“Eu Fansoun Kinamwe” A Arapoto!

“Ren mettoch meinisin a wor ar fansoun, . . . eu fansoun maun me eu fansoun kinamwe.”​—EKLESIASTIS 3:1, 8.

1. Ifa ewe mettoch mi amairu a fen pwalo lon ewe aruween senturi ussun maun me kinamwe?

A lap ngeni aramas mi tipeni kinamwe, nge a ffat ewe popun. Kinamwe lon ei aruween senturi a kis seni ewe kinamwe lon ekkewe senturi lom meinisin lon uruwoon fonufan. Mi amairu ena poraus, pun an aramas achocho le alukulukatiu kinamwe lon ei fansoun a fen kon lap seni ekkewe fansoun lom meinisin. Lon 1920 a fisita ewe League of Nations. Lon 1928 a foruta ewe Kellogg-Briand Pact, nge eu puk a apasa pwe “iei a lap me lein eu tettelin foffor fan iten forutaan kinamwe mwirin ewe Aewin Maunen Fonufan,” iwe, “arapakan meinisin muun fonufan . . . ra tipeeufengen lon ar apasa pwe ese pwung an epwe kapachelong maun lon an ekkewe muu kokkot fan iten pwonutaan ar angang.” Iwe, lon 1945 a foruta ewe United Nations fan iten siwilin ewe League of Nations, nge a fen kaulo angangen ewe League me inet ewe.

2. Met ewe United Nations a ekiekin apwonueta, me ifa ukuukun an tufichin fori ena mettoch?

² Ussun chok ewe League, a for ewe United Nations fan iten an epwe alukulukatiu kinamwe won fonufan. Nge ese tongeni apwonueta ena mettoch fansoun meinisin. Pwungun pwe ese fiffis won fonufan iei ewe sokkun maun mi lollo ngeni ekkewe ruu maunen fonufan. Nge, a wor chommong kukkun maun mi angei seni fitepuku ngerou aramas kinamween letiper, pisekir, me fan chommong, manauer. Sipwe ita apilukuluku pwe ewe United Nations epwe tongeni awilaalo ewe ruwe me aewin senturi ngeni “eu fansoun kinamwe”?

Minne Epwe Efisata Kinamwe mi Enlet

3. Pwata kinamwe mi enlet esap tongeni nomfengen me oput?

³ Esap tongeni wor kinamwe lefilen aramas me muu ren chok an aramas eani ewe ekiekin mutata ekkoch mettoch an epwe fiffis. Emon epwe tongeni wesewesen kinamwefengen me emon a kan oput? Esap pwak ena me ren 1 Jon 3:15: “Emon mi oput pwiin, i emon chon nnielo aramas.” (NW) Kanoto chok, uruwo a pwarata pwe oput leutun aramas a mecheresin efisata fofforun nni aramas.

4. Io chok epwe tongeni kuna kinamwe, me met popun?

⁴ Pokiten Jiowa “ewe Kot mi atoto kinamwe,” (NW) ekkewe chok aramas mi tongei Kot me sufoliiti an kkewe alluk mi pwung repwe tongeni kuna kinamwe. A ffat pwe Jiowa ese kan awora kinamwe ngeni meinisin. “‘Ese wor kinamwe,’ ai Kot a fen apasa, ‘ren ekkewe mi ngau.’” (NW) A ina ussun pun ekkewe mi ngau rese mochen nonnom fan emmwenien an Kot ngun mi fel, nge kinamwe eu uwaan ena ngun.​—Rom 15:33; Aisea 57:21; Kalesia 5:22.

