Ekkewe Pwal Fitemon Siip Me Ewe Atipeeu Sefo

“Ekkewe chon ekis . . . , ir meinisin mi akkapwonueta ewe allukun sapat pwe resap epiningaua me ir mi kamwochuta won ai atipeeu, upwe pwal emmweniireto ngeni chuuki we mi fel.”​—AISEA 56:6, 7.

1. (a) Me ren kunaen Jon, met a kan pwoppwonuta lupwen a pinepin asapwalin an Jiowa apwung? (b) Menni mwich mi amwarar Jon a kuna?

LON EWE aruuanun langepwi lon ewe puken Pwarata, ewe aposel Jon a kuna pwe a pinepin ekkewe asapwalin kata seni an Jiowa apwung atun an epwe wekes ewe angangen mecheni meinisin chon “ewe Israelin Kot.” Ikkena ir ekkewe repwe akkom le kuna feioch ren Jises, ewe nampa eu kinikin lon mwirimwirin Eperiam. (Kalesia 6:16; Keneses 22:18; Pwarata 7:1-4) Lon chok ena langepwi, Jon a kuna “eu mwich mi lapalap, nge esor emon mi tongeni alleaniir, seni meinisin muu me einang me aramas me fos . . . iwe, ra leuwommong le kota: ‘Ewe angangen amanau a nom ren ach Kot, ewe mi mommot won ewe leenien nemenem, me pwal ren ewe Lam.’” (Pwarata 7:9, 10) Ren ar apasa pwe “Ewe angangen amanau a nom . . . ren ewe Lam,” ewe mwich mi lapalap a pwarata pwe pwal ir ra kuna feioch ren Mwirimwirin Eperiam we.

2. Inet a pwalo ewe mwich mi lapalap, me ifa ussun sipwe esinner?

² Aramas ra sinneni ena mwich mi lapalap lon 1935, iwe ikenai, chochoon a lap seni limu million. Pokiten ir mi esissin ren ar repwe manau atun ewe riaffou mi lapalap, chon ena mwich repwe kaimulo fan iten manau esemuch lupwen Jises epwe aimufeseni “ekkewe siip” seni “ekkewe siike.” Chon Kraist lon ewe mwich mi lapalap ra nom lein “ekkewe pwal fitemon siip” lon an Jises kapas awewe ussun ekkewe kumiin siip. Ra eani ewe apilukulukun ar repwe manau tori feilfeilo chok lon eu paratis won fonufan.​—Mattu 25:31-46; Jon 10:16; Pwarata 21:3, 4.

3. Ren porausen ewe atipeeu sefo, ifa ussun chon Kraist mi kepit ra sokko seni ekkewe pwal fitemon siip?

³ Ren ekkewe 144,000, feiochun ewe atipeeu fan iten Eperiam a kan toto rer ren ewe atipeeu sefo. Pokiten ir chon kapachelong lon ena atipeeu, ra nom “fan chen” me “fan ewe alluk ngeni Kraist.” (Rom 6:15; 1 Korint 9:21) Ina minne, mi fichiiti ekkewe chok 144,000 chon ewe Israelin Kot ar repwe aea ewe pilawa me wain lon ewe Achechchemenien maloon Jises, me Jises a foratiu ngeni ir chok an atipeeu fan iten eu Muu. (Luk 22:19, 20, 29) Chon ewe mwich mi lapalap rese kapachelong lon ewe atipeeu sefo. Iwe nge, ra fiffiti ewe Israelin Kot me ra nonnom rer lon “fonuer.” (Aisea 66:8) Ina popun, a pwung ach apasa pwe pwal ir ra nom fan chenin Jiowa me fan ewe alluk ngeni Kraist. Inaamwo ika rese kapachelong lon ewe atipeeu sefo, nge ir chon kuna feioch seni.

“Chon Ekis” me “ewe Israelin Kot”

4, 5. (a) Me ren Aisea, menni mwich epwe angang ngeni Jiowa?? (b) Ifa ussun Aisea 56:6, 7 a pwonuta ngeni ewe mwich mi lapalap?

