“Ami Oupwe Ukkuwa Chommong”

“Ami oupwe ukkuwa chommong me anneta pwe ami nei chon kaeo.”​—JON 15:​8, NW.

1. (a) Me ren alon Jises ngeni noun kewe aposel, ifa wiisen noun kewe chon kaeo? (b) Ifa ewe kapas eis sipwe eisini pwisin kich?

A FEN tori ewe kuniolun mwen an Jises epwele malo. Jises a fen awora nafochun fansoun fan iten an epwe apochokkula noun kewe aposel ren an kapas ngeniir seni wesewesen lelukan. Lon ena atun, neman a fen lu seni lukenipwin, nge Jises a chuen kakkapas ngeni chienan kewe mi achengicheng pokiten an tongeer. Iwe, le polen an kapas, a achchema ngeniir ussun pwal eu mettoch repwe wiisen fori ren ar repwe chuen noun chon kaeo. Iei alon: “Semei we epwe lingelo ren ei mettoch, pwe ami oupwe ukkuwa chommong me anneta pwe ami nei chon kaeo.” (Jon 15:​8, NW) Lon ei fansoun, mi nom rech ena esissin, esissinnen noun Jises chon kaeo? Met weween ei kapas, “ukkuwa chommong”? Ren ach sipwe silei weween, sipwe nengenisefalli met ra kapasfengen ussun lon ena kuniolun.

² Ena kapasen pesepes ussun ewe mettoch ukkuwa chommong och kinikinin eu kapas awewe Jises a ereni noun kewe aposel. Iei alon: “Ngang ewe ira mi enlet, o Semei ewe chon tumunu. Iwe, epwe walo iteiten palen lon ngang mi sap uwa, o epwe limeti iteiten palan mi uwa pwe epwe mutuwa. Nge ami oua fen limoch ren ekkewe kapas ua apasa ngenikemi. Iwe, ami oupwe chok nonnom lon ngang, pwal ngang lon ami. Usun chok palan ese tongeni pwisin uwa are ese nonnom lon ewe ira, epwe pwal iei usun ami are ousap nonnom lon ngang. Iwe, ngang ewe ira, nge ami ekkewe palan. . . . Epwe iei usun an Semei we lingelo, are oupwe uwa chommong o ami oupwe nei chon kaeo. Usun chok Semei a fen tongeiei, a pwal iei usun ai tongeikemi. Iwe, oupwe chok nonnom lon ai tong. Are oupwe alleasochisi ai kewe alluk, oupwe nonnom lon ai tong.”​—Jon 15:​1-​10.

³ Lon ena kapas awewe Jiowa ewe Chon Ffot Ira, Jises ewe iraan krep, me ekkewe aposel Jises a kapas ngeniir, ir ekkewe palan. Ika ekkewe aposel repwe achocho ngeni ar repwe “eu chok” me Jises, repwe ukkuwa. Iwe mwirin, Jises a awewei ifa ussun ekkewe aposel repwe tongeni anukunukatiu ena tipeeu mi fokkun lamot: “Are oupwe alleasochisi ai kewe alluk, oupwe nonnom lon ai tong.” Mwirin, ewe aposel Jon epwap makkei ena esin kapas ngeni chienan kewe chon Kraist: “Aramas meinisin mi alleasochisi an kewe alluk, ra nonnom lon i.”a (1 Jon 2:​24; 3:​24) Ina minne, ren ar alleasochisi an Kraist kewe alluk, noun kewe chon kaeo repwe eu chok me i, iwe mwirin, ena tipeeu epwe atufichiir ar repwe ukkuwa. Mei fet ewe uwa sipwe uwaani?