5. Ifa ewe mettoch Chon Kraist mi enlet resap fokkun tongeni fori?

⁵ Chon Kraist mi enlet resap fokkun tongeni maun ngeni chiener kkewe chon fonufan​—nge fan chommong a ina ussun chokkewe mi apasa pwe ir chon Kraist, akkaewin, lon ei aruween senturi. (Jemes 4:1-4) A enlet pwe ra kan maun ngeni ekkewe afalafal mi chofona ussun Kot, nge ar maun a kan alisi aramas, nge esap efeiengauer. Ewe lamalamen Kraist mi enlet a mmen mwaalfesen me ewe fofforun eriaffou aramas pokiten mi sokkolo ar lamalam are ewe fofforun nnielo aramas fan iten kokkotun ekkewe muu. Iei an Paul emmwen ngeni chon Kraist lon Rom: “Are mi tufich, ukukun minne oua tongeni, oupwe kinamwefengen me aramas meinisin.”​—Rom 12:17-​19; 2 Timoti 2:24, 25.

6. Ia chok kinamwe epwe tongeni nom ie ikenai?

⁶ Ikenai, ewe kinamwe lang a awora epwe nom ren chok ekkewe chon fel mi enlet, chon fel ngeni Jiowa Kot. (Kol Fel 119:165; Aisea 48:18) Sokkofesenin muur kkewe ese kan atai ar tipeeu, pun won unusen fonufan rese fiffiti mwokutukutun ekkewe muu. (Jon 15:19; 17:14) Pokiten ir mi “eufengen chok, lon ekiek eu o tipeeu,” ar kinamwe esap tongeni talo pun ese sokkofesen ekkewe afalafal ra luku. (1 Korint 1:10) Ewe kinamwe Chon Pwarata Jiowa ra pwapwaesini a ussun eu manaman lon ei fansoun, nge ina efisien Kot mi tipeeu ngeni an ei pwon: “Upwe seikata kinamwe pwe epwe samolunikemi, nge pwung epwe nemenikemi.”​—Aisea 60:17; Ipru 8:10.

Pwata Iei “eu Fansoun Maun”?

7, 8. (a) Inaamwo ika Chon Pwarata Jiowa, ir aramas mi kinamwe, nge met ra ekieki ussun ach ei fansoun? (b) Menni pisekin maun Chon Kraist ra akkaewin akkaea?

⁷ Inaamwo ika ir aramas mi kinamwe, nge Chon Pwarata Jiowa ra luku pwe iei akkaewin “eu fansoun maun.” Nge esap ina wesewesen maun, pun ar eriani aramas pwe repwe luku porausen Paipel ren ar aea pisekin maun epwe u ngeni an Kot kapasen etiwetiw mi apasa “eka e mochen, epwe angefatei chok ewe koniken manau.” (Pwarata 22:17) Ar angang esap och minen erian! Ewe maun Chon Pwarata Jiowa ra eani a fiffis lon chok pekin ngun. Iei makkeien Paul: “Pisekin ach maun esap minen fonufan, nge mi wor ar manamanen Kot pwe repwe atailo ekkewe leeni mi pochokkul.”​—2 Korint 10:4; 1 Timoti 1:18.

⁸ Ewe nampa eu “pisekin ach maun” a wewe ngeni “katilasen ewe Ngun, ewe kapasen Kot.” (Efisus 6:17) Ei ketilas a manaman. “Ewe kapasen Kot mi manau o manaman, a ken seni sokkun katilas meinisin mi ken me ruu epek, o a tu ngeni aimufeseni manau o ngun, o pwal ekkewe kailen chuu me masouen chuu; o a pwal tongeni apungu ekkewe ekiek o mochenian letipach.” (Ipru 4:12) Ren ar nounou ena ketilas, chon Kraist ra tufichin pokuetiu ekkewe “ekiek me meinisin mettoch mi tekia mi appolua silelapen Kot.” (2 Korint 10:5) A atufichir ar repwe pwari afalafal mi chofona, foffor mi efeiengau, me ekkewe sokkun ekiek mi popu seni tipachchemen aramas nge esap tipachchemen lang.​—1 Korint 2:6-8; Efisus 6:11-​13.

