Chechemeni Ewe Mi Foruk!
“Kopwe chechemeni ewe Chon Forukuta mi Lapalap . . . mwen ekkkewe ran mi ngau repwe feito.”—EKLESIASTES 12:1.
1. Ifa ussun ekkewe aluwol me fopul mi fen fangelo manauer ngeni Kot repwe mochen aea ierir sarafo me ar pochokkul?
JIOWA a awora pochokkul ngeni noun kewe chon angang pwe repwe tongeni fori letipan. (Aisea 40:28-31) A enlet ei poraus ese lifilifil fite ierir. Nge ekkewe aluwol me fopul mi fen fangelo manauer ngeni Kot repwe akkaeuin mochen aea ar fansoun, manaman, me pochokkul ren tipatchem. Ina minne, ra lefareni ewe kapasen fon seni “ewe Chon Amwichafengenni Aramas,” [are Chon Afalafal] King Salomon seni Israel lom lom. A eani ewe kapasen pesepes: “Iwe, le alualum, kopwe chechemeni ewe mi foruk, mwen ekkewe ran mi ngau repwe feito. Pun epwe war ewe fansoun kopwe apasa usun, ‘Usap fokkun efich ei fansoun ua nom lon.’”—Eklesiastes 1:1; 12:1.
2. Met epwe lamot noun ekkewe chon Kraist mi fen fangelo manauer ngeni Kot repwe fori?
2 An Salomon kapasen fon ussun ar repwe chechemeni ewe Chon Forata le kukkunur a akkom weneiti ekkewe sarafo lon Israel. Ra uputiu lon eu muu mi fen pinilo ngeni Jiowa. Iwe, met porausen noun ekkewe chon Kraist ikenai mi fen fangelo manauer ngeni Kot? Pwungun pwe repwe pwal chechemeni ewe Chon Forireta. Ika repwe ina ussun, repwe asamolu I me efeiochu pwisin ir.—Aisea 48:17, 18.
Leenien Appiru Mi Murinno Me Lom
3. Ifa ussun Josef, Samuel, me Tafit ra isetiu leenien appiru mi murinno?
3 Chommong sarafo, porauser a mak lon Paipel, ra isetiu leenien appiru mi murinno ren ar chechemeni ewe Chon Forata mi Lapalap. Seni le kukkunun feffeita, noun Jekop we Josef a chechemeni ewe mi forata. Lupwen puluwen Potifar we a sotuni Josef pwe epwe lisowu mwaal ngeni, a tipeppos le polueni: “Ifa ussun upwe tongeni fori ei foffor mi fokkun ngau o tipis ngeni Kot?” (Keneses 39:9) Ewe chon Lifai Samuel ese chok chechemeni ewe mi forata seni chok le kukkunun pwe pwal lon unusen manauan. (1 Samuel 1:22-28; 2:18; 3:1-5) Ewe aluwol Tafit seni Petleem a fokkun chechemeni ewe Chon Forata. An lukuluk won Kot a pwapwalo lupwen epwe fiu ngeni ewe re Filistia mi fokkun watte itan Koliat, iwe, a apasa: “En ka feito rei fan efoch ketilas, efoch fisika me efoch siles. Nge ngang ua feila reom fan iten Jiowa, ewe Samol mi Unusen Manaman, ewe Kot an ewe mwichen sounfiun Israel en ka apalua. Ikenai Jiowa epwe atolongok lepei, nge ngang upwe niikela o pokuela uom; . . . murin, aramasen fonufan meinisin repwe silei pwe mi wor emon Kot lon Israel. Nge chokei meinisin mi nom ikei repwe silei pwe Jiowa a amanaua noun aramas sap ren ketilas me siles. Pun ewe maun, an Jiowa, nge i epwe atolongakemi meinisin fan nemeniem.” Ekiselo chok nge Koliat a malo, iwe, ekkewe chon Filistia ra su.—1 Samuel 17:45-51.
4. (a) Met a pwarata pwe emon nenginin Israel mi eolo lon Siria me pwal King Josia le aluwolun ra chechemeni ewe Chon Forireta? (b) Ifa ussun Jises a pwarata pwe a chechemeni ewe Chon Forata atun an a 12 ierin?
