Ach Sipwe Silelo “Ewe Ekiekin Kraist”

“‘Pun io mi silei letipen [Jiowa, NWT], pwe epwe afalafala i?’ Nge letipen Kraist a fen nonnom rech.”​—1 KORINT 2:16.

1, 2. Lon an we Kapas, met Jiowa a pwarata ussun Jises?

IFA lapalapen inisin Kraist? Ifa anuwan meten mokuran? unuchan? mesan kkewe? Ifa ukukuun ttaman? Ifa ukukun chouun inisin? Lon ekkewe senturi ra lo, a watte sokkofesennin ekkewe sokkopaten niosun Jises, seni minne epwe tongeni pwung tori minne esap tufich. Ekkoch ra chungani pwe epwe ussun emon mwan mi pochokkul me manaman, nge pwal ekkoch ra eniyossuuw pwe epwe ussun emon mi oro-apwangapwang me soropwpwech.

² Iwe nge, ewe Paipel ese kapas chommong ussun lapalapen inisin. Nge Jiowa a ekiekin pwarata eu mettoch mi fokkun lamot lap seni lapalapen inisin, weween, lapalapen manauen Jises. Ekkewe puken Kapas Allim ese chok kapas ussun minne Jises a apasa me fori, nge ra pwal pwarata alollolun meefian me lapalapen an ekiek, weween, minne an kewe kapas me foffor ra popu seni. Ekkeei ruanu puk mi popu seni Kot ra atufichikich ach sipwe nennengeni lon minne ewe aposel Paul a eita ngeni “ewe ekiekin Kraist.” (1 Korint 2:16) Epwe lamot ach sipwe silei an Jises kkewe ekiek, memeef, me lapalap. Pwata? Mei wor ruu popun.

3. Ach silelo ewe ekiekin Kraist epwe tongeni awora ngenikich met sokkun weweoch?

³ Aeuin, ewe ekiekin Kraist a atufichikich ach sipwe ekis silei ussun ekiekin Jiowa Kot. Pokiten Jises a fokkun silei Seman we, a tongeni apasa: “Esor emon a silei io ewe Nau, pwe ewe chon Sam; are io ewe Sam, pwe ewe chok Nau, o pwal io emon ewe Nau a mochen pwar ngeni.” (Luk 10:22) A ussun ita Jises a apasa: ‘Ika ka mochen silei lapalapen Jiowa kkewe, nennengeniei.’ (Jon 14:9) Ina minne, lupwen sipwe kaeo met ekkewe puken Kapas Allim ra pwarata ussun ekiekin me meefien Jises, sipwe pwal kaeo ussun ekiekin me meefien Jiowa. Ena sokkun sile epwe atufichikich ach sipwe arap ngeni ach Kot.​—Jemes 4:8.

4. Ika sipwe enletin akkappiru Kraist, met sipwe akkom kaeo, iwe, pwata?

⁴ Oruuan, ach silei ekiekin Kraist epwe alisikich ach sipwe “tapwelo mwirin lon ipwan.” (1 Piter 2:21) Ach sipwe tapwelo mwirin Jises esap chok wewe ngeni ach sipwe apiapini alon kewe me akkappiru an kkewe foffor. Pokiten ach fos me foffor repwe popu seni ach ekiek me memeef, ach tapwelo mwirin Kraist epwe wewe ngeni ach sipwe eani ewe chok sokkun “ekiek” a eani. (Filipai 2:5) Weween, ika sipwe enletin appiru fofforun Kraist, akkom epwe lamot ach sipwe kaeo pwe sipwe eani an kewe ekiek me memeef, ukukuun ach tufich pokiten kich aramas sise unusoch. Iwe, ren alillisin ekkewe sou makkei ekkewe puken kapas allim, sipwe nennengeni ewe ekiekin Kraist. Sipwe akkom kaeo ekkewe mettoch mi amwokutu Jises an epwe eani an kewe ekiek me memeef.

Manauan Me Mwen An A Feitiu Fonufan

5, 6. (a) Met chienach kewe repwe tongeni fori ngenikich? (b) Noun Kot we mwanichi a kan chiechi ngeni io lon lang me mwen an we feitiu fonufan, iwe, ifa ussun an a anapanapa lapalapan?

