En Kopwe Tongeni Likiitu Tori Ewe Sopwolon
“Sipwe chok likiitu le sa lon ewe kitir mi nom mwach.”—IPRU 12:1.
1, 2. Met weween ach sipwe likiitu?
“LIKIITU a lamot ngenikemi,” ina makkeien ewe aposel Paul ngeni ekkewe chon Kraist chon Ipru lon ewe aeuin senturi. (Ipru 10:36) Ewe aposel Piter a apochokkulata lamoten ena lapalap ren an pesei chienan kewe chon Kraist: “Oupwe apacha ngeni ami luku . . . likiitu.” (2 Piter 1:5, 6) Nge ifa weweochun likiitu?
2 A iei ussun eu puken affouni kapasen Krik ngeni fosun English a awewei ewe kapasen Krik mi affouni ewe kapas “likiitu,” a era pwe a wewe ngeni “nonnom nge sap su seni . . . uppwos, sap fangeta.” Ren ewe kapasen Krik “likiitu,” eu puken awewe a era: “Ina ewe tufichin mokurechou fan weires, sap chok ren an ekiekin fangeta, pwe ren eu apilukuluk mi fokkun pochokkul . . . Iei ewe lapalap mi atufichi emon mwan an epwe uta mwen ewe asapwal. Ina ewe lapalap mi tongeni siwili ewe fansoun mi fokkun weires ngeni ling pun lukun ewe riaffou a tongeni kuna minne epwe achocho ngeni.” Iwe, likiitu a atufichi emon an epwe uppwos fan sossot me weires nge esap pout seni an apilukuluk. A akkaeuin lamot ngeni io kewe ena lapalap?
3, 4. (a) A lamot ngeni io ewe mettoch likiitu? (b) Met popun sipwe likiitu tori ewe sopwolon?
3 Chon Kraist meinisin ra fiti eu kitir lon kapas monomon, nge a lamot ngenir ar repwe likiitu lon ena kitir. Orun ewe ier 65 C.E., ewe aposel Paul a mak ngeni chienan we chon angang me chon eti le sai itan Timoti ekkeei kapas mi apochokkula: “Ua fen fiti ewe maun mi murinno, ua fen awesalo ai kitir, ua fen akamwochu ewe luku.” (2 Timoti 4:7) Ren an apasa pwe a fen “awesalo [an] kitir,” Paul a alollofengenni an manaueni manauen chon Kraist me eu kitir, a wor efoch alan me eu tepkiri. Lon na fansoun, Paul a arap ngeni sopwolon ewe kitir, iwe, a lukuluk pwe epwe angei ewe liwinin. A sopweilo le apasa, “Seni iei fefeilo, ewe mwaramwar itan pung a fen iseis fan itei, ewe mwaramwar ewe Samol, ewe sou apwung mi pung, epwe ngeniei lon ewe Ran.” (2 Timoti 4:8) Paul a luku pwe epwe angei ewe liwinin pun a fen likiitu tori ewe sopwolon. Nge ifa ussuch?
4 Ren an epwe apochokkulata ir kewe mi poputa le fiti ewe kitir, Paul a makkei: “Sipwe likiitu le sa lon ewe kitir mi nom mwach.” (Ipru 12:1) Kich chon Kraist sia poputa le fiti ewe kitir lupwen sia fangelo manauach ngeni Jiowa Kot ren Jises Kraist. A lamot epwe murinno poputaan ach kitir, nge a akkaeuin lamot ach sipwe awesochuolo. Jises a apasa: “I mi likiitu tori sopwolon epwe kuna manau.” (Mattu 24:13) Ewe liwinin mi witiwiti ir kewe mi tori ewe tepkeri, ina manau esemuch! Ina minne, ren ach sipwe ekilapei ewe tepkeri, a lamot sipwe likiitu tori ewe sopwolon. Iwe, met epwe alisikich ach sipwe tori ewe tepkeri?
A Fokkun Lamot Mongo mi Fich
5, 6. (a) Ren ach sipwe likiitu lon ewe kitir fan iten manau, met sipwe ekilapei? (b) Ikkefa ekkewe minen alillis lon pekin ngun sipwe fokkun akkaea, iwe, pwata?
5 Arap ngeni ewe telinimw Korint, Kris, a nom ewe leeni ikewe ie ekkewe Isthmian Games mi itefoulo ra fiffis me lom lom. Ese mwaal Paul a mirititi pwe pwiin kewe chon Korint ra silei ussun ekkewe urumot me pwal ekkoch sokkun akkuf mi fiffis ikana ie. A kapas ussun minne ra silei, iwe, a achema ngenir ussun ewe kitir ra fiti fan iten manau: “Iwe, ifa ussun, ami ouse silei usun chon kitir, pwe ir meinisin repwe kitir, nge emon chok epwe angei winnan? Iwe, oupwe kitir pwe oupwe angei.” Paul a ekilapei lamoten ar repwe likiitu lon ewe kitir me sassa tori ewe sopwolon. Nge met epwe alisir ar repwe fori ena? A pwal era, “Iteiten chon kitir meinisin repwe onout ren mettoch meinisin.” Ewer, ekkewe chon urumot mi fiti ekkewe urumot lom lom ra fokkun rensu, tuttumunu minne ra mongo me un, me nemenifichi ar kewe foffor meinisin fan iten ar repwe win.—1 Korint 9:24, 25.
6 Ifa ussun ewe kitir ekkewe chon Kraist ra fiti? Emon elter lon eu mwichefelin Chon Pwarata Jiowa a apasa, “A fokkun lamot kopwe tuttumunu anom mongoon ngun ika kopwe likiitu lon ewe kitir fan iten manau.” Ekkekieki ewe mongoon ngun Jiowa, “ewe Kot mi akkawora likiitu,” a awora fan asengesich. (Rom 15:5) Akkaeuin sia angei mongoon ngun seni an we Kapas, ewe Paipel. Sisap achocho le awora fansoun iteitan fan iten ach sipwe alleani ewe Paipel? Ren “ewe chon angang mi tuppwol o tipatchem,” Jiowa a pwal awora ekkewe chassi The Watchtower me Awake! me pwal ekkoch puk mi alongolong won Paipel. (Mattu 24:45) Ach kakkaeofichi ekkena puk epwe apochokkulakich lon pekin ngun. Ewer, a lamot sipwe awora ewe fansoun—‘kukkutta ewe fansoun’—fan iten ach sipwe pwisin kaeo.—Efisus 5:16.
7. (a) Met popun sisap menemenoch ren ach sipwe chok silei ekkewe kaeon le popun? (b) Ifa ussun sipwe “feffeita ngeni asimau”?
7 Ren ach sipwe likiitu lon ewe alen Chon Kraist, a lamot ach sipwe silei lap seni ewe “kaeon le popun” me “feffeita ngeni asimau.” (Ipru 6:1) Iwe, sipwe amarata ach mochen silei “cholapan, are langattaman, are tekian, are alollolun” ewe enlet me kuna pochokkul seni ewe “mongo pochokkul [mi] och ngeni aramas asimau.” (Efisus 3:18; Ipru 5:12-14) Awewe chok, ekkewe ruanu puken porausen manauen Jises won fonufan—ekkewe puken Kapas Allim, iter Mattu, Mark, Luk, me Jon. Ren ach kaeofichi ekkeei puk, sisap chok silei fofforun Jises kewe me ewe sokkun aramas a wiliti pwe pwal lapalapen an ekiek mi amwokutu an kewe foffor. Epwe ina ussun sipwe tongeni “eani ekiekin Kraist.”—1 Korint 2:16.
8. Ifa ussun ach fiffiti an chon Kraist kewe mwich a alisikich le likiitu lon ewe kitir fan iten manau?
8 Paul a pesei chienan kewe chon luku: “Sipwe ekiekifichi usun ach sipwe apochokkula emon me emon lefilach lon tong o foffor-murinno. O sisap ukutiu seni ach mwichefengen, usun ekkoch ra fori, nge sipwe alolofengennikicheta, o alapalo ach achocho ngeni, pwe oua nengeni pwe ewe Ran a arapoto.” (Ipru 10:24, 25) A ifa me watten an ekkewe Chon Kraist mwich ra apochokkulatakich! Iwe, a fokkun murinno ach sipwe nom lein pwich kkewe mi tong, ir kkewe mi ekieki ussuch me mochen alisikich le likiitu tori ewe sopwolon! Sise mochen ekieki pwe a lamot kisikis ei minen alillis mi tong seni Jiowa. Seni ach pwisin kakkaeo me fiffiti mwich, ach ekiek “epwe ussun ekkewe mi tipemwan.”—1 Korint 14:20.
Ekkewe Chon Katol Ra Peppeseiok
9, 10. (a) Ifa ussun ekkewe chon katol repwe tongeni apochokkulata chon fiti eu kitir? (b) Ikkefa ‘ekkewe chommong chon pwarata mi pwellifeilikich, usun chok eu kuchi mi lap’ Ipru 12:1 a kapas ussun?
9 Iwe nge, inaamwo ika emon chon kitir epwe ammolnafich, nge och mettoch epwe tongeni fis pwe epwe eppeti i. “Ami sassa a murinno. Io a pineikemi seni ami alleasochisi ewe enlet?” (Kalesia 5:7) Pokiten ekkoch Chon Kraist chon Kalesia ra chiechi ngeni aramas mi ngau, ra rikilo seni ar fiffiti ewe kitirin manau. Iwe nge, alillis me kapasen pesepes seni ekkewe ekkoch epwe tongeni amecheresi ar likiitu lon ewe kitir. Epwe ina ussun ewe alillis epwe tongeni tori ekkewe chon kitir seni ekkewe chon katol ewe urumot. Ekkewe chon katol mi mwasangasang repwe apochokkula achochoon ekkewe sou urumot seni le poputaan tori ewe sopwolon. Fan chommong, puchorun ekkewe chon katol fengen me ekkewe kol mi osummong me ar pisipis epwe tongeni alisi ekkewe chon kitir atun ra tori amuchuloon kinikinin ewe kitir. Pwungun pwe ekkewe chon katol repwe tongeni alisi ekkewe chon kitir.
10 Lon ewe kitirin manau ekkewe Chon Kraist ra fiti, io kkewe repwe wewe ngeni ekkewe chon katol? Mwirin an eiteita ekkewe chon luku Jiowa lom mwen ewe fansoun Kraist, ussun an a mak lon Ipru sopwun 11, Paul a makkei: “Iei minne, pokiten mi wor ewe kuchuun chon pwarata mi pwellifeilikich, . . . sipwe chok likiitu le sa lon ewe kitir mi nom mwach.” (Ipru 12:1) Ren an eani kapas awewe won eu kuchu, Paul ese nounou ewe kapasen Krik mi wewe ngeni eu kuchu mi limelimoch napanapan. Nge, me ren emon lexicographer W.E. Vine, a nounou ewe kapas mi “wewe ngeni eu kuchu ese limelimoch napanapan lon lang.” A ffat pwe Paul a ekieki ussun eu mwichen chon pwarata mi chommong—ra kon lien chommong pwe ra ussun chok eu kuchu.
11, 12. (a) Ifa ussun ekkewe chon pwarata mi tuppwol mwen Kraist ra peppeseikich pwe sipwe likiitu le sa lon ewe kitir? (b) Ifa ussun epwe lapelo ach kuna feioch seni ‘chommong chon pwellifeilikich ussun chok eu kuchu mi lap’?
11 Mei tufich ngeni ekkewe chon luku lom lom ar repwe wesewesen chon katol ewe kitir ikenai? Aap. Ir meinisin ra fen malo, iwe, ra witiwiti ewe manausefal. Iwe nge, atun ra manau ir pwal chon kitir mi sopwoch, iwe, mi chuen manau ar leenien appiru lon ekkewe pekin taropween ewe Paipel. Lupwen sipwe kaeo ewe Paipel, ekkeei chon tuppwol repwe manaueta lon ach ekiek me amwokutukich pwe sipwe sassa lon ewe kitir tori le sopwolon.—Rom 15:4.a
12 Awewe chok, lupwen ewe fonufan epwe sotunikich ren minne epwe ita faffang ngenikich, ach ekieki ussun an Moses likitalo ekkewe lingen Isip esap amwokutukich pwe sipwe likiitu? Ika eu sossot epwe kon weires ngenikich, ach sipwe chechemeni an Eperiam sossot mi fokkun chou lupwen Kot a ereni pwe epwe asoresini noun we Aisek epwe amwokutukich ach sisap fangeta lon sossotun ach luku. Ukukun ena ‘kuchuun’ chon pwarata repwe apochokkulakich epwe alongolong won ifa ukukun ach weweiti porausen manauer.
13. Ifa ussun ekkewe Chon Pwarata Jiowa ra kan peseikich ach sipwe likiitu lon ewe kitir fan iten manau?
13 Iwe, a pwal pwellifeilikich chommong Chon Pwarata ngeni Jiowa lon ei fansoun. A ifa me watten ekkewe leenien appiru ekkewe Chon Kraist mi kepit fengen me ekkewe mwan me fefin lein ewe “mwich mi lapalap” ra isetiu! (Pwarata 7:9) Fan ekkoch, sipwe tongeni alleani porausen manauer lon ei chassi me pwal ekkoch puk seni ewe Watch Tower.b Lupwen sipwe ekieki ussun ar luku, sipwe kuna pochokkul pwe sipwe likiitu tori le sopwolon. Iwe, a pwal amwarar ewe alillis seni chienach kkewe me mararich mi angang ngeni Jiowa fan tuppwol! Ewer, mei wor chommong repwe peseikich lon ewe kitirin manau.
Aukukuochu Muttirin Om Ssa Ren Tipatchem
14, 15. (a) Pwata a lamot ach sipwe aukuku muttirn ach ssa ren tipatchem? (b) Met popun sipwe mirit ren ach ekieki ekkewe mettoch sipwe achocho ngeni?
14 Lupwen emon epwe sassa lon eu marasong, a lamot an epwe aukuku an ssa ren tipatchem. Ewe chassi New York Runner a apasa: “An emon kon muttir le ssa seni le poputaan epwe chok sopwongau. Eni epwe fokkun weires ngeni lon ekkewe lusun mail are epwe fangeta.” Emon chon fiti marasong a chechemeni: “Ewe chon afalafal lon ewe mwich ua fiti fan iten mmolnetaan ewe kitir a eani ei kapasen ourour: ‘Ousap chei ekkewe chon sassa mi kon muttir. Oupwe aukukuochu ami ssa ren pwisin ami tufich. Ika ousap fori ena oupwe pekkus, iwe, eni oupwe fangeta.’ Ei kapasen fon a alisiei le awesi ewe kitir.”
15 Lon ewe kitirin manau, a lamot ngeni noun Jiowa kkewe chon angang ar repwe pwisin akkachocho ngeni. (Luk 13:34) Iwe nge, ewe chon kaeo Jemes a makkei: “Ewe tipatchem seni won . . . a ekiekoch.” (Jemes 3:17) Inaamwo ika an ekkewe ekkoch leenien appiru repwe tongeni peseikich ach sipwe foffori pwal ekkoch mettoch, nge mirit epwe amwokutukich pwe minne sipwe achocho ngeni epwe tipeeu ngeni ach kewe tufich me nonnomun manauach. Ewe Paipel a achema ngenikich: “Iteiten aramas epwe pwisin pi en me angangen; iwe, itan epwe popu seni pwisin i, nge esap seni emon. Pun kich emon me emon sipwe fokkun pwisin en me uwei osan.”—Kalesia 6:4, 5.