Epwe Tufichin Lapalo Ach Uwa

⁴ Lon ena kapas awewe ussun ewe iraan krep, Jiowa a kan “walo,” are pokuelo, efoch palan lupwen esap uwa. Met ena mettoch a aiti ngenikich? Sap minne a chok affata pwe wiisen chon kaeo meinisin ar repwe ukkuwa, pwe pwal meinisin mi tufichin ukkuwa, ese lifilifil ika mei fet nonnomur are lipwakingauer. A enlet pwe ika Jiowa epwe ‘walo,’ are atowu emon noun Kraist chon kaeo seni wiisan pokiten an ese fori och mettoch esap pwak ren, an Jiowa fori ena mettoch esap tipeeu ngeni an tong.​—Kol Fel 103:14; Kolose 3:​23; 1 Jon 5:3.

⁵ An Jises kapas awewe ussun ewe iraan krep a pwal affata pwe wiisach ach sipwe mammaarita lon ach kewe angang, angangen emon chon kaeo, nge epwe longolong won met sipwe tufichin fori. Nengeni mwo ifa ussun Jises a awewei ena mettoch: “Iwe, epwe walo iteiten palan lon ngang mi sap uwa, o epwe limeti iteiten palan mi uwa pwe epwe mutuwa.” (Jon 15:2) Arap ngeni le sopwoloon ena kapas awewe, Jises a pesei noun kewe chon kaeo pwe repwe “uwa chommong.” (Wokisin 8) Ifa weween alon na? Lon wiisach we, wiisen chon kaeo, sisap tenechepwak. (Pwarata 3:​14, 15, 19) Nge sipwe pippi ifa ussun sipwe tongeni alapalo uwaach. Met sokkun uwa sipwe achocho ngeni ach sipwe akkalapalo? A wor ruu sokkun: (1) “uwaan ewe ngun mi fel” me (2) uwaan ewe Muu.​—Kalesia 5:​22, 23; Mattu 24:14.

Uwaan Lapalapen Chon Kraist kewe

⁶ Tong a mak akkom lein “uwaan ewe ngun mi fel.” An Kot ngun mi fel a apwuku tong lon chon Kraist, pun ra kan alleasochisi ewe alluk Jises a apasawu ekis mwen an we a uwawu ewe kapas awewe ussun ewe iraan krep mi ukkuwa. Iei alon ngeni noun kewe aposel: “Iwe, upwe ngenikemi eu alluk mi fo, pwe oupwe tongfengen lefilemi.” (Jon 13:34) A enlet pwe lon meinisin an kewe kapas lon ena saingoon pwinin manauan won fonufan, fan chommong Jises a achchema ngeni ekkewe aposel ussun lamoten ar repwe pwarata tong.​—Jon 14:15, 21, 23, 24; 15:12, 13, 17.

⁷ Piter, emon mi nom leir lon ena pwinin, a weweiti pwe ewe sokkun tong mi nom ren Kraist me ekkewe pwal fitu lapalap mi pacheri ena tong epwe pwalo lein noun Kraist kewe chon kaeo mi enlet. Fite ier mwirin, Piter a pesei chon Kraist pwe repwe amaarata ekkan lapalap, ussun chowean nemenem won ekiek me memmeef, ririin lefilen pwipwi, me tong. A pwal makkei pwe ach fori ena mettoch epwe alisikich pwe site “liseangas are uwangau.” (2 Piter 1:​5-8, NW) Sipwe tufichin pwarata uwaan ewe ngun mi fel, ese lifilifil ika mei fet nonnomuch. Ina minne, amwo sipwe achocho ngeni ach sipwe akkalapalo ach pwarata tong, kirokiroch, mosonoson, me ekkewe pwal fitu lapalapen Kraist, pun “esor och alluk epwe pinei ekkeei sokkun,” are ese kan kauk ekkena mettoch. (Kalesia 5:​23) Enlet, sipwe achocho ngeni ach sipwe “mutuwa.”

Ukkuwaani Uwaan ewe Muu

⁸ Efoch ira a kan ling ika uwaan epwe anuwanoch me anno. Iwe nge, aucheaan ena esin uwa a fokkun lap seni och chok minen aling. Uwaan a pwal lamot fan iten an epwe chommongolo ena sokkun ira ren foun kewe. Pwal ussun chok, sap minne uwaan ewe ngun mi fel a chok alinga lapalapach, lapalapen chon Kraist, nge a fori fokkun lap seni ena. Ekkan lapalap ussun chowean tong me luku ra pwal amwokutukich pwe sipwe achoufetalei porausen ewe Muu, ewe mi nom lon ewe Kapasen Kot. Nengeni mwo ifa ussun ewe aposel Paul a menlapei ena mettoch mi fokkun lamot. Iei alon: “Sia pwal pwarata luku [och kinikinin uwaan ewe ngun mi fel], iwe, ina popun, sia kakkapas.” (2 Korint 4:​13, NW) Paul a pwal awewei pwe a ina ussun sia kan “iseta ach asoren mwareiti Kot, iei ewe asor: uwan tinauach”​—iei ewe oruuen sokkun uwa a lamot ach sipwe uwaani. (Ipru 13:15) Sipwe tufichin alapalo ena sokkun uwa lon manauach, are wesewesen “mutuwa,” lon wiisach, wiisen chon esilefeili porausen an Kot we Muu?

⁹ Ren an epwe pwung ach polueni ena kapas eis, a lamot ach sipwe akkom weweiti ika mei fet uwaan ewe Muu. Epwe pwung ach sipwe apasa pwe ach uwaoch a wewe ngeni ach alisi aramas pwe repwe noun Jises chon kaeo? (Mattu 28:19) Ewe uwa sipwe uwaani a ita akkaewin wewe ngeni ekkan aramas sipwe alisiir pwe repwe chon fel mi papatais, chon fel ngeni Jiowa? Aapw. Ika pwe mi pwung ena, meinisin ekkan Chon Pwarata mi achengicheng repwe fokkun letipechou pokiten ar akkafalafala porausen ewe Muu fite, fite ier lon ekkan leeni ese lien okor chon mochen auseling. A wesewesen pwung pwe ika uwaan ewe Muu sipwe ukkuwaani a chok wewe ngeni ekkan minefoon chon kaeo, ekkena Chon Pwarata mi angang weires repwe ussun ekkewe palen ira esor uwaar lon an Jises we kapas awewe! Iwe, a enlet pwe esap ina weween ena poraus. Iwe, ifa chok akkaewin uwaan ewe Muu lon ach angangen afalafal?

Ukkuwaoch ren Ach Amorafeili Porausen ewe Muu

¹⁰ An Jises we kapas awewe ussun ewe chon amora pwikil me ekkewe ppwul mi sokkofesen a affata poluen ena kapas eis asan​—nge poluan eu minen apochokkula letipen chokewe mi akkafalafal lon ekkan leeni ikewe ese lien mammaarita ewe angang ie. Jises a apasa pwe ewe foun pwikil a wewe ngeni porausen ewe Muu mi nom lon an Kot we Kapas me ewe ppwul a liosueta letipen aramas. Ekkoch pwikil ra “moretiu won pwul murinno, o ra mamarita. Ra uwani ipuku.” (Luk 8:8) Met sokkun uwa? Iwe, ika efoch iraan wit epwe maarita, epwe uwaani minefoon foun, nge esap kukkun iraan wit. Pwal ussun chok, chon Kraist repwe uwaani minefoon pwikilin ewe Muu, nge esap minefoon chon kaeo.

¹¹ Ina popun, ewe uwa lon ei poraus esap wewe ngeni minefoon chon kaeo are ekkewe lapalap murinno chon Kraist repwe lapalapeni. Pokiten ewe pwikil mi morotiu a wewe ngeni kapasen ewe Muu, iwe, ese mwaal ewe uwa a wewe ngeni chommongoloon ena pwikil. Lon ei poraus, ewe uwa a wewe ngeni an aramas kakkapas ussun ewe Muu. (Mattu 24:14) Kich mi tufichin ukkuwaani ena sokkun uwaan ewe Muu​—weween, ach ekkesilefeili poraus allimen ewe Muu​—ese lifilifil ika mei fet nonnomuch? Ewer, fokkun ina! Lon ena chok kapas awewe, Jises a awewei ewe popun an a ina ussun.

Ach Angang ren Unusen Letipach fan iten Lingen Kot

¹² Jises a apasa pwe “ekkewe mi moretiu won pwul murinno. . . ra uwani ipuku, ekkoch wone, o ekkoch ilik.” (Mattu 13:23) Eli epwe sokkofesen uwaan ekkan pwikil mi morotiu lon eu atake pokiten an a sokkolo en me nonnomun. Pwal ussun chok, eli epwe sokkofesen minne sipwe tufichin fori le esilefeili ewe poraus allim pokiten sokkofesenin nonnomuch, me Jises a affata pwe a miritiiti ena mettoch. Eli ren ekkoch a kan watte ar fansoun me ar tufich; nge ren pwal ekkoch a kan pochokkul inisir me ir mi aumanau. Ina popun, eli minne sipwe tufichin fori epwe lap seni are kis seni minne ekkewe pwal fitemon repwe tufichin fori, nge ika sipwe angang ren unusen letipach, Jiowa epwe pwapwa rech. (Kalesia 6:4) Inaamwo ika watteen ierich are samau mi chou epwe akukkunatiu ach fiti ewe angangen afalafal, nge ese mwaal Semach we mi umoumoch, Jiowa, epwe meefi pwe kich mi “ukkuwaani uwa chommong.” Met popun? Popun, pun sia kan ngeni i ‘mettoch meinisin mi wor rech’​—weween, ach angang ngeni ren unusen letipach.b​—Mark 12:43, 44; Luk 10:27.

¹³ Ika sipwe chechchemeni ewe popun sia kan ukkuwaani uwaan ewe Muu, ena mettoch epwe amwokutukich pwe sipwe “uwa chommong” lon ewe chok ukuukun sia tufichin uwaani. (Jon 15:16) Iei alon Jises ussun ewe akkaewin popun sipwe ukkuwa: “Epwe iei usun an Semei we lingelo, are oupwe uwa chommong.” (Jon 15:8) Ewer, ach angangen afalafal a kan epini iten Jiowa mwen mesen aramas meinisin. (Kol Fel 109:30) Iei alon emon fefin itan Honor, emon Chon Pwarata mi tuppwol, nge a lap seni 70 ierin: “Lon pwal mwo nge ekkewe leeni ese lien wor chon mochen auseling, a mmen auchea wiisach, wiisen ach sipwe tupuni ewe Emon mi Tekia seni Meinisin.” Poputa seni 1974, Claudio emon Chon Pwarata mi tinikken. Lupwen emon a eisini ika met popun a chuen chok akkafalafal inaamwo ika ese lien wor chon mochen auseling lon leenian we, a aloni alon Jon 4:​34 (NW), ikewe ie a mak alon Jises ei: “Iei anei, pwe upwe fori letipen ewe emon mi tinieito me awesalo an angang.” Pwal iei alon Claudio: “Ussun Jises, sap minne ua chok mochen poputa ai angang lon wiisei we, wiisen emon chon afalafala porausen ewe Muu, nge ua pwal mochen awesalo ai angang.” (Jon 17:4) Chon Pwarata Jiowa won unusen fonufan ra kan tipeeu ngeni alon na.​—Pi ena och poraus mi iteni “Ifa ussun sipwe tufichin ‘Ukkuwaoch Fan Likiitu,’ ” lon pekin taropwe 19.

Wiisach Chon Afalafal me Sense

¹⁴ Lon ekkewe puken Poraus Allim a mak pwe Jon Papatais ewe akkaemonun chon esilefeili porausen ewe Muu. (Mattu 3:​1, 2; Luk 3:​18) Akkaewin an angang, pwe epwe emon “chon pwarata,” me a apwonueta wiisan fan an lukuluk mi pochokkul me an apilukuluk “pwe sokkun aramas meinisin repwe luku.” (Jon 1:​6, 7, NW) Mi enlet pwe ekkoch me lein chokewe Jon a afalafaler ra wiliiti noun Jises chon kaeo. (Jon 1:​35-​37) Ina minne, Jon emon chon afalafal me emon sense. Pwal Jises emon chon afalafal me emon sense. (Mattu 4:​23; 11:1) Iwe, esap och poraus amairu pwe sap minne Jises a chok alluku ngeni noun kewe chon kaeo pwe repwe afalafala porausen ewe muu, nge repwe pwal alisi chokewe mi etiwa ena poraus pwe repwe wiliiti noun chon kaeo. (Mattu 28:19, 20) Ina popun, lon ei fansoun, a kochu lon ach angang ach sipwe afalafala me asukula aramas.

¹⁵ Me lein ir kewe Paul a afalafaler me asukuler lon ewe aewin senturi C.E., “ekkoch ra luku minne a apasa, nge ekkoch rese luku.” (Fofor 28:24) Lon ei fansoun, a pwal ina ussun aramas. A solap pwe a lap ngeni ekkan foun ewe Muu ar ra morotiu won ppwul ese lien och. Meit mwo, nge ekkoch pwikil ra morotiu won ppwul murinno, a pwuk warer, iwe, ra pwukuta, ussun Jises a oesini. Pwungun pwe won unusen fonufan, lap seni 5,000 aramas (average) ra kan wiliiti noun Kraist chon kaeo iteiten wiik! Ekkena minefoon chon kaeo ra ‘luku minne ra rong,’ inaamwo ika a lap me lein aramas rese luku. Met a awora alillis pwe letiper epwe etiwa porausen ewe Muu? Fan chommong, an Chon Pwarata Jiowa ekilapei manauen aramas​—weween, ar achochonu ekkewe pwikil mi keran morotiu​—a achungu letiper. (1 Korint 3:6) Nengeni mwo porausen ruuemon me lein ekkewe chommong mi kuna ena sokkun alillis.

A Lamot ewe Mettoch Ekilapei Manauen Aramas

¹⁶ Karolien, emon Chon Pwarata mi nonnom lon Belgium, a kapas ngeni emon chinnap fefin, nge ewe fefin ese mochen auseling ngeni porausen ewe Muu. Pokiten a ffiniti ngeni poun ewe fefin och pansoko, Karolien me chienan we ra ereni pwe repwe alisi, nge ewe fefin ese mochen. Ruu ran mwirin, ekkena chok ruuemon Chon Pwarata ra liwiniti imwen ewe fefin, iwe, ra eisini ika a ifa ussun. Karolien a apasa pwe “Ina ewe mettoch a achungu letipan. Neminnewe a fokkun mairu pokiten an kuna pwe am mi wesewesen ekilapei manauan. A etiwakemelong lon imwan, iwe, a poputa am kaeo ngeni lon Paipel.”

¹⁷ Sandi, emon Chon Pwarata lon ewe United States, a pwal pwarata pwe a wesewesen ekilapei ir kewe a afalafal ngeniir. A kan pippi lon simpung iten ekkan aramas mi keran nounou, iwe, a lo kapas ngeniir fan Nei Puken Porausen Paipel.c Pokiten ewe inelap a kan nom leimw me a pwapwa le api ngeni chon etto kukkunou noun monukol, iwe, fan chommong a poputa porausfengen. Sandi a apasa pwe “Ua kan fos ngeni ewe sam me in ussun lamoten ar repwe ririoch ngeni nour upufo ren ar akkallea ngeni. Mwirin, ua kapas ngeniir ussun wiiser mi chou, wiisen ar repwe amaarata nour we kukkun lein ei pilon aramas.” Kanoto chok, pokiten ena esin afalafal ngeni eu famili, emon in me wonumon noun ra poputa le angang ngeni Jiowa. Eli ach tinikken me ach pwarata pwe sia ekilapei aramas epwe atoto ena sokkun uwa mi apwapwa lon ach angangen afalafal.

¹⁸ A kan pochokkuleta letipach pokiten ach silei pwe sipwe tufichin apwonueta wiisach, wiisen ach sipwe “uwa chommong”! Ese lifilifil ika sia kukkun are chinnap, pochokkul are apwangapwang, are ika sia afalafal lon eu fonu ikewe a kan wor chon mochen auseling ie are ese lien wor chon mochen auseling ie, nge oukich meinisin sia tufichin uwa chommong. Ifa ussun? Ren ach alapalo ach pwarata uwaan ewe ngun mi fel me pwal ren ach achoufetalei porausen an Kot Muu ukuukun ach tufich. Kapach ngeni ena, sia kan pwal achocho le ‘nonnom lon an Jises kapas’ me ‘uwaani tong lefilach.’ Ewer, ren ach wiisen apwonueta ekkena ulungat mettoch mi lamot epwe nom ren noun Jises kewe chon kaeo, ussun an a mak lon makkeien Jon we puken Poraus Allim, sia kan anneta pwe kich “wesewesen noun [Kraist] kewe chon kaeo.”​—Jon 8:​31; 13:35.

[Footnotes]

Kapas Eis fan iten Enniwili Poraus

• A lamot an epwe lapalo ach uwaani met sokkun uwa?

• Pwata sipwe tufichin “ukkuwa chommong”?

• Ussun an a pwalo lon makkeien Jon we Puken Poraus Allim, a wor ulungat mettoch noun Jises kewe chon kaeo repwe wiisen apwonueta. Ikkefa ekkena ulungat mettoch sia fen kaeo ussun?

2. Ifa ewe kapas awewe ussun uwa Jises a uwawu lon ewe pwinin mwen an epwe malo?

3. Noun Jises kewe chon kaeo repwe fet ren ar repwe tufichin ukkuwa?

4. Met sipwe tongeni kaeo seni porausen an Jiowa “walo” iteiten palen ira ese ukkuwa?

5. (a) Ifa ussun an Jises kapas awewe a affata pwe epwe tongeni lapalo ach tufichin ukkuwa? (b) Ikkefa ekkewe ruu sokkun uwa sipwe kaeo ussun?

6. Ifa ussun Jises Kraist a menlapei lamoten ewe akkaewin uwaan ewe ngun mi fel?

7. Ifa ussun ewe aposel Piter a affata pwe ach tufichin ukkuwa a riri ngeni ach ukkuwaani lapalapen Kraist kewe?

8. (a) Ifa ussun an a ririfengen uwaan ewe ngun mi fel me uwaan ewe Muu? (b) Mi lamot ach sipwe ekieki menni kapas eis?

9. Ach ukkuwa a ita wewefengen me ach alisi aramas pwe repwe noun Jises chon kaeo? Awewei mwo.

10. Ifa ussun an Jises kapas awewe ussun ewe chon amora pwikil me ekkewe ppwul mi sokkofesen a affata met uwaan ewe Muu a wewe ngeni me met esap wewe ngeni?

11. Ifa weween uwaan ewe Muu?

12. Meinisin chon Kraist repwe tufichin uwaani uwaan ewe Muu? Awewei mwo.

13. (a) Ifa akkaewin ewe popun ach sipwe “ukkuwaani” uwaan ewe Muu? (b) Met epwe alisikich pwe sipwe ukkuwa lon ekkan leeni ikewe ese lien wor chon mochen auseling ie? (Pi ena refiref lon pekin taropwe 19.)

