Eáni Leenien Áppirú Ekkewe Soufós Usun Sowel
1. Lón ach angangen afalafal, ifa usun sipwe áppirú án Sowel tipetekison?
1 Ié we soufós Sowel? A chék apasa pwe i “nöün Petuel we mwän.” (Sow. 1:1) Ena soufós mi tipetekison a akkomwa án Jiowa kapas nge esap wisan we chón uwei pwóróus. Pwal ina usun kich, sipwe elinga Jiowa me menlapei ewe Paipel lón ach we angangen afalafal lap seni ach sipwe kútta itéchúch. (1 Kor. 9:16; 2 Kor. 3:5) Pwal och, sia péchékkúl seni ewe pwóróus sia esilefeili. Menni kinikinin án Sowel we oesini a tongeni apéchékkúlakich le eáni tinikken me ápilúkúlúk lón ei fansoun?
2. Met arapotoon ránin Jiowa we a amwékútúkich le féri?
2 “Ränin ewe Samol mi Lapalap A Arap.” (Sow. 1:15): Inaamwo ika ekkena kapas ra fen mak fitu ngeréú ier lóóm, nge sia nónnóm lón ei sáingoon fansoun an epwele pwénútá. Ngawólóón napanapen ei fénúfan me ach kúna án aramas rese áfánni me ar esiita ewe pwóróus allim lón ach we leenien afalafal, ikkena esissillen pwe sia fen nóm lesópwólóón ei ótót mi ngaw. (2 Tim. 3:1-5; 2 Pet. 3:3, 4) Ika sia ekilonei arapotoon ewe sópwólóón, iwe a wor popun mi lamot ach sipwe akkomwa ewe angangen afalafal lón manawach.—2 Pet. 3:11, 12.
3. Pwata ewe angangen afalafal a ákkáeúin lamot lón ei atun sia arap ngeni ewe riáfféú mi lapalap?
3 “Ewe Samol mi Lapalap Epwe Eu Lenien Op fän iten Nöün Aramas.” (Sow. 3:16): Ewe chechchech ei wokisin a fós usun, a chék weneiti án Jiowa kapwúng atun ewe riáfféú mi lapalap. A aururukich ach silei pwe lón ena atun, Jiowa epwe seláni néún kewe chón angang mi tuppwél. (Pwär. 7:9, 14) Atun sia fiffiti ewe angangen afalafal me kúna ifa usun Jiowa a túmúnúkich me apéchékkúlakich, a mááritá ach lúkú me likiitú. Ikkena ekkewe napanap repwe álisikich atun warotoon ewe riáfféú mi lapalap.
4. Pwata sia tongeni pwapwa me nennelói mwachkkan fán lúkúlúk?
4 Inaamwo ika ekkóch aramas ra apasa pwe a elichippúng ewe pwóróus Sowel a uwei, nge a fen awora ápilúkúlúkún ngaseló fán iten néún Kot kewe aramas. (Sow. 2:32) Iwe, sipwe nennelói mwachkkan fán lúkúlúk me tinikken le esilei pwóróus allimen án Kot we Mwú pokiten sia álleasochisi alon Sowel 2:23: ‘Sipwe pwapwa ren mine ewe Samol mi Lapalap ach we Kot a föri.’