Ifa Ukuukun Om Tongei An Kot We Kapas?

“Ifa lapalapen ai aucheani om alluk! Ua chok ekieki usun ran meinisin.”​—KOL FEL 119:97.

1. Ifa eu mettoch aramas mi niuokkusiiti Kot repwe tongeni pwarata ar tong fan iten ewe Kapasen Kot?

FITE puku milion mwan me fefin ra fen nouni eu Paipel. Nge mei wor sokkofesennin an emon nouni eu Paipel me an tongei an Kot we Kapas. Emon epwe tongeni apasa pwe a tongei an Kot we Kapas ika a alleani fan ekkoch chok? Pwungun pwe, aapw! Nge, mei wor ekkoch rese kon aucheani ewe Paipel me loom nge iei ra akkalleani iteiten ran. Ra fen kaeo ifa ussun repwe tongei an Kot we Kapas, me ussun chok ewe soumak kol, ra ekiekifichi an Kot we Kapas “ran meinisin.”​—Kol Fel 119:97.

2. Ifa ussun ewe luku a nom ren emon Chon Pwarata Jiowa ese apwangapwangelo atun osukosuk watte?

² Nasho Dori, emon mi fen kaeo le tongei an Kot we Kapas. A likiitu me chienan kewe chon luku ren chommong ier le angang ngeni Jiowa lon fonuan we, Albania. Lape ngeni ena fansoun, mi pinepin angangen Chon Pwarata Jiowa, me ekkoch chok puken aweween Paipel a tori ekkeei Chon Kraist mi tuppwol. Nge, an Brother Dori luku a pochokkul. Ifa ussun? “Met ua achocho ngeni,” a apasa, pwe “upwe alleani ewe Paipel eu awa iteiten ran, iwe, ina met ua fen fori lon 60 som ier mwen mesei ra apwangapwangelo.” Lon ena atun, ese wor unusen ewe Paipel lon fosun Albania, nge Brother Dori a fen kaeo fosun Kris le kukkunun, ina popun a alleani ewe Paipel lon ena fos. An akkalleani ewe Paipel a apochokkula Brother Dori pwe epwe likiitu fan sokkopaten riaffou, me epwe pwal tongeni apochokkulakich.

“Oupwe Fakkun Mochen” an Kot we Kapas

3. Met sokkun ekiek Chon Kraist repwe ita amaaraata ussun an Kot we Kapas?

³ “Usun chok monukol mi a koran uputiu,” ewe aposel Piter a makkei, “oupwe fakkun mochen ewe chonun oup mi enlet o mi fich ngeni mi enlet o mi fich ngeni ngunumi.” (1 Piter 2:2) Ussun chok emon monukol a mwoneiti chonun oupun inan we, ekkewe Chon Kraist mi miritiiti ar osupwang lon pekin ngun ra pwal pwapwaesini ar alleani an Kot we Kapas. A ina ussun meefiom? Ika kese meefi ina ussun, kesap lolilen. Kopwe pwal tongeni amaaraata om mochen alleani an Kot we Kapas.

4. Met a lamot ika sipwe eorenalo ach akkalleaan Paipel?

⁴ Ren om kopwe fori ena mettoch, kopwe akkom emmiriiti pwisin en pwe kopwe eorenalo alleaan Paipel, iteiten ran ika ka tawe ngeni. (Fofor 17:11) Eli kese tongeni alleani ewe Paipel eu awa iteiten ran ussun Nasho Dori a fori, nge ese mwaal kopwe tongeni filata ekis fansoun iteiten ran ren om kopwe alleani ewe Kapasen Kot. Chommong Chon Kraist ra muttir nennelo pwe repwe ekieki ussun eu poraus lon ewe Paipel. Esap ina eu mettoch mi murinno pwe sipwe poputani ewe ran? Ekkoch ra saani ar repwe alleani ewe Paipel mwen repwe mour. Nge pwal ekkoch ra alleani ewe Paipel lon ekkoch fansoun mi och ngeniir. Ewe mettoch mi lamot pwe sipwe akkalleani ewe Paipel. Mwirin, ekiekifichi met ka fen alleani. Sipwe poraus ussun ekkoch aramas mi fen kuna feioch seni ar akkalleani me ekiekifichi ussun an Kot we Kapas.

Emon Soumak Kol Mi Tongei an Kot we Alluk

5, 6. Inaamwo sise silei itan, nge, met sipwe tongeni kaeo ussun ewe sou makkei Kol Fel 119 ren ach alleani me ekiekifichi minne a makkei?