9. Pwata sisap tongeni ukutiu lon ach maun ngeni futukach mi tipis?

⁹ Pwal eu sokkun maun lon pekin ngun a weneiti futukach mi tipis. Chon Kraist ra kan appiru fofforun Paul, nge iei makkeian: “Ua pwisin afolu inisi, pwe epwe fakkun nonnom fan nemenien letipei; pwe ute afalafala ngeni ekkoch nge pwisin ngang ua poutmwalilo.” (1 Korint 9:27) A mak och fon ngeni chon Kraist lon Kolose pwe repwe nnielo “kifetin inisir mi nom won fonufan fan iten lisowu mwaal, foffor mi limengau, mocheisou, mocheniangau, me tipelap, pwe ina fofforun fel ngeni mettoch mi chofona.” (Kolose 3:5, NW) Iwe, ewe soumakken Paipel Juta a pesei chon Kraist “pwe repwe achocho le maun fan asengesin ewe luku mi kawor ngeni ekkewe aramas mi fel fan eu chok.” (Juta 3, NW) Pwata sipwe fori ena mettoch? Iei makkeien Paul: “Ika manauemi epwe fitalo mochenien inisimi oupwe wesewesen malo; nge ika oupwe nnielo fofforun ewe inis ren ewe ngun, oupwe manau.” (Rom 8:13, NW) Pokiten a ffatoch ena poraus, esap tongeni ukutiu ach maun ngeni ekkewe lapalap mi ngau lon inisich.

10. Met a fis lon 1914, nge epwe emmwen ngeni met ekiselo chok lon mwach kkan?

¹⁰ Iei pwal eu popun sipwe ekieki pwe iei eu fansoun maun. Epwele war “ewe ranin kapwung seni ach Kot.” (Aisea 61:1, 2, NW) Lon 1914, a war ewe fansoun Jiowa a filata fan iten an epwe poputani ewe Muun Messaia me awiisa ngeni an epwe maun ngeni an Setan we otot. Lon ena atun a much ewe fansoun mi mumuta ngeni aramas ar repwe sotun forata ar kkewe nemenem, nge lang esap eppetiir. Nge a lap me lein aramas ar ra u ngeni ewe Sou Nemenem, ewe Messaia, Kot a seikata, nge a pwal ina ussun aramas lon ewe aewin senturi. (Fofor 28:27) Ina minne, pokiten an aramas u ngeni ewe Muu, Kraist a “lo fori an angangen akkuf lein chon koputan.” (Kol Fel 110:2, NW) Sia pwapwa pwe Pwarata 6:2 a pwonei nge i epwe “awesochu an angangen akkuf.” Epwe fori ena mettoch lon “ewe maun lon ewe ran mi lapalap, ranin ewe Kot mi Unusen Tekia . . . , ewe mi iteni lon fosun Ipru Har–Magedon.”​—Revelation 16:14, 16, NW.

Iei “Eu Fansoun Kapas”

11. Met popun Jiowa a fen wesewesen mosonottam, nge lo, lo, met epwe fis?

¹¹ Seni 1914, nge iei ewe ier a fis watte siwil lon kokkotun chon fonufan, a fen lulo 85 ier. A mmen watte mosonottamen Jiowa ngeni chon fonufan. A fen affataochu ngeni noun kkewe Chon Pwarata ussun choun ei fansoun. Manauen fite, fite milion epwe tongeni poutulo. Mi fichiiti ekkena chommong aramas ar repwe rong ewe ourour pun “Jiowa . . . ese mochen pwe pwal mwo nge emon epwe nninniilo nge a mochen pwe meinisin repwe aier.” (2 Piter 3:9, NW) Iwe nge, ekiselo chok epwele war “pwapwaaloon ewe Samol Jises seni lang fitifengen me noun kkewe chonlang mi manaman.” Iwe, meinisin mi fen pwisin filata ar repwe puratiu porausen an Kot we Muu repwe kuna ewe “kapwung” Jises epwe apwonueta “ngeni ir rese silei Kot me ir rese alleasochisi ewe poraus allim ussun ach Samol Jises.”​—2 Tesalonika 1:6-9, NW.

12. (a) Pwata esor lamoten an aramas pwisin meefata inet ewe riaffou mi lapalap epwe poputa? (b) Ifa ewe ourour Jises a eani ussun ena mettoch?

¹² Inet mosonottamen Jiowa epwe muchulo? Esor lamoten aramas repwe esissin won inet ewe “riaffou mi lapalap” epwe poputa. A mmen ffat alon Jises ei: “Ussun ena ran me ena kulok esor emon mi silei.” Nge iei an fon: “Ina minne, oupwe mammas, pun ouse silei lon menni ran ami Samol epwe war. . . . Oupwe ammonlakemi, pun lon eu kulok ami ouse ekieki ussun, ewe Noun aramas epwe war.” (Mattu 24:21, 36, 42, 44, NW). A wewe ngeni pwe iteiten ran sipwe ita pippi met a fiffis won fonufan me ekieki poputaan ewe riaffou mi lapalap. (1 Tesalonika 5:1-5) A mmen efeiengau ach sipwe ekieki pwe sipwe tongeni angangpwotete chok, me eani ewe sokkun manau aramas ra eoreni ikenai, nge pwal witiwiti chok met sokkun mettoch epwe fisita! Iei alon Jises: “Oupwe tuttumunukemi pwe letipemi ete choutiu ren mongommong me unnummong me aurekin manau, iwe, muttir chok ena ran epwe mweterikemi ussun eu ssar.” (Luk 21:34, 35, NW) Iei eu mettoch sisap tipemwaramwar ussun: Ekkewe “ruaanu asapwalin” kata noun Jiowa kkewe “fomon chonlang” ra amwochu esap pinepin tori feilfeilo chok.​—Pwarata 7:1-3.

13. Arap ngeni wonu milion aramas ra fen miritiiti met?

¹³ Pokiten ena ranin kapwung epwe warekai, mi sokkolo lamoten alon Solomon ussun “eu fansoun kapas.” (Eklesiastis 3:7) Pokiten ar miritiiti pwe iei wesewesen eu fansoun kapas, arap ngeni wonu milion Chon Pwarata Jiowa ra kan tinikken le kakkapas ussun lingen an Kot nemenem me ra ouroura aramas ussun an we ranin kapwung. Ra kan tipemecheresin asoresini manauer lon ei ranin an Kraist maun.​—Kol Fel 110:3; 145:10-​12.

Ir Mi Apasa “Kinamwe, Lupwen Esor Kinamwe”

14. A wor met sokkun soufos chofona lon ewe afisuen senturi B.C.E.?

¹⁴ Atun ewe afisuen senturi B.C.E., noun Kot kkewe soufos, Jeremaia me Isikiel, ra uwei porausen kapwung seni lang ngeni Jerusalem pokiten an alleasolap ngeni Kot. Ewe kata ra oesini ussun a fis lon 607 B.C.E., inaamwo ika ekkewe nouwiisin lamalam mi tekia me foummong ra u ngeni alon noun Kot kkewe soufos. Mwirin, a ffatolo pwe ekkena nouwiis, ir “soufos mi tiparoch . . . mi atokalo noun [Kot] kewe aramas, pwe ra apasa, ‘A wor kinamwe!’ lupwen esor kinamwe.”​—Isikiel 13:1-​16; Jeremaia 6:14, 15; 8:8-​12.

