Fansoun Ngaselo Mi Lingemwarar Ekiselo Chok Ren Noun Kot Kewe

“Pun a likitalo masouen lang me fonufan meinisin pwe repwe lamotongauolo . . . lon apilukuluk allim. Pun masouen lang me fonufan repwe fokkun ngaseseni fan nemenien limengau, o repwe eti noun Kot kewe lon ewe ngas mi ling.”—ROM 8:20, 21.

1. Ifa ussun an Jises asor a liosutiu lon ewe Ranin Omusomusen Tipis?

JIOWA a fangolo Noun we alaemon pwe epwe eu moon kepich mi suuki ewe al ngeni manau lon lang ren 144,000 me apilukuluk allim esemuch ren lusun chon fonufan. (1 Jon 2:1, 2) Ussun sia fen kuna lon ewe lesen mi akkom mwen ei, an Jises asor fan iten chon Kraist mi upsefal ren ewe ngun a liosutiu lupwen ewe samol fel mi lapalap lon Israel a asoresini emon atemwanin kowu fan iten pwisin i, chon le imwan, me ewe einangen Lifai lon ewe Ranin Omusomusen Tipis mi fis fan eu iteiten ier. Lon chok ena ran, a asoresini emon kuuch fan iten tipisin meinisin lusun chon Israel, iwe, a ina ussun an Kraist asor epwe efeiochu chon fonufan meinisin. Lon eu poraus awewe, emon kuuch a uweialo tipis meinisin aramas ra fori lon ewe ier a lo, iwe, a lofocholo lon ewe fonu poon.a​—Lifitikos 16:7-15, 20-22, 26.

2, 3. Ifa weween alon Paul lon Rom 8:20, 21?

² Mwirin an awewei apilukulukun chokewe repwe wiliiti “noun Kot” lon lang, ewe aposel Paul a apasa: “Pun masouen lang me fonufan ra chok witiwiti pwapwaloon noun Kot kewe, pun ra fokkun mochen kuner. Pun a likitalo masouen lang me fonufan meinisin pwe repwe lamotongauolo; sap ren pwisin letiper, nge ren letipen ewe emon a likitalo ir iei ussun lon apilukuluk allim. Pun masouen lang me fonufan repwe fokkun ngaseseni fan nemenien limengau, o repwe eti noun Kot kewe lon ewe ngas mi ling.” (Rom 8:14, 17, 19-21) Ifa weween alon na?

³ Lupwen semelapach we Atam a forutiu emon aramas mi unusoch, i emon “noun Kot.” (Luk 3:38) Pokiten an tipis, a “fotek ngeni mettoch mi ngau” me a emwirimwir ngeni aramas meinisin ena mettoch. (Rom 5:12) Kot a mut ngeni aramas ar repwe uputiu fan “lamotongau” pokiten ar uputiu lon tipis, nge a awora apilukuluk allim ren ewe “mwirimwir,” Jises Kraist. (Keneses 3:15; 22:18; Kalesia 3:16) Pwarata 21:1-4 a kapas ussun ewe fansoun lupwen ‘malo, letipechou, puchor, me metek esap chuen nom.’ Pokiten ina eu pwon ngeni “aramas,” a alukuchara pwe eu minefon mwicheichen aramas mi nom fan nemenien ewe Muu epwe kuna sefosefallin ekiekir me inisir pwe repwe unusen pochokkuleta, iwe, pwal manau esemuch pokiten ir “noun Kot kewe” won fonufan. Atun an Kraist Engerou Ierin Nemenem, aramas mi alleasochis “repwe ngas seni fotekin mettoch mi ngau.” Mwirin ar pwarata pwe ir mi tuppwol ngeni Jehovah lon eu saingoon sossot, repwe ngaselo seni tipis me malo tori feilfeilo chok. (Pwarata 20:7-10) Iwe, ir mi nonnom won fonufan “repwe eti noun Kot kewe lon ewe ngas mi ling.”

Ir ra Akapasa “Feito!”

