“Kukkutta Jiowa Me An Pochokkul”

“Ewe Samol mi Lapalap a nenengeni unusen fanufan, pwe epwe apochokula chokewe mi fang ngeni unusen letiper.”​—2 KRONIKA 16:9.

1. Met weween manaman, me ifa ussun aramas ra fen kan aea?

MANAMAN epwe tongeni wewe ngeni fitu mettoch, awewe chok ren nemenem; an emon tufichin fori och mettoch; pochokkulen inisin emon; ika tipachchemen are wenecharen letipen emon. Ese och porausen uruwo ussun an aramas aea ar manaman. Iei alon Lord Acton, emon sou uruwo, lupwen a kapas ussun ewe pochokkulen nemenemen a nom ren ekkewe nouwiis: “Pochokkulen nemenem a kan appwora letipen aramas me an aramas eani nemenem mi unus a kan angaua unusen ekiekir me letiper.” A wor chommong poraus lon ei fansoun mi pwarata pwe a pwung alon Lord Acton. Lon ewe aruween senturi, esaamwo fis fan eu me lom ukuukun watteen an “aramas nemeni aramas o ariafouur.” (Eklesiastis 8:9) Ekkewe chon nemenem mi ppwor ra fen aeamwalli ar pochokkulen nemenem, iwe, ra nnielo fite milion aramas. Pochokkulen nemenem eu mettoch mi efeiengau ika ese pacheri tong, tipachchem, me pwung.

2. Awewei mwo ifa ussun ekkewe pwal fitu lapalap mi fel ra nennemeni ifa ussun Jiowa a kan akkaea an manaman.

² Kot a sokko seni chommong aramas, pun fansoun meinisin a kan aea an manaman fan iten minne mi pwung. “Ewe Samol mi Lapalap[Jiowa] a nenengeni unusen fonufan, pwe epwe apochokula chokewe mi fang ngeni unusen letiper.” (2 Kronika 16:9) Jiowa a kan nemeniochu lapalapen an aea an manaman. Mosonottamen Kot a amwochu seni an epwe nnielo ekkewe mi ngau ren an epwe awora ngeniir fansoun pwe repwe tufichin aier. Tong a kan amwokutu i pwe epwe attina ewe akkar won sokkun aramas meinisin​—chon pwung me chon rese pwung. An Kot pwung epwe amwokutu i pwe epwe aea an manaman ese kauk pwe epwe atterielo ewe emon mi tufichin efisata malo, Setan ewe Tefil.​—Mattu 5:44, 45; Ipru 2:14; 2 Piter 3:9.

3. Pwata an Kot manaman mi unusen tekia eu popun sipwe anomu ach lukuluk won i?

³ Ewe manaman mi sokkolo watteen a nom ren Semach we lon lang eu popun ach sipwe unusen luku me achifoua an kkewe pwon me an tumun. Emon kukkun semirit a kan meefi lukulukoch lein chon ekis ika epwe a kamwoch poun seman we, pun a silei pwe seman we epwe tumunu i pwe esap feiengau. Pwal ussun chok, Semach we lon lang, ewe emon mi eani “pochokul mi lapalap” pwe epwe “amanaua aramas,” epwe tumunukich seni ach sipwe feiengaufochofoch ika sipwe fitipach ngeni i. (Aisea 63:1; Mika 6:8) Iwe, pokiten i emon Sam mi murinno, fansoun meinisin Jiowa epwe apwonueta an kkewe pwon. An manaman ese kauk eu minen alukuluk pwe an ‘kapas esap liwinto ren fan pon, pwe epwe apwonueta mine a akunou ngeni.’​—Aisea 55:11; Taitos 1:2.

4, 5. (a) Met a fis lupwen King Asa a anomu unusen an lukuluk won Jiowa? (b) Met epwe tongeni fis ika sipwe anomu ach lukuluk won ekiekin aramas fan iten ach sipwe pwakini ach kkewe osukosuk?

