Akkappiru Ewe Kot Mi Kapas Enlet
“Oupwe appiru Kot, usun chok noun kewe mi achengicheng.”—EFISUS 5:1.
1. Met ekkoch ra luku ussun minne mi enlet, me pwata a mwaal ar ekiek?
“META ewe enlet?” (Jon 18:38) Ena kapas eis Pontius Pailat a eani orun 2,000 ier loom a pwari an ekiek pwe repwe resin kukkutta ewe enlet. Chommong aramas ikenai repwe tipeeu ngeni. Aramas ra tipemwaramwareiti woren ewe mettoch itan enlet. Eni ka fen rongorong pwe emon me emon epwe pwisin foralo minne mi enlet me ren, are ewe enlet ese unus fansoun meinisin, are a kan akkasiwil ewe enlet. Nge mei mwaal ena sokkun ekiek. Popunlapen an aramas kakkaeo me fiffiti sukul pwe repwe kaeo ekkewe poraus mi pwung, minne mi enlet ussun ewe otot sia nonnom lon. Minne mi enlet esap alongolong won chok ekiekin emon me emon. Ren chok awewe, epwe pwung are epwe mwaal pwe ngunun aramas esap tongeni malo. Epwe pwung are epwe mwaal pwe Satan, i wesewesen emon mi manau. Iwe, mei wor popun manauach are esor. Lon ekkena poraus meinisin, mei wor eu chok mi pwung. Eu mi enlet, eu mi mwaal; esap tufich ir me ruu poraus mi mwaalfesen ar repwe enlet.
2 Lon ewe lesen mwen ei, sia fen kaeo pwe Jiowa i ewe Koten enlet. A silei ewe enlet ussun mettoch meinisin. A fokkun sokko seni ewe chon oput mi likotupotup, Satan ewe Tefil, pun Jiowa a kapas enlet iteiten fansoun meinisin. Pwal eu, Jiowa a kan kisaseu le pwarata ewe enlet ngeni ekkewe ekkoch. Ewe aposel Paul a pesei chienan kewe Chon Kraist: “Oupwe appiru Kot, usun chok noun kewe mi achengicheng.” (Efisus 5:1) Pokiten kich Chon Pwarata Jiowa, epwe ifa ussun sipwe appiru i ren ach sipwe atipeeufengenni ach kewe fos me foffor ngeni ewe enlet? Pwata a lamot ach sipwe fori ena mettoch? Iwe, pwata sipwe tongeni luku pwe Jiowa epwe acheni ir kewe mi aleni ena alen enlet? Sipwe pi.
3 Sia manau lon eu fansoun atun a chommongelo ekkewe afalafal mi chofona lon pekin lamalam. Ussun ewe aposel Paul a oesini fan emmwenien Kot, chommong aramas lon ekkeei “ranin le sopwolon” ra amwochu pwomen ewe manau mi fich ngeni Kot, nge ra amam manamanan. Ekkoch ra u ngeni ewe enlet, iwe, ra “limengau lon letiper.” Pwal eu, “ekkewe aramas ingau, . . . repwe chok alapalo ar fofor-ingau, ra otupu ekkoch, nge ekkoch ra pwal otupu ir.” Inaamwo ika ekkena sokkun aramas ra kakkaeo, nge rese “tongeni sinei minne mi enlet.”—2 Timoti 3:1, 5, 7, 8, 13.
4 Fan emmwenien ngunun Kot, ewe aposel Piter a pwal mak ussun ekkewe ranin le sopwolon. Ussun chok an a oesini, aramas rese chok oput ewe enlet nge ra pwal turunufasei an Kot we Kapas me ir kewe mi afalafala ewe enlet me lon. “Ren ar mochen,” ekkena chon turunufas ra tunalo ewe poraus mi enlet pwe ewe fonufan lon ranin Noa we a talo ren ewe noter, iwe, a isetiu eu minen kauk fan iten pwal eu ranin kapwung lon fansoun mwach. Ar otupu pwisin ir ren ar ekieki pwe lapalapen mettoch meinisin a ussun we chok epwe atoto ngenir kiteter lupwen epwe tori an Kot fansoun le nielo ekkewe mi ngau.—2 Piter 3:3-7.
Noun Jiowa kkewe Chon Angang Ra Silei ewe Enlet
5 Lon an awewei ussun “ewe fansoun sopwolon,” ewe soufos Taniel a eani eu oesini mi sokkolo ren met epwe fis lein noun Kot kewe aramas—epwe pwasefal ekkewe afalafal mi enlet lon pekin lamalam. A makkei: “Chommong aramas repwe sotun kutta weween, iwe, sile mi enlet epwe lapalo.” (Taniel 12:4, NW) Noun Jiowa kewe aramas rese tupulo are chunulo ren ewe Chon Otupotup mi Lapalap. Ren ar kuttafetal lon ewe Paipel, ra angei sile mi enlet. Lon ewe aeuin senturi, Jises a asarama noun kkewe chon kaeo. A “suuki letiper, pwe repwe wewe ren minne a fen mak.” (Luk 24:45) Lon ach ei ran, Jiowa a fori ussun chok. Ren an we Kapas, an we ngun mi fel, me an we mwicheich, a fen atufichi fitu milion aramas won unusen fonufan ar repwe weweiti minne a fen silei—ewe enlet.
6 Kich noun Kot kkewe aramas sia weweiti chommong mettoch iei sise tongeni silei me mwan. Sia silei poluen ekkewe kapas eis ekkewe sou tipatchemen fonufan ra resin polueni fitu ngerou ier. Awewe chok, sia silei pwata an a mumuta riaffou, met popun aramas ra mammalo, me met popun aramas resap tongeni efisata kinamwe me tipeeufengen won fonufan. Sia pwal feioch ren an a aiti ngenikich minne epwe fisita lon mwachkkan—ewe Muun Kot, eu paratis won fonufan, me manau esemuch mi unusoch. Sia silelo Jiowa, ewe mi Unusen Tekia. Sia fen kaeo ussun lapalapochun fengen me minne sipwe fori fan iten ach sipwe angei an feioch. Ach silei ewe enlet a atufichikich ach sipwe esinna minne ese enlet. Ach apwonueta ewe enlet epwe tumunukich seni foffor mi lamotengau, a atufichikich ach sipwe sopwoch lon manauach, me a kan awora ngenikich eu apilukuluk allim fan iten mwachkkan.
7 En mi weweiti ekkewe poraus mi enlet lon ewe Paipel? Ika ina, a fokkun watte feiochum. Lupwen emon sou mak a makkei eu puk, epwe kan anapanapa makkeian fan iten an epwe fichiiti och sokkun aramas. Ekkoch puk ra mak fan iten ekkewe mi fen fiti ekkewe sukul tekia, pwal ekkoch fan iten ekkewe semirit, nge pwal ekkoch fan iten ekkewe mi eani och sokkun angang. Inaamwo ika a mecheres ngeni aramas meinisin ar repwe nouni eu Paipel, nge epwe akkaeuin fich ngeni eu sokkun mwichen aramas ar repwe weweiti me pwapwaesini. Jiowa a fori ewe Paipel fan iten ekkewe mi tipetekison, ekkewe aramasen fonufan mi mosonoson. Ina ekkewe sokkun aramas mi tongeni wewefichiiti ewe Paipel, ese lifilifil fitu ier ra fiti sukul, lapalapen me eorenien ar lewo, ika ir aramas tekia are tekison. (1 Timoti 2:3, 4) Iwe nge, ese suuk ngeni chokewe rese fichiiti weweochun ekkewe poraus mi enlet lon Paipel, nge meit ika ir mi sukul tekia are fokkun tipatchem. Ese tufich ngeni ekkewe mi lamalam tekia me tipetekia ar repwe wewefichiiti ekkewe poraus enlet mi auchea seni an Kot we Kapas. (Mattu 13:11-15; Luk 10:21; Fofor 13:48) Kot chok a tongeni fori ei sokkun puk.
Noun Jiowa kewe Chon Angang Ra Wenechar
8 Ussun chok Jiowa, noun kkewe Chon Pwarata mi tuppwol ra wenechar. Jises Kraist, ewe Chon Pwarata Jiowa mi tekia seni meinisin, a apochokkulata ewe enlet ren minne a eani asukul me pwal ren lapalapen manauan me an we malo. A apochokkula enletin an Jiowa we kapas me an Jiowa kewe pwon. Ina minne, Jises pwisin a wewe ngeni ewe enlet, ussun an a pwisin apasa.—Jon 14:6; Pwarata 3:14;
9 Jises a “ur ren kirokiroch me enlet”, iwe, “esor kapasen likotupotup lon auan.” (Jon 1:14; Aisea 53:9) Chon Kraist mi enlet ra appiru an Jises we pisekin nengeni pwe a chok kapas enlet ngeni aramas. Paul a fonou chienan kkewe chon luku: “Oupwe chok kapas enlet, en me ngeni chon orun, pun kich kifetin eu chok inis.” (Efisus 4:25) Me mwan we, ewe soufos Sekaraia a makkei: “Kapas enlet lefilemi.” (Sekaraia 8:16) Chon Kraist ra kapas enlet pun ra mochen apwapwai Kot. Jiowa mi enlet, iwe, a silei ewe feiengau mi popu seni kapas chofona. Ina minne, a pwung an epwe kutta seni noun kkewe chon angang ar repwe kapas enlet.
10 Ren chommong, kapas chofona epwe atufichiir ar repwe angei ar kewe mochen. Aramas ra kapas chofona fan iten ar resap kuna liwinin ar foffor-mwaal, are fan iten ar repwe kuna winner, are kuna ling seni aramas. Iwe nge, ewe fofforun kapas chofona, ina eu foffor-mwaal aramas rese pwung ra kan foffori. Pwal eu, emon chon kapas chofona esap tongeni kuna an Kot chen. (Pwarata 21:8, 27; 22:15) Lupwen aramas ra sinneni pwe kich mi wenechar, ra luku aloch; ra lukuluk woch. Iwe nge, ika a pwapwalo fan eu chok pwe sia mwakel, aramas repwe tongeni tipemwaramwareiti mettoch meinisin minne sipwe apasa lon mwachkkan. Eu an chon Africa mwitun a apasa: “Eu kapas chofona a aingaualo engerou kapas enlet.” Pwal eu mwitun a apasa: “Aramas resap luku alon emon mi mwamwakel, inaamwo ika epwe kapas enlet.”
11 Ewe mettoch wenechar a lu seni ach sipwe chok kapas enlet. Ina efoch aal sipwe alen ukuukun ranin manauach. A awewei ion kich. Sia esilei ewe enlet ngeni aramas sap chok ren minne sipwe apasa pwe pwal ren minne sipwe fori. “En . . . ewe chon afalafala ekkewe ekkoch aramas, pwata kose pwisin afalafalok?” ewe aposel Paul a eis. “En ewe chon afalafala aramas pwe rete sola, nge ifa usun, kopwe sola? En ewe chon apasa pwe resap lisou, nge ifa usum, kopwe lisou?” (Rom 2:21, 22) Ika sipwe esilei ngeni aramas ewe enlet, a lamot sipwe wenechar lon ach kkewe foffor meinisin. An aramas sissilei ussun ach achocho ngeni ach sipwe wenechar epwe nemeni ifa ussun aramas repwe etiwa minne sipwe aiti ngenir.
12 Ekkewe sarafo lein noun Jiowa kewe chon angang ra pwal weweiti lamoten ar repwe wenechar. Lon makkeian we taropwe fan iten sukul, Jenny, 13 ierin lon na fansoun, a makkei: “Ua fokkun aucheaani kapas enlet. Solapan pwe mei chokisikis aramas mi unusen wenechar ikenai. Ua pwisin pwon pwe upwe wenechar ukuukun ranin manauei. Upwe pwal wenechar atun kapas enlet esap awinnaei are chienei kkewe. Ua fokkun tumunu pwe upwe chok chiechi ngeni ir kewe mi wenechar.”
13 Lon an kapas ussun noun Jenny we taropwe, noun Jenny we sense a ereni: “Inaamwo ika a kukkun ierum, nge ka fen amwochu eu pilukun alluk mi pwung. Ua silei pwe kopwe apwonueta om na pwin alluk pun en mi pochokkul lon minne mi pwung.” Met a efisata an ena nengngin pochokkul lon minne mi pwung? Le poputaan noun we taropwe, Jenny a era pwe an we lamalam “a foratiu ewe pilukun alluk fan asengesin manauan.” Fisu ier ra lo seni ewe fansoun Jenny a makkei ena taropwe. Ussun noun we sense a ekieki, Jenny a sopweilo le manaueni ewe manau mi fokkun murinno pun i emon Chon Pwarata Jiowa.
Noun Jiowa kkewe Chon Angang Ra Pwarata ewe Enlet
14 Pwungun, ekkoch aramas lukun Chon Pwarata Jiowa ra kapas enlet me sotun manaueni ewe manau mi wenechar. Iwe nge, pokiten kich noun Kot kkewe chon angang, a watte wiisach ach sipwe apochokkula minne mi enlet. A alluku ngenikich ren ekkewe poraus mi enlet seni Paipel—ekkewe poraus mi enlet mi tongeni emmweni emon ngeni manau esemuch. Ina minne, mei wor wiisach ach sipwe aronga ngeni aramas ekkena poraus. Jises a apasa, “Are Kot epwe ngeni emon chommong mettoch, iwe, epwe pwal kutta seni i chommong mettoch.” (Luk 12:48) Enlet, epwe ‘kutta chommong mettoch’ seni ir kkewe mi feioch ren ewe sile mi auchea ussun Kot.
15 Mei wor pwapwa lon ach aiti ngeni aramas ewe enlet lon Paipel. Ussun noun Jises kewe chon kaeo lon ewe aeuin senturi, kich sia afalafala kapas allim—eu poraus ussun apilukuluk allim mi achungu letipach—ngeni ir kewe mi “riaffou me torotorongau ussun chok siip esor chon maser” me pwal ngeni ir mi chunulo me osukosuk ren “afalafalen ekkewe timon.” (Mattu 9:36; 1 Timoti 4:1) Ewe aposel Jon a makkei: “Esor och pwapwa mi lap seni ai pwapwa lupwen ai rong pwe nei kena ra fefetal lon ewe enlet.” (3 John 4) Tuppwolun “noun” Jon kewe—neman ir mi kaeo ewe enlet seni Jon—a atoto ngeni Jon pwapwa chapur. A atoto rech pwapwa atun sipwe kuna an aramas etiwa ren kilisou ewe Kapasen Kot.
16 Pwungun pwe esap aramas meinisin repwe etiwa ewe enlet. Jises a kapas enlet ussun Kot, pwal mwo nge lupwen aramas rese kan mochen auseling. A apasa ngeni ekkewe chon Jus mi u ngeni “Pwata chok ouse mo lukuei? Ewe mi seni Kot epwe rong ekkewe kapasen Kot. Iei popun ami ouse mo rong, pun ami sap seni Kot.”—Jon 8:46, 47.
17 Ussun chok Jises, sise amwochu seni aramas ewe enlet mi auchea ussun Jiowa. Sise ekieki pwe aramas meinisin repwe nguuri minne sipwe ereniir, pun sap meinisin ra nguuri minne Jises a afalafala. Iwe nge, sia pwapwa pun sia silei pwe a pwung minne sia foffori. Lon an tong, Jiowa a mochen pwe ewe enlet epwe pwapwalo ngeni aramas meinisin. Pokiten ekkewe Chon Kraist ra eani ewe enlet, repwe chon uwei saram lon ei fonufan mi rochopwak. Ren ach atittina saramen ewe enlet ren ach kewe kapas me foffor, sipwe tongeni alisi ekkewe ekkoch ar repwe alinga Semach we lon Lang. (Mattu 5:14, 16) Sia pwari ngeni aramas pwe sise etiwa minne mi enlet me ren Satan nge sia chok akkamwochu an Kot we Kapas mi limoch. Ewe enlet sia silei me afalafala epwe tongeni unusen angasalo ir kewe mi nguuri.—Jon 8:32.
Feffetal Won ewe Alen Wenechar
18 Jises a tongei me afalafala ewe enlet. Atun an a afalafal won fonufan, a pwarata chen ngeni ekkewe mi kapas enlet. Ussun Nataniel, Jises a apasa: “Nengeni, emon wesewesen re Israel, esor otuputup ren.” (Jon 1:47) Ina minne, Nataniel, ewe a pwal iteni Partalomiu, a seikita emon me lein ekkewe 12 aposel. (Mattu 10:2-4) A ifa me watten aucheaan ena wis!
19 Unusen eu sopwun lon ewe puken Paipel itan Jon a kapas ussun pwal emon mwan mi wenechar mi kuna chen seni Jises. Sise silei itan. Nge sia silei pwe i emon chon mwera mi mesechun seni uputiuan. Ekkewe aramas ra fokkun mairu lupwen Jises a anenneloi atewe. Porausen ewe manaman a tori selingen ekkewe Farisi, ekkewe chon oputa ewe enlet, ekkewe mi fen tipeeufengen lefiler pwe ir kewe mi eani lukuluk won Jises repwe tou seni ewe sinakok. Pokiten semen me inen atewe ra silei usun ena rauangau, lon ar niuokkus ra kapas chofona ngeni ekkewe Farisi, iwe, ra apasa pwe rese silei pwata nour we a tongeni kuna iei are io a fori ena mettoch.—Jon 9:1-23.
20 Ewe mwan mi chikar a tosefallilong mwen ekkewe Farisi. Fan pwora a apasaou ewe enlet, nge ese lifilifil minne epwe tongeni fis ngeni. A awewei ifa ussun a chikareta me ren Jises, i ewe chon forata ewe manaman. A mairu pwe ekkeei mwan tekia me tipatchem rese luku pwe Jises i seni Kot, iwe, atewe mi chikar a pwora le peser ar repwe nguuri minne mi wesewesen pwung: “Are atewe esap seni Kot, ese tongeni fori och.” Pokiten rese tongeni polueni, ekkewe Farisi ra tipi ngeni ewe mwan pwe a lamalam tekia, iwe, ra atou.—Jon 9:24-34.
21 Lupwen Jises a rongorong ei poraus, lon an tong a lo kutta ewe mwan. Lupwen a kuna, a aueta won ewe luku ewe mwan mi pin mesechun a fen pwarata. Jises a pwarata ngeni pwe i ewe Messaia. A watte feiochun ena mwan pokiten an kapas enlet! Pwungun pwe chen seni Kot epwe tori ir kewe mi kapas enlet.—Jon 9:35-37.
22 Sipwe ekilapei me feffetal lon ewe alen wenechar. Ina longolongun ach sipwe foratiu me akkamwochu ach ririoch ngeni aramas me Kot. Ach foffori minne mi enlet a wewe ngeni ach sipwe wenechar, enlet, tipemecheres, me lukuchar, iwe, epwe atoto rech an Jiowa chen. (Kol Fel 15:1, 2) Emon mi mwamwakel epwe emon chon otupotup, wiliwilikkis, me chofona, iwe, epwe atoto ren an Jiowa oput. (An Salomon Fos 6:16-19) Ina minne, tipeppos pwe kopwe feffetal lon ewe alen enlet. Pwungun pwe fan iten ach sipwe appiru ewe Koten enlet, epwe lamot ach sipwe silei ewe enlet, kapas enlet, me manaueni ewe enlet.
Ifa Ussun Kopwe Polueni?
• Pwata sipwe kilisou pun sia silei ewe enlet?
• Ifa ussun sipwe tongeni appiru Jiowa lon ach sipwe wenechar?
• Ikkefa ekkewe feioch repwe toto rech seni ach sipwe afalafala aramas ewe enlet seni Paipel?
• Pwata a lamot ach sipwe kakkapas minne mi enlet fansoun meinisin?
2. Pwata sipwe tongeni apasa pwe Jiowa i ewe Kot mi kapas enlet, iwe, ikkefa ekkewe kapas eis sipwe kaeo iei?
3, 4. Met ekkewe aposel Paul me Piter ra apasa epwe fis lon ekkewe “ranin le sopwolon”?
5.Me ren ewe soufos Taniel, met epwe fis lon “ewe fansoun sopwolon,” iwe, ifa ussun an a pwonueta ei oesini?
6. Noun Kot kewe aramas ra weweiti menni poraus mi enlet seni Paipel?
7. A suuk ngeni io kewe ekkewe enlet seni Paipel, nge ese suuk ngeni io kewe?
8. Pwata sipwe tongeni apasa pwe Jises i wesewesen chon tupuni ewe enlet?
9. Met ewe Paipel a apasa ussun ach sipwe kapas enlet?
10. Ikkefa ekkoch popun aramas ra kkan kapas chofona, iwe, met mwiringauan?
11. Ifa ussun an emon epwe wenechar esap chok wewe ngeni an epwe kapas enlet?
12, 13. Met emon sarafo a makkei ussun ewe mettoch wenechar, me ifa popunlapen a manaueni manau mi murinno?
14. Pwata noun Kot kewe chon angang ra wiiseni ewe wiis auchea pwe repwe akkamwochu minne mi enlet?
15. Ifa ewe pwapwa a toruk seni om afalafala ekkewe ekkoch ewe enlet seni Paipel?
16, 17. (a) Pwata esap aramas meinisin repwe etiwa ewe enlet? (b) Ifa ewe pwapwa kopwe tongeni meefi seni om afalafala ewe enlet seni Paipel?
18. Met popun me ifa ussun Jises a efeiochu Nataniel?
19-21. Ifa ussun emon mwan mi pin mesechun a kuna feioch seni an pworacho le kapas enlet?
22. Pwata sipwe chok kakkapas enlet?
[Picture on page 26]
Pokiten ra eani ewe enlet seni Paipel, ekkewe Chon Kraist ra achocho le afalafala ekkewe ekkoch
[Picture on page 28]
Ewe mwan mi mesechun Jises a anenneloi a kuna feioch watte pokiten an kapas enlet