Apwung A Fis Lon Ewe Masiesin Apwung
“Ekkewe muu . . . repwe kito ren ewe masiesin Jehosafat; pun upwe mot ikewe ie ren ai upwe apwungu ekkewe muu meinisin.”—SOWEL 3:12.
1. Pwata Sowel a kuna chommong aramas mi mumufengen lon “ewe masiesin apwung”?
“CHOMMONG, chommong aramas ra chufengen lon masiesin ewe apwung”! Sia alleani ekkena kapas lon Sowel 3:14. Pwata ekkena aramas chommong ra chufengen? Sowel a apasa pwe “Ranin Jiowa a arapoto.” Ina ewe ran mi lapalap epwe aitochu Jiowa, iwe, ina ewe ranin apwung won ekkewe chommong mi fen u ngeni an Kot we Muu fan nemenien Kraist Jises. Ina ewe fansoun ekkewe “fomon chonlang” lon Pwarata sopwun 7 repwe epichalo “ekkewe ruanu asapwalin fonufan,” iwe, ina poputaan ewe “riaffou mi lapalap esaamwo fis fan eu seni poputaan fonufan tori iei, nge esap pwal fissefal mwirin.”—Pwarata 7:1; Mattu 24:21.
2. (a) Pwata mi fichiiti ewe leeni Jiowa epwe apwonueta an apwung ie an epwe iteni “ewe masiesin Jehosafat”? (b) Met sokkun ffoffor mi pwung Jehosafat a eani lupwen a poputa maun?
2 Lon Sowel 3:12, leenien pwonutaan ena apwung a iteni “ewe masiesin Jehosafat.” A fich ena, pun atun eu fansoun fitikoko lon uruwoon Juta, Jiowa a eani eu apwung ikewe ie fan iten King Jehosafat, emon king mi murinno, nge itan a wewe ngeni “Jiowa mi Sou Kapwung.” Ach kaeo minne a fis lon ena fansoun epwe alisikich le weweiti met epwele fis lon ach ei fansoun. Ewe poraus a mak lon 2 Kronika sopwun 20. Lon wokisin 1 lon ena sopwun, sia alleani pwe “noun Moap kkewe me noun Ammon kkewe me ekkoch chon Ammonim ra fitiir pwe repwe maun ngeni Jehosafat.” Met Jehosafat a ffori? A ffori minne noun Jiowa kkewe chon angang mi tuppwol ra kan ffori lupwen a wor fitikoko. A kutta emmwen seni Jiowa ren an eani ei iotek: “O ach Kot, kosap efisata om apwung ngeniir? Pun esor am pochokkul mwen ei mwich mi lapalap mi etto maun ngenikem; iwe, am ause silei met aupwe ffori, nge mesem mi nennengonuk.”—2 Kronika 20:12.
Jiowa a Polueni Eu Iotek
3. Met sokkun emmwen Jiowa a ngeni chon Juta lupwen chon ekkewe muu mi pwelliir ra ekiekin maun ngeniir?
3 Lupwen “meinisin chon Juta ra ukkuta mwen Jiowa, pwal mwo nge nour kkewe kukkun, puluwer kkewe me nour kkewe at,” Jiowa a affata poluan. (2 Kronika 20:13) Ussun an nounou noun we “chon angang mi tuppwol me tipatchem” ikenai, a ina ussun ewe Chon Auseling ngeni iotek a amwokutu ewe soufos lon pekin Lifai itan Jahasiel pwe epwe uwawu poluan ngeni chokkewe mi mwicheto. (Mattu 24:45) A mak: “Iei alon Jiowa ngenikemi, ‘Ousap nisimwa are niuokkus pokiten ei mwich mi lapalap; pun ewe maun esap ami, nge an Kot. . .. Esor lamoten ami oupwe maun lon ei fansoun. Oupwe atettelikemi, ukkuta chok me kuna amanauen Jiowa fan asengesimi. . .. Ousap nisimwa are niuokkus. Lesor oupwe feiliwu rer, me Jiowa epwe nonnom remi.’”—2 Kronika 20:15-17.
4. Met sokkun ffoffor Jiowa a ekiekin kuna seni noun kkewe aramas, nge sap minne repwe nonnommwaal, lupwen chon koputer ra ekiekin maun ngeniir?
4 Sap minne Jiowa a ereni King Jehosafat me noun kkewe aramas pwe repwe chok nonnommwaal me witi eu manaman an epwe amanauer. Nge wiser ar repwe mwokut pwe resap kkuf ren ir mi etto maun ngeniir. Ewe king me ‘meinisin chon Juta, pwal mwo nge nour kkewe kukkun, puluwer kkewe me nour kkewe at,’ ra pwarata ar luku mi pochokkul lupwen ra pwatakai me lesossor, iwe, ra fetalewu pwe repwe sap ngeni ekkewe sounfiu mi toki fonuer. Atun ar fetalelo, ewe king a awora emmwen seni lang me a apochokkuler ren an ereniir, “Oupwe luku Jiowa ami Kot pwe oupwe tongeni likiitu. Oupwe luku noun kkewe soufos pwe oupwe tufichin pworacho.” (2 Kronika 20:20) Repwe luku Jiowa! Repwe luku noun kkewe soufos! Epwe ina ussun ar repwe tufichin pworacho. Pwal ussun chok ikenai, atun ach akkangang ngeni Jiowa, sisap tipemwaramwar ussun an Jiowa tufichin awinnakich pokiten ach luku!
5. Ikenai, met sokkun mettoch Chon Pwarata Jiowa ra kan ffoffori lupwen repwe mwareiti Jiowa?
5 Ussun chok ekkewe chon Jutia lon fansoun Jehosafat, wisach ach sipwe “mwareiti Jiowa, pun an tong epwe nom tori feilfeilo chok.” Ifa ussun sipwe mwareiti i? Ren ach tinikken lon ewe angangen afalafala ewe Muu! Ekkewe chon Jutia ra “poputa le fetal fan puchorun chengel me kapasen mwareiti i,” iwe, pwal ussun chok, sipwe apacha ngeni ach luku ffoffor. (2 Kronika 20:21, 22) Ewer, sipwe pwarata pwe sia eani ewe chok sokkun luku mi pochokkul lupwen Jiowa epwe mwokut pwe epwe maun ngeni chon appolua i! Inaamwo ika a ussun ita nge mi ttam ewe aal, nge sipwe apposa letipach pwe sipwe likiitu me eani luku mi manau, ussun noun kkewe aramas mi pworacho ra kan ffoffori lon ekkewe leeni mi wor fitikoko ie ikenai. Lon ekkoch fonu mi fiffis angangen eriaffou, ffoffor mi mwanesol, lengita, me osukosuk ren nafangauen moni ie, chon angangen Kot mi tuppwol ra kukkuna uwa mi fokkun amairu, ussun minne mi mak lon ewe 1998 Yearbook of Jehovah’s Witnesses.
Jiowa a Amanaua Noun kkewe Aramas
6. Ikenai, ifa ussun luku mi pochokkul epwe alisikich pwe sipwe tuppwol?
6 Ekkewe muu mi ngau mi pwelli Juta ra sotuni le pworaiti noun Kot kkewe aramas, nge fan ar luku mi pochokkul, noun Jiowa kkewe chon angang ra polueniir ren ar eani kolun mwareiti i. Sipwe tongeni pwarata ena chok sokkun luku ikenai. Ren ach auralo manauach ren ffofforun mwareiti Jiowa, sipwe apochokkula ach kkewe minen tumun lon pekin ngun, iwe, an Setan kkewe rau resap tongeni efeiengauakich. (Efisus 6:11) Luku mi pochokkul epwe akkufu ewe sossotun ach sipwe rikilo ren ekkewe minen apwapwa mi ngau, tongen pisek, me tinikop mi pwapwaalo lon ewe fonufan pwellikich, nge mi feffeil ngeni an epwe morolo. Ena luku mi nomofoch epwe alikiitukich pwe sipwe tuppwol le angangfengen me “ewe chon angang mi tuppwol me tipatchem” lupwen sia akkaea fansoun meinisin ewe mongoon ngun mi kawor “lon fansoun mi fich.”—Mattu 24:45.