4 Pwal emon semirit mi chechemeni ewe Chon Forata, ina i emon nenginin Israel mi eolo. A fokkun murinno minne a ereni puluwen ewe meilapen sounfiun Siria itan Naaman, iwe, atewe a feilo ngeni noun Kot we soufos, a chikar seni rupun pwotur, me a wiliti emon chon fel ngeni Jiowa. (2 Kings 5:1-19) Le aluwolun, King Josiah a pwora le apochokkulata fel ngeni Jiowa mi limelimoch. (2 Kings 22:1–23:25) Iwe nge, ewe leenien appiru mi murinno lap seni meinisin ren ir kewe mi chechemeni ewe Chon Forata le aluwolur, ina i Jises seni Nasaret. Ekieki minne a fis lupwen a tori 12 ierin. Seman kewe me inan ra uwei ngeni Jerusalem pwe repwe fiti ewe Pasofer. Lupwen ra liwinlo, ra kuna pwe Jises ese nom rer; iwe, ra liwinsefal pwe repwe kutta. Lon ewe aulungatin ran, ra kuna me lon ewe imwenfel, a porausfengen me ekkewe sense ussun ekkoch kapas eis. Ren an polueni inan we mi aureki, Jises a eisini: “Pwata oua kuttaei? Ouse mo meefi pwe upwe fokkun nonnom lon imwen Semei?” (Luk 2:49) A efeiochu Jises pwe epwe angei sile lon pekin ngun lon ewe imwen fel, ‘imwen Semei.’ Ikenai, kich mi tongeni angei sile mi pwung ussun ewe Chon Forikich mi Lapalap lon ekkewe Kingdom Hall, an Chon Pwarata Jiowa kewe leenien mwich.
Chechemeni Jiowa Iei!
5. Lon pwisin om fos, ifa ussun om kopwe awewei alon ewe Chon Afalafal mi mak lon Eklesiastes 12:1?
5 Emon chon fel ngeni Jiowa mi letip-unus epwe mochen muttir poputa an angang ngeni Kot me foffori ukukun lusun manauan. Iwe nge, met epwe fis ngeni emon mi fen asolapa an kewe ierin sarafo pokiten an ese chechemeni ewe Chon Forata? Fan emmwenien ngun mi fel ewe Chon Afalafal a apasa: “Iwe, lealuwalum, kopwe chechemeni ewe mi foruk, mwen ekkewe ran mi ngau repwe feito. Pun epwe war ewe fansoun kopwe apasa usun, ‘Usap fokun efich ei fansoun ua nom lon.’”—Eklesiastes 12:1.
6. Ikkefa pisekin annetata pwe ekkewe chinnap Simion me Anna ra chechemeni nour we Chon Forata?
6 Esor emon a pwapwaesini “ekkewe ran[in chinnap] mi weires.” Nge ekkewe chinnap mi ekkekieki Kot ra pwapwa. Awewe chok, ewe chinnap itan Simion a angei ewe monukol Jises le poun kewe lon ewe imwenfel, iwe, a pwapwa le era: “Iwe, iei Samol, kopwe chok mut ngeni noum ei chon angang pwe epwe feilo lon kinamwe, usun mi fich ngeni om kapas; pun mesei ra fen kuna om angangen amanau, ewe ka fen ammolnata mwen mesen aramas, eu saram mi epwe pwar ngeni ekkewe ren Jentail, eu saram mi epwe alinga noum kewe aramasen Israel.” (Luk 2:25-32) Ewe fefin itan Anna, walik-me-ruanu ierin, a pwal chechemeni ewe Chon Forata. A nonnom chok lon ewe imwenfel, iwe, a nonnom lupwen ra walo ewe monukol Jises ikewe ie. “Lon ewe chok fansoun, a feito, o a apasa an kilisou ngeni Kot, o a pwal kakkapas usun i ngenir meinisin mi witiwiti ewe amanauen Jerusalem.”—Luk 2:36-38.
7. Ifa lapalapen manauen ekkewe mi chinnapelo lon ar angang ngeni Kot?
7 Eni Chon Pwarata Jiowa mi fen chinnapelo lon ar angang ngeni Kot ra kuna metekin me weiresin ar fetal ngeni chinnap. Iwe nge, a ifa me watten ar pwapwa, iwe, sia fokkun aucheani ar angang ren tuppwol! Ra eani “pwapwan Jiowa,” pun ra silei pwe a fen angei an manaman chapur ren ei fonufan me seikata Jises Kraist pwe epwe King mi manaman lon lang. (Nehemaia 8:10) Iei ewe fansoun pwe ekkewe mi kukkun pwal ekkewe mi chinnap repwe alleasochisi ewe kapasen pesepes mi era: “Ekkewe aluwol me ekkewe fopul meinisin, ekkewe mi chinnap me ekkewe semirit! Repwe mwareiti iten Jiowa, pun itan we chok mi tekia; an we ling mi tekia seni fonufan o pwal seni lang.”—Kol Fel 148:12, 13.
8, 9. (a) “Ekkewe ran mi ingau” rese apwapwa ngeni io kewe, iwe, met popun epwe ina ussun? (b) Ifa ussun kopwe awewei Eklesiastes 12:2?
8 “Ekkewe ran mi fokkun weires”, lon fansoun chinnap rese apwapwa—meni ra fokkun aletipechou—ngeni ir kewe rese ekieki ewe Chon Forireta me rese weweiti an kewe kokkot mi lingoch. Pokiten rese weweiti ekkewe mettochun ngun, resap tongeni mokurechou fan ekkewe riaffou mi aweiresi aramas seni fansoun Setan a koturutiu seni lang. (Pwarata 12:7-12) Iwe, ewe Chon Afalafal a peseikich ach sipwe chechemeni ewe Chon Forikich “me mwen an epwe kiroch ewe akkar, saram, maram, me fu kana, mwen ekkewe kuchu repwe liwinto murin ut.” (Eklesiastes 12:2) Met weween ekkena kapas?
9 Salomon a alollofengenni ewe fansoun sarafo me ewe fansoun ras lon Palestine lupwen ewe akkar, maram, me ekkewe fu ra tinoch fan lang nge esor kuchu. A fokkun saramaram manauer lon ena fansoun. Iwe nge, ren ekkewe chinnap, ar kewe ran ra ussun chok ewe fansoun fou mi patapat me puppungutiu ut, a chok tottorir fitikoko, tap, osukosuk watte. (Job 14:1) A ifa me watten alolilen ika aramas ra silei ussun ewe Chon Forata nge rese angang ngeni lon ewe fansoun ras lon manauer! Lon fansoun fou lon manauach, weween, ranin chinnap, a kirochelo, akkaeuin ngeni ir kewe rese angang ngeni Jiowa lealuwolur pokiten ar chechei ekkewe mettoch mi lamot-mwaal. Iwe nge, ese lifilifil ierin manauach nge sipwe ‘unusen appiru Jiowa,’ ussun chok atewe itan Kalep mi tuppwol, chienen ewe soufos Moses.—Josua 14:6-9.
Mwiriloon An Aramas Chichinnapelo
10. Met a liosutiu ren (a) “ekkewe chon tumunu ewe imw”? (b) “ekkewe mwan mi pochokkul”?
10 Mwirin, Salomon a kapas ussun ekkewe weires “lon ewe ran lupwen chon tumunu ewe imw repwe chechech, me ekkewe mwan mi manaman repwe pwor, me ekkewe fefin mi ngungu ra ukutiu le angang pun ra chokukunula, me ekkewe fefin mi nennelo lon asamwocho ra toputopula.” (Eklesiastes 12:3) Ewe “imw” a wewe ngeni inisin aramas. (Mattu 12:43-45; 2 Korint 5:1-8) Ekkewe “chon tumunu” a wewe ngeni ekkewe pau me kumuch mi tumunu ewe inis me pwakini an kewe apwangapwang. Lon ierin chinnap, ra chechech ren apwangapwang, pireir, me apwangapwang. “Ekkewe mwan mi pochokkul”—pechech kewe—rese chuen ussun chok urelap nge ra apwangapwangelo me pworetiu pwe ra chok anifelo. Nge, kese pwapwa le kuna chienach kewe chon luku mi chinnap lon ach kewe mwich?
11. Lon kapas monomon, io ekkewe “fefin mi ngungu” me “ekkewe fefin mi nennelo lon ekkewe asamwocho”?
11 “Ekkewe fefin mi pin ngungu” rese chuen ngungu pun ra chokukkunulo”—nge ifa ussun? Eni ngiich kewe ra apwangapwangelo are ra fen wuttuut, iwe, rese chuen chommong. A weires an epwe ngungu mongo mi pochokkul are ese fen chuen tongeni fori. “Ekkewe fefin mi nennelo lon ekkewe asamwocho”—a wewe ngeni mesach fengen me kifetin tupuach mi atufichi ach sipwe kuna—ra kirochelo, ika sap unusen kiroch.
12. (a) Ifa ussun “ekkewe asam lon ewe al ra kesipelo”? (b) Met om ekiek ussun ekkewe chon afalafala ewe Muu mi chinnap?
12 Ewe Chon Afalafal a sopwolo le apasa, “Iwe, ekkewe asam ngeni ewe al ra kesip, lupwen ese chuen rongorong ewe fein seim are iu, me emon a pwata ren tikin machang, nge ese kon lien rongorong ekkewe nenginin kol.” (Eklesiastes 12:4) Ekkewe ruu asamen ewe au—tinauach—rese kon lien sussuuk are rese chuen apasa minne a nom lon ewe “imw,” are inis, ren ir kewe mi chinnap nge rese angang ngeni Kot. Rese chuen tinalo och lon “ewe alen” aramas. Iwe nge, ifa ussun ekkewe chon afalafala ewe Muu mi chinnap me tinikken? (Job 41:14) Eni repwe mang le feilfetal seni imw me imw, me epwe weires ngeni ekkoch ar repwe kakkapas, nge enlet, ra fokkun mwareiti Jiowa!—Kol Fel 113:1.
13. Ifa ussun ewe Chon Afalafal a awewei ekkewe ekkoch osukosuk ekkewe chinnap ra kuna, nge met a enlet ussun ekkewe chon Kraist mi chinnap?
13 Mongungun ewe fein seim a leuwokukkun atun ewe chinnap ese chuen wor ngiin nge a chok mongo ren wochen ngiin. Emon chinnap mwan ese kinamwe le onnut won an we pet. Pwal mwo nge tikin emon matchang epwe atai an mour. Ese chuen eani chommong kol, me a leuwokukkun le kol. “Ekkewe nenginin kol”—ekkewe nooten kol—“ra lewupotete.” Ekkewe chinnap rese kon lien rongorong nikattik me kolun aramas. Iwe nge, ekkewe mi kepit mi chinnap pwal chiener kewe, nge ekkoch leir a pwal watte ierir, ra chuen eani kolun mwareiti Kot lon ar kewe mwich. A ifa me watte ach pwapwa ach peppenir le mwareiti Jiowa lon ewe mwichefel!—Kol Fel 149:1.
14. Met sokkun niuokkus a aweiresi ekkewe mi chinnap?
14 A ifa me watte attongen ekkewe chinnap, akkaeuin ir kewe mi tunalo ewe Chon Forata! Ewe Chon Afalafal a apasa: “Pwal eu, ra niuokkusiti ren minne mi tekia, iwe, a wor minen aniuokkus won al. Iwe, iraan almond a soonono, me ewe lifichifich-mas a chok atekini pwisin inisin, me ewe foun ira itan caper berry a ttomw, pun aramas ra fetal ngeni imwer ren langattam fansoun me chon ngungures repwe feffetal won al.” (Eklesiastes 12:5) Chommong chinnap repwe niuokkus ar repwe turutiu ika repwe tota won efoch nate. Lupwen repwe neta ngeni och mettoch mi tekia repwe tongeni meefi mwanien. Lupwen epwe lamot ar repwe fetal lein aramas won al, ra niuokkus ika repwe feiengau ren serengau are ren chon sola.