15. A wor ena sokkun soufos chofona ikenai? Awewei mwo.

¹⁵ Ussun chok ekkewe “soufos mi tiparoch” lon ena fansoun, a lap me lein ekkewe nouwiisin lamalam ikenai rese pwal ouroura aramas ussun waren an Kot we ranin kapwung. Nge, ra kan michi aramas ren ar apasa pwe ekkewe muu repwe forata kinamwe me lukulukoch. Pokiten ar mochen apwapwai aramas lap seni Kot, ra kan ereni nour kkewe aramas minne ra mochen rong, nge rese awewei ngeniir pwe an Kot we Muu a fen uta me ewe King Messaia epwele awesi an angangen akkuf. (Taniel 2:44; 2 Timoti 4:3, 4; Pwarata 6:2) Pokiten ir soufos chofona, ra pwal kapas ussun “kinamwe, lupwen esor kinamwe.” Nge ar lukuluk epwele wiliiti niuokkus lupwen repwe sapfengen me songen ewe Emon ra fen kapas chofona ussun me itan we ra fen achuukata kapasen esiit won. Ekkewe nouwiis lon ewe mwicheichen lamalam mi chofona, ewe mi nom won unusen fonufan, nge a ussun emon fefin mi sikepwach lon Paipel, repwe kuna kapwung mi chou pokiten ar eani kapas mi otuputup ussun kinamwe.​—Pwarata 18:7, 8.

16. (a) A fen ffatolo pwe Chon Pwarata Jiowa, ir met? (b) Ifa ussun ra sokko seni ir mi apasa pwe a wor “kinamwe, lupwen esor kinamwe”?

¹⁶ Inaamwo ika a lap me lein ekkewe nouwiis mi tekia me foummong ra akkaeani pwonen kinamwe mi likotuputup, nge ena mettoch ese kan siwili ekiekin ir mi luku an Kot pwon ussun kinamwe mi enlet. Ren lap seni ipuku ier, Chon Pwarata Jiowa ra fen anneta pwe ra tuppwol le fiu fan iten ewe Kapasen Kot, me ra pwora le u ngeni lamalam chofona, me ra tipeppos le peni an Kot we Muu. Sap minne ra michi aramas ren ar eani kapas mi orukoruk ussun kinamwe, nge ra kan achocho le ameef ngeni aramas pwe ikenai eu fansoun maun.​—Aisea 56:10-​12; Rom 13:11, 12; 1 Tesalonika 5:6.

Jiowa Ese Chuen Fanafanelo

17. Ifa ussun Jiowa esap chuen fanafanelo ekiselo chok?

¹⁷ Iei pwal alon Solomon: “Ewe Kot mi enlet epwe apwungu ewe emon mi pwung me ewe emon mi ngau, pun a wor eu fansoun ren mettoch meinisin.” (Eklesiastis 3:17, NW) Ewer, a wor eu fansoun Jiowa a fen filata fan iten an epwe apwonueta an kapwung won lamalam mi chofona me pwal won “ekkewe kingen fonufan mi u . . . ngeni Jiowa me noun we chon kepit.” (Kol Fel 2:1-6, NW; Pwarata 16:13-​16) Lupwen ena fansoun epwe war, epwe much ekkewe ranin an Jiowa “fanafanelo.” (Kol Fel 83:1; Aisea 62:1; Jeremaia 47:6, 7) Ren an nounou ewe King Messaia mi nennemenem, Jises Kraist, i epwe “fos” lon ewe chok sokkun fos chokkewe mi appolua i repwe weweiti: “Ussun emon mwan mi fokkun pochokkul Jiowa epwe ssalo. I epwe tinikken ussun emon sounfiu. Epwe puchor, ewer, epwe eani eu puchorun maun; epwe pwarata pwe a pochokkul mwen chon koputan. ‘Ua fen fanelo fansoun langattam. Ua faffanelo chok. Ua mokurechou chok. Ussun emon fefin mi nounou upwe ngungures, mwiengas, me ngaselap. Upwe ataielo ekkewe chuuk me leeni mi ppaneta, me upwe appwasa meinisin ekkewe fetil wor. Upwe awilaalo chanpupu ngeni too, me upwe amora ekkewe lolo. Upwe afetala chon mesechun lon eu lapalap resaamwo silei ussun; upwe paaniir pwe repwe ipwetiu won efoch al resaamwo silei ussun. Upwe awilaalo eu leeni mi rochopwak mi nom mwer ngeni saram, me siwili fonu mi sonongau pwe epwe sonosonoch. Ikkeei ekkewe mettoch upwe fori fan asengesir, me usap likitiirelo.’” ​—Aisea 42:13-​16, NW.