7. Met Chon Pwarata Jiowa ra fen ffori lupwen aramas ra ussun ita maun ngeniir?
7 Ach luku mi longolong won Paipel epwe apochokkulakich pwe sipwe uppos fan ekkewe angangen eriaffou, kefisitaan ir mi eani ngunun ewe “chon angang mi ngau,” nge porauser a mak lon Mattu 24:48-51) A mmen amairu an ekkewe chon rikilo akkapwonueta ena oesini, pwe iwe ra kan ekkefisata kapas chofona me poraus mi orukoruk lon chommong fonu ikenai, me ra pwal mwo nge efisata ar kkewe ekiek sola ren alillisin ekkoch mi wis tekia lein ekkewe muu. Lon fansoun mi fich ngeni, Chon Pwarata Jiowa ra fen ‘tuttumunu me ffotukatiu ewe poraus allim lon pekin alluk,’ ussun mi mak lon Filipai 1:7. Ren chok awewe, lon September 26, 1996, lon eu kapwung lon Kriis, ekkewe tiu sou kapwung lon ewe European Court of Human Rights, lon Strasbourg, ra apwungalo pwe “Chon Pwarata Jiowa ra kapachelong fan ewe itelap ‘lamalam mi itefoulo,’” iwe, a wor ar pwuung le pwapwaesini ar tufichin nemeni pwisin ekiekir, mwelien letiper, me ar luku, me a wor ar pwuung le afalafal ussun ar luku. Nge ren chon rikilo, iei an Kot apwung ussur: “Ewe mwiitun mi enlet a fen pwonuta ngeniir: ‘Ewe konak a fen liwiniti pwisin mmusan, me ewe pik mi fen tutu a fen liwiniti ewe pwokak.’”—2 Piter 2:22.
8. Lon fansoun Jehosafat, ifa ussun Jiowa a apwungu chon appolua noun kkewe aramas?
8 Lon fansoun Jehosafat, Jiowa a apwungu ir mi mochen efeiengaua noun kkewe aramas. A mak: “Jiowa a aopa mwan kkana pwe repwe mweteri noun Ammon, Moap me chon ewe leeni mi ppaneta itan Etom, nge ir mi fetaleto ngeni Juta, iwe, ra awatafengenniir. Iwe, noun Ammon me Moap kkewe mwan ra poputa le u ngeni chon ewe leeni mi ppaneta itan Etom me ra nniirelo me aroserelo; iwe, lupwen ra wes le nnielo chon Etom, ra pwisin sapefengen lefiler me nnifengenniir.” (2 Kronika 20:22, 23) Chon Jutia ra eita ngeni ena leeni ewe Masiesin Peraka, nge Peraka a wewe ngeni “Feioch.” Lon pwal ach ei fansoun, an Jiowa apwungu chon koputan epwe efisata feioch lapalap fan iten noun kkewe aramas.
9, 10. Io kkewe ra fen pwarata pwe mi fichiitiir kapwungungau seni Jiowa?
9 Eli sipwe eis, Lon ei fansoun, io epwe kuna kapwungungau seni Jiowa? Ren ach sipwe silei poluen ena kapas eis, sipwe liwiniti an Sowel we oesini. Sowel 3:3 a kapas ussun chon koputen noun kkewe aramas, nge ir mi “tongeni kamolo emon kukkun at fan iten liwinin emon fin lisowu, me ra amomolo emon kukkun nengngin fan iten wain.” Ewer, ra kan ekieki pwe noun Kot kkewe chon angang ra mmen tekisosson seniir, me esor aucheaan nour kkewe pwe me rer nge liwinir a ussun liwinin emon fin lisowu are eu rumeen wain. Repwe kapwung ren ar eani ena sokkun ekiek.
10 Mi pwal fichiiti ir mi lisowu lon pekin ngun ar repwe kuna apwung. (Pwarata 17:3-6) Iwe, a akkaewin ngau ir mi pesei ekkewe muu pwe repwe eriaffou Chon Pwarata Jiowa me pinei ar angang, nge ina ussun ffofforun ekkoch nouwisen lamalam lon Eastern Europe kanoto chok. Jiowa a kan pwarata pwe epwe wesewesen apwungu ekkena chon ffofforingau.—Sowel 3:4-8.
“Epini Maun!”
11. Ifa ussun Jiowa a kokkori chon koputan kkewe ngeni maun?
11 Mwirin, Jiowa a ereni noun kkewe aramas pwe repwe esilefeili eu akkuffengen lein ekkewe muu: “Epini maun! Aranga ekkewe mwan pochokkul! Ereniir pwe repwe kanoto! Mut ngeniir ar repwe pwereta, meinisin ekkewe sounfiu!” (Sowel 3:9) Ina eu poraus esilesil ussun och sokkun maun mi sokkolo, weween, eu maun mi pwung. Noun Jiowa kkewe Chon Pwarata mi tuppwol ra aea pisekin maun lon pekin ngun lupwen repwe appolua poraus mi orukoruk, iwe, ra fiu ngeni kapas chofona ren ar akkaea minne mi enlet. (2 Korint 10:4; Efisus 6:17) Ekiselo chok, Kot epwe epini “ewe maun lon ewe ran mi lap, ranin ewe Kot mi Unusen Tekia.” (Pwarata 16:14) Epwe amoielo seni fonufan meinisin mi u ngeni an Kot nemenem. Noun kkewe aramas won fonufan resap fiti ena maun. Ra fen unusen ‘usi nour kkewe ketilas pwe repwe wiliiti minen ttu ppwul me wokur kkewe siles pwe repwe wiliiti minen fichin ira.’ (Aisea 2:4) Nge, Jiowa a kori ekkewe muu mi u ngeni i pwe repwe ffori ei mettoch: “Oupwe usi ami kkana minen ttu ppwul pwe repwe wiliiti ketilas me ami kkana fichin ira pwe repwe wiliiti siles.” (Sowel 3:10) A koriir pwe repwe aea meinisin ar kkewe pisekin maun fan iten ewe maun. Nge resap tongeni win, pun Jiowa epwe unusen akkufur!
12, 13. (a) Inaamwo ika a fen wes ewe Maun won Kapas, nge ifa ussun chommong muu ra fen pwarata pwe ir mi chuen ekkekieki maun? (b) Ekkewe muu rese kan mmonleta fan iten met?
12 Mwirin 1990, ekkewe muu ra apasa pwe a wes ewe Maun won Kapas. Pokiten ena, ewe UN a fen ita efisata minne a akkaewin achocho ngeni, weween, kinamwe me lukulukoch? Aapwi! Met ekkewe mettoch mi fis lon Burundi, ewe Democratic Republic of Congo, Iraq, Liberia, Rwanda, Somalia, me ewe fonu mi iteni Yugoslavia me lom ra affata ngenikich? Me ren alon Jeremaia 6:14, ra kan apasa pwe “‘A wor kinamwe! A wor kinamwe!’ lupwen esor kinamwe.”
13 Inaamwo ika maun a fen ukutiu lon ekkoch leeni, nge ekkewe muu mi choni ewe UN ra chuen ekkemiisfengen lefiler fan iten fforun ekkewe pisekin maun. Ekkoch mi chuen ikkisoni ekkewe kensi pakutang. Pwal ekkoch ra kan fforata ekkan pisekin maun mi ussun safei, me ra tongeni nnielo chommong, chommong aramas. Atun an ekkena muu feffetal ngeni ar repwe mumufengen lon eu leeni lon kapas awewe mi iteni Armaketon, Kot a uwawu ei kapasen akkuffengen: “Nge ren ewe emon mi apwangapwang, epwe ita apasa: ‘Ngang emon mwan mi pochokkul.’ Akkawora ami alillis me kito, ami kkana muu mi pwellifeil, me ou ochufengennikemi.” Mwirin, Sowel a uwawu pwisin an tingor: “O Jiowa, kopwe tinatiu ngeni ena leeni noum kkewe mi pochokkul.”
Jiowa a kan Tuttumunu Pwisin Noun kkewe
14. Ifa weween noun Jiowa kkewe mi pochokkul?
14 Io noun Jiowa kkewe mi pochokkul? Fan 280 lon Paipel, ewe Kot mi enlet a iteni “Jiowa meilapen sounfiu.” (2 King 3:14) Ekkena sounfiu ra wewe ngeni ekkewe chonlang mi mmonleta pwe repwe ffori letipen Jiowa. Lupwen chon Siria ra ekiekin turufi Ilaisa, Jiowa a suuki mesen noun Ilaisa we chon alillis pwe epwe weweiti ewe popun resap tongeni turufi i: “Nengeni! Ewe leeni won chuuk a ur ren oris me wokenin maun mi pulopulen ekkei me ra pwellifeili Ilaisa.” (2 King 6:17) Jises a apasa pwe epwe tongeni tingorei Seman ren “lap seni engol me ruu mwichen chonlang.” (Mattu 26:53) Iei alon Pwarata lupwen a awewei an Jises ssalo ren an epwe apwonueta ewe apwung lon Armaketon: “Ekkewe mwichen sounfiu lon lang ra tapwelo mwirin i won oris mi pwech, me ra ufouf linen mi pwech, limoch, me echipwor. Me seni auan a itiwu emon ketilas, pwe epwe nninni ngeni ekkewe muu, iwe, epwe nemeni ir ren efoch wokumecha. A pwal puri ewe leenien pupuun krep mi wewe ngeni songen ewe Kot mi Unusen Tekia.” (Pwarata 19:14, 15) A mmen ffatoch ekkewe kapas mi awewei ena leenien pupuun krep pwe a apasa ina “ewe leenien pupuun krep mi lapalap, ewe mi wewe ngeni songen Kot.”—Pwarata 14:17-20.
15. Ifa ussun Sowel a awewei an Jiowa maun ngeni ekkewe muu?
15 Iwe, ifa ussun Jiowa a polueni an Sowel tingor fan iten feitiuen pwisin noun Kot kkewe mi pochokkul? A nounou ekkeei kapas mi titchik: “Ekkewe muu repwe rangeta me feita ngeni masiesin Jehosafat; pun upwe mommot ikewe ie pwe upwe apwungu ekkewe muu mi pwellifeil. Eitielong efoch weweito, pun a nup uwaan atake. Ou kito me pweretiu, pun a ur ewe leenien pupuun krep. Ekkewe leenien pupuun krep a uroureta; pun ngauer a mmen lapalo. Chommong, chommong aramas ra nom lon masiesin ewe apwung, pun ranin Jiowa we a arapoto lon ewe masiesin apwung. Akkar me maram repwe wesewesen rocholo, me ekkewe fuu resap chuen ttin. Iwe, seni Saion Jiowa epwe oruor, me seni Jerusalem epwe fosowu. Iwe, lang me fonufan repwe wesewesen chchech.”—Sowel 3:12-16.
16. Pwal io kkewe repwe kapachelong lein ir mi kuna apwung seni Jiowa?
16 Ewe it Jehosafat a wesewesen wewe ngeni “Jiowa mi Sou Kapwung,” iwe, epwe chok pwal ina ussun Jiowa Kot epwe wesewesen pwarata pwe a pwung an nemenem lupwen epwe apwungu fonufan. Ewe oesini a apasa pwe ir mi kuna kapwungungau ra ussun ‘chommong, chommong aramas lon ewe masiesin apwung.’ Ekkewe lusun chon peni lamalam chofona repwe nom lein ekkena chommong aramas. Epwe pwal kapachelong chokkewe mi mak porauser lon ewe oruuen Kol Fel, weween, ekkewe muu, einang, kingen fonufan, me nouwis, nge ir mi efich ewe otot mi ngau won ei fonufan me rese mochen ‘angang ngeni Jiowa fan niuokkus.’ Chokkana rese tipeni ar repwe “mitiri ewe nau.” (Kol Fel 2:1, 2, 11, 12) Rese nguuri ewe poraus pwe Jises chienen Jiowa lon ewe wis King. Pwal och, ekkewe chommong aramas mi esissin fan iten ar repwe nninniilo a pwal wewe ngeni meinisin ekkewe aramas mi nom lon pekin siike me ren apwungun ena King mi ling. (Mattu 25:33, 41) Lupwen epwe war ewe fansoun Jiowa epwe oruor me lon ewe Jerusalemin lang, emonnewe Jiowa a fen seikata Kingen ekkewe king epwe ssawu pwe epwe apwonueta ena apwung. Lang me fonufan repwe wesewesen chchech! Iwe nge, a wor ei kapasen alukuluk ngenikich: “Jiowa epwe eu leenien op ren noun kkewe aramas, me eu imwen maun fan iten noun Israel kkewe.”—Sowel 3:16.