16. Ifa ussun tipetekison epwe alisikich le aukuku ach ssassa?
16 Mika 6:8 a eani ei kapas eis mi achungu ach ekiek, a era: “Met Jiowa a mochen pwe kopwe fori . . . kopwe fori minne a pwung o eani kirikiroch, kopwe pwal tipetekison fan mesen om we Kot?” A kapachelong lon tipetekison ach mirititi aukukun ach kewe tufich. Apwangapwangen inisich are ach chinnapelo a aukukun minne sipwe tongeni fori lon ach angang ngeni Kot? Sisap letipechou. Jiowa a nguuri ach achocho me ach kewe asor ‘ren minne a wor rech, sap ren minne esor rech.’—2 Korint 8:12; alollo ngeni Luk 21:1-4.
Nengeni Chok ewe Liwinin
17, 18. An ekieki chok met a alisi Jises le likiitu won ewe iraan ninni?
17 Lon an Paul aiti ngeni ekkewe chon Kraist lon Korint lamoten ar repwe likiitu lon ewe kitir fan iten manau, a kapas ussun pwal eu lapalapen ekkewe Isthmian Games mi lamot ar repwe ekieki. Ren ekkewe chon fiti ekkena urumot, Paul a makkei: “Iteiten chon kitir meinisin repwe onout ren mettoch meinisin. Ra fori ei sokkun pwe repwe mwareni epa mwaramwar mi epwe chok morelo, nge kich pwe sipwe mwareni epa mwaramwar mi esap morelo. Iei minne, ngang upwe kitir, nge usap kitir-mwaal; upwe pwal afol, nge sap usun chok emon mi afolu asapwal.” (1 Korint 9:25, 26) Liwinin ewe chon win lon ekkena urumot lom lom, ina epa mwaramwar mi for seni chon ira [Isthmian pine leaves]—enlet, ina “epa mwaramwar mi epwe morelo.” Iwe nge ifa winnen chon Kraist mi likiitu tori sopwolon?
18 Lon an kapas ussun ach Leenien Appiru, Jises Kraist, ewe aposel Paul a makkei: “Sipwe nenneloi Jises, Samolun ach luku, o ewe Chon Aunusochulo, atewe mi likiitu won ewe iraan ninni pokiten ewe pwapwa mi nom mwen i, ese mo lolileniesini asauan, o a mottiu pelimwanin ewe leenien motun Kot.” (Ipru 12:2) Jises a likiitu tori sopwolon manauan won fonufan ren an nennelo ngeni liwinin mi lu seni ewe iraan ninni, pachelong an pwapwa le epinalo iten Jiowa we, an epichalo aramas seni malo, me pwal an nemenemen King me Samol Fel atun epwe aliwinato manau esemuch ngeni aramas won eu paratisin fonufan.—Mattu 6:9, 10; 20:28; Ipru 7:23-26.
19. Met sipwe ekilapei atun sipwe feffetal lon ewe alen chon Kraist?
19 Ekieki ewe pwapwa mi nom mwach atun sipwe feffetal lon ewe alen chon Kraist. Jiowa a fen ngenikich ewe angangen afalafala ewe kapas allim ussun an Kot we Muu me pwal aiti ngeni aramas ekkewe enlet lon Paipel mi tongeni amanauer. (Mattu 28:19, 20) A fokkun apwapwa ach sipwe kuna emon mi mochen silei ewe Kot mi enlet me alisi emonna an epwe fiti ewe kitir fan iten manau! Iwe, ese lifilifil ika aramas repwe etiwa are resap etiwa ach afalafaler nge ina eu wis auchea ach sipwe fiti ewe angang mi riri ngeni epinaloon iten Jiowa we. Lupwen sipwe likiitu lon ewe angangen afalafal nge meit ika aramas resap auseling are fen u ngenikich, sipwe chengel lon ach apwapwai letipen Jiowa we. (Proferp 27:11) Iwe, ewe liwinin mi lap a pwonei ngenikich, ina manau esemuch. A ifa me watten pwapwaan! A lamot ach sipwe ekieki ekkena feioch me likiitu lon ewe kitir.