⁴ Pwata a wesewesen lamot ach sipwe achocho ngeni ach sisap monuki ewe tumun seni Semach we lon lang? Popun, pun epwe tufich an epwe kon chounikich osukosuken lon manauach, iwe, sipwe monuki met sia kan wesewesen lukulukoch ren. Ina eu mettoch mi pwalo lon porausen King Asa, nge i emon mwan mi kan anomu an lukuluk won Jiowa. Atun nemenemen Asa, ewe mwichen sounfiu seni Itiopia mi ukuukun eu milion chochoon a maun ngeni Jerusalem. Pokiten an Asa weweiti pwe ena mwichen sounfiu a chocho mwen noun kkewe sounfiu, a iei ussun an iotek: “[Jiowa], esap wor eman usun en mi tongeni alisi chon apwangapwang le maun ngeni chon pochokul. [Jiowa] am we Kot, kose mochen kopwe alisikem, pun am aia anomu am apilukuluk womw, nge aia feito pwe aipwe maun ngeni ei mwichemongun sounfiu fan itom. [Jiowa], en am Kot, esap wor eman a tongeni akufuk.” (2 Kronika 14:11) Jiowa a apwonueta an Asa we tingor me a alisi i le akkufu ewe mwichen sounfiu.

⁵ Iwe nge, mwirin an tuppwol le angang ngeni Kot chommong ier, a kukkunulo an Asa luku an Jiowa manaman, manamanen amanaua aramas. Ren an esap kkuf ren ekkewe sounfiu seni ewe muun Israel a nom ennefen, a kulliiti Siria ren an alillis. (2 Kronika 16:1-3) Inaamwo ika an uwowu monien alillis mwaal ngeni ewe Kingen Siria Pen-Hatat a amoielo an Israel ekiekin maun ngeni Juta, nge ewe atipeeu lefilen Asa me Siria a pwarata nafangauen an eani lukuluk won Jiowa. Hanani ewe soufos a eisini i: “Ifa usun, esap fokun watte an ekewe chon Itiopia me chon Lipia mwichen sounfiu fiti chomong chomong war woken me chon wawa oris? Nge pokiten ka anomu om apilukuluk won [Jiowa], i a mwutata pwe kopwe akufuur.” (2 Kronika 16:7, 8) Nge, Asa ese auseling ngeni ena apwung. (2 Kronika 16:9-12) Lupwen sipwe kuna osukosuk, sisap anomu ach lukuluk won ekiekin aramas. Nge, sipwe pwarata pwe sia anomu ach lukuluk won Kot, pun ach eani lukuluk won pochokkulen aramas epwe emmwen ngeni lichipung le sopwoloon.​—Kol Fel 146:3-5.

Kukkutta ewe Manaman Jiowa a Akkawora

6. Pwata sipwe “kukutta Jiowa me an pochokkul”?

⁶ Jiowa epwe tufichin tumunu noun kkewe chon angang, me epwe pwal tongeni awora manaman ngeniir. Ewe Paipel a peseikich pwe sipwe “kukutta ewe SAMOL [Jiowa] o an we manaman.” (Kol Fel 105:4) Met popun? Pun lupwen sipwe fori och mettoch fan manamanen Kot, sipwe aea ach pochokkul fan iten feiochun aramas, nge esap fan iten ar repwe feiengau. Esor eu leenien appiru mi murinno seni Jises Kraist fan iten ena mettoch, pun a fori chommong manaman ren “manamanen ewe Samol[Jiowa].” (Luk 5:17) Jises a tufichin achocho ngeni an epwe pisekisek, itefoulo, are pwal mwo nge emon king mi unusen manaman. (Luk 4:5-7) Nge a aea ewe manaman Kot a ngeni pwe epwe emiriti me asukula aramas, me alisi me achikara aramas. (Mark 7:37; Jon 7:46) A ifa me murinnoon ena leenien appiru ngenikich!

7. Menni lapalap mi fokkun lamot sia kan amaraata ika sipwe fori mettoch meinisin fan an Kot pochokkul nge esap pwisin ach?

⁷ Pwal och, lupwen sipwe fori och mettoch lon ewe “manaman mi feito seni Kot,” iei eu minen alillis ngenikich fan iten ach sipwe tipetekison. (1 Piter 4:11) Aramas mi ekiekin alapalo ar pochokkul fan iten pwisin ir ra kan wiliiti aramas mi lamalam tekia. Awewe chok ren ewe kingen Asiria Esar-hatton, ewe mi pwarata lamalam tekia lupwen a apasa: “Ngang mi manaman, ngang mi unusen manaman, ngang mi itefoulo, ngang mi wesewesen foummong, ngang mi fokkun tekia.” Nge sokko seni ena, Jiowa a “filata minne mi apwangapwang lon fonufan, pwe epwe asaua minne mi pochokkul.” Ina minne, ika emon chon Kraist mi enlet epwe sikasini och mettoch, epwe ita sikasini Jiowa, pun a silei pwe minne a fori ese fis pokiten pwisin an pochokkul. ‘Ach atekisonakichetiu fan poun Kot mi manaman’ epwe enletin atekiakicheta.​—1 Korint 1:26-​31; 1 Piter 5:6.

8. Met sipwe fori akkom ren ach sipwe angei manaman seni Jiowa?

⁸ Ifa ussun epwe toto rech pochokkulen Kot? Akkom, sipwe tingorei Kot lon iotek. Jises a alukuluku ngeni noun kkewe chon kaeo pwe Seman we epwe awora ngun mi fel ngeni ir mi tingorei. (Luk 11:10-13) Ekieki mwo ifa ussun ena mettoch a auralo noun Kraist kkewe chon kaeo ren manaman lupwen ra filata pwe repwe alleasochisi Kot, nge esap ekkewe nouwiisin lamalam mi alluk ngeniir pwe repwe ukutiu le afalafal ussun Jises. Lupwen ra iotek ren alillisin Jiowa, a polu ar we iotek mi pwungoch, iwe, ngun mi fel a apochokkulereta pwe repwe sopweelo ar afalafala ewe poraus allim fan pwora.​—Fofor 4:19, 20, 29-​31, 33.

9. Eiteita mwo ewe oruuen mettoch epwe atoto pochokkul lon pekin ngun, me awewei eu poraus lon Paipel mi affata lamotan.

⁹ Oruuan, sipwe tongeni pochokkuleta lon pekin ngun ren alillisin Paipel. (Ipru 4:12) Manamanen ewe kapasen Kot a pwalo atun fansoun King Josaia. Inaamwo ika ena kingen Juta a fen amoielo seni ewe fonu ekkewe uluulun, nge lupwen a pwa Allukun Jiowa lon ewe imwen fel, a amwokutu i pwe epwe alapalo an kokkotun alimelim.a Mwirin an Josaia pwisin alleani ngeni ekkewe aramas ewe Alluk, unusen ewe muu a fori eu atipeeu lefiler me Jiowa, me a poputa pwal eu angang fan tinikken, angangen limetawu seni ewe fonu ewe fofforun fel ngeni kot chofona. A sopwoch an Josaia angangen alimelim pun lon “unusen ranin manauen Josia resap tokolo seni ar aleasochis ngeni [Jiowa].”​—2 Kronika 34:33.

10. Ifa ewe aulungatin mettoch epwe atoto pochokkul seni Jiowa, me pwata a lamot?

¹⁰ Aulungatin, sia kan pochokkuleta seni Jiowa ren ach fiffiti chienach kkewe chon Kraist. Paul a pesei chon Kraist pwe repwe fiffiti mwich iteitan ren ar repwe “apochokkula emon me emon lefilach lon tong o fofor-murinno” me aufichieta emon me emon. (Ipru 10:24, 25) Lupwen Piter a kepichilo seni imwen fotek ren eu manaman, a mochen chufengen me pwiin kkewe chon Kraist, ina minne, a feilwenewenelo ngeni imwen inen Jon Mark, ikewe “chommong aramas ra mwichfengen ie o iotek.” (Fofor 12:12) Pwungun pwe ir meinisin ra tongeni nonnom chok lon en me imwan le iotek. Nge ra filata pwe repwe chufengen le iotek me aufichiireta lon ena fansoun weires. Arap ngeni sopwoloon an Paul sai ngeni Rom, nge mi ttam me efeiengau an we sai, a chuuri ekkoch brother lon Puteoli, iwe mwirin, pwal fitemon mi sai pwe repwe chuuri i. Met meefian? “Lupwen Paul a kuner, a kilisou ngeni Kot, o a pwal apilukuluk allim.” (Fofor 28:13-15) A pochokkuleta ren an nomsefal ren chienan kkewe chon Kraist. Sipwe pwal pochokkuleta seni ach fiffiti chienach kkewe chon Kraist. Ukuukun chok ewe fansoun esap wor och mettoch mi eppetikich seni ach chuchchufengen, sisap sotun alaemonulo le feffetal won ewe alchokkis mi ale ngeni manau.​—An Salomon Fos 18:1; Mattu 7:14.