⁵ Chienach kkewe repwe tongeni pwunungngau are pwunuoch ngenikich, repwe tongeni ochiti are aingaua ach kewe ekiek, memmef, me foffor.a (Proverbs 13:20) Ekieki mwo ussun chienen Jises kkewe lon lang me mwen an a feitiu fonufan. Ewe puken Jon a kapas ussun manauen Jises lon lang atun i “ewe Kapas,” are Soufos, fan iten Kot. Jon a apasa: “Le poputan a wor ewe Kapas, o ewe kapas nom ren Kot, o ewe Kapas mi emon kot. Iwe, ewe Kapas a nonnom le poputan ren Kot.” (Jon 1:1, 2) Ese mwaal, pokiten ese wor poputaan Jiowa, an ewe Kapas nonnom ren Kot seni “le poputaan” epwe wewe ngeni seni le poputaan an Kot forata mettoch meinisin. (Kol Fel 90:2) Jises, i “mwanichien forien Kot kkewe meinisin.” Iwe, a fen nonnom mwen forien ekkewe ekkoch chonlang me ekkewe mettochun lang me fonufan.​—Kolose 1:15; Pwarata 3:14.

⁶ Me ren ekkoch sou silei, wesewesen masouen lang me fonufan ra fen nonnom orun 12 billion ier. Ika epwe pwung ar ekiek, ren langattam fansoun, noun Kot we mwanichi a pwapwaesini an chiechiochfengen me Seman we langattam fansoun mwen forutaan Atam. (Alollo ngeni Mika 5:2) A mammarita eu ririoch mi fokkun alollol lefiler. Ussun ita nge Jises a liosueta tipatchem, iwe, mwen an a wiliti emon aramas, ena Mwanichien Kot a apasa: “Ua nom ren Kot usun eman sousile angang, ngang popun an pwapwa iteiten ran. Ua meseik me fan mesan fansoun meinisin.” (Proverbs 8:30) Enlet, an nonnom ren Popun ewe lapalapen tong ren langattam fansoun epwe ochiti Noun Kot we! (1 Jon 4:8) Ei Nau a silelo me akkappiru an Seman kkewe ekiek, memeef, me foffor lap seni ekkewe ekkoch meinisin.​—Mattu 11:27.

Manauan Won Fonufan me Minne A Kku Manauan

7. Ifa eu popun a lamot ngeni noun Kot we mwanichi an epwe feitiu fonufan?

⁷ Mei chuen wor och mettoch Noun Kot we epwe kaeo, pun ina an Jiowa kokkot pwe epwe atufichi Noun we pwe epwe wiliti emon Samol-fel lapalap mi umoumoch, emon mi tongeni “meefi ach kkewe apwangapwang.” (Ipru 4:15) Ina eu popun ewe Nau a feitiu fonufan ussun emon aramas pwe epwe lipwakochulo lon ena wis. Ikkeei ie, ussun wesewesen emon aramas mi for seni fituk me chcha, Jises a kuna ekkewe sokkun mettoch me lapalap a pin chok nennengeni me lang. Iei a tongeni meefi meefien aramas. Fan ekkoch a meefi pekkus, kaka, me echik. (Mattu 4:2; Jon 6, 7) Iwe, a pwal likiitu fan chommong sokkopatten weires me riaffou. A ina ussun an a “kaeo alleasochis”, iwe, a lipwakochulo fan iten an epwe wiseni ewe wis Samol-fel Lapalap.​—Ipru 5:8-​10.

8. Met sia silei ussun poputaan manauen Jises won fonufan?

⁸ Met porausen lekukkunun Jises atun a nonnom won fonufan? A wor ekisi chok porausan lekukkunun. Enlet, Mattu me Luk chok ra kapas ussun fansoun uputiuan. Ekkewe chon makkei ekkewe puken Kapas Allim ra silei pwe Jises a pin manau lon lang me mwen an we a feitiu fonufan. Lap seni ekkewe ekkoch mettoch meinisin, manauan lon lang me mwen an wiliti emon aramasen fonufan, a anapanapa ewe sokkun mwan a wiliti. Iwe nge, Jises, i wesewesen emon aramas. Inaamwo ika a unusoch, nge a chok kakkaeo, atun an a mammarita seni emon monukol, emon semirit, me sarafo tori an a wiliti emon mwan. (Luk 2:51, 52) Ewe Paipel a pwarata ekkoch mettoch ussun lekukkunun Jises nge ese mwaal a anapanapa lapalapan.

9. (a) Met a pwarata pwe Jises a uputiu lon eu famili mi woungau? (b) Neman ifa lapalapen an Jises mammarita?