15. Met weween “ewe iraan almond a uwei poon ira,” me ifa ussun ewe lifichifich-mas ‘a atekini pwisin inisin’?
15 Ren emon chinnap mwan, eni “ewe iraan almond a soonono,” a wewe ngeni pwe epwe topw, iwe, mwirin epwe pwechepwech ussun chok sno. Meten mokuran epwe moretiu ussun chok pon iraan ewe iran almond mi pwechepwech. Atun an a ‘atekini pwisin inisin’ neman a pworetiu nge poun kewe ra chok ititiu are iteuk me epinipinin poun a pworeta, iwe, a lapalapeni lapalapen emon lifichifich-mas. Iwe nge, ika mei wor ekkoch leich mi ina ussun, ekkewe ekkoch repwe weweiti pwe kich sia fiti an Jiowa we mwichen sounfiun lifichifich-mas mi tinikken!—Nengeni The Watchtower, May 1, 1998, pekin taropwe 8-13.
16. (a) ‘An ewe caper berry ttomw’ epwe tongeni wewe ngeni met? (b) Meta “imwen aramas ren langattam fansoun,” and ikkefa ekkewe esissin pwe a chok arap ngeni malo?
16 Ekkewe chinnap rese chuen mwoneiti aner mongo, inaamwo ika ewe mongo won chepel a fokkun anno ussun chok ewe foun ira itan caper berry. Ren langattam fansoun, aramas ra aea ekkena foun ira pwe repwe alisata an aramas mwoneiti aner. ‘An ewe caper berry ttomw’ a tongeni wewe ngeni pwe lupwen emon chinnap mwan ese chuen mwoneiti anan mongo, pwal mwo nge ena foun ira esap tongeni alisata an mwoneiti mongo. Ekkena mettoch ra pwarata pwe epwe arap ngeni “imwan we ren langattam fansoun,” ewe peias. Epwe imwan we tori feilfeilo chok ika esap ekkekieki ewe Chon Forata nge epwe chok manaueni ewe sokkun manau mi ngau pwe Kot esap chechemeni lon ewe manausefal. Esissin pwe epwele malo a pwapwalo seni ewe mongungu me ngungures me ngunungunungau mi tou seni asamen auen ewe chinnap.
17. Ifa ussun “ewe sein silifer” a mwu, iwe, meta ewe “sepi mi for seni kolt” a tongeni liosueta?
17 A wor kapasen pesepes ach sipwe chechemeni ewe Chon Forikich “mwen ewe sein seni silifer epwe mwu, ika ewe sepi seni kolt epwe mok, ika ewe rume epwe mok orun ewe chonuttu, ika ewe leenien ufuf konuk epwe tala.” (Eklesiastes 12:6) Eni ewe “sein seni silifer” epwe wewe ngeni ewe chuulap. Emon epwe fokkun malo lupwen ena alen uwei poraus ngeni tupuan a wesewesen feiengau. Eni ewe “sepi seni kolt” epwe wewe ngeni ewe tupu mi nonnom lon ewe kifetin inisich mi ussun chok eu sepi mi pach ngeni ewe chuulap. Kolt a wewe ngeni pwe a fokkun auchea, iwe, ewe tupu lupwen epwe ukutiu le angang epwe emmwen ngeni malo.
18. Meta ewe “rume orun ewe chonuttu” lon kapas monomon, iwe, met epwe fis lupwen epwe mok?
18 “Ewe rume orun ewe chonuttu” a wewe ngeni ewe foun ngasangas mi angei pupuun chcha, iwe, a pwal tinisefallilo pwe epwe feilfetal lon ewe inis. Lon fansoun malo, ewe foun ngasangas epwe ussun chok eu rume mi mok, a tatakkisilo lon ewe chonuttu pun esap chuen tongeni angei, uwei, me pomwei ewe chcha mi fokkun lamot ngeni pochokkulen ewe inis. Ewe ‘leenien ufuf konuk mi tala’ esap chuen kul, iwe, ewe chcha mi wewe ngeni manau esap chuen feilfetal. Jiowa a fen pwarata ngeni Salomon porausen fetallin chcha langattam fansoun me mwen an ewe tokter William Harvey lon ewe 17th senturi a annetata pwe a feilfetal.
