Ekkekieki Ranin Jiowa

“Lon ekkewe ranin le sopwolon chon esiit repwe feito ren ar esiit.”​—2 PITER 3:3.

1. Ifa ussun emon chon Kraist lon ach ei fansoun a mefi atapwalapwal?

EMON chon afalafal full-time lap seni 66 ier a makkei: “Seni chok me lom, ua fen fokkun mefi atapwalapwalen fansoun. Fansoun meinisin, Armaketon epwe chok fis sorotan lesor. (Pwarata 16:14, 16) Usun chok semei, me semen semei, ngang ua manaueni ewe manau ewe aposel Piter a peseikich ach sipwe eani, a era pwe sipwe ‘ekiekifichi o amuttiri warotoon ewe ranin Jiowa.’ Fansoun meinisin ua mefi pwe ewe otot sefo mi pwon, ina eu ‘mettoch mi enlet sia achifoua inaamwo ika sise mo kuna.’”​—2 Piter 3:11, 12; Ipru 11:1; Aisea 11:6-9; Pwarata 21:3, 4.

2. Met weween ach sipwe ekkekieki ranin Jiowa we?

² An Piter apasa “ekkekieki” ussun warotoon ewe ranin Jiowa a wewe ngeni pwe sisap tunalo lon ekiekich. Sisap monukalo pwe a fokkun arapoto ewe ran lupwen Jiowa epwe ataielo ei ototen mettoch mwen an epwe foratiu ewe otot sefo mi pwon. Sipwe fokkun luku enletin pwe epwe ussun ita nge sia kuna mwen mesach nge a fokkun ffatafatoch. A ina usun ekkewe soufosun lom ra mefi, iwe, fan chommong ra era pwe a fokkun arapoto.​–Osea 13:6; Joel 1:15; 2:1; Obadiah 15; Sefanaia 1:7, 14.

3. Met a efisi an Piter awora kapasen fon ussun ranin Jiowa we?

³ Pwata Piter a peseikich ach sipwe ekieki pwe ewe ranin Jiowa epwe ita feito, “sorotan lesor”? Popun pun ekkoch ra fen poputa le esiita ewe ekiek ussun an Kraist nonnom mi pwon atun ekkewe chon fofforingau repwe kuna kapwung. (2 Piter 3:3, 4) Ina popun, lon sopwun 3 lon noun we oruuen taropwe, ewe sipwele kaeo iei, Piter a polueni ekkena kapasen esiit..

Kapasen Pesepes pwe Repwe Chechemeni

4. Met Piter a mochen ach sipwe chechemeni?

⁴ An Piter acheni pwiin kewe a pwapwalo ren an kokkorir “ami mi achengicheng” fan chommong lon ei sopwun. Fan tong a peseir pwe resap monukalo minne ra fen kaeo, Piter a poputa ren an apasa: “Ami mi achengicheng, . . . ua fongunata ngunumi mi limelimoch usun och minen achema ngenikemi, pwe oupwe chechemeni oesinien ekkewe soufos mi fel, o allukun ewe Samol ach chon Amanau ren noun kewe chon kuno ngenikemi.”​—2 Piter 3:1, 2, 8, 14, 17; Juta 17.

5. Met ekkoch soufos ra apasa usun ranin Jiowa we?

⁵ Ikkefa ekkewe “oesinien ekkewe soufos mi fel” Piter a pesei ekkewe chon alleani ar repwe chechemeni? Mwa, ekkewe oesini usun nonnomun Kraist lon manamanen ewe Muu pwal kapwungun ekkewe mi touau seni Kot. Piter a fen kapas ussun ekkena oesini. (2 Piter 1:16-19; 2:3-10) Juta a kapas usun Inok, ewe akkaeuin soufos a mak poausan lon Paipel mi eani kapasen ourour usun an Kot kapwung won chon fofforingau. (Juta 14, 15) Pwal ekkoch soufos ra tapwelo mwirin Inok, iwe, Piter ese mochen ach sipwe monukalo minne ra makketiu.​—Aisea 66:15, 16; Sefanaia 1:15-18; Sekaraia 14:6-9.