Atun ewe Sopwolon A Arapoto
20. Ifa ussun epwe weiresilo ewe kitir fan iten manau atun epwe arapoto ewe sopwolon?
20 Lon ewe kitir fan iten manau, sipwe fiffiu ngeni ewe chon oputakich, Setan ewe Tefil. Iei atun a chok arapoto ewe sopwolon, a tinikken le sotun oturukapakich are ammanga ach angang ngeni Kot. (Pwarata 12:12, 17) Iwe, ese mecheres ach sipwe sopweilo le esilefeili ewe Muu mi tuppwol pokiten ekkewe maun, lengita, malapalap, me ekkewe ekkoch weires mi esissinata “ewe fansoun sopwolon.” (Taniel 12:4; Mattu 24:3-14; Luk 21:11; 2 Timoti 3:1-5) Lap seni ena, fan ekkoch ewe sopwolon a touau lap seni minne sia ekieki, akkaewin ika sia pin fiti ewe kitir seni chok me lom. Iwe nge, an Kot we Kapas a alukuluku ngenikich pwe epwe war ewe sopwolon. Jiowa a apasa pwe esap mmang. Ewe sopwolon a chok arapoto pwe ussun ita nge sipwe tongeni kuna.—Apakkuk 2:3; 2 Piter 3:9, 10.
21. (a) Met epwe apochokkulakich atun sipwe sopweilo lon ewe kitir fan iten manau? (b) Met sipwe tipeppos le fori atun ewe sopwolon a arapoto?
21 Ren ach sipwe win lon ewe kitir fan iten manau, a lamot ach sipwe angei pochokkul seni minne Jiowa a awora ren tong fan iten ach sipwe pochokkul lon pekin ngun. A pwal lamot ach sipwe angei pochokkul seni ach chiechi ngeni chienach kewe chon luku mi pwal fiffiti ewe kitir. Inaamwo ika riaffou watte me sereserengau epwe aweiresi ach ssassa, nge sipwe tongeni likiitu tori ewe sopwolon pun Jiowa a kan awora “ewe manaman mi watte seni pwisin ach.” (2 Korint 4:7) A ifa me watten an a akinamweikich ach sipwe silei pwe Jiowa a mochen ach sipwe sopwoch lon ewe kitir! Ren uppwos, “sipwe chok likiitu le ssa lon ewe kitir mi nom mwach,” me lukuluk pwe “lon an we fansoun sipwe kini, are sise achanu.”—Ipru 12:1; Kalesia 6:9.
[Ppii ekkewe pwóróus fan]
a Ren porausen Ipru 11:1–12:3, nengeni The Watchtower, January 15, 1987, pekin taropwe 10-20.
b Sia tongeni alleani porausen manauen ekkoch chon isetiu leenien appiru lon The Watchtower of June 1, 1998, pekin taropwe 28-31; September 1, 1998, pekin taropwe 24-8; February 1, 1999, pekin taropwe 25-9.
En mi Chechemeni?
◻ Met popun sipwe likiitu tori ewe sopwolon?
◻ Ikkefa ekkewe mettoch Jiowa a kan awora nge sisap tunalo?
◻ Pwata a lamot ach sipwe tipatchem le aukuku ach ssassa?
◻ Ifa ewe pwapwa mi nom mwach atun sipwe sopweilo lon ewe kitir?
[Sasing lon pekin taropwe 28]
Angei pochokkul seni an chon Kraist kewe mwich