⁹ Jises a uputiu lon eu famili mi woungau. Ena mettoch a pwapwalo ren ewe asor Josef me Meri ra uwei ngeni ewe imwenfel orun 40 ran mwirin uputiuan. Rese wato emon appanen siip pwe repwe asoresini me emon appanen muro are emon witiwit pwe eu asorun tipis, nge ra wato “ruemon witiwit, are ruemon appanen muro.” (Luk 2:24) Me ren ewe Allukun Moses, epwe mumuta ngeni ekkewe mi woungau ar repwe eani ena sokkun asor. (Lifitikos 12:6-8) Lo, lo, chochoon ei famili a lapelo. Mwirin uputiuen Jises ren ewe manamanen Kot, Josef me Meri ra nounou pwal wonumon are lap seni wonumon. (Mattu 13:55, 56) Iwe, Jises a mammarita lon eu famili mi watte, nge rese pisekisek.

10. Met a pwarata pwe Meri me Josef, ir aramas mi niuokkusiti Kot?

¹⁰ Seman me inen Jises ra niuokusiti Kot, iwe, ra tongei Jises. Inan we, Meri, i emon fefin mi fokkun murinno. Chechemeni mwo pwe lupwen ewe chonlang Kapriel a kapong ngeni, a apasa: “Ran allim, en mi achengicheng, [Jiowa] a nonnom reom.” (Luk 1:28) Josef, i pwal emon mwan mi tuppwol. Iteiten ier a sai 90 mail ngeni Jerusalem fan iten ewe Pasofer. Meri a pwal fiti, inaamwo ika a chok alluk ngeni ekkewe mwan. (Ekistos 23:17; Luk 2:41) Fan eu, lon ena sokkun fansoun sai atun Jises a 12 ierin, Josef me Meri ra kukkutta Jises, iwe, mwirin och fansoun ra kuna lon ewe imwenfel lein ekkewe sense. Iwe, Jises a apasa ngeni seman kewe me inan mi osukosuk ren: “Ouse mwo meefi pwe upwe fokkun nonnom lon imwen Semei?” (Luk 2:49) “Semei”​—ena kapas a efisata tong lon leluken ewe at Jises. Ese mwaal, seman kewe me inan ra fen esilei ngeni pwe Jiowa, wesewesen Seman we. Pwal eu, Josef, emon sam mi murinno ngeni Jises. Ese fokkun mwaal pwe Jiowa esap filata emon mwan mi kirikiringau are arochongau pwe epwe amarata Noun we achengicheng!

11. Jises a kaeo met sokkun angang, iwe, lon fansoun Paipel a makketiu, met epwe kapachelong lon ena sokkun angang?

¹¹ Lon ewe fansoun a nonnom lon Nasaret, Jises a kaeo ewe angangen taiku, ese mwaal seni seman we mi muti, Josef. Pokiten Jises a fokkun angoch lon ena angang, aramas ra eita ngeni “ewe chon taiku.” (Mark 6:3) Lon ena fansoun, ekkewe chon taiku ra aueta imw, fori ekkewe pisekin imwen aramas (pachelong ekkewe chepel me leenien mot), me ekkewe pisekin atake. Lon an we puk Dialogue With Trypho, Justin Martyr, seni ewe oruuen senturi C.E., a makkei ussun Jises: “A eani ewe angangen chon taiku lupwen a nonnom lein aramas, iwe, a forata ekkewe pisekin tuu pwul me ekkewe iok.” Ese mecheres ena sokkun angang, pun ekkewe chon taiku lom rese tongeni moni ira. Iwe, eni a feilo filata efoch ira, pokuelo, me uweilo lon imwan we. Iwe, eni Jises a silei weiresin an aramas akkangang, angang fan iten aramas, me atufichi manauen an we famili.

12. Met a pwarata pwe Josef a malo akkom mwen Jises, iwe, met weween ngeni Jises?

¹² Pokiten i ewe mwanichi, eni Jises a wisen atufichi chon le imwan kewe, akkaeuin, pokiten Josef a malo mwen Jises.b Zion’s Watch Tower minen Januari 1, 1900, a apasa: “Eoreni a era pwe Josef a malo atun Jises a chuen emon sarafo, iwe, mwirin, Jises a eani ewe angangen taiku me atufichi manauen ewe famili. Eni, ena poraus a tipeeu ngeni Paipel pun a era pwe aramas ra eita ngeni Jises emon chon taiku, me a kapas ussun inan we me pwiin kewe, nge a tunalo Josef. (Mark 6:3) . . . Neman, ukukun ekkewe engol me wanu ier lon manauen ach Samol, seni ewe fansoun a fis [minne a mak lon Luk 2:41-49] tori fansoun an papatais, Jises a foffori minne ekkewe ekkoch aramas ra foffori.” Meri me noun kkewe, pachelong Jises, ra silei ewe letipechou mi popu seni maloon emon sam me puluen emon fefin mi achechicheng.