⁵ Ewe emon a makkei Kol Fel 119 a fokkun aucheani ewe Kapasen Kot. Io a makkei ena kol? Ewe Paipel ese affata ewe soumak. Iwe nge, seni masouan ewe kol, sia tongeni kaeo ekkoch porausan, me sia silei pwe a pwal wor osukosuk lon manauan. Ekkoch chienan mi pwal fel ngeni Jiowa rese aucheani ekkewe alluk lon Paipel ussun i a aucheani. Nge, ewe soumak kol ese mut ngeni ena mettoch an epwe pinei an fori minne mi pwung. (Kol Fel 119:23) Ika ka nonnom are angangfengen ren emon ese sufoliiti allukun Paipel, eli kopwe kuna lollopokuun nonnomun ewe soumak kol me om we.

⁶ Inaamwo ika ewe soumak kol emon mi niuokkusiiti Kot, nge ese lukuluku pwisin an pwung. A pwisin apasawu an kewe tipis. (Kol Fel 119:5, 6, 67) Iwe nge, ese mut ngeni tipis an epwe nemeni i. “Meeta emon aluwol epwe fori pwe an fofor epwe limelimoch?” a kapas eis. A polueni: “Epwe mamasa usun mi fich ngeni om kapas.” (Kol Fel 119:9) Mwirin, a itelapei manamanen ewe Kapasen Kot fan iten fisitaan minne mi pwung lupwen a apasa: “Ua fen iseis om kapas lon letipei, pwe usap fori tipis ngonuk.” (Kol Fel 119:11) Pwungun pwe a mmen pochokkul eu manaman mi tongeni alisata ach sisap tipis ngeni Kot!

7. Met popun ekkewe sarafo repwe ita akaewin ekiekifichi ussun ewe lamoten ar repwe alleani ewe Paipel iteiten ran?

⁷ Epwe och ngeni ekkewe sarafo Chon Kraist ar repwe ekiekifichi ussun an ewe soumak kol kapas. Mei wor a toki ekkewe sarafo Chon Kraist ikenai. Ewe Tefil epwe fokkun mochen an epwe aingaualo ewe minefo tettelin chon fel ngeni Jiowa. Setan a achocho le etipetipa ekkewe sarafoon Chon Kraist pwe repwe fori alon mochenian fituker me ataielo an Kot kewe alluk. Fan chommong ekkewe TV prokram me kachito ra pwarata ekiekin Setan. Ekkewe aramas lon ekkena prokram ra lioch me atoch me ussun ita ir mi aramasoch; ra pwarata pwe esor ngauen ewe lisowu mwaal lefiler. Ifa ewe poraus? ‘Ese ngau ika ruuemon rese pupulu repwe lisowu ika ra wesewesen tongfengen.’ A mmen alolilen pwe iteiten ier fitemon sarafo Chon Kraist ra tupulo ren ena esin ekiek. Fan ekkoch ar luku a unusen talo. Pwungun pwe a mmen pochokkul ewe minen etipetip! Nge weween pwe a kon pochokkul ewe minen etipetip pwe ekkewe sarafo resap tongeni likiitu? Esap ina ussun! Jiowa a fen awora och alillis ngeni ekkewe sarafoon Chon Kraist fan iten ar resap kkuf fan mochenia ingau. Repwe tongeni u ngeni ekkewe pisekin maun ese lifilifil ewe Tefil epwe tongeni fori ren ar ‘mamasa usun mi fich ngeni an Kot we Kapas, me iseis kapasen Kot lon letiper.’ Ifa ttamen ewe fansoun ka nounou le akkalleani me ekkekieki ussun ewe Paipel?

8. Ifa ussun ekkewe poraus a mak lon ei parakraf epwe alisuk pwe epwe lapelo om aucheani ewe Allukun Moses?

⁸ Ewe sou makkei Kol Fel 119 a apasa: “Ifa lapalapen ai aucheani om alluk!” (Kol Fel 119:97) A fos ussun menni alluk? Ngeni ewe kapasen Jiowa mi fen pwalo, kapachelong ewe Allukun Moses. Eli emon a keran kuna ewe Alluk epwe ekieki pwe ese chuen och ngeni ei fansoun me ekieki ifa ussun emon epwe tongeni tongei. Iwe nge, lupwen sia ekiekifichi ussun ekkewe sokkopaten kinikinin ewe Allukun Moses, ussun ewe soumak kol a fori, sipwe tongeni miritiiti watteen ewe tipatchem lon ena Alluk. Ese chok masou ren chommong oesini, nge mei pwal wor alluk ussun alimelim me mongo, me ekkeei mettoch a alisata limelimoch me pochokkulen inis. (Lifitikos 7:23, 24, 26; 11:2-8) Ewe Alluk a pese ngeniir ar repwe wenechar lon business me ar repwe pwarata tong ngeni chiener kewe chon fel mi osupwang. (Ekistos 22:26, 27; 23:6; Lifitikos 19:35, 36; Tuteronomi 24:17-​21) Repwe eani kapwung ngeni ekkewe aramas fan pwung. (Tuteronomi 16:19; 19:15) Lupwen ewe sou makkei Kol Fel 119 a miritilo, ese mwaal a kuna sopwochun chokkewe mi apwonueta an Kot kewe Alluk, ina popun a lapelo an saani ewe Alluk. Ussun chok ikenai, lupwen ekkewe Chon Kraist ra sopwoch lupwen ra apwonueta ekkewe allukun Paipel, ar tong me kilisou fan iten Kapasen Kot a pwal lapelo.

