwal akkota pwe epwe angei seni fönüfan 144,000 Chon Kraist mi kepit pwe repwe feitä läng me eti Kraist le nemeni fönüfan.​—Pwar. 14:1-5.

15. Asokkofesenni nemenien än Kot we Mwu me än aramas nemenem.

¹⁵ A ifa me watteen sokkofesennin lefilen än Jises fengen me ekkewe 144,000 nemenem me nemenemen aramas rese unusöch! Fän chommong, ekkewe sou nemenemen ei ototen fönüfan ra kirikiringaü me ra fen emmweni nöür kewe aramas ngeni maun, iwe, fite milion ra mälo. Ina popun, ewe Paipel a fönökich pwe sisap eäni lükülük woon aramas, “pun esor alilis me rer”! (Kölf. 146:3) Nge Jises epwe nemenem ren tong! Jises a apasa: “Oupwe feito rei, ami meinisin mi pekus o chouchou, o ngang upwe asosokemi. Oupwe pwilitalong ai iok, o kaeo seniei, pun ngang mi mosonoson me tipetekison; iwe, oupwe kuna asosoon ngunumi. Pun ai iok mi murinno, o osei a pwas.”​—Mt. 11:28-30.

A Arapoto Muchuloon Ekkewe Rän le Sopwoloon!

16. Epwe ifa ussun ekkeei ränin le sopwoloon repwe muchulo?

¹⁶ Seni ewe ier 1914 ei ototen fönüfan a fen nom lon ewe amuchüloon fansoun, are ekkewe “ränin le sopwoloon.” (Mt. 24:3) Ekiselo chök epwe fis minne Jises a eita ngeni ewe “riaffou lapalap.” (Älleäni Mattu 24:21.) Ena riäfföü mi lapalap seni meinisin epwe ataielo unusen än Setan ototen fönüfan. Nge ifa ussun epwe poputä ewe riäfföü mi lapalap? Iwe, ifa ussun epwe muchulo?

17. Met ewe Paipel a apasa epwe fis le poputään ewe riäfföü mi lapalap?

¹⁷ Sipwe rüng chök nge ewe riäfföü mi lapalap a fis. Ewer, “ranin ewe Samol” epwe chök weiweitä “lupwen aramas repwe apasa, ‘Kinamwe pwal nukunukoch.’” (Älleäni 1 Tesalonika 5:2, 3.) Lupwen ekkewe mwu ra ekieki pwe ra tongeni ataweei ekkoch ar kewe osukosuk watte, ewe riäfföü mi fen oesini epwe poputä ren mwittir kitetterin “Papilon mi Lapalap,” ewe mwicheichen lamalam chofona meinisin. Epwe amäirü ngeni chon fönüfan. Ekkewe sou nemenem me ekkewe ekkoch repwe fokkun mäirü lupwen epwe fis kapwüngün Papilon mi Lapalap.​—Pwar. 17:1-6, 18; 18:9, 10, 15, 16, 19.

18. Epwe fet Jiowa lupwen Setan epwe maunei Nöün kewe aramas?

¹⁸ Lon eü fansoun mi lamot, “ekkoch esisin repwe pwata lon ewe akkar, lon ewe maram, o pwal lon ekkewe fu,” me “esisinen ewe Noun-Aramas epwe pwa lon lang.” Lon ena atun sipwe tongeni ‘netä me sachetä pun ach amanau a fen arapoto.’ (Luk 21:25-28; Mt. 24:29, 30) Setan, are Kok, epwe nöünöü nöün kewe a nemeni le maun ngeni nöün Kot kewe aramas. Nge iei alon Jiowa ussun ekkewe repwe maunei nöün kewe chon angang mi tuppwöl: “Chokewe mi atapakemi ra atapa fituken lon [mesei].” (Sek. 2:8) Ina minne, esap sopwöch än Setan achocho le niirelo. Pwata? Pun ewe Epinkepiisom Jiowa epwe mwittir mwökütüküt le seläni nöün kewe chon angang.​—Is. 38:9, 18.

19. Pwata sipwe tongeni lükülük pwe nöün Kot kewe sounfiun läng repwe atai än Setan we otot?

¹⁹ Lupwen Kot epwe apwüngü ekkewe mwu, ‘repwe silei pwe i Jiowa.’ (Is. 36:23) Epwe tinato ekkewe chonläng fän nemenien Kraist Jises pwe repwe ataielo lusun än Setan otot woon fönüfan. (Pwar. 19:11-19) Lupwen sipwe chechchemeni pwe lon eü fansoun emön chök chonläng a “niela ipükü walik me limungeröü” chon oput Kot lon eü chök pwin, sipwe tongeni lükülük pwe epwe mecheres ngeni ekkewe sounfiun läng ar repwe ataielo unusen än Setan otot woon fönüfan atun ewe riäfföü mi lapalap epwe muchulo lon Armaketon. (2 King 19:35; Pwar. 16:14, 16) Setan me nöün kewe timon repwe kalapus lon ewe apis ükükün engeröü ier. Lo, lo, lo, repwe ninniilo.​—Pwar. 20:1-3.

20. Met Jiowa epwe efisatä ren ewe Mwu?

²⁰ Iwe, epwe limetawu seni läng me fönüfan minne mi ngaü, me ekkewe aramas mi pwüng repwe manau woon fönüfan tori feilfeilo chök. Jiowa epwe fen ännetatä pwe i ewe Sou Amanau mi Lapalap. (Kölf. 145:20) Ren ewe Mwu, epwe ännetatä an pwüüng le nemenem, epinalo itan we mi fel, me apwönüetä an kokkot mi lapalap woon fönüfan. Amwo kopwe fokkun pwapwaesini om angangen afalafal atun kopwe esilefeili ei kapas allim me älisi “ir meinisin mi fil ngeni manau esemuch” ar repwe silei pwe arapakkan chök, än Kot we Mwu epwe angasakichelo!​—Fof. 13:48.

Ka Chechchemeni?

• Ifa ussun Jises a menlapei lamoten ewe Mwu?

• Pwata a lamot watte lap seni loom än emön epwe angasalo aramas?

• Ikkefa ekkewe mettoch repwe fis lon ewe riäfföü mi lapalap?

• Ifa ussun Jiowa a ännetatä pwe I ewe Sou Amanau mi Lapalap?

[Sasing lón pekin taropwe 16]

Än Kot we Kapas a oesini ussun eü angangen afalafal mi lap seni meinisin epwe fis woon unusen fönüfan lon ach ei fansoun

[Sasing lón pekin taropwe 18]

Jiowa “epwe tolu . . . , chonun meser meinisin, o esap chuen wor malo.”​—Pwar. 21:4.

[Sasing lón pekin taropwe 19]

Ussun Jiowa a angasalo Noa me an famili, Epwe tongeni angasakichelo