13. Lupwen Jises a poputani an we angangen afalafal, pwata a fen wor ren sokkun silelap, mirit, me alollolun memmef ese nom ren pwal emon aramas?

¹³ A ffat pwe Jises ese uputiu lon eu famili mi mecheres manauer. Nge, a manaueni manauen aramas kisikis. Iwe nge, lon 29 C.E., a tori ewe fansoun pwe Jises epwe apwonueta wisan we seni Kot. Lon woon wunumar lon ena ier, a papataiselo lon konik me ngun mi fel a feitiu won pwe epwe emon Noun Kot we lon pekin ngun. ‘A suuk ngeni i ekkewe lang,’ weween, pwe a tongeni chechemeni manauan lon lang me mwen an a feitiu fonufan, pachelong ekkewe ekiek me memeef a pin eani ikkewe ie. (Luk 3:21, 22) Iwe, lupwen Jises a poputa an angangen afalafal, a eani ewe sokkun sile, mirit, me memeef mi alollol ese tongeni nom ren pwal emon mwan. A wor popun ekkewe chon makkei ekkewe puken Kapas Allim ra akkaeuin mak ussun ekkewe ierin an Jises foffori ewe angangen afalafal. Iwe nge, rese tongeni mak ussun iteiten an kkewe foffor meinisin. (Jon 21:25) Nge minne ewe ngun mi fel a amwokutur ar repwe makkei a atufichikich ach sipwe nennengeni ekiekin ewe mwan mi lapalap seni meinisin.

Ifa Lapalapen Jises kewe

14. Ifa ussun ekkewe puken Kapas Allim ra pwarata pwe Jises emon mwan mi umoumoch me eani memmeef mi alollol?

¹⁴ Mi pwapwalo lon ekkewe puken Kapas Allim pwe Jises, i emon mwan mi kirokiroch me a eani memeef mi alollol. A pwarata chommong sokkopaten memeef: tong ngeni emon chon rupun pwotur (Mark 1:40, 41); letipechou ren ekkewe chon lukulukumang (Luk 19;41, 42); song mi pwung ngeni ekkewe chon siwili moni mi tipemmong (Jon 2:13-17). Jises, i emon mwan mi meefi mefien ekkewe ekkoch, a tongeni kechiu, iwe, ese tukumalo mefian kkewe. Lupwen chienan we mi achengicheng Laseres a malo, a kuna Meri, fefinen Lasarus we, a kekkechiu, iwe, a wesewesen chung letipen Jises pwe a pwal pwisin kechiu mwen mesen ekkewe ekkoch.​—Jon 11:32-​36.

15. Ifa ussun meefien Jises kewe mi kirokiroch me umoumoch ra pwapwalo lon lapalapen an ekiek me foffor ngeni aramas?

¹⁵ An Jises tong a akkaeuin pwapwalo lon an ekiek ussun me an kewe foffor ngeni ekkewe ekkoch. A ekieki ussun ekkewe mi woungau me osupwang, iwe, a alisir pwe repwe ‘kuna asosoon ngunur.’ (Mattu 11:4, 5, 28-30) Ese kon osukosuk pwe esap tongeni alisi ekkewe mi semmwen, awewe chok, ewe fefin mi pupuseni cha mi attapa ufan we are emon chon mwera mi mesechun mi esap fanafanelo. (Mattu 9:20-22; Mark 10:46-52) Jises a kan kutta minne mi murinno lon ekkewe ekkoch, iwe, a mwareitir; iwe nge, a pwal tongeni apwungur lupwen epwe lamot. (Mattu 16:23; Jon 1:47; 8:44) Lon ena fansoun, ese chommong an fefin kewe pwung, nge Jises a itepok me ruuepek lon an foffor ngenir, a sufolutir me asamolur. (Jon 4:9, 27) Iwe, sipwe tongeni weweiti ewe popun eu mwichen fefin ra ateniki ren pisekir kkewe.​—Luk 8:3.