17, 18. Io kkewe repwe kuna manau atun ewe riaffou mi lapalap, me met sokkun mettoch mi murinno repwe pwapwaesini?
17 Pwarata 7:9-17 a apasa pwe ir mi kuna manau atun ewe riaffou mi lapalap ra ussun “eu mwich mi fokkun lapalap,” nge ir aramas mi pwarata pwe ra luku chchaan Jises we mi tufichin amanauer. Chokkana repwe kuna tumun lon ranin Jiowa we, nge ekkewe chommong aramas lon an Sowel oesini repwe kuna kapwungungau. Iei alon Sowel ngeni ir mi kuna manau: “Ami kkana aramas oupwe wesewesen silei pwe ngang Jiowa ami Kot, nge ua nonnom lon Saion, chuuki we mi fel,” weween, leenien Jiowa we lon lang.—Sowel 3:17a.
18 Mwirin, ewe oesini a erenikich pwe nemenen an Kot we Muu lon lang “epwe wiliiti eu leeni mi fel; iwe, ren chon ekis, resap chuen pwerelong lon.” (Sowel 3:17b) Lon lang me pwal lon nemenen ena Muun lang me won fonufan, esap wor chon ekis, pun meinisin repwe ririfengen lon ewe fel mi enlet.
19. Ifa ussun Sowel a awewei pwapwaan ewe paratis noun Kot kkewe aramas ra kan kuna ikenai?
19 Pwal mwo nge ikenai, a wor kinamwe mi somolo lein noun Jiowa kkewe aramas won fonufan. Fan tipeeu, ir mi ekkesilefeili an kkewe apwung lon lap seni 230 fonu me pwal lon lap seni 300 sokkun fos. An Sowel oesini a awewei feiochur lon ekkeei kapas mi ammeseik: “Epwe wesewesen fis lon ena ran pwe epwe suputiu wain mi ngar me won ekkewe chuuk, me milik epwe puputiu me won ekkewe ppan, me ekkewe chanpupuun Juta repwe uroureta ren konik.” (Sowel 3:18) Ewer, Jiowa epwe akkawora ngeni ir mi mwareiti i won fonufan feioch mi somolo me poraus enlet mi lapalapalo. Epwe unusen ffatolo pwe a wor an Jiowa pwuung le nemeni mettoch meinisin lon ewe masiesin apwung, me chengel epwe choufetal lupwen epwe nonnom tori feilfeilo chok lein noun kkewe aramas mi kuna amanau.
En mi Chechchemeni?
◻ Ifa ussun Jiowa a selani noun kkewe aramas lon fansoun Jehosafat?
◻ Me ren Jiowa, io kkewe mi fichiitiir ar repwe nninniilo lon “ewe masiesin apwung”
◻ Noun Kot kkewe mi pochokkul ra wewe ngeni io, me met wiser lon ewe saingoon maun?
◻ Met sokkun pwapwa ekkewe chon fel mi tuppwol ra kan pwapwaesini?
[Sasing lón pekin taropwe 27]
Ei kapas a tori Juta: ‘Ousap niuokkus pun ewe maun esap ami, pwe an Kot’
[Sasing lón pekin taropwe 29]
Jiowa a kokko ngeni chon koputan kkewe pwe repwe ‘usi ar kkewe minen ttu ppwul pwe repwe wiliiti ketilas’
[Sasing lón pekin taropwe 30]
Paipel a awewei porausen eu mwich mi lapalap epwe kuna manau atun ewe riaffou mi lapalap