4. Met weween “angefatei konikin manau”?

⁴ Ifa amwararen ewe apilukuluk mi nom ren aramas! A ffat ewe popun chon Kraist mi upsefal ren ewe ngun, nge ir mi chuen nom won fonufan, ra tiniken le emmweni ewe angangen esilei ngeni aramas ussun! Pokiten repwe kapachelong lein ir mi wiliiti “puluwen” ewe Lam mi lingelo, Jises Kraist, ekkena lusun chon kepit ra kapachelong lon pwonutaan ei oesini: “Ewe ngun o ewe fin apupulu sefo ra apasa, ‘Feito.’ Eka e rong epwe apasa, ‘Feito.’ O eka e kaka epwe feito, pwal eka e mochen, epwe angefatei chok ewe konikin manau.” (Pwarata 21:2, 9; 22:1, 2, 17) Feiochun an Jises asorun penmanau esap fan iten chok ekkewe 144,000 chon kepit. An Kot ngun a angangolo won lusun ir mi kapachelong lon ewe mwich mi wewe ngeni ewe fin apupulu pwe repwe apasa “Feito.” Eka e rong, nge a kaka ren minne mi pwung, a kokko pwe epwe apasa “Feito,” iwe, a ina ussun an angei minne Jiowa a awora fan iten ewe angangen amanaua aramas.

5. Chon Pwarata Jiowa ra pwapwa pokiten io ekkan mi nonnom leir?

⁵ Chon Pwarata Jiowa ra luku met Kot a awora fan iten manau ren an nounou Jises Kraist. (Fofor 4:12) Ra pwapwa pwe a nonnom leir aramas mi tipewen, nge ra mochen kaeo ussun an Kot kewe kokkot me ra mochen fori letipan. Ar kewe Kingdom Hall ra suuk ngeni meinisin mi mochen ‘feito me angefatei konikin manau’ lon ei “fansoun sopwolon.”​—Taniel 12:4.

Mettoch mi Siwil Lupwen a Lullulo Fansoun

6. Ifa ussun ngunun Kot a amanamana noun Jiowa kewe chon angang lon fansoun mi sokkopat?

⁶ Kot a kan atetteli an fansoun fan iten an kewe kokkot, me ena mettoch a kku an kewe foffor ngeni aramas. (Eklesiastis 3:1; Fofor 1:7) Ikaamwo ngunun Kot a feitiu won noun kewe chon angang mwen an Kraist feitiu fonufan, nge rese upsefal pwe repwe wiliiti noun lon pekin ngun. Iwe nge, poputa ren Jises, a war an Jiowa fansoun pwe epwe aea ewe ngun mi fel le aupusefalli mwan me fefin mi fen fangolo manauer ngeni pwe repwe alemwiri manau lon lang. Nge ifa ussun ach ei fansoun? Ewe chok ngun a akangang won noun Jises kewe “pwal ekkoch siip,” nge ese ffotukalong lon ir ewe sokkun apilukuluk me mochen ren manau lon lang. (Jon 10:16) Pokiten ar angei seni Kot ewe apilukulukun ar repwe kuna manau esemuch lon paratis won fonufan, ra pwapwa le peni ekkewe lusun chon kepit lon ewe angangen afalafal lon ei atun an epwe siwil ei fonufanen lom ngeni an Kot fonufan sefo mi pwung.​—2 Piter 3:5-13.

