Jiowa—Ewe Emon Mi Fokkun Watte An Manaman
“Meinisin ra nom pokiten watten an tufich, pwal ren pochokulen an manaman.”—AISEA 40:26.
1, 2. (a) Ifa ewe minen awora manaman manauen oukich meinisin a longolong won? (b) Awewei mwo ewe popun Jiowa wesewesen Populapen sokkun manaman meinisin.
MANAMAN eu mettoch chommong leich sise lien afanni. Ren chok awewe, sise lien ekieki ewe manaman lon ewe fiifi mi asarama me apata imwach are mecheresin ach sipwe onnei ekkewe pisek mi aea fiifi lon imwach. Nge lupwen epwe kotur fiifi, sia weweiti pwe ika esor fiifi, neman epwe kaulo ekkewe sokkopaten angang lon ekkewe telinimw watte. A lap ngeni ewe fiifi sia kan aea a popu seni ewe minen awora manaman mi lukulukoch seni meinisin—ewe akkar.a Iteiten seken ewe akkar a aealo limu milion ton kaasin fuu, iwe, a tinawu ngeni fonufan ewe sokkun manaman mi tufichin amanaua mettoch meinisin.
2 A popu seni met manamanen ewe akkar? Io a forata ena mettochun lang mi fokkun manaman? Jiowa Kot a forata. Iei alon Kol Fel 74:16: “Ka fen isetiu ekkewe saram, o pwal ewe akkar.” Ewer, Jiowa wesewesen ewe Sou Efisata sokkun manaman meinisin, ussun chok i ewe Sou Efisata sokkun monumanau meinisin. (Kol Fel 36:9) Sisap tunalo an manaman fan eu. Ren an nounou ewe soufos Aisea, Jiowa a achema ngenikich pwe sipwe neta ngeni masouen lang, awewe chok ren ewe akkar me ekkewe fuu, iwe, sipwe ekieki ifa ussun ra fen fisita. “Oupwe neta lang. Io a forata masouan meinisin? Iwe, Kot a emwenawu mwicheicher meinisin, a pwal aita ngeniir iter. Meinisin ra nom pokiten watten an tufich, pwal ren pochokulen an manaman.”—Aisea 40:26; Jeremaia 32:17.
3. Ifa ussun sia kan kuna feioch seni pwapwaaloon an Jiowa manaman?
3 Pokiten a mmen watte an Jiowa manaman, sipwe tongeni meefi lukulukoch pwe ewe akkar epwe chuen awora ewe saram me pwichikar manauach a longolong won. Iwe nge, sia kan anomu ach lukuluk won manamanen Kot ren fokkun lap seni minne a lamot ngenikich lon pekin aion. Ach ngaselo seni tipis me malo, ach apilukuluk ren mwach kkan, me ach eani lukuluk won Jiowa a riri ngeni an aea an manaman. (Kol Fel 28:6-9; Aisea 50:2) A wor chommong poraus lon Paipel mi pwarata ussun an Jiowa manaman fan iten an forata mettoch me an amanaua aramas, me pwal fan iten an selani noun kkewe aramas me an nnielo chon koputan kkewe.
An Kot Manaman a Pwalo lon Forian kkewe
4. (a) Met meefien Tafit lupwen a nenneta lang lepwin? (b) Masouen lang kkewe ra pwarata met ussun manamanen Kot?
4 Ewe aposel Paul a awewei pwe an ewe Chon Forikich ‘manaman esemuch a tongeni pwaochulo lon ekkewe mettoch a fen forata.’ (Rom 1:20) Fitepuku ier me mwan, Tafit, ewe sou makkei kol mi fel, a weweiti lingmwararen unuselapen lang me manamanen ewe Chon Forata, nge neman fan chommong a kan neta lang lepwin pokiten i emon chon ffol siip. Iei makkeian: “Lupwen ua nennengeni om kewe lang, foriom mesen poum, ewe maram pwal ekkewe fu ka fen iseniretiu lon leenier; meeta lamoten aramas, nge ka fen ekieki, pwal ewe noun-aramas, nge ka tumunu?” (Kol Fel 8:3, 4) Inaamwo ika Tafit a silei ekis chok ussun masouen lang, nge a weweiti pwe i a wenewenen lamot kisikis seni ewe Chon Forata unuselapen lang me fonufan. Ikenai, a fen lapalo sileien ekkewe sou kaeo masouen lang ussun watteen unuselapen lang me ewe manaman mi amwokutu masouan kkewe. Ren chok awewe, ra aiti ngenikich pwe iteiten seken ukuukun watteen ewe manaman mi feiliwu seni ewe akkar a lollo ngeni pwpwungun 100,000 milion megaton TNT.b Fokkun ekis chok ena manaman a tori fonufan, nge a naf ena ukuukun fan iten an epwe amanaua mettoch meinisin won ei fonufan. Iwe nge, sap minne ewe akkar a nampa eu watteen seni ekkewe fuu meinisin lon lang. Ewe manaman mi feiliwu seni ekkoch fuu lon eu chok seken mi lollo ngeni ewe manaman mi feiliwu seni ewe akkar lon unusen eu ran. Iwe, ekieki mwo ewe manaman mi nom ren ewe Emon mi forata ekkena mettochun lang! A pwung alon Elihu ei: “Sisap tongeni kuna Ewe mi Unusen Manaman. I a tekia lon an manaman me an pwunguoch.”—Hiop 37:23.
5. Ikkefa ekkewe pisekin annet fