Feioch Mi Lapalap Seni Ewe Atipeeu Sefo

“Jises . . . pwal ewe chon affor lon eu atipeeu mi murinno seni lom.”​—IPRU 8:6.

1. A ffatolo pwe io ‘mwirimwirin ewe fefin’ mi pwonetiu lon Ichen, me ifa ussun emon a ‘opuni epinipinin pechen’?

MWIRIN an Atam me If tipis, Jiowa a uwawu an apwung ngeni Setan, ewe emon mi otupu If ren an apasa pwe “Upwe efisata koum lefilemi me ewe fefin me pwal lefilen mwirimwirum kkewe me mwirimwirin neminnewe. Atewe epwe opunuk won mokurom me kopwe opuni won epinipinin pechen. (Keneses 3:15) Lupwen Jises a papatais lon ewe Chanpupu Jortan lon 29 C.E., ina pwaloon ewe Mwirimwir mi pwonetiu lon Ichen. Lupwen a malo won efoch iraan nninni lon 33 C.E., eu kinikinin ena oesinien lom a pwonuta. A ina ussun an Setan ‘opuni epinipinin pechen’ ewe Mwirimwir.

2. Me ren alon Jises, ifa ussun an malo a kan efeiochu chon fonufan?

² Sia pwapwa pwe inaamwo ika Jises a mmen riaffou lupwen a malo, nge ese mafocholo. Jises a manaueta seni malo, nge i emon ngun mi manaufoch, a feita ren Seman we lon lang, iwe, a mwei ngeni aucheaan chchaan we mi niniitiu pwe epwe “eu moon kepich fan iten akkasiwilin chommong.” A ina ussun pwisin alon we a pwonuta: “Ewe Noun aramas epwe nninniilo, pwe meinisin mi luku i repwe tongeni angei manau esemuch. Pun a kon watte an Kot tongei fonufan, ina minne, a fangolo Noun we alaemon, pwe meinisin mi pwarata ar luku i resap nninniilo, nge repwe angei manau esemuch.” (Mattu 20:28; Jon 3:14-16; Ipru 9:12-14) A mmen watte lamoten ewe atipeeu sefo fan iten pwonutaan an Jises oesini.

Ewe Atipeeu Sefo

3. Inet a keran aewin poputa pwonutaan ewe atipeeu sefo?

³ Ekis chok fansoun mwen an malo, Jises a ereni noun kkewe chon kaeo pwe chchaan mi niniilo, ina “chchaan ewe atipeeu [sefo].” (Mattu 26:28; Luk 22:20) Engol ran mwirin an feita lang, a poputa pwonutaan ewe atipeeu sefo lupwen ngun mi fel a feitiu won ina epwe 120 chon kaeo mi chufengen lon eu ruum lon Jerusalem. (Fofor 1:15; 2:1-4) Katolongen ekkena 120 chon kaeo lon ewe atipeeu sefo a pwarata pwe ewe atipeeu “lom,” weween, ewe Alluk fan iten eu pwon, a molo lon ena fansoun.​—Ipru 8:13.

4. A ita ngau ewe atipeeu lom? Awewei mwo.

⁴ A ita ngau ewe atipeeu lom? Aapw. A enlet pwe pokiten a wor siwilin, chon Israel rese chuen noun Kot kkewe aramas mi sokkolo aucheaar. (Mattu 23:38) Nge ra ina ussun pokiten an Israel alleasolap me an ese luku Noun Jiowa we mi Kepit. (Ekistos 19:5; Fofor 2:22, 23) Iwe nge, me mwen an a wor siwilin ewe Alluk, a apwonueta chommong mettoch. Ren fitepuku ier, a awora eu aalen arap ngeni Kot me eu minen tumun seni lamalam chofona. A pwari ekkoch lapalapen ewe atipeeu sefo, iwe, ren ekkewe asor mi fiffis fan chommong lon, a pwarata pwe aramas ra fokkun osupwang ren eu mettoch epwe angaserelo seni tipis me malo. A enlet pwe ewe Alluk eu “chon emmwen mi emmwen ngeni Kraist.” (Kalesia 3:19, 24; Rom 3:20; 4:15; 5:12; Ipru 10:1, 2) Iwe nge, ren ewe atipeeu sefo ewe feioch mi pwonetiu fan iten Eperiam epwe unusen pwonuta.

Ekkewe Muu ra Feioch Ren Mwirimwirin Eperiam

5, 6. Lon pwonutaan ewe atipeeu fan iten Eperiam lon pekin ngun, io Mwirimwirin Eperiam, me menni muu a akkom le kuna feioch reni i?

⁵ Iei an Jiowa pwon ngeni Eperiam: “Ren mwirimwirum muun fonufan meinisin repwe wesewesen pwisin efeiochur. (Keneses 22:18) Fan ewe atipeeu lom, chommong chon ekis mi tipetekison ra feioch ren ar pacheri Israel, nge ina ewe muu mi wewe ngeni mwirimwirin Eperiam. Iwe nge, ren wesewesen pwonutaan lon pekin ngun, Mwirimwirin Eperiam a wewe ngeni emon mwan mi unusoch. Paul a awewei ena ren alon ei: “Kapasen ekkewe pwon a tori Eperiam me pwal tori mwirimwirin we. Sap minne a apasa: ‘Me pwal tori mwirimwirin kkewe,’ pwe epwe ussun ita nge ir mi chommong, nge ina porausen emon: ‘Me pwal tori mwirimwirum we,’ nge i Kraist.”​—Kalesia 3:16.

⁶ Ewer, Jises Mwirimwirin Eperiam we, me ekkewe muu repwe angei ren i eu feioch mi fokkun lap seni met epwe tufich ren ewe muun Israel. A enlet pwe Israel ewe akkaewin muu mi angei ena feioch. Ekiselo mwirin Pentecos 33 C.E., iei alon Piter ngeni eu pwin chon Jus: “Ami noun ekkewe soufos me ewe atipeeu Kot a foratiu ngeni semelapemi kkewe ren an apasa ngeni Eperiam, ‘Iwe, ren mwirimwirum we meinisin einangen fonufan repwe feioch.’ Kot, mwirin an amanauata noun we Chon Angang, a akkom tinalo i ngenikemi pwe epwe efeiochukemi ren an okullu emon me emon leimi seni ami kkewe foffor mi ngau.”​—Fofor 3:25, 26.

7. Ikkefa ekkewe muu mi feioch ren Jises, Mwirimwirin Eperiam?

⁷ Ekiselo mwirin, ena feioch a tori chon Sameria, iwe mwirin, ngeni chon Jentail. (Fofor 8:14-17; 10:34-48) Lefilen 50 me 52 C.E., iei makkeien Paul ngeni chon Kraist lon Kalesia lon Asia Minor: “Ewe Paipel, pokiten an kuna me mwan pwe Kot epwe ko ngeni chon ekkewe muu aramas mi pwung pokiten ar luku, a esilei ngeni Eperiam ewe poraus allim me mwan, nge iei alon: ‘Ekkewe muu meinisin repwe kuna feioch reom.’ Ina minne ir mi pacheri ewe luku ra kukkuna feioch fitifengen me Eperiam, ewe mi tuppwol.” (Kalesia 3:8, 9; Keneses 12:3) Inaamwo ika chommong chon Kraist lon Kalesia, ir “chon ekkewe muu,” nge ra kuna feioch ren Jiowa pokiten ar luku. Ifa ussun?

8. Ren chon Kraist lon fansoun Paul we, ar kuna feioch a wewe ngeni met, me fitemon repwe kuna ena sokkun feioch?

⁸ Iei alon Paul ngeni chon Kraist lon Kalesia, ese lifilifil menni muu ra popu seni: “Ika ami noun Kraist, ami wesewesen mwirimwirin Eperiam, chon alemwir pokiten eu pwon.” (Kalesia 3:29) Ren ekkena chon Kalesia, ewe feioch mi toto me ren Mwirimwirin Eperiam a pwal wewe ngeni ar kapachelong lon ewe atipeeu sefo me ar wiliiti chienen Jises chon alemwir, me ar fiti Jises le kapachelong lein mwirimwirin Eperiam kkewe. Sise silei ukuukun chochoon Israel lom. Sia chok silei pwe ra “ussun ekkewe foun ppi mi nom orosset ren chommongur.” (1 King 4:20) Iwe nge, sia silei fitemon repwe eti Jises le wiliiti mwirimwirin Eperiam lon pekin ngun, iwe, ra tori 144,000. (Pwarata 7:4; 14:1) Ekkena 144,000 ra feito seni “iteiten einang me fos me aramas me muu” lein chon fonufan, me ra fiti ewe angangen afetalalo lein aramas ekkewe feioch seni ewe atipeeu ngeni Eperiam.​—Pwarata 5:9.

Eu Oesini mi Pwonuta

9. Ifa ussun allukun Jiowa a nom lon ir mi kapachelong lon ewe atipeeu sefo?

⁹ Lon an Jeremaia we oesini ussun ewe atipeeu sefo, iei makkeian: “‘Iei ewe atipeeu upwe foratiu ren imwen Israel mwirin ekkena ran,’ iei alon Jiowa. ‘Upwe minalong ai alluk lon ir, me upwe makkeilong lon letiper.’” (Jeremaia 31:33) Ururun pwe ir mi nom lon ewe atipeeu sefo repwe angang ngeni Jiowa pokiten ar tongei i. (Jon 13:35; Ipru 1:9) An Jiowa alluk a mak lon letiper, me ra mmen tipeni ar repwe fori letipan. A enlet pwe lon Israel lom ekkoch mi tuppwol ra wesewesen tongei an Jiowa alluk. (Kol Fel 119:97) Nge esap ina ussun chommong. Iwe nge, ir mi chuen kapachelong lon ewe muu. Emon esap tongeni nonnom lon ewe atipeeu sefo ika an Kot alluk ese mak lon letipan.

10, 11. Ren chokkewe mi kapachelong lon ewe atipeeu sefo, ifa ussun Jiowa a “wiliiti ar Kot,” me ifa ussun ir meinisin repwe silei i?

¹⁰ Pwal iei alon Jiowa ussun ir mi nom lon ewe atipeeu sefo: “Upwe wiliiti ar Kot, me pwisin ir repwe wiliiti nei aramas.” (Jeremaia 31:33) Lon Israel lom chommong ra fel ngeni koten ekkewe muu, nge ra chuen chok chon Israel. Ren ewe atipeeu sefo, Jiowa a forata eu muu lon pekin ngun, “ewe Israelin Kot,” pwe epwe siwili ewe Israel lon pekin futuk. (Kalesia 6:16; Mattu 21:43; Rom 9:6-8) Iwe nge, emon esap tongeni nonnom lon ewe minefoon muu lon pekin ngun ika epwe ukutiu seni an fel ngeni Jiowa, nge wesewesen i chok.

¹¹ Pwal iei alon Jiowa: “Ir meinisin repwe sileiei, seni ewe mi kisifochofoch leir tori pwal mwo nge ewe mi lapalap leir.” (Jeremaia 31:34) Lon Israel, chommong ra tunalo Jiowa ren ar ita apasa: “Jiowa esap fofforoch, me esap fofforingau.” (Sefanaia 1:12) Emon esap tongeni kapachelong lon ewe Israelin Kot ika epwe tunalo Jiowa are alimengaua ewe fel mi unusen limoch. (Mattu 6:24; Kolose 3:5) Chon Israel lon pekin ngun, ir “aramas mi sissilei ar Kot.” (Taniel 11:32) Ra kan pwapwa le ‘sissileilo ewe emon chok Kot mi enlet me Jises Kraist.’ (Jon 17:3) Ar silei Jises a kan alapalo sileier ussun Kot pun lon och lapalap mi sokkolo, Jises “ewe emon mi fen awewei [Kot].”​—Jon 1:18; 14:9-11.

12, 13. (a) Ifa longolongun an Jiowa okkomusalo tipisin ir mi kapachelong lon ewe atipeeu sefo? (b) Ifa ussun ewe atipeeu sefo a murinno seni ewe atipeeu lom fan iten omusomusen tipis?

¹² Iwe saingo, iei an Jiowa pwon: “Upwe omusalo mwaallir, me usap chuen chechchemeni ar tipis.” (Jeremaia 31:34b) Wisen chon Israel ar repwe alleasochisi fitepuku alluk mi makketiu lon ewe Allukun Moses. (Tuteronomi 28:1, 2, 15) Meinisin mi ipweri ewe Alluk ra fori asor fan iten apwolun ar kkewe tipis. (Lifitikos 4:1-7; 16:1-31) Lo, lo, chommong chon Jus ra luku pwe repwe tongeni wiliiti aramas mi pwung ren fofforur kkewe fan ewe Alluk. Iwe nge, chon Kraist ra weweiti pwe resap tongeni wiliiti aramas mi pwung ren ita liwinin fofforur kkewe. Esap tufich ar repwe ukutiu seni tipis. (Rom 5:12) Fan ewe atipeeu sefo, aramas ra tongeni wiliiti chon pwung mwen mesen Kot fan iten chok an Jises asor. Iwe nge, ar wiliiti aramas mi pwung, iei eu liffang, eu mettoch mi popu seni an Kot chen. (Rom 3:20, 23, 24) Jiowa a chuen ekiekin kuna alleasochis seni noun kkewe chon angang. Paul a apasa pwe ir mi kapachelong lon ewe atipeeu sefo ra nom “fan alluk ngeni Kraist.”​—1 Korint 9:21.

¹³ Ina minne, ren pwal chon Kraist a wor eu asor fan iten tipis, nge a fokkun auchea seni ekkewe asor fan ewe Alluk fan iten eu atipeeu. Iei makkeien Paul: “Iteiten samol fel [fan ewe Alluk fan iten eu atipeeu] a uta lon leenian ran me ran pwe epwe angang fan iten aramas me fori ekkewe asor fan chommong, pwe ekkeei asor resap tufichin unuseni amoielo tipis. Nge i [Jises] a awora eu asor fan iten tipis tori feilfeilo chok, iwe, a mottiu le peliefichin Kot.” (Ipru 10:11, 12) Pokiten chon Kraist lon ewe atipeeu sefo ra kan pwarata ar luku an Jises asor, Jiowa a ko ngeniir aramas mi pwung, weween, esor tipisir, iwe, a ina ussun ar tufichin kepit pwe repwe noun lon pekin ngun. (Rom 5:1; 8:33, 34; Ipru 10:14-18) Lupwen repwe tipis pokiten esap ir aramas mi unusoch, repwe tongeni tingorei Jiowa ren omusomus, iwe, fan iten an Jises asor, Jiowa epwe omuserelo. (1 Jon 2:1, 2) Iwe nge, ika repwe filata ewe aalen tipis, resap chuen aramas pwung me epwe pout senir wiser mi auchea, wisen ar repwe kapachelong lon ewe atipeeu sefo.​—Ipru 2:2, 3; 6:4-8; 10:26-31.

Ewe Atipeeu Lom me ewe Minefo

14. A wor met sokkun sirkumsais fan ewe Alluk fan iten eu atipeeu me fan ewe atipeeu sefo?

¹⁴ Ekkewe mwan lon ewe atipeeu lom ra sirkumsais pwe epwe eu esissinnen ar nom fan ewe Alluk. (Lifitikos 12:2, 3; Kalesia 5:3) Mwirin poputaan ewe mwichefelin Kraist, ekkoch ra meefi pwe chon Jentail mi wiliiti chon Kraist repwe pwal sirkumsais. Nge ekkewe aposel me elter lon Jerusalem mi nom fan ewe emmwen seni ewe Kapasen Kot me ewe ngun mi fel ra weweiti pwe ese lamot ena. (Fofor 15:1, 5, 28, 29) Ekkoch ier mwirin, Paul a apasa pwe “Emon chon Jus me lukun, esap i wesewesen chon Jus, me sirkumsais esap och mettoch me lukun mi pwa won ewe inis. Nge wesewesen chon Jus, ina i ewe aramas lon, me an sirkumsais a fis lon letipan ren ewe ngun, nge esap ren och alluk mi fen makketiu.” (Rom 2:28, 29) Sirkumsais won ewe inis, pwal mwo nge ren wesewesen chon Jus, ese chuen wor lamotan lon pekin ngun mwen mesen Jiowa. Ren ir mi nom lon ewe atipeeu sefo, ewe letip, nge esap ewe inis, epwe sirkumsais. Mettoch meinisin mi mwaal lon ekiekir, mochenir, me meefier are mi limengau mwen mesen Jiowa epwe reireilo.a Ikenai manauen chommong ra wisen pwarata ussun manamanen ewe ngun mi fel fan iten an tufichin siwili lapalapen aramas.​—1 Korint 6:9-11; Kalesia 5:22-24; Efisus 4:22-24.

15. Ifa ussun ewe Israel lon pekin futuk a sokko seni ewe Israelin Kot ren en me noun kkewe king?

¹⁵ Lon ewe kokkot fan ewe Alluk fan iten eu pwon, Jiowa a wisen King won Israel, iwe, lo, lo, a apwonueta an nemenem ren an nounou aramas mi sekita ngeni king lon Jerusalem. (Aisea 33:22) Jiowa, i Kingen ewe Israelin Kot, weween, Israel lon pekin ngun, iwe, poputa seni 33 C.E., a fen nemenem ren an nounou Jises Kraist, ewe mi angei “nemenem meinisin . . . lon lang me won fonufan.” (Mattu 28:18; Efisus 1:19-23; Kolose 1:13, 14) Ikenai, ewe Israelin Kot a asamolu Jises lon wisan we, wisen Kingen an Kot we Muu lon lang, nge ena muu a uta lon 1914. Jises emon King mi fokkun murinno seni Hesekaia, Josaia, me ekkewe pwal fitemon king mi tuppwol lon Israel lom.​—Ipru 1:8, 9; Pwarata 11:15.

16. Ewe Israelin Kot a wewe ngeni met sokkun mwichen samol fel?

¹⁶ Sap minne Israel eu muu chok, nge a pwal wor eu mwichen samol fel mi kepit lon. Lon 33 C.E., ewe Israelin Kot a siwili ewe Israel lon pekin futuk, iwe, a wiliiti noun Jiowa “chon angang,” are, noun kkewe “chon pwarata.” (Aisea 43:10) Alon Jiowa ngeni Israel lon Aisea 43:21 me Ekistos 19:5, 6 ra weneiti ewe Israel lon pekin ngun lon ena atun. An Kot we minefoon muu lon pekin ngun a wewe ngeni “eu einang mi filita, eu mwichen samol fel mi tekia, eu muu mi fel, eu mwichen aramas mi imulo ren eu kokkot auchea,” iwe, repwe wisen ‘esilefeili lapalapochun Jiowa.’ (1 Piter 2:9) Meinisin mwan me fefin lon ewe Israelin Kot ra wewe ngeni eu mwichen samol fel. (Kalesia 3:28, 29) Pokiten ir ewe oruuen kinikin lon mwirimwirin Eperiam we, iei ra kan apasa: “Oupwe pwapwa, ami kkana muu, ren noun kkewe aramas.” (Tuteronomi 32:43) Chon ewe Israel lon pekin ngun mi chuen nom won fonufan ra wewe ngeni ewe “chon angang mi tuppwol me tipatchem.” (Mattu 24:45-47) Aramas repwe tongeni fori angang mi fel fan iten Kot ren chok ar fiffiti chokkana.

An Kot Muu​—Ewe Saingoon Mettoch epwe Pwonuta

17. Mei fet upun ir mi nom lon ewe atipeeu sefo?

¹⁷ Chon Israel mi uputiu mwirin 1513 B.C.E. ra kapachelong lon ewe Alluk fan iten eu pwon seni uputiuer. Ir mi kapachelong lon ewe atipeeu sefo pokiten an Jiowa filiireta ra pwal up, nge ra up lon pekin ngun. Jises a kapas ngeni ewe Farisi Nikitimos ussun ena lupwen a apasa: “Enlet ua apasa ngonuk, Ika emon ese upsefal, esap tongeni kuna ewe muun Kot.” (Jon 3:3) Ekkewe 120 chon kaeo lon Pentecos 33 C.E. ra akkom le kuna ena up sefo. Pokiten ar iteni aramas pwung fan ewe atipeeu sefo, ra angei ngun mi fel pwe epwe “eu minen alukuluk” fan iten ar alemwir lon pekin samol. (Efisus 1:14) Ra “up seni ewe ngun” pwe repwe noun Kot mumu, iwe, ra wiliiti pwiin Jises me “chienen Kraist chon alemwir.” (Jon 3:6; Rom 8:16, 17) Ar “upsefal” a suuki ewe aal ngeni apilukuluk mi amwarar.

18. Upsefallin ir mi nom lon ewe atipeeu sefo a suuki ngeniir met sokkun apilukuluk mi amwarar?

¹⁸ Lupwen a apwonueta wisan we, wisen chon affor fan iten ewe atipeeu sefo, Jises a foratiu pwal eu atipeeu lefiler me noun kkewe chon kaeo ren an apasa: “Ua foratiu eu atipeeu remi, ussun chok Semei a foratiu eu atipeeu rei, fan iten eu muu.” (Luk 22:29) Ei atipeeu fan iten eu Muu a ammonlata mettoch meinisin fan iten pwonutaan eu langepwi mi fokkun amwarar, nge a mak lon Taniel 7:13, 14, 22, 27. Taniel a kuna “emon mi ussun emon noun aramas” mi angei nemenemen king seni “ewe Emon mi manau seni lom lom,” Jiowa Kot. Iwe mwirin, Taniel a kuna pwe “ekkewe mi fel ra angei nemenemen ewe muu.” Jises ewe emon mi “ussun emon noun aramas,” iwe, a angei nemenemen ewe Muun lang seni Jiowa Kot. “Ekkewe mi fel” ra wewe ngeni noun kkewe chon kaeo mi kepit ren ewe ngun mi fel me ra fiti i lon ena Muu. (1 Tesalonika 2:12) Ifa ussun?

19, 20. (a) Ifa ussun an Jiowa pwon ngeni Eperiam epwe pwonuta lon eu saingoon lapalap mi lingemwarar ren ir kkewe mi nom lon ewe atipeeu sefo? (b) Ifa pwal eu kapas eis mmen lamot an epwe polu?

¹⁹ Mwirin ar malo, ekkena chon kepit ra ussun Jises pwe ra manausefal seni malo ren ar wiliiti ngun mi manaufoch ren ar repwe fiti i le angang lon ewe wis king me samol fel lon lang. (1 Korint 15:50-53; Pwarata 20:4, 6) A ifa amwararen ar apilukuluk! “Repwe nemenem lon ewe wis king won fonufan,” nge esap won ewe chok fonuen Kenan. (Pwarata 5:10) Repwe ita ‘liapeni asamelapen chon koputer’? (Keneses 22:17) Ewer, epwe fokkun ina ussun, nge akkaewin, lupwen repwe kuna kataaloon ewe fin lisowu mi anioput lon pekin lamalam, Papilon mi Lapalap, me lupwen ekkena chon kepit mi manausefal repwe eti Jises le emmweni ekkewe muu “ren efoch wokumecha” me opuni mokuren Setan. Epwe ina ussun ar repwe fiti ewe angangen apwonueta ewe saingoon kinikin lon ewe oesini mi mak lon Keneses 3:15.​—Pwarata 2:26, 27; 17:14; 18:20, 21; Rom 16:20.

²⁰ Eli sipwe chuen eis, Ewe atipeeu fan iten Eperiam me ewe atipeeu sefo ra ita weneiti ekkewe chok 144,000 mi tuppwol? Aapw, pwe pwal fitemon rese kapachelong lon ekkena atipeeu repwe feioch senir, ussun sipwele kuna lon ena eu lesen mwirin ei.

[Footnote]

En mi Chechchemeni?

◻ Inet a keran aewin poputa angangen ewe atipeeu sefo?

◻ Met sokkun mettoch a pwonuta ren ewe atipeeu lom?

◻ Mwirimwirin Eperiam a akkaewin wewe ngeni io, me ifa tettelin ekkewe muu mi kuna feioch ren ena Mwirimwir?

◻ Ifa saingoon pwonutaan ewe atipeeu fan iten Eperiam me ewe atipeeu sefo ren ekkewe 144,000?

[Sasing lón pekin taropwe 22]

A mmen alollol weween omusomusen tipis ren ir mi nom fan ewe atipeeu sefo lap seni ir mi nom fan ewe atipeeu lom