19. Ifa ussun ekkewe kapas lon Eklesiastes 12:7 a pwonueta lon fansoun malo?
19 Ewe Chon Afalafal a pwal era: “Iwe, ewe inis epwe liwiniti ewe pwul pun a popu seni pwul, pwal ewe ngun epwe liwinla ren ewe Kot mi enlet, ewe a ngeni.” (Eklesiastes 12:7) Lupwen ewe “minen etit konuk” epwe talo, ewe inisin aramas mi pin for seni susuun pwul epwe liwiniti pwul. (Keneses 2:7; 3:19) Ewe soul epwe malo pun ewe ngun are manamanen manau Kot a fang ngeni epwe liwiniti are nonnom ren ewe Chon Forikich.—Isikiel 18:4, 20; Jemes 2:26.
Met Epwe Kawor lon Mwachkkan ren Ir kewe mi Chechemeni Kot?
20. Met Moses a tingor lupwen a eani ewe iotek mi mak lon Kol Fel 90:12?
20 Salomon a fokkun angoch le pwarata ifa lamoten ach sipwe chechemeni ewe Chon Forikich mi Lapalap. Enlet, ren ir kewe mi ekkekieki Jiowa me foffori letipan we ren unusen letiper rese manaueni ewe sokkun manau mi mochomoch me ur ren fitikoko. Ese lifilifil ika ir mi kukkun are watte, nge ra eani ewe chok ekiek Moses a eani, iwe, a iotek: “Kopwe aiti ngenikem minne am aupwe fori lon am keei ran, pwe am aupwe tongeni ani letip mi tipatchem.” Noun Kot we soufos mi tipetekison a fokkun mochen pwe Jiowa epwe pwarata are aiti ngeni fengen me aramasen Israel ar repwe eani tipatchem le aucheani ‘ranin manauer’ me akkaea lon eu lapalap Kot epwe pwapwa ren.—Kol Fel 90:10, 12.
21. Ika sipwe alleani ach kewe ran ngeni lingen Jiowa we, met sipwe fokkun fori?
21 Akkaeuin ekkewe sarafo chon Kraist repwe tipeppos le auseling ngeni an ewe Chon Afalafal kapasen fon pwe repwe chechemeni ewe Chon Forireta. A suuk ngenir chommong wis auchea pwe repwe angang ngeni Kot! Iwe nge, ese lifilifil ierich nge ika sipwe silei ifa ussun sipwe alleani ranin manauach ngeni lingen Jiowa lon ei “fansoun sopwolon,” eni sipwe tongeni sopwosopwolo le alleanir tori feilfeilo chok. (Taniel 12:4; Jon 17:3) Pwungun, ika sipwe fori ina ussun, sipwe fokkun chechemeni ewe Chon Forikich. A lamot ach sipwe pwal unusen apwonueta wisach ngeni Kot.
◻ Met popun ekkewe sarafo ra kuna kapasen pesepes ar repwe chechemeni ewe Chon Forireta?
◻ Ikkefa ekkoch poraus lon Paipel ussun ir kewe mi chechemeni ewe Chon Forireta mi Lapalap?
◻ Ifa ussun Salomon a awewei mwiriloon an aramas chinnapelo?
◻ Met epwe fis lon mwachkkan fan iten ir kewe mi chechemeni Jiowa?
[Study Questions]
[Ekkewe sasing lon pekin taropwe 9]
Tafit, ewe nenginin Israel mi eolo Anna, me Simion ra chechemeni Jiowa
[Ekkewe sasing lon pekin taropwe 10]
Ekkewe Chon Pwarata Jiowa mi chinnap ra pwapwa le angang ngeni ewe Chon Forikich mi Lapalap