7. Met sokkun angangen ras ekkewe Chon Kaeo Paipel ra ekilapei, nge met sileier ussun paratis?

⁷ Kot a poputa le ‘emmwen ngeni ling chommong noun’ lupwen a niniitiu ngun mi fel lon Pentecos 33 C.E., me neman a filata eu fansoun lupwen epwe unuselo ewe “Israelin Kot” lon pekin ngun, nge ukukur, 144,000. (Ipru 2:10; Kalesia 6:16; Pwarata 7:1-8) Poputa lon 1879, fan chommong ei chassi a kapas ussun eu fansoun ras mi weneiti chon Kraist mi kepit. Nge ekkewe Chon Kaeo Paipel (iei ra iteni Chon Pwarata Jiowa) ra pwal silei pwe Paipel a kapas ussun ewe apilukulukun manau esemuch lon eu paratis won fonufan. Awewe chok, ewe Leenien Mas, minen July 1883 a apasa: “Lupwen Jises epwe poputani muun, amoielo fofforingau, me met kewe, iwe, ei fonufan epwe wiliiti eu paratis . . . me meinisin mi nom lon peias repwe tolong lon. Iwe, ren ar alleasochisi an kewe alluk, repwe tongeni manau tori feilfeilo chok lon.” Lupwen a lulo fansoun, rasen chon kepit a kisilo, me ekis me ekis, ir kewe rese eani ewe apilukulukun manau lon lang ra ionfengen lon an Jiowa mwicheich. Iwe, lon ena atun, Kot a ngeni noun kewe chon angang mi kepit, nge ir chon Kraist mi upsefal ren ewe ngun, weweoch mi fokkun auchea.​—Taniel 12:3; Filipai 2:15; Pwarata 14:15, 16.

8. Mwirin 1930, ifa ussun a lapalo an aramas weweiti porausen ewe apilukulukun manau won fonufan?

⁸ Akkaewin seni 1931, ir mi eani ewe apilukulukun manau won fonufan ra poputa le fiffiti ewe mwichefelin Kraist. Lon ena ier, Jiowa a asarama ekiekin ekkewe lusun chon Kraist mi upsefal ren ewe ngun pwe repwe weweiti nge Isikiel sopwun 9 a kapas ussun ena mwich epwe nonnom won fonufan, nge ra esissin fan iten ar repwe kuna manau lon an Kot fonufan sefo. Lon 1932 a kapwungulo pwe chienen Jehu itan Jehonatap a liosueta chokewe mi ussun siip lon ei atun. (2 King 10:15-17) Lon 1934 a ffatolo pwe ir mi iteni “Jonatap” repwe “epini,” are fangolo manauer ngeni God. Lon 1935, a ffatolo pwe ewe “pwin aramas mi chocho,” are “mwich mi lapalap,” ra wewe ngeni ekkewe ekkoch siip mi eani ewe apilukulukun manau won fonufan, nge me lom ra ekieki nge ina eu oruuen mwich lon pekin ngun epwe “chieneni” ir mi wewe ngeni puluwen Kraist lon lang. (Pwarata 7:4-15; 21:2, 9; Kol Fel 45:14, 15) Iwe, akkaewin seni 1935, chokewe mi kepit ra fen emmweni ewe angangen kutta aramas mi wenechar, nge ir mi tipeni ar repwe manau tori feilfeilo chok lon paratis won fonufan.

9. Mwirin 1935, Pwata ekkoch chon Kraist rese chuen angeilo ewe pilaua me wain lon ewe Faafen Ach Samol?

⁹ Mwirin 1935, ekkoch chon Kraist mi fen akangei ewe pilaua me wain lon ewe Faafen Ach Samol rese chuen angeilo. Pwata? Pun ra mirititi pwe rese eani ewe apilukulukun manau lon lang, nge won fonufan. Iei alon emon fefin mi papatais lon 1930: “Ikaamwo am aua meefi pwe mi fichitikem aupwe angei ewe pilaua me wain, akkaewin, fan iten ir mi tiniken lon ewe angangen afalafal full-time, nge use wesewesen achifoua pwe ua filita fan iten manau lon lang. Iwe, lon 1935, a ffatolo pwe a ikionfengen eu mwich mi chocho fan iten ewe apilukulukun manau esemuch won fonufan. Chommong leim ra pwapwa ren am weweiti pwe am chon ena mwich mi chocho, iwe, am aua ukutiu seni am angei ewe pilaua me wain.” A pwal siwil masouen ekkewe puk fan iten chon Kraist. Mesemwan, ekkena puk ra akkaewin mak fan iten chon appiru Jises mi upsefal ren ewe ngun, nge seni 1935 feffeilo, Ewe Leenien Mas me ekkewe fitu puk, forien ewe ‘chon angang mi tuppwol,” ra awora mongoon ngun mi fichiti ir mi kepit me chiener kewe mi eani ewe apilukulukun manau won fonufan.​—Matthew 24:45-47.