⁴ Iei makkeien ewe soufos Aisea: “Ekkewe chon ekis mi fen pacheri Jiowa pwe repwe angang ngeni me acheni iten Jiowa, ren ar repwe wiliiti chon angang ngeni, ir meinisin mi akkapwonueta ewe sapat pwe resap epiningaua me ir mi kamwochuta won ai atipeeu, upwe pwal emmweniireto ngeni chuuki we mi fel me upwe amwaneka ir lon imwei we, imwen iotek. Iwe, upwe etiwa meinisin ar kkewe asor mi kek me met kkewe repwe asoresini won ai roong.” (Aisea 56:6, 7) Lon Israel, a wewe ngeni pwe “chon ekis,” nge esap ir chon Israel, repwe fel ngeni Jiowa ren ar akkacheni itan we, ar akkalleasochisi alon ewe Alluk fan iten eu atipeeu, ar akkapwonueta ewe Sapat, me ar foffori ar asor lon ewe imwen fel, “imwen Kot we imwen iotek.”​—Mattu 21:13.

⁵ Lon ei fansoun, “ekkewe chon ekis mi fen pacheri Jiowa” ra wewe ngeni ewe mwich mi lapalap. Chokkana ra fiffiti ewe Israelin Kot le akkangang ngeni Jiowa. (Sekaraia 8:23) Ekkewe asor ra eani a apwapwai Kot ussun chok ekkewe asorun seni ewe Israelin Kot. (Ipru 13:15, 16) Ra feffel lon an Kot we imwen fel lon pekin ngun, “imwan we imwen iotek.” (Alollo ngeni Pwarata 7:15.) Ra ita apwonueta ewe Sapat iteiten wiik? Ekkewe chon kepit are ekkewe pwal fitemon siip rese nom fan ena sokkun alluk. (Kolose 2:16, 17) Iwe nge, iei alon Paul ngeni chon Ipru mi wiliiti chon Kraist: “Mi chuen wor eu asosoon sapat ren aramasen Kot kkewe. Pun ewe aramas mi fen tolong lon an Kot asoso a fen pwal pwisin asoso seni pwisin an angang, ussun chok an Kot asoso seni pwisin an.” (Ipru 4:9, 10) Ekkena chon Ipru ra tolong lon ena “asosoon sapat” lupwen ra pwisin anomur fan “an Kot pwung” me ra asoso seni ar sotuni le anneta pwisin ar pwung ren fofforun ewe Alluk. (Rom 10:3, 4) Chon Jentail mi wiliiti chon Kraist mi kepit ra pwal tolong lon ena asoso ren ar pwisin anomur fan an Jiowa pwung. Ewe mwich mi lapalap a pwal fitiir lon ena asoso.

6. Ikenai, ifa ussun ekkewe pwal fitemon siip ra kan kamwochuta won ewe atipeeu sefo?

⁶ Pwal och, ekkewe pwal fitemon siip ra kamwochuta won ewe atipeeu sefo ussun chok ekkewe chon ekis lom lom ra kamwochuta won ewe Alluk fan iten eu atipeeu. Ifa ussun? Esap ren ar kapachelong lon, pwe ren ar anomur fan ekkewe alluk mi kapachelong lon me ar kuna feioch seni an kkewe kokkot. (Alollo ngeni Jeremaia 31:33, 34.) An Jiowa alluk a mak ‘lon letipen’ ekkewe pwal fitemon siip, ussun chok chiener kkewe chon kepit. Ra wesewesen tongei me alleasochisi an Jiowa kkewe alluk me emmwen. (Kol Fel 37:31; 119:97) Ra silei Jiowa, ussun chok ekkewe chon Kraist mi kepit. (Jon 17:3) Nge ifa ussun sirkumsais? Ina epwe 1,500 ier mwen forutiuen ewe atipeeu sefo, iei alon Moses ngeni chon Israel: “Ami oupwe sirkumsaisi letipemi.” (Tuteronomi 10:16; Jeremaia 4:4) Inaamwo ika sirkumsaisiin ewe inis a molo fitifengen me ewe Alluk, nge chon kepit me ekkewe pwal fitemon siip repwe “sirkumsaisi” letiper. (Kolose 2:11) Iwe saingoon, Jiowa a kan omusalo tipisin ekkewe pwal fitemon siip fan iten chchaan Jises mi niniilo, “chchaan ewe atipeeu.” (Mattu 26:28; 1 Jon 1:9; 2:2) Kot ese kan mutiir pwe repwe noun lon pekin ngun, nge a ina ussun ekkewe 144,000. Iwe nge, a eita ngeni ekkewe pwal fitemon siip aramas mi pwung, nge a ina ussun an eita ngeni Eperiam aramas mi pwung pokiten i chiechien Kot.​—Mattu 25:46; Rom 4:2, 3; Jemes 2:23.