18. Ifa ussun noun Kot kkewe aramas repwe “fanafanelo” ekiselo chok?

¹⁸ Lupwen Jiowa epwe ‘foseta’ fan iten an epwe anneta pwe a pwung an Nemenem, esap chuen lamot ngeni noun kewe aramas ar repwe foseta fan iten ar repwe pwisin anneta pwungun ar angang. Epwe ina ewe fansoun repwe “fanafanelo.” Ekkeei kapas epwe weneitiir, ussun ar weneiti noun Kot kewe chon angang me lom: “Esor lamoten ami oupwe maun lon ei fansoun. Oupwe atettelikemi, ukkuta chok, me nengeni an Jiowa angangen amanau fan asengesimi.”​—2 Kronika 20:17, NW.

19. Met pwiin Kraist kkewe repwe wiisen fori ekiselo chok?

¹⁹ A fet watteen ar repwe kkuf Setan me an we mwicheich! Pwiin Kraist kkewe mi fen lingeta repwe pwal wiisen awora alillis le efisata eu fansoun pworacho mi amwarar fan iten minne mi pwung, nge epwe tipeeu ngeni ei pwon: “Ewe Kot mi awora kinamwe epwe achapapa Setan fan pechemi ekiselo chok.” (Rom 16:20, NW) Epwe ina ewe fansoun epwe fisita ewe kinamwe aramas ra fen witiwiti fansoun langattam.

20. Ekiselo chok epwe war ewe fansoun fan iten met?

²⁰ Epwe ifa me watteen feiochun ir meinisin won fonufan mi manau mwirin pwaloon an Jiowa manaman! Ekiselo mwirin ekkewe mwan me fefin mi tuppwol seni lom repwe etiir pun epwe fen war ewe fansoun repwe manausefal. An Kraist Engerou Ierin Nemenem epwe enletin “eu fansoun foffot, . . . , eu fansoun chikareta . . . , eu fansoun kau imw . . . , eu fansoun takir . . . , eu fansoun mwetemwet . . . , eu fansoun foropach me . . . eu fansoun tongfengen.” Ewer, epwe ina ussun me epwe “eu fansoun kinamwe” tori feilfeilo chok!​—Eklesiastis 3:1-8; Kol Fel 29:11; 37:11; 72:7.

Ifa Ussun Kopwe Polueni?

◻ Kinamwe mi nomottam a kan longolong won met?

◻ Pwata Chon Pwarata Jiowa ra ekieki pwe iei “eu fansoun maun”?

◻ Inet noun Kot kkewe aramas repwe “foffos,” me inet repwe “fanafanelo”?

◻ Ifa ussun me inet Jiowa esap chuen fanafanelo?

[Box on page 13]

Jiowa a Fen Filata eu Fansoun fan iten an epwe

◻ luki Kok pwe epwe maun ngeni noun Kot kkewe aramas.​—Isikiel 38:3, 4, 10-​12

◻ minalong lon letipen ekkewe nouwiisin muun ewe ekiekin ar repwe ataielo Papilon mi Lapalap.​—Pwarata 17:15-​17; 19:2

◻ fori apupuluun ewe Lam.​—Pwarata 19:6, 7

◻ poputani ewe maunen Armaketon.​—Pwarata 19:11-​16, 19-​21

◻ fotekini Setan ren an epwe poputa an Jises Engerou Ierin Nemenem.​—Pwarata 20:1-3

Ekkeei poraus epwe fis ra chok mak me ren tettelir lon Paipel. Esor tipemwaramwar pwe ekkena limu mettoch repwe fis me ren ifa ussun Jiowa a atetteliir me pwal lon chok ewe fansoun Jiowa epwe filata.

[Ekkewe sasing lon pekin taropwe 15]

An Kraist Engerou Ierin Nemenem epwe wesewesen eu fansoun . . .

takir . . .

foropach . . .

tongfengen . . .

foffot . . .

mwetemwetfetal . . .

kau imw . . .