14. (a) Ikkefa ekkewe ruu mettoch angangen Jon Papatais me Jises a apwonueta? (b) Ifa ussun kopwe awewei angangen chon Kraist lon ei fansoun?

15. Ifa ussun meefien aramas ussun ewe angangen afalafal lon ewe aewin senturi C.E. a wewefengen me meefien aramas ussun ewe angang mi fiffis lon ei fansoun?

16, 17. Pwata a lamot ach sipwe pwarata pwe sia kan ekilapei ekkewe aramas sipwe chuuriir lon ach angangen afalafal?

18. (a) Pwata ewe wiis, wiisen ‘uwa chommong’ eu wiis kich meinisin sipwe tufichin apwonueta? (b) Ikkefa ekkewe ulungat mettoch lon makkeien Jon we Poraus Allim epwe nom ren noun Jises kewe chon kaeo, nge a pposolo letipom om kopwe wiisen apwonueta?

[Box/Picture on Page 19]

Ifa Ussun Sipwe Tufichin “Ukkuwa Fan Likiitu”

MET a kan alisuk pwe kopwe tuppwol le akkafalafala porausen ewe Muu lon ekkewe leeni ikewe ese lien wor chon mochen auseling ie? A iei ussun an ekkoch aramas polueni ena kapas eis, nge minne ra apasa a awora alillis fan iten ena mettoch.

“Ach silei pwe Jises a peppenikich a kan peseikich pwe sipwe apilukoch me achocho ngeni, ese lifilifil ika mei fet meefien aramas lon leeniach.”​—Harry, 72 ierin; a papatais lon 1946.

“Fansoun meinisin ei wokisin lon 2 Korint 2:​17 a apochokkulaei. A apasa pwe sia fiti ewe angangen afalafal ‘mwen mesen Kot, nge Kraist a etikich.’ Lupwen ua fiti ewe angangen afalafal, chienei kewe mi murinno seni meinisin ra kan etiei.”​—Claudio, 43 ierin; a papatais lon 1974.

“Enlet, a mmen weires ngeniei ai upwe fiti ewe angangen afalafal. Nge, ua kuna letin ewe kapas mi mak lon Kol Fel 18:29: ‘Ren alillisin ai we Kot upwe tufichin tota won eu ttit.’ ”​—Gerard, 79 ierin; a papatais lon 1955.

“Ua kan sotuni le aea ekkewe sokkopaten minen sukuun poraus. A wor chommong sokkun pwe iwe usap tufichin aea ir meinisin lon ekkewe lusun ierin manauei.”​—Paul, 79 ierin; a papatais lon 1940.

“Use kan meefi pwe aramas ra oputaei ika rese mochen auseling. Use atapwal, iwe, ua chok porausfengen me aramas me auseling ngeni minne ra ekieki.”​—Daniel, 75 ierin; a papatais lon 1946.

“Ua fen chuuri ekkan aramas mi keran papatais, iwe, ra ereniei pwe ai angangen afalafal a alisiir pwe repwe wiliiti Chon Pwarata. Use silei pwe ekkoch ra kaeo ngeniir lon Paipel mwirin ai chuuriir, iwe, ra alisiir pwe repwe feffeita lon ar lukuluk. Ua chengel ren ai silei pwe oukich meinisin sia kan alillisfengen lon ach angangen afalafal.”​—Joan, 66 ierin; a papatais lon 1954.

Met a kan alisuk pwe kopwe “ukkuwa fan likiitu”?​—Luk 8:​15.

[Pictures on page 18]

Sipwe kan ukkuwa chommong ren ach uwaani uwaan ewe ngun mi fel me pwal ren ach ekkesilefeili porausen ewe Muu

[Picture on page 21]

Met weween alon Jises lupwen a ereni noun kewe aposel pwe repwe “Ukkuwa chommong”?