11. Eiteita mwo ekkoch fansoun lupwen a akkaewin lamot “pochokkulen ewe manaman.”

¹¹ Ren ach ikkiotek iteitan, ach kakkaeo ewe Kapasen Kot, me ach chuchchufengen me chienach kkewe chon luku, sipwe “pochokkul lon ach Samol, pwal lon pochokkulen an we manaman.” (Efisus 6:10) Esor tipemwaramwar pwe a lamot ngeni oukich meinisin “pochokkul lon ach Samol.” Ekkoch ra riaffou ren samau mi chou, pwal ekkoch ren apwangapwangen chinnap are ren maloon puluwer. (Kol Fel 41:3) Pwal ekkoch ra meefi weires ren an puluwer u ngeni ar luku. Eli ekkoch sam me in repwe kuna pwe a mmen chou wiiser, wiisen ar repwe lo angang iteiten ran me ffoleni ar famili. A lamot ngeni chon Kraist sarafo ewe pochokkul fan iten ar resap fiti ekiekin me fofforun chiener kkewe me pwal ren ar repwe ti seniir safeien opuchopuch me lisowu mwaal. Esap ita wor emon mi tiperueru le tongorei Jiowa ren “pochokkulen ewe manaman” ren an epwe pworaiti ekkena sossot.​—2 Korint 4:7.

“A ngeni Ekewe Chon Malulu Pochokul”

12. Ifa ussun Jiowa a kan alikiitukich lon an chon Kraist angangen afalafal?

¹² Pwal och, Jiowa a kan ngeni noun kkewe chon angang manaman lupwen repwe fori ar angangen afalafal. Iei alon an Aisea oesini: “A ngeni ekewe chon malulu pochokul, nge ekewe chon lipwakingau a ngeniir tufich mi somwolo. . . . Nge chokewe mi anomu ar apilukuluk won [Jiowa] repwe angei pochokul mi fo. Repwe assita ren poukassir usun chok ekewe asaf. Repwe fefeil, nge resap achanu. Repwe fetal, nge resap malulu.” (Aisea 40:29-​31) Ewe aposel Paul a angei manaman ren an epwe fori an angangen afalafal. Ina minne, a fisoch an angangen afalafal. Iei makkeian ngeni chon Kraist lon Tesalonika: “Ach kapas allim ese fisita remi lon kapas chok, pwe lon manaman pwal lon ewe Ngun mi Fel.” (1 Tesalonika 1:5) A wor och manaman ren an angangen afalafala me asukula aramas, nge iei manamanen an epwe efisata siwil watte lon manauen ir mi auseling ngeni i.

13. Met a apochokkula Jeremaia pwe epwe likiitu inaamwo ika aramas ra u ngeni?

¹³ Eli sipwe lichipung lupwen aramas lon kiannin ach mwichefel repwe kan chipwang le auseling, nge eli sia fen akafalafal fitu ier ikewe ie. Jeremaia a pwal meefi lichipung pun aramas ra u ngeni, esiita, me amonungau ngeni an angang. Iei an ekiek: “Usap chuen founi iten ewe Samol mi Lapalap ika kapas fan itan.” Nge ese tongeni fanalo. Ewe poraus a uwei “a usun chok ekkei mi ku me lechuu[n].” (Jeremaia 20:9) Met a awora manaman ngeni lupwen a kuna chommong chon u ngeni? Jeremaia a apasa pwe “[Jiowa a] nom rei usun chok eman sounfiu mi pochokkul.” (Jeremaia 20:11) An Jeremaia miritiiti lamoten ewe poraus a uwei me wiisan we me ren Kot a ameef ngeni pwe Jiowa a apochokkula i.