10. Ifa ussun epwe tongeni wor siwilin emon chon kepit ika esap tuppwol?

¹⁰ Epwe ifa ussun ika emon mi kepit esap tuppwol? Epwe wor siwilin? Paul a makkei pwe epwe ina ussun lupwen a makkei ewe kapas awewe ussun ewe iraan olif. (Rom 11:11-32) Ika a lamot epwe wor siwilin emon mi upsefal ren ewe ngun, neman Kot epwe filata fan iten ewe kokkoon lang emon mi wesewesen tuppwol le angang ngeni i fite, fite ier.​—Alollo ngeni Luk 22:28, 29; 1 Peter 1:6, 7.

Chommong Popun Sipwe Meefi Kilisou

11. Ese lifilifil menni apilukuluk sia eani, nge met Jemes 1:17 a alukulukatiu ngenikich?

¹¹ Lon leeni meinisin sipwe angang ngeni Jiowa fan tuppwol, epwe awora met a lamot ngenikich me apwonueta mochenich kewe mi pwung. (Kol Fel 145:16; Luk 1:67-74) Ese lifilifil ika sia enletin eani ewe apilukulukun manau lon lang are ewe mi weneiti fonufan, nge a wor chommong popun sipwe meefi kilisou ngeni Kot. Fansoun meinisin a foffori met epwe ochiti ir mi tongei i. Ewe chon kaeo Jemes a apasa pwe “meinisin sokkun liffang mi murinno, o meinisin sokkun minen liffang mi unusoch, ra chok seni won; ra feffeitiu me ren Semen ekkewe saram,” Jiowa Kot. (Jemes 1:17) Sipwe nengeni ekkoch ekkena liffang me feioch.

12. Pwata sia tongeni apasa pwe Jiowa a fen ngeni emon me emon noun kewe chon angang mi tuppwol eu apilukuluk mi amwarar?

¹² Jiowa a fen ngeni emon me emon noun chon angang eu apilukuluk mi ammeseik. A kori ekkoch ngeni manau lon lang. Ren noun kewe chon pwarata mi manau mwen waren Kraist, Jiowa a ngenir ewe apilukuluk allimen ar repwe manausefal ngeni manau esemuch won fonufan. Awewe chok, Eperiam a luku ewe manausefal me a witi “ewe telinimw mi enlet longolongun”, weween, ewe Muun lang mi epwe amanauata i ngeni manau won fonufan. (Ipru 11:10, 17-19) Pwal eu, lon ei fansoun sopwolon, Kot a mut ngeni fite million ar repwe eani ewe apilukulukun manau esemuch lon paratis won fonufan. (Luke 23:43; John 17:3) Pwungun pwe ir mi angei seni Jiowa ena apilukuluk mi amwarar repwe meefi kilisou wachemuk ren.

13. Ifa ussun an Kot ngun mi fel a fen amanamana noun kewe aramas?

¹³ Jiowa a ngeni noun kewe aramas liffangen ewe ngun mi fel. Chon Kraist mi kokko fan iten manau lon lang ra kepit ren ngun mi fel. (1 John 2:20; 5:1-4, 18) Iwe nge, ewe alillis me emmwen seni ewe ngun a nom ren ir mi apilukuluk ngeni manau won fonufan. Moses emon leir, ewe mi eani ngunun Jiowa, ussun chok ekkewe 70 mwan mi seikita chon alillis ngeni. (Numperis 11:24, 25) Fan emmwenien ngun mi fel, Pisalel a mmen silelap lupwen a wisen angang won an Israel imwen fel mangaku. (Ekistos 31:1-11) Ngunun Kot a feitiu won Kition, Septa, Samson, Tafit, Elias, Elisa, me pwal fitemon. Ikaamwo ekkena chon lom resap lingelo lon lang, nge ngun mi fel a emmwenir me alisir, ussun chok noun Jises kewe pwal ekkoch siip ikenai. Iwe, sap minne sia eani ewe kokkoon lang pokiten chok an a nom rech ngunun Kot. Iwe nge, ngunun Jiowa a akawora emmwen, a alisikich pwe sipwe afalafal me apwonueta pwal ekkoch angang Kot a awisa ngenikich, a ngenikich manaman mi somolo, me a amaarata loch uwaan kewe, weween, tong, pwapwa, kinamwe, mosonottam, kirokiroch, fofforoch, luku, mosonoson, me nemenem won memmeef. (Jon 16:13; Fofor 1:8; 2 Korint 4:7-10; Kalesia 5:22, 23) Sisap ita meefi kilisou ren ena liffang mi echipwor seni Kot?