7. Ikenai, menni apilukuluk a kan suuk ngeni ekkewe pwal fitemon siip, nge ra iteni aramas pwung ussun chok Eperiam?

⁷ Ren ekkewe 144,000, ar iteni aramas mi pwung a suuki ngeniir ewe apilukulukun ar repwe fiti Jises le nemenem lon ewe Muun lang. (Rom 8:16, 17; Kalesia 2:16) Ren ekkewe pwal fitemon siip, ar iteni aramas mi pwung pokiten ir chiechien Kot a suuki ngeniir ewe apilukulukun ar repwe kuna manau esemuch lon paratis won fonufan ren ar kuna manau mwirin Armaketon pokiten ir chon ewe mwich mi lapalap are ren ewe ‘manausefal fan iten aramas mi pwung.’ (Fofor 24:15) A ifa watteen aucheaan ar eani ena apilukuluk me ar wiliiti chiechien ewe Sou Nemenem mi Tekia seni meinisin, me ar wiliiti “wasola lon an tento”! (Kol Fel 15:1, 2) Ewer, chon kepit me ekkewe pwal fitemon siip ra kuna feioch mi amwarar ren Jises, Mwirimwirin Eperiam we.

Eu Ranin Omusomusen Tipis mi Lap seni Lom

8. Fan ewe Alluk, ekkewe asor lon ewe Ranin Omusomusen Tipis ra liosueta met?

⁸ Lupwen Paul a mak ussun ewe atipeeu sefo, a achema ngeni aramas ussun ewe Ranin Omusomusen Tipis mi fis iteiten ir fan ewe Alluk fan iten eu atipeeu. Lon ena ran, a wor ruu sokkun asor, eu fan iten ewe einangen samol fel Lifai, me eu fan iten ekkewe 12 einang, nge esap ir samol fel. Seni lom sia fen awewei pwe ina liosun an Jises asor mi lapalap, iwe, epwe efeiochu ekkewe 144,000 mi apilukuluku ar repwe manau lon lang me ekkewe fite million mi apilukuluku ar repwe manau won fonufan.a Paul a pwarata pwe ren pwonutaan ena ran, ekkewe feioch seni an Jises asor repwe toto ren eu Ranin Omusomusen Tipis mi lapalap fan ewe atipeeu sefo. Pokiten i ewe Samol Fel mi Lapalap fan iten ena ran mi lapalap, Jises a fangolo manauan we mi unusoch pwe epwe eu asor fan iten omusomusen tipis ren an epwe atoto eu “minen ngaselo mi nomofoch” fan iten aramas.​—Ipru 9:11-24.

9. Pokiten ar kapachelong lon ewe atipeeu sefo, chon Ipru mi wiliiti chon Kraist mi kepit ra tufichin angei met?

⁹ Chommong chon Ipru mi wiliiti chon Kraist lon ewe aewin senturi ra chuen “tinikken fan iten ewe Alluk [an Moses].” (Fofor 21:20) Iwe, mi fichiitiir an Paul achema ngeniir pwe “[Jises] ewe chon affor lon eu atipeeu sefo, pwe, pokiten maloon emon a fen fis fan iten ar repwe ngaselo seni ekkewe tipis fan ewe atipeeu lom ren eu moon kepich, iwe, ir mi kokko repwe tongeni angei pwonen ewe alemwir esemuch.” (Ipru 9:15) Ewe atipeeu sefo a angasalo ekkewe chon Ipru mi wiliiti chon Kraist seni ewe atipeeu lom, nge ena atipeeu a pwarata pwe ir chon tipis. Pokiten ewe atipeeu sefo, repwe tongeni eani “pwonen ewe alemwir esemuch.”