Manamanen Akinasa me Manamanen Achikara Aramas

14. (a) Mei fet ewe manaman a nom ren ewe chonau? (b) Awewei mwo ekkoch poraus mi affata ifa ussun ewe chonau epwe tongeni efisata feiengau.

¹⁴ Sap minne sokkun manaman meinisin mi nom rech a feito seni Kot. Ren chok awewe, a nom ren ewe chonau ewe manamanen akinasa me pwal achikara aramas. Solomon a ourourakich pwe “Malo me manau ra nom lon manamanen ewe chonau.” (Proferp 18:21, New World Translation) Minne a fis pokiten an Setan kapas ngeni If a affata ewe watteen fitikoko epwe tongeni fisita pokiten kapas. (Keneses 3:1-5; Jemes 3:5) Sipwe pwal tongeni efisata fitikoko watte ren chonauach. Ach ereni emon fopul pwe a kon chou inisin epwe tongeni aletipechou i pwe epwe nnouesini mongo. Sipwe tongeni atai ach chiechifengen me emon ika sipwe ereni pwe emon a pweni i. Ewer, a lamot ach sipwe nennemeni chonauach.

15. Ifa ussun sipwe tongeni aea chonauach le apochokkula me achikara aramas?

¹⁵ Iwe nge, chonauach epwe pwal tufichin apochokkula aramas, nge esap aletipechour chok. Iei alon eu proferp lon Paipel: “Mi wor aramas ra fos, nge resap ekieki och. Ekei sokun fos ra akinasa aramas, usun efoch ketilas a akinasa eman. Nge an ekewe chon tipachem kapas ra atoto pochokul.” (An Salomon Fos 12:18) Chon Kraist mi tipachchem ra kan aea manamanen ewe chonau pwe repwe aururu chon letipechou me ir mi ma seniir attonger. Kapas mi umoumoch epwe tongeni apochokkula ekkewe sarafo mi fiffiu ngeni ekiekin me fofforun chiener kkewe sarafo. Kapas mi murinno epwe tongeni ameef ngeni chienach kkewe chon luku mi chinnap pwe sia chuen aucheaniir me tongeer. Kapas mi popu seni kirokiroch epwe tongeni efisata pwapwa lon letipen ir mi samau. Lap seni meinisin, sipwe tongeni aea chonauach le esileelo ewe poraus mi manaman, porausen ewe Muu, ngeni meinisin mi mochen auseling. Sipwe tufichin esilefeili ewe Kapasen Kot ika pwe letipach a kan amwokutukich. Iei alon Paipel: “Kopwe eani kirikiroch ngeni aramas mi osupwang, lupwen ka tufich ngeni.”​—An Salomon Fos 3:27.

Aean Manaman fan Pwung

16, 17. Lupwen ekkewe elter, sam me in, me chon pupulu repwe aea ar nemenem, ifa ussun repwe tongeni appiru Jiowa?

¹⁶ Inaamwo ika Jiowa a Unusen Tekia, nge a nemeni ewe mwichefel ren tong. (1 Jon 4:8) Lon ar akkappiru i, ekkewe chon Kraist mi wiisen chon mas ra kan angang ngeni noun Kot kkewe siip ren tong​—ra akkaeafichi ar nemenem, nge rese kan akkaeamwaalli. A enlet pwe fan ekkoch a lamot pwe ekkena chon mas repwe “fonou, apungu, achipa [aramas],” nge ra ikkina ussun ren “likiitu o ren sokkun afalafal meinisin.” (2 Timoti 4:2) Ina minne, ekkewe elter ra kan ekkekieki minne ewe aposel Piter a mak ngeni ir mi wisen emmweni ewe mwichefel: “Oupwe tuttumunu noun Kot kewe siip, ekkewe mi nonnom fan nemeniemi. Ousap tumunu ir lukun letipemi, nge oupwe fori seni lon letipemi; sap seni mochenia moni mi asau, nge pokiten wesewesen letipemi; sap usun ita oupwe lapalapeni lapalapen samol ngenir mi nom fan nemeniemi, nge oupwe pwisin forikemilo pwe leenien appiru ngeni ekkewe siip.”​—1 Piter 5:2, 3; 1 Tesalonika 2:7, 8.