6. Ikkefa alon Kraist me noun kewe aposel mi asaramakich ussun ranin Jiowa we?

⁶ Pwal eu, Piter a ereni chon alleani noun we taropwe ar repwe chechemeni “allukun ewe Samol me Chon Amanau.” A kapachelong lon an Jises we alluk ei kapasen pesepes: “Oupwe pwisin tumunukemi, pwe letipemi ete chourek . . . o ewe ran ete mutir torikemi usun chok eu ser.” “Oupwe tumunukemi o mammasa, pun ouse silei inet ewe fansoun epwe fis.” (Luk 21:34-36; Mark 13:33) Piter a pwal peseikich ach sipwe alleasochisi alon ekkewe aposel. Awewe chok, ewe aposel Paul a makkei: “Ranin Jiowa epwe waroto usun chok warewaren emon chon sola lepwin. . . . Iei minne, sisap okonnut usun ekkewe ekkoch, nge sipwe mammasa o forfichi.”​—1 Tesalonika 5:2, 6.

Mochenin Ekkewe Chon Esiit

7, 8. (a) Met sokkun aramas ra esiita an Kot kewe porausen ourour? (b) Met ekkewe chon esiit ra apasa?

⁷ Usun sia fen era, popun Piter a awora ena kapasen fon, pun ekkoch ra fen poputa le turunufasei ekkena kapasen ourour, usun chok ekkewe chon Israel lom ra turunufasei noun Jiowa kewe soufos. (2 Kronika 36:16) Piter a awewei: “Aeuin seni meinisin, oupwe fokkun wewe ren ei mettoch, pwe lon ekkewe ranin le sopwolon chon esiit repwe feito ren ar esiit, repwe tapwelo mwirin pwisin ar mochenia-ingau.” (2 Piter 3:3) Juta a apasa pwe ekkewe chon esiit ra mocheniaiti “mettochun fonufan chok.” A eita ngenir “aramas mi usun chok man, ewe Ngun ese mo nom rer.”​—Juta 17-19.

⁸ Ese mwaal ekkewe sense chofona Piter a era “ra mocheniani mochenia mi anioput” ra nonnom lein ekkena chon esiit mi lukulukummang. (2 Peter 2:1, 10, 14) Repwe turunufasei me eisini chon Kraist mi tuppwol: “Ia pwonen an epwe feito? Pun seni chok fansoun semach kewe ra mourelo, mettoch meinisin ra usun we chok seni popun lom.”​—2 Piter 3:4.

9. (a) Pwata ekkewe chon esiit ra sotun turunufasei an ewe Kapasen Kot amef ngeni aramas atapwalapwalen ei fansoun? (b) Ifa ussun epwe eu minen tumun ngenikich ach sipwe ekkekieki ranin Jiowa we?

⁹ Pwata a wor ena esiit? Pwata ra era pwe eni esap fis an Kraist nonnom, pwe Kot ese fen angolong lon an aramas kewe mwokutukut, iwe, esap pwal fori? Iwe, ren ar efisata tipemwaramwar ussun atapwalen ewe fansoun lon ewe Kapas en Kot, ekkena chon esiit mi lapalapeni lapalapen man ra sotun fori pwe aramas repwe aiessum lon pekin ngun, iwe, epwe mecheres ar repwe kkuf ren pwisin ar kewe mochenia. Ena poraus epwe fokkun etipetipakich ach sipwe mammasa me nennelo lon pekin luku! Amwo sipwe ekkekieki ranin Jiowa me chechemeni pwe mesan kewe ra atolakich fansoun meinisin! Epwe ina usun sipwe angang ngeni Jiowa ren tinikken me amwochu ach limelimoch.​—Kol Fel 11:4; Aisea 29:15; Isikiel 8:12; 12:27; Sefanaia 1:12.

Tipeweires me Ngau

10. Ifa usun Piter a annetata pwe ekkewe chon esiit ra mwaalilo?

¹⁰ Ekkena chon esiit ra tunalo eu poraus mi fokkun lamot. Ra pwisin filata ar repwe tunalo, iwe, ra pwal etipetipa aramas ar repwe pwal monukalo. Met popun? Pun epwe mecheres ar repwe otupur. “Pun, me ren pwisin ar mochen,” Piter a makkei, “a lama seni ir ei mettoch.” Ifa ewe mettoch? “Pwe a wor ekkewe lang lom lom ren ewe kapasen Kot, o pwal eu fonufan mi forata seni konik o ren konik. Iwe, ewe konik a pungutiu o a pwoluelo ewe fonufan mi nonnom lon ewe fansoun, o a pwal ataielo.” (2 Piter 3:5, 6) Ewer, Jiowa a amoielo fofforingau seni fonufan lon ewe Noter lon ranin Noa we, eu poraus mi enlet Jises a pwal itelapei. (Mattu 24:37-39; Luk 17:26, 27; 2 Piter 2:5) Iwe, mwaalfesen me minne ekkewe chon esiit ra apasa, mettoch meinisin rese “ussun we chok seni popun lom.”

11. Ikkefa ekkoch mettoch ekkewe popun chon Kraist ra ekiekin kuna nge ese pwung, ina popun ekkoch ra esiiter?

¹¹ Eni chon esiit ra turunufasei chon Kraist mi tuppwol pun esaamwo fis minne ra witiwiti. Ekiselo mwirin an Jises malo, noun kewe chon kaeo “ra ekieki pwe muun Kot epwe chok muttir pwapwalo.” Iwe, mwirin an we manausefal, ra kapas eis ika ewe Muu epwe muttir foruta. Pwal eu, orun engol ier me mwen Piter a makkei noun we oruuachoon taropwe, ekkoch ra “osukosuk” ren “och kapas” are “echok taropwe,” usun ita nge seni ewe aposel Paul are chienan kewe, “pwe ranin Jiowa a fen waroto.” (Luk 19:11; 2 Tesalonika 2:2; Fofor 1:6) Iwe nge, ese chofona minne noun Jises kewe chon kaeo ra witiwiti, nge ra chok ekieki pwe epwe muttir fis. Ranin Jiowa we epwe waroto!

An Kot we Kapas A Lukuchar

12. Ifa usun an Kot we Kapas a lukuchar lon an kewe oesini usun “ewe ranin Jiowa”?

¹² Usun sia fen kuna, fan chommong, ekkewe soufosun lom ra ouroura aramas pwe an Jiowa we ranin kapwung a chok arapoto. Eu “ranin Jiowa” mi kisikis a war lon 607 B.C.E. lupwen Jiowa a apwungu noun kewe aramas mi tokolo. (Sefanaia 1:14-18) Mwirin, a tori pwal ekkoch muu, pachelong Papilon me Isip, eu “ranin Jiowa” mi kisikis. (Aisea 13:6-9; Jeremiah 46:1-10; Obadiah 15) A pwal oesini pwe epwe sopwolo ewe ototen chon Jus lon ewe aeuin senturi, iwe, a fis lupwen ekkewe soufiun Rom ra ataielo Jutia lon 70 C.E. (Luk 19:41-44; 1 Piter 4:7) Nge Piter a kapas usun eu “ranin Jiowa” epwe feito lon mwachkkan, nge epwe lapalap seni ewe Noter!

13. Menni poraus lon uruwoon aramas a pwarata pwe epwe wesewesen fis sopwolon ei ototen mettoch?

¹³ Piter a poputa le kapas usun ena ranin kiteter epwe feito ren an apasa: “Nge ren ewe chok kapas.” A keran apasa pwe “ren kapasen Kot,” ewe fonufan mwen ewe Noter a “foruta seni konik o ren konik.” Ei napanap, ewe mi mak lon an ewe Paipel porausen forutaan fonufan, a atufichi ewe Noter lupwen a pungutiu ut fan an Kot emmwen, are kapas. Piter a sopweilo: “Ren ewe chok kapas [kapasen Kot] a iseis ekkeei lang o fonufanen ei fansoun ngeni ekkei, a iseis ir tori ewe ranin apung, ranin an ekkewe aramas ingau poutmwaalilo.” (2 Piter 3:5-7; Keneses 1:6-8) A wor rech an Jiowa we kapas mi lukuchar! Epwe asopwalo “ekkewe lang me ewe fonufan”​—ei ototen mettoch​—ren an lingeringer lon an we ran mi lap! (Sefanaia 3:8) Nge inet?

Mwoteres pwe Epwe Waroto ewe Sopwolon

14. Pwata sipwe tongeni lukuluk pwe sia nonnom lon “ekkewe ranin le sopwolon”?

¹⁴ Noun Jises kewe chon kaeo ra mochen silei inet ewe sopwolon epwe waroto, ina popun ra eisini: “Inet epwe fis ekkeei mettoch, o meeta esisinen om liwinsefal pwal sopwolon ei fansoun?” A pwapwalo pwe ra eisini inet epwe sopwolo otaen ekkewe chon Jus, nge minne Jises a eani polu a akkaeuin weneiti inet ewe ’lang me fonufan’ lon ei fansoun epwe talo. Jises a oesini pwe epwe fis maun mi lap, lengita, chechchechin fonu, malapalap, me atai alluk. (Mattu 24:3-14; Luk 21:5-36) Seni ewe ier 1914, sia fen kuna pwonuetaan ewe esissin Jises a awora fan iten “sopwolon ei ototen mettoch” pwal ekkewe mettoch ewe aposel Paul a era epwe esissinata “ekkewe ranin le sopwolon.” (2 Timoti 3:1-5) Enlet, a chukuchukuta ekkewe pisekin annet pwe sia nonnom lon ewe fansoun sopwolon ei ototen mettoch!

15. Met ekkoch chon Kraist ra fori inaamwo ika Jises a eani kapasen ourour?

¹⁵ Chon Pwarata Jiowa ra fokkun mochen silei inet epwe fis ewe ranin Jiowa. Fan ekkoch, pokiten ar mwoteres ra sotun esissin inet epwe feito. Nge ren ar fori ina usun, usun chok noun Jises kewe popun chon kaeo rese kon lien auseling ngeni alon nour we Masta pwe sise “silei inet ewe fansoun mi kefil epwe waroto.” (Mark 13:32, 33) Chon esiit ra turunufasei chon Kraist mi tuppwol pokiten ar kewe ekiek-mwan ussun ena fansoun. (2 Piter 3:3, 4) Iwe nge, Piter a alukuluku pwe ranin Jiowa we epwe feito me ren an kokkotun fansoun.

A Lamot Ach Sipwe Eani an Jiowa we Ekiek

16. Sipwe tipatchem le alleasochisi menni kapasen fon?

¹⁶ A lamot ach sipwe eani an Jiowa we ekieki usun fansoun, usun Piter a achema ngenikich: “Iwe nge, esap lama senikemi ei chok eu mettoch: eu ran epwe usun chok engerou ier ren Jiowa, o engerou ier epwe pwal usun chok eu ran.” Met ren mwochomwochen ttamen manauach ren 70 are 80 ier! (2 Piter 3:8; Kol Fel 90:4, 10) Ina minne ika usun ita nge a ekis mmang pwonuetaan an Kot kewe pwon, a lamot ach sipwe nguuri an noun Kot we soufos kapasen fon, a era: “Are epwe mang [ewe fansoun mi filita] le pwonueta, kopwe chok witiwit. Epwe fokkun pwonueta. Esap mang.”​—Apakuk 2:3.

17. Inaamwo ika ekkewe ranin le sopwolon ra sopweilo lap seni chommong ra ekieki, nge met sipwe tongeni lukuluk won?

¹⁷ Pwata ekkewe ranin le sopwolon ei otot ra sopweilo lap seni chommong ra ekieki? A wor eu popun murinno, ussun Piter a awewei: “Jiowa esap amanga an we pwon, usun chok ekkoch aramas ra ekieki usun mang, nge a chok mosonottam ngenikemi, pun ese mochen pwe emon epwe poutmwaalilo, pwe aramas meinisin repwe tori aier.” (2 Piter 3:9) Jiowa a ekkekieki met epwe efeiochu aramas meinisin. A fokkun ekieki manauen aramas, usun a apasa: “Ua pwapwaiti, sap maloon chon fofforingau, pwe emon mi ingau epwe kul seni an tipis o manau.” (Isikiel 33:11) Iwe, sipwe tongeni lukuluk pwe ewe sopwolon epwe waroto lon ewe chok fansoun fich pwe epwe apwonueta kokkotun ewe Chon Forata mi tipatchem me tong!

Met Epwe Morelo?

18, 19. (a) Pwata Jiowa epwe wesewesen ataielo ei ototen mettoch? (b) Ifa usun Piter a awewei ussun sopwolon ei otot, iwe, met epwe wesewesen talo?

¹⁸ Pokiten Jiowa a enletin tongei ir kewe mi angang ngeni, epwe amoielo ir meinisin mi efisata ar osukosuk. (Kol Fel 37:9-11, 29) Usun Paul a apasa me mwan, Piter a pwal apasa pwe ei kiteter epwe feito lon eu fansoun sise ekieki, iwe, a makkei: “Ranin Jiowa epwe feito usun chok emon chon sola, o lon ewe fansoun ekkeei lang repwe morelo ren akurang chapur, o ekkeei sokkun meinisin repwe itelo ren ekkei, o ei fonufan pwal ekkeei mettoch mi nonnom won epwe karelo.” (2 Piter 3:10; 1 Tesalonika 5:2) Ekkewe wesewesen lang me fonufan rese talo lon ewe Noter, iwe, resap pwal talo lon ranin Jiowa we. Iwe, met epwe “morelo,” are talo?

¹⁹ Ekkewe muun fonufan mi fen nemeni aramas usun chok “lang” repwe morelo, iwe, ewe “fonufan” are aramas mi touau seni Kot repwe pwal morelo. Ewe “akurang chapur” epwe tongeni weween pwe ekkewe lang repwe muttir morelo. “Ekkewe sokkun mettoch” mi wewe ngeni ekkewe aramasen fonufan mi ngangaualo epwe “karelo,” are kiteterelo. Iwe, ewe “fonufan”, pachelong “ekkewe mettoch mi nonnom won” repwe “pwapwalo”. Jiowa epwe unusen pwarata fofforingauen aramas atun epwe arosalo unusen ei ototen mettoch mi chok fich ngeni an epwe talo.

Ekkekieki Chok Om Apilukuluk Allim

20. Ifa ussun epwe ita kku manauach ach silei usun ekkewe mettoch repwele fisita lon mwachkkan?

²⁰ Pokiten ekkena mettoch repwele fisita, Piter a era pwe sipwe ita foffori “foffor mi fel o mi fich ngeni Kot, ren ami witiwiti o amuttiri warotoon ewe ranin Jiowa.” Ese fokkun wor tipemwarmwar! “Ekkeei lang repwe fisi o itelo, o ekkeei sokkun meinisin epwe telilo ren ekkei!” (2 Piter 3:11, 12) Pokiten epwe tufich pwe ekkena mettoch repwe tongeni fis leesor epwe ita kku mettoch meinisin sipwe fori are meefata.

21. Met epwe siwili ekkeei lang me fonufan?

²¹ Iei Piter a erenikich met epwe siwili ewe ototen lom, a era: “Nge usun an we pwon, sia witiwiti lang sefo o pwal fonufan sefo, ikewe pung epwe nonnom ie.” (2 Piter 3:13; Aisea 65:17) Iwe, sipwe fokkun ngaselo! Kraist me chienan kewe 144,000 sou nemenem epwe wiliti eu “lang sefo” are muu, iwe, ekkewe aramas mi chuen manau mwirin taloon ei otot repwe wiliti ewe “fonufan sefo.”​—1 Jon 2:17; Pwarata 5:9, 10; 14:1, 3.

Akkamwochu Ach Meefi Atapwalapwal me Ach Limelimoch

22. (a) Met epwe alisikich pwe esap wor och sor are tikitikipwul rech? (b) Met sokkun feiengau Piter a ourourakich usun?

²² Piter a sopweilo, “Iei minne, ami mi achengicheng, are oua witiwiti ekkeei mettoch, oupwe achocho ngeni pwe oupwe nonnom fan kinamwe, o esap wor remi och sor are tikitikipwul. O oupwe ekieki usun mosonottamen ach Samol, pwe iei amanauen ngunumi.” Ach witiwit ren mwasangasang pwal ekieki pwe an ita mmangoto ranin Jiowa a chok pwarata an Kot mosonottam epwe alisikich pwe esap wor rech och sor are tikitikipwul. Iwe nge, a wor minen efeiengau1 Piter a ourourakich pwe lon ekkewe taropwe seni “noun pwich we mi achengicheng Paul . . . mi wor och mi weires ngenikich ach sipwe wewe ren, o ir kewe mi tiparoch o tipemwaramwar ra awilielo, o ra pwal forata ngeni ar poutmwaalilo, usun chok ra pwal fori ngeni kapasen ekkewe ekkoch puk mi fel.”​—2 Piter 3:14-16.

23. Ifa an Piter amuchuloon kapasen fon?

²³ A pwapwalo pwe ekkewe sou afalafal chofona ra sorei makkeien Paul kewe ussun an Kot we chen, ra siwili ngeni angol. Neman Piter a ekieki ussun ena lupwen a makkei le sopwolon noun we taropwe ei kapasen fon, a era: “Iei minne, ami mi achengicheng, pokiten oua fen silei ekkeei mettoch me lom oupwe tumunukemi pwe oute mwaalilo ren mwaaliloon ekkewe aramas ingau, are turutiu seni ami likiitu.” Iwe, a awesalo noun we taropwe ren an pesei: “Oupwe mammarita lon ewe chen o tipatchemen ach Samol o Chon Amanau, Jises Kraist.”​—2 Piter 3:17, 18.

24. Menni ekiek noun Jiowa kewe chon angang meinisin repwe ita eani?

²⁴ A ffatoch pwe Piter a mochen apochokkulata pwiin kewe. A mochen meinisin repwe eani ekiekin ewe Chon Pwarata Jiowa mi tuppwol, 82 ierin, sia fen alleani alon le poputaan ach ei lesen, a apasa: “Ua manaueni manauei usun chok ewe aposel a peseikich, ‘ekkekieki warotoon ewe ranin Jiowa.’ Fansoun meinisin ua ekieki pwe ewe fonufan sefo, ina och mettoch sia ‘achifoua inaamwo ika sise mo kuna.’” Amwo kich meinisin sipwe manaueni manauach lon ena chok lapalap.

Ifa Usun Kopwe Polueni?

◻ Met weween ach “ekkekieki” ranin Jiowa we?

◻ Met ekkewe chon esiit ra filata an epwe lama senir, iwe, met popun?

◻ Met popun ekkewe chon esiit ra turunufasei ekkewe chon Kraist mi tuppwol?

◻ Menni ekiek epwe lamot ach sipwe akkeani?

[Sasing lón pekin taropwe 30]

Ekkekieki ranin Jiowa we . . .

[Sasing lón pekin taropwe 31]

. . . me ewe otot sefo epwe feito