10. Chon kepit me ekkewe pwal fitemon siip ra kilisou ngeni Kot ren met?

¹⁰ “Meinisin” mi “pwarata ar luku ewe Nau” repwe kuna feioch seni ewe asor fan iten ewe moon kepich. (Jon 3:16, 36) Iei alon Paul: “Ewe Kraist a asor fan eu tori feilfeilo chok pwe epwe uwei tipisin chommong; me ewe oruuen fansoun an epwe pwalo, epwe imulo seni tipis me epwe pwalo ngeni ir mi achocho le kutta i fan iten an epwe amanauer.” (Ipru 9:28) Ikenai, chokkewe mi achocho le kukkutta Jises a wewe ngeni ekkewe chon Kraist mi kepit lon ewe Israelin Kot, nge ir mi chuen manau won fonufan, me ekkewe fite million chon ewe mwich mi lapalap, nge pwal ir ra eani eu alemwir esemuch. Ir me ruu ekkena kumi ra kilisou ngeni Kot ren ewe atipeeu sefo me ekkewe feioch mi atoto manau mi popu seni ena atipeeu, iwe, a kapachelong ewe Ranin Omusomusen Tipis mi Lapalap me angangen ewe Samol Fel mi Lapalap, Jises, lon ewe Leeni mi Unusen Pin lon lang.

Achocho lon ewe Angang mi Fel

11. Fan mwelien letiper mi limochulo ren an Jises asor, chon kepit me ekkewe pwal fitemon siip ra pwapwa le foffori met?

¹¹ Lon noun we taropwe ngeni ekkewe chon Ipru, Paul a menlapei pwe a watte aucheaan an Jises asor lon ewe atipeeu sefo mwen ekkewe asor fan iten tipis fan ewe atipeeu lom. (Ipru 9:13-15) An Jises asor mi watte aucheaan a tufichin “alimochu mwelien letipach seni foffor mi lamot mwaal pwe sipwe tongeni apwonueta angang mi fel fan iten ewe Kot mi manau.” Ren ekkewe chon Ipru mi wiliiti chon Kraist, “foffor mi lamot mwaal” a pwal wewe ngeni “ekkewe tipis fan ewe atipeeu lom.” Ren chon Kraist ikenai, a kapachelong ekkewe tipis ra fori me lom, nge ir mi enletin aier senir me Kot a fen omuserelo. (1 Korint 6:9-11) Fan mwelien letiper mi fen limochulo, chon Kraist mi kepit ra kan apwonueta “angang mi fel fan iten ewe Kot mi manau.” A pwal ina ussun chon ewe mwich mi lapalap. Pokiten a fen limochulo mwelien letiper ren “chchaan ewe Lam,” ra nonnom lon an Kot imwen fel mi lapalap lon pekin ngun, me ra “apwonueta angang mi fel fan itan le ran me le pwin.”​—Pwarata 7:14, 15.

12. Ifa ussun sia kan pwarata pwe sia eani “luku mi unusoch”?

¹² Pwal iei alon Paul: “Sipwe arap ngeni ren letip mi wenechar fan luku mi unusoch, pokiten letipach a fen limochulo seni mwelien letip mi ngau me inisich a fen tottol ren konik mi limoch.” (Ipru 10:22) Ifa ussun sipwe tongeni pwarata pwe a nom rech “luku mi unusoch”? Iei an Paul pesepes ngeni chon Ipru mi wiliiti chon Kraist: “Sipwe amwochunnuku ewe kapasen esilesil ussun ach apilukuluk [lon lang] fan uppos, pun a tuppwol emonnewe mi pwonei. Iwe, sipwe ekieki emon me emon leich ren ach sipwe alapalo tong me foffor murinno, nge sisap tunalo ach mwichfengen, pwe a ina ussun eorenien ekkoch, nge sipwe apochokkula emon me emon leich, me epwe lapalo ami foffori ena, lupwen oupwe kuna pwe ewe ran a arapoto.” (Ipru 10:23-25) Ika ach luku a manau, sisap pwal ‘tunalo ach mwichfengen.’ Sipwe pwapwa le apochokkula pwiich kkewe me sipwe pochokkuleta rer fan iten tong me foffor murinno. Sipwe pwal pochokkuleta ren ewe angang mi fokkun lamot, ewe angangen esilefeili ewe apilukuluk sia eani, ese lifilifil ika a weneiti fonufan are lang.​—Jon 13:35.