14. Ifa ussun sia kan feioch seni an Kot liffangen silelap me mirit?

¹⁴ Silelap me mirit, ir liffang seni Kot, iwe, sipwe kilisou rer, ese lifilifil ika sia apilukuluk ngeni manau lon lang are won fonufan. Sile mi enlet ussun Jiowa a alisikich le “alukuchara ekkewe mettoch mi kon lamot” me “manaueni ewe sokkun manau mi fich ngeni Jiowa, ewe sokkun manau i epwe unusen pwapwa ren.” (Filipai 1:9-11; Kolose 1:9, 10) Mirit seni Kot eu minen tumun me emmwen lon manauach. (Proferpis 4:5-7; Eklesiastis 7:12) Sile me mirit mi enlet ra longuni ewe Kapasen Kot, me letipen ekkewe lusun chon kepit a akkaewin chung ren met a apasa ussun ar apilukuluk fan iten manau lon lang. Iwe nge, ach tongei ewe Kapasen Kot me ach wewefichiti, esap ina ussun an Kot pwarata pwe sia kokko ngeni manau lon lang. Ekkoch aramas, awewe chok ren Moses me Taniel, ra wisen makkei masouen Paipel, nge repwe manausefal ngeni manau won fonufan. Ese lifilifil ika ach apilukuluk a weneiti lang are fonufan, nge kich meinisin sia akangei mongoon ngun seni ewe “chon angang mi tuppwol me tipatchem” Jiowa a nounou. (Mattu 24:45-47) A ifa watten ach kilisou ren ewe silelap sia kan angei!

15. Ifa eu lein an Kot kewe liffang mi kon lapalap, me met meefiom ussun?

¹⁵ Eu lein an Kot kewe liffang mi lapalap, iei an awora fan tong an Jises asor fan iten ewe moon kepich, iwe, a efeiochukich, ese lifilifil ika sia apilukuluk ngeni manau lon lang are won fonufan. A mmen watte an Kot tongei fonufan “pwe a fangolo Noun we alaemon pwe iteiten aramas mi luku i esap poutmwaallilo, nge epwe kuna manau esemuch.” (Jon 3:16) Me an Jises tong a amokutu i “pwe epwe fangolo manauan pwe epwe penmanauen aramas mi chommong.” (Mattu 20:28) Ussun ewe aposel Jon a awewei, Jises Kraist “ewe minen omusomus ren ach tipis [ir mi kepit], nge sap ach chok, pwe pwal tipisin fonufan meinisin.” (1 Jon 2:1, 2) Ina minne, kich meinisin sipwe ita meefi kilisou wachemuk ren ena mettoch mi kawor fan tong ren ewe angangen amanau fan iten manau esemuch.b

Kopwe Fiti ewe Mwich?