¹⁷ Jiowa a ngeni ekkewe sam me in me mwan mi pupulu och nemenem, me repwe aea ar nemenem pwe repwe alisi, ffoleni, me aucheani chon le imwer. (Efisus 5:22, 28-30; 6:4) Fofforun Jises a pwarata pwe aramas repwe tongeni aea ar nemenem fan tong. Ika kaworen fon a ukuukoch me wenechar, ekkewe semirit resap letipechoulo. (Kolose 3:21) Ekkewe pupulu repwe pochokkuleta ika ekkewe mwan repwe aea ar nemenem fan tong me ekkewe fefin repwe sufoliiti mokurer, weween, puluwer, iwe nge, resap tokolo seni wiiser me ren Kot ren ar repwe nemeni puluwer are kutta pwisin letiper.​—Efisus 5:28, 33; 1 Piter 3:7.

18. (a) Ifa ussun sipwe appiru Jiowa fan iten ach sipwe nemeni ach song? (b) Ir mi wiisen nemenem repwe sotun amaarata met lon ir mi nonnom fan ar tumun?

¹⁸ Ir mi wiisen nemenem lon famili are lon ewe mwichefel repwe akkaewin tumunuoch pwe repwe nemeni ar song, pun song a kan efisata niuokkus, nge esap tong. Iei alon ewe soufos Nahum: “[Jiowa] a mang le song, nge a fokun manaman.” (Nahum 1:3; Kolose 3:19) Ach nukunuefou a kan pwarata pwe sia pochokkul, nge ach pwarata song a kan anneta pwe sia apwangapwang. (An Salomon Fos 16:32) Lon famili me lon ewe mwichefel, sipwe akkaewin achocho ngeni ach sipwe alapalo tong​—tong ngeni Jiowa, tong lefilen aramas, me tong ngeni kapasen emmwen mi pwung. Tong ewe minen ririfengenni aramas mi pochokkul seni meinisin me iei ewe minen amwokut mi pochokkul seni meinisin fan iten an aramas fori minne mi pwung.​—1 Korint 13:8, 13; Kolose 3:14.

19. Ifa ewe kapasen alukuluk Jiowa a awora, me epwe amwokutukich pwe sipwe fet?

¹⁹ Ach silei Jiowa a wewe ngeni ach miritiiti watteen an manaman. Ren an nounou Aisea, Jiowa a apasa pwe “Ousap silei usun? Are ousap rong usun? [Jiowa] eman Kot mi nonom tori feilfeilachok, a fori unusen fanufan. Iwe, esap malulu, esap pwal achanu, nge an tipachem esap wor aukukun.” An Jiowa manaman esap tongeni morolo. Ika sipwe anomu ach lukuluk won i, nge esap won pwisin kich, i esap likitikichelo. Iei an kapasen alukuluk ngenikich: “Iwe, kosap niuokus pun ngang ua etuk, kosap pwal apilukungau, pun ngang om Kot. Upwe apochokulok, upwe pwal alisuk. Upwe fokun tumwunuk o amanauok.” (Aisea 41:10) Met sipwe fori pokiten an a nom rech an tumun mi fiti tong? Ussun Jises, fansoun meinisin sipwe aea sokkun manaman meinisin Jiowa a awora ngenikich pwe sipwe alisi me apochokkula aramas. Amwo sipwe nemeni chonauach pwe epwe achikara aramas, nge esap akinaser. Iwe, amwo sipwe nennelo lon pekin ngun fansoun meinisin, uppos lon ach luku, me pochokkuleta fan manamanen ewe Chon Forikich mi Lapalap, Jiowa Kot.​—1 Korint 16:13.

[Pworous fan]

En mi Tufichin Awewe?

• Ifa ussun Jiowa a kan akkaea an manaman?

• Ifa ussun sipwe tongeni angei alillis seni an Jiowa manaman?

• Ifa ussun sipwe akkaea manamanen ewe chonau?

• Ifa ussun ewe nemenem aramas ra angei seni Kot epwe tongeni wiliiti eu feioch?

[Sasing lon pekin taropwe 12]

Jises a aea an Jiowa manaman le alisi aramas

[Ekkewe sasing lon pekin taropwe 14]

Sipwe tufichin ekkesilefeili ewe Kapasen Kot ika sipwe fiti ewe angang seni lon letipach