Ewe “Atipeeu Esemuch”

13, 14. Ifa ussun ewe atipeeu sefo eu atipeeu esemuch?

¹³ Met epwe fis lupwen ewe mi mwirifochofoch lein ekkewe 144,000 epwe feita lang? Epwe ita ukutiu angangen ewe atipeeu sefo? Lon ena fansoun, esap chuen nom won fonufan chon ewe Israelin Kot. Meinisin chon kapachelong lon ena atipeeu repwe nom ren Jises “lon muun Seman.” (Mattu 26:29) Nge sia chechchemeni alon Paul ei lon noun we taropwe ngeni ekkewe chon Ipru: “Ewe Koten kinamwe . . . a autaai seni malo ewe chon masen siip mi lapalap ren chchaan eu atipeeu esemuch.” (Ipru 13:20; Aisea 55:3) Ifa ussun ena atipeeu sefo eu atipeeu esemuch?

¹⁴ Aewin, ese ussun ewe Alluk fan iten eu atipeeu, pwe esap wor siwilin. Oruuan, minne a pwonuta ren epwe nomofoch, nge a ina ussun an Jises nemenemen king. (Alollofengenni Luk 1:33 me 1 Korint 15:27, 28.) Ewe Muun lang epwe kapachelong lon an Jiowa kkewe kokkot tori feilfeilo chok. (Pwarata 22:5) Iwe, aulungatin, ekkewe pwal fitemon siip repwe chuen kukkuna feioch seni ewe kokkot fan iten ewe atipeeu sefo. Atun an Kraist Engerou Ierin Nemenem, aramas mi tuppwol repwe “akkapwonueta angang mi fel [fan iten Jiowa] le ran me le pwin lon an we imwen fel” ussun chok ar foffori iei. Jiowa esap achemasefallieto ar kkewe tipis lom mi fen musulo fan iten chchaan Jises we, “chchaan ewe atipeeu.” Repwe chuen pwapwaesini ar iteni aramas mi pwung pokiten ar wiliiti chiechien Jiowa, me an alluk epwe chuen mak lon letiper.

15. Awewei mwo ewe riri lefilen Jiowa me chon fonufan mi fel ngeni i lon ewe fonufan sefo.

¹⁵ Jiowa epwe ita tufichin apasa ei mettoch ussun ekkena aramas mi angang fan itan: ‘Ngang ar Kot, me ir nei aramas’? Ewer. “I epwe nonnom rer, me repwe wiliiti noun aramas. Iwe, Kot epwe pwisin nonnom rer.” (Pwarata 21:3) Repwe wiliiti “ewe iolap fan iten ekkewe mi fel,” weween, repwe wisen tupuni won fonufan “ewe telinimw mi achengicheng,” nge iei puluwen Jises Kraist we lon lang. (Pwarata 14:1; 20:9; 21:2) Ekkena mettoch meinisin repwe tufichin pwonuta pokiten ar luku chchaan Jises mi niniilo, “chchaan ewe atipeeu,” me ar alleasochis ngeni ekkewe king me samol fel lon lang, nge ikkena ir chon ewe Israelin Kot lupwen ra fen piin nom won fonufan.​—Pwarata 5:10.

16. (a) Met sokkun apilukuluk epwe suuk ngeni ir mi manausefal won fonufan? (b) Met sokkun feioch epwe toto le sopwoloon ekkewe engerou ier?

¹⁶ Nge ifa ussun ekkewe chon malo mi manausefal won fonufan? (Jon 5:28, 29) Pwal ir repwe kokko fan iten ar repwe “pwisin efeiochur” ren Jises, Mwirimwirin Eperiam we. (Keneses 22:18) Wiser ar repwe pwal tongei iten Jiowa, afalafal ussun i, awora asor mi pwung, me eani angang mi fel lon imwan we, imwen iotek. Ir mi ikkina ussun repwe tolong lon an Kot asoso. (Aisea 56:6, 7) Le sopwoloon ekkewe engerou ier, meinisin chon tuppwol repwe fen unusochulo ren alillisin Jises Kraist me chienan kkewe 144,000 samol fel. Manauer epwe unusen pwung, nge sap minne repwe chok iteni aramas pwung pokiten ir chiechien Kot. Repwe ussun ita “manaueta,” pun repwe unusen ngaselo seni ewe tipis me malo mi tokiir seni Atam. (Pwarata 20:5; 22:2) Epwe ifa watteen ena feioch! Me ren kunaach ikenai, a ussun ita nge ewe angangen samol fel ren Jises me ekkewe 144,000 epwe fen wes lon ena atun. Ekkewe feioch seni ewe Ranin Omusomusen Tipis mi lapalap epwe fen unusen pwonuta. Pwal och, Jises epwe ‘enniwili ngeni an Kot me Seman we ewe muu.’ (1 Korint 15:24) Epwe wor eu saingoon sossot ngeni chon fonufan, iwe mwirin, Setan me noun kkewe timon repwe kuna nninniilo esemuch.​—Pwarata 20:7, 10.

17. Pokiten ewe chengel epwe sounikich, oukich meinisin sipwe ita apposa letipach pwe sipwe fet?

¹⁷ Iwe, epwe ita wor wisen ewe “atipeeu esemuch” lon ewe fansoun mi ammeseik epwe poputa mwirin? Sise silei mwo iei. A nafoch minne Jiowa a fen pwaralo tori iei. Sia fen mairu ren. Ekieki mwo amwararen manau esemuch fan kokkotun ewe “lang sefo me eu fonufan sefo”! (2 Piter 3:13) Amwo esap wor och mettoch epwe akukkunalo ach mochen alemwiri ena pwon. Eli esap mecheres ach sipwe uppos. Iei alon Paul: “A lamot ngenikemi likiitu, pwe mwirin ami foffori letipen Kot, oupwe tufichin kuna pwonutaan ewe pwon.” (Ipru 10:36) Iwe nge, chechchemeni mwo pwe ese lifilifil met sokkun osukosuk are minen eppet sipwe pworaiti, nge ir meinisin ra ussun en otuot lupwen sia ekieki ewe chengel epwe sounikich. (2 Korint 4:17) Ina minne, amwo esap wor emon leich epwe wiliiti “ewe sokkun aramas mi nimeremersefal ngeni kiteter.” Nge, amwo sipwe anneta pwe kich “ewe sokkun aramas mi eani ewe luku mi tufichin selani manauach.” (Ipru 10:39) Amwo oukich meinisin sipwe luku Jiowa ren unusen letipach, nge i Koten ekkewe atipeeu, fan iten ach sipwe kuna feioch esemuch.

[Footnote]

En mi Weweiti?

◻ Lukun chon Kraist mi kepit, pwal io ra kukkuna feioch ren Mwirimwirin Eperiam?

◻ Pokiten ar kuna feioch ren ewe atipeeu sefo, ifa ussun ekkewe pwal fitemon siip ra ussun ekkewe chon wiliilo fan ewe atipeeu lom?

◻ Ifa ussun ekkewe pwal fitemon siip ra feioch ren ewe kokkot fan iten ewe Ranin Omusomusen Tipis mi lapalap?

◻ Pwata Paul a eita ngeni ewe atipeeu sefo eu “atipeeu esemuch”?

[Sasing lón pekin taropwe 31]

Pokiten ewe chengel epwe sounikich, sipwe “eani ewe luku mi tufichin selani manauach”