Emon Samol Ese Nioukkus le Pwarata Pwe I Mi Sokkolo

9. Met sokkun ekiek King Hesekaia a amaaraata ussun ewe Kapasen Kot?

⁹ Masouen Kol Fel 119 a tipeeu ngeni met sia silei ussun Hesekaia lupwen a chuen emon samol mi kukkun. Ekkoch sou kaeo Paipel ra ekiekieta pwe Hesekaia ewe sou makkei ewe kol. Inaamwo ika ese ffat ika mei pwung ei poraus, sia silei pwe Hesekaia a sufoliiti an Kot we Kapas. Ren lapalapen manauan, a pwarata pwe a unusen tipeeu ngeni ekkewe kapas lon Kol Fel 119:97. Ewe Paipel a apasa ussun Hesekaia: “A kamwochunuk won ewe Samol mi Lapalap, esap fokun aleasolap ngeni, nge a apwonueta ekewe alluk meinisin ewe Samol mi Lapalap a alluk ngeni Moses.”​—2 King 18:6.

10. Epwe ifa ussun ewe leenien appiru Hesekaia a isetiu epwe apochokkula ekkewe Chon Kraist nge semer me iner rese niuokkusiiti Jiowa?

¹⁰ Me ren ekkewe poraus meinisin, Hesekaia ese maarita lon eu famili mi niuokkusiiti Kot. Seman we, King Ahas, emon chon fel ngeni uluulun mi lukulukummang me a keni emon are lap seni emon lein noun kewe lupwen a chuen manau​—pwiin Hesekaia​—ren an epwe asor ngeni emon kot chofona! (2 King 16:3) Inaamwo ika a wor ei leenien appiru mi ngau mwen Hesekaia, nge a tongeni “fori mine a pwung” me ese kkuf ren etipetipaen ekkewe rese luku Kot ren an kakkaeo Kapasen Kot.​—2 Kronika 29:2.

11. Atun Hesekaia a katol, ifa mwiriloon fofforun seman we mi lukulukummang?

¹¹ Lupwen Hesekaia a mammaarita, a kuna ifa ussun an seman we mi fel ngeni uluulun a nemeni ewe Fonu. Chon oput ra rokopwalli Juta. Rezin, ewe kingen Siria, a fiti King Pekah seni Israel le toki Jerusalem. (2 King 16:5, 6) Ekkewe Chon Edom me ekkewe Chon Filistia ra sopwoch le maunei Juta me pwal mwo nge liapeni ekkoch telinimw lon Juta. (2 Kronika 28:16-​19) Ifa ussun Ahas a sotun le pwakini ekkeei osukosuk? Ese tingor an Jiowa alillis le u ngeni Siria, nge a kulu ngeni ewe kingen Asiria, me a emichimich le liffang ngeni kolt me silifer, kapachelong ekkewe a nonnom lon an ewe imwen fel leenien iseis moni. Nge ei mettoch ese wato kinamwe mi enlet ngeni Juta.​—2 King 16:6, 8.

12. Epwe lamot pwe Hesekaia epwe fori met pwe esap tapwelo mwirin fofforingauen seman we?

¹² Lo, lo, lo, Ahas a malo me Hesekaia a wiliiti king lupwen a tori 25 ierin. (2 Kronika 29:1) Hesekaia a chok kukkun, nge ena mettoch ese pinei an epwe sopwoch lon wiisan we wiisen king. Ese appiru fofforun seman we mi lukulukummang, nge a alleasochisi Allukun Jiowa. Ei alleasochis a kapachelong eu alluk mi sokkolo auchean fan iten ekkewe king: “Lupwen [ewe king] epwe tolong lon wisan wisen king lon mwun, epwe apiruelong lon eu puk ekei alluk fan itan seni ewe puk mi nom fan tumwunuen ekewe souasor ir chon ewe ainangen Lefi. Ewe puk epwe nom ren, pwe epwe aleani lon ranin manauan meinisin, epwe pwal tongeni kaio seni usun an epwe meniniti ewe Samol mi Lapalap an we Kot ren an aleasochisi kapasen ekewe alluk me ekewe pwuung meinisin.” (Tuteronomi 17:18, 19) Ren an alleani Kapasen Kot iteiten ran, Hesekaia epwe kaeo le niuokkusiiti Jiowa me epwe alisata an esap appiru tipisin seman we ese niueiti Kot.

13. ifa ussun epwe ffat ngeni emon Chon Kraist pwe mettoch meinisin a fori lon pekin ngun epwe sopwoch?

¹³ Ewe kapasen pesepes pwe repwe ekkekieki an Kot we Kapas esap chok fan iten ekkewe king nge fan iten Chon Israel meinisin mi niuokkusiiti Kot. Ewe aewin Kol a awewei emon mwan mi unusen pwapwa ussun emon mi “pwapwaiti allukun ewe Samol, o a fakkun ekieki usun an we alluk, le ran me lepwin.” (Kol Fel 1:1, 2) Ewe soumak kol a apasa ussun ena esin mwan: “Mettoch meinisin minne a fori epwe sapoch.” (Kol Fel 1:3) Nge, ussun emon mi nafangau an lukuluk won Jiowa Kot, ewe Paipel a apasa: “Emon mi tipemwaramwar o wiliwilikkis lon an kewe fofor meinisin.” (Jemes 1:8) Kich meinisin mi mochen ach sipwe pwapwa me sopwoch. Akkalleaan Paipel me miritiiti aucheaan epwe tongeni alapalo ach pwapwa.

An Kot We Kapas a Alisi Jises Pwe Epwe Likiitu

14. Ifa ussun Jises a pwarata an tongei ewe Kapasen Kot?

¹⁴ Eu fansoun, seman me inan ra kuna Jises atun a mommot lein ekkewe sense lon ewe imwen fel lon Jerusalem. Ekkewe sou silei Allukun Kot ra “weitifengennir ren an tipatchem o ren an kapas”! (Luk 2:46, 47) Ena mettoch a fis lupwen Jises a keran 12 ierin. Ewer, pwal mwo nge ewe atun a chuen kukkun, a fokkun saani ewe Kapasen Kot. Nge mwirin, Jises a nounou ewe Paipel ren an epwe apwungu ewe Tefil, ren an apasa: “Aramas resap manau ren pilaua chok, pwe ren iteiten kapas meinisin mi tou seni auen Kot.” (Mattu 4:3-​10) Ekiselo chok mwirin ena, Jises a afalafal ngeni ekkewe aramas lon fonuan we Nasaret, ren an nounou ewe Paipel.​—Luk 4:16-​21.

15. Ifa ussun Jises a isetiu eu leenien appiru lupwen a afalafal ngeni aramas?

¹⁵ Fan chommong Jises a aloni alon ewe Kapasen Kot pwe epwe anetata aitian kewe. Chokkewe mi auseling ngeni ra “weitifengen ren an afalafal.” (Mattu 7:28) Me sisap mairu ren aitien Jises pun a feito seni Jiowa Kot! Jises a apasa: “Ai afalafal esap ai, pwe an ewe emon mi tinieito. Ewe mi pwisin kapas a chok kutta pwisin an ling, nge ewe mi kutta lingen ewe emon a tinato i, atewe mi enlet, o esor och mi chofona lon.”​—Jon 7:16, 18.

16. Ifa ukuukun an Jises pwarata tongen ewe Kapasen Kot?

¹⁶ Jises ese ussun ewe sou makkei Kol Fel 119 popun pun “esor an limengau.” Esor tipisin, i Noun Kot, ewe a “atekisonatiu o a chok alleasochisik tori malo.” (Filipai 2:8; Ipru 7:26) Nge, inaamwo ika Jises mi unusoch, a kaeo me alleasochisi ewe Allukun Kot. Iei ewe mettoch mi lamot a atufichi an likiitu lon an luku. Lupwen Piter a nounou efoch ketilas pwe epwe pinei an aramas aresini noun we Masta, Jises a apwungu ewe aposel me eisini: “Ka ekieki pwe usap tongeni tingor ngeni Semei, nge iei chok epwe tinato rei lap seni engol-me-ruu mwichen chonlang? Nge ifa usun pwonuetan maken ekkewe puk pwe epwe chok iei usun?” (Mattu 26:53, 54) Ewer, pwonuetaan ewe Kapasen Kot a auchea ngeni Jises lap seni an epwe ti seni malo mi weires me asau. A ifa me watteen an tongei an Kot we Kapas!

Pwal Ekkoch Chon Appiru Kraist

17. Ifa aucheaan ewe Kapasen Kot ngeni ewe aposel Paul?

¹⁷ Ewe aposel Paul a mak ngeni chienan kewe Chon Kraist: “Oupwe appiruei, usun chok ngang ua appiru Kraist.” (1 Korint 11:1) Ussun chok noun we Masta, Paul a amaaraata tong fan iten ewe Kapasen Kot. A apasa: “Lon letipei ua fokkun tongei an Kot kewe Alluk.” (Rom 7:22, The Jerusalem Bible) Paul a aloni ewe Kapasen Kot fan chommong. (Fofor 13:32-​41; 17:2, 3; 28:23) Lupwen a ereni Timoti, chienan chon afalafal mi achengicheng, Paul a menlapei lon an saingoon poraus ifa ukuukun an Kot we Kapas epwe ita kku manauen “noun kot aramas” meinisin iteiten ran.​—2 Timoti 3:15-​17.

18. Awewei mwo porausen emon, lon ei fansoun, mi pwarata sufol ngeni ewe Kapasen Kot.

¹⁸ Chommong chon angangen Jiowa mi tuppwol ikenai ra pwal appiru an Jises tong fan iten ewe Kapasen Kot. Le poputaan ei senturi, chienan emon aluwon a ngeni eu Paipel. A awewei meefian ussun ei liffang mi fokkun auchea: “Ua uppos le akkota lon manauei ai upwe alleani ekis seni ewe Paipel iteiten ran.” Iten ena aluwon, Frederick Franz, me an tong fan iten ewe Paipel a emmwen ngeni an pwapwaesini manau mi langattam me sopwoch lon an Jiowa we angang. Chommong aramas ra chechchemeni ifa ussun a tufichin apasawu fite sopwun seni ewe Paipel a fen amwochuluku.

19. Ifa ussun ekkoch ra akkotaochu ar alleaan Paipel iteiten wiik fan iten ewe Theocratic Ministry School?

¹⁹ Chon Pwarata Jiowa ra afanni ewe lamoten akkalleaan Paipel iteitan. Iteiten wiik, fan iten ar ammonlata ngeni eu lein ar kewe mwiich, ewe Theocratic Ministry School, ra alleani fite sopwun lon ewe Paipel. Atun ewe mwiich, ra poraus ussun menlapen ewe alleaan Paipel fan iten ewe wiik. Ekkoch Chon Pwarata ra aineti ewe alleaan Paipel ngeni fisu kinikin me ra alleani eu kinikin iteiten ran. Lupwen ra allea, ra ekiekifichi ussun ewe poraus. Ika ra tawe ngeni, ra pwal fori research ren alillisin ekkewe puken aweween Paipel.

20. Met a lamot ika epwe naf ewe fansoun fan iten akkalleaan Paipel?

²⁰ Eli epwe lamot om kopwe ‘kamo fansoun mi fich’ seni ekkewe ekkoch angang ren om kopwe akkalleani ewe Paipel. (Efisus 5:16, New World Translation) Iwe nge, ekkewe feioch epwe toruk epwe lap seni minne kopwe fangelo. Lupwen ka angang ngeni om kopwe eorenalo om akkalleaan Paipel iteiten ran, om tong fan iten ewe Kapasen Kot epwe lapelo. Ekiselo chok, kopwe tongeni fiti ewe soumak kol le apasa: “Ifa lapalapen ai aucheani om alluk! Ua chok ekieki usun ran meinisin.” (Kol Fel 119:97) Ena sokkun ekiek epwe wato feioch watte iei me lon mwach kkan, ussun ewe poraus mwirin epwe aitingenikich.

Ka Chechchemeni?

◻ Ifa ussun ewe sou makkei Kol Fel 119 a pwarata tong mi alollon fan iten ewe Kapasen Kot?

◻ Ikkefa ekkewe lesen sipwe kaeo seni ekkewe leenien appiru Jises me Paul ra isetiu?

◻ Ifa ussun ach tong fan iten ewe Kapasen Kot epwe maarita?

[Sasing lon pekin taropwe 20]

Ekkewe king mi tuppwol repwe akkalleani ewe Kapasen Kot. En ka fori ina ussun?

[Sasing lon pekin taropwe 22]

Jises a tongei ewe Kapasen Kot, pwal mwo nge lupwen a chuen kukkun