16. Met a pwarata pwe Jises a eani ekiek mi itepok me ruuepek ussun manau me pisek?

¹⁶ Jises a eani ekiek mi itepok me ruepek. Ese alamota akkom mettochun fonufan. Ese chommong an kkewe pisek. A apasa pwe “esor leenien ewe Noun-Aramas an epwe akonalo mokuran.” (Mattu 8:20) Iwe nge, Jises a alisi ekkewe ekkoch ar repwe kuna pwapwa. Lupwen a fiti eu fetellapen apupulu​—fansoun a kan wor nikattik, kol, me pwapwa​—a ffat pwe ese atai pwapwaan ekkewe chon fiti. Enlet, Jises a forata an we aeuin manaman ikewe ie. Lupwen a poonulo ewe wain, a siwili konik ngeni wain, ewe a “apwapwai letipen aramas.” (Kol Fel 104:15; Jon 2:1-11) Ina minne a tongeni sopweilo ewe fetellap, iwe, ese mwaal resap sau ekkewe chon pupulu. An itepok me ruepek a pwal pwapwalo lon ach kuna pwe a fokkun chommong ekkewe fansoun Jises a angang weires lon an we angangen afalafal lap seni ekkewe fansoun an a fiti pari.​—Jon 4:34.

17. Met popun sisap mairu pwe Jises, emon Sense mi Lapalap, iwe, met an kewe afalafal ra pwarata?

¹⁷ Jises emon Sense mi Lapalap. Lap ngeni an kewe afalafal meinisin ra alongolong won porausen manauen aramas ran me ran, minne Jises a fokkun silefichi. (Mattu 13:33; Luk 15:8) A fokkun auchea lapalapen an afalafal​—a ffatafatoch, mecheres, me lamot. A pwal auchea minne a kait ngeni aramas. An kewe afalafal ra pwarata mochenin letipan pwe epwe esilei ngeni ekkewe chon auseling an Jiowa kewe ekiek, memmeef, me al.​—Jon 17:6-8.

18, 19. (a) Jises a eani met sokkun kapas monomon le awewei ussun Seman we? (b) Met sipwe porausfengen ussun lon ewe lesen mwirin?

¹⁸ Fan chommong Jises a eani kapas monomon le awewei ussun Seman we nge ekkewe chon auseling resap tongeni monukalo. A mecheres an aramas repwe kapas ussun umoumochun Kot. Nge a sokkolo aucheaan lupwen a alollofengenni Jiowa me emon sam mi omusalo tipisin noun we, iwe, atun ewe sam a kuna noun we mwan a liwinsefal mwirin an we a mwalechelo, a ‘chelo o foropachei o mitiri i.’ (Luk 15:11-​24) Jises ese tipeeu ngeni eorenian chon Jus mi kon eipo me ekkewe nouwisen lamalam ra atekiata pwisin ir won ekkewe aramas kisikis. Jises a awewei pwe Seman we, emon Kot sipwe tongeni arap ngeni, iwe, a fokkun etiwa an emon chon angei takises mi tipetekison kewe tingor lap seni iotekin emon Farisi mi sikasini. (Luk 18:9-14) Jises a pwarata pwe Jiowa emon Koten tong mi silei inet emon litchok epwe turutiu won pwul. Jises a alukuluk ngeni noun kewe chon kaeo, “Oute niuokus, pun ami mi auchea lap seni chommong litchok.” (Mattu 10:29, 31) Sia weweiti pwata aramas ra weitifengen ren “lapalapen an Jises afalafal”, iwe, ra kito ren. (Mattu 7:28, 29) Iwe, fan eu, “eu pwin aramas mi chommong” ra nonnom ren Jises ulungat ran, nge esor aner mongo!​—Mark 8:1, 2.

¹⁹ Sipwe kilisou pwe Jiowa a pwarata lon an we Kapas ewe ekiekin Kraist! Iwe nge, ifa ussun sipwe amarata me pwarata ekiekin Kraist lon ach kewe foffor ngeni aramas? Sipwe kaeo ena lon ewe lesen mwirin.

[Ppii ekkewe pwóróus fan]

En Mi Chechemeni?

• Met popun epwe lamot ach sipwe sileifichi “ewe ekiekin Kraist”?

• Jises a kan chiechi ngeni io me mwen an a wiliti emon aramas?

• Atun a nonnom won fonufan, met sokkun lapalap Jises a pwisin kuna?

• Met ekkewe puken Kapas Allim ra pwarata ussun lapalapen Jises kewe?

[Sasing lon pekin taropwe 16]

Jises a mammarita lon eu famili mi watte, iwe, neman rese pisekisek

[Ekkewe sasing lon pekin taropwe 18]

Ekkewe sense ra ingeiti an Jises weweoch me an poluenir atun a chok 12 ierin