16. Menni mwich mi auchea epwe fis mwirin tuputiuen ewe akkar lon April 11, 1998, me io ekkewe repwe ita fiti?

¹⁶ Ach kilisou ren ewe moon kepich Kot a awora ren an tinatiu Noun epwe ita amokutukich pwe sipwe nom lon ekkewe Kingdom Hall are pwal fitu leeni Chon Pwarata Jiowa repwe mwichfengen lon mwirin tuputiuen ewe akkar lon April 11, 1998, ren ar repwe fori achechemenien maloon Kraist. Lupwen a poputani ena achechem atun an nom ren noun kewe aposel mi tuppwol lon ewe saingoon pwinin manauan won fonufan, Jises a apasa: “Oupwe fori iei ussun pwe minen achechemeniei. (Luk 22:19, 20; Mattu 26:26-30) Ekkewe ekkoch lusun chon kepit repwe aea ewe pilaua ese lefen mi liosueta inisin Jises esor tipis me un ewe wain mi par, nge a liosueta chchaan we. Ekkewe chok chon Kraist mi upsefal ren ewe ngun repwe mongo me un pun ir chok ra kapachelong lon ewe pwon sefo me ewe pwon fan iten ewe Muu, me a nom rer pisekin annet mi lukuchar seni an Kot ngun mi fel pwe ra eani ewe apilukulukun manau lon lang. Pwal fite million repwe fitir pwe repwe chon katol mi kilisou ren ewe tong Kot me Kraist ra pwarata fan iten an Jises asor, ewe mi atufichi manau esemuch.​—Rom 6:23.

17. Met sipwe ita chechemeni ussun an aramas kepit ren ewe ngun?

¹⁷ Eli met ra luku lon ekkewe lamalam ra fiti me lom, ar kewe memmeef mi pochokkul pokiten maloon emon attonger, ekkewe fansoun weires ra kuna lon pwisin manauer, are ar meefi pwe mi torir och feioch mi sokkolo aucheaan seni Jiowa epwe tongeni ameef ngeni ekkoch pwe ra eani ewe kokkoon lang. Nge sipwe chechemeni pwe Paipel ese alluku ngenikich pwe sipwe angei ewe pilaua me wain ren ach sipwe pwarata kilisou ren an Kraist asor fan iten ewe moon kepich. Pwal och, an aramas kepit ren ewe ngun “a longolong, esap won ewe emon mi aneanei, are won ewe emon mi sassa, nge won Kot,” ewe mi aupusefalli Jises pwe epwe emon Noun lon pekin ngun me epwe emmwen ngeni ling pwal 144,000 chok noun.​—Rom 9:16; Aisea 64:8.

18. A lap me lein ir mi angang ngeni Jiowa ikenai repwe kuna met sokkun feioch lon mwach kkan?

¹⁸ Lon ekkeei ranin sopwolon, a lap me lein ir mi angang ngeni Jiowa ra angei seni Kot ewe apilukulukun manau esemuch won fonufan. (2 Timoti 3:1-5) Ekiselo chok, repwe pwapwaesini ena paratis mi amwarar. Iwe, ekkewe Samol repwe akkota mettochun fonufan fan nemenien lang. (Kol Fel 45:16) Kinamwe epwe choufetal lupwen chon fonufan repwe tipeeu ngeni allukun Kot me alapalo sileier ussun Jiowa. (Aisea 9:6, 7; Pwarata 20:12) Epwe wor chommong angang fan iten kau imw me an aramas nemenalo fonufan. (Aisea 65:17-25) Iwe, ekieki mwo pwapwaan an ekkewe famili chufengensefal lupwen chon malo repwe manausefal! (Jon 5:28, 29) Mwirin eu saingoon sossot, meinisin mettoch mi ngau repwe morolo. (Pwarata 20:7-10) Iwe mwirin, tori feilfeilo chok, fonufan epwe masou ren aramas mi unusoch, nge repwe ‘ngaseseni fan nemenien limengau, o repwe eti noun Kot kewe lon ewe ngas mi ling.’

[Footnote]

Ifa Ussun Kopwe Polueni?

◻ Met weween an aramas “angefatei konikin manau”?

◻ Ikkefa ekkewe popun sipwe meefi kilisou ngeni Kot, ese lifilifil ika ach apilukuluk a weneiti lang are fonufan?

◻ Menni minen achechem mi fis iteiten ier oukich meinisin sipwe ita fiti?

◻ A lap me lein noun Jiowa kewe aramas repwe kuna met lon mwach kkan?

[Sasing lón pekin taropwe 26]

Fite million ra akangefatei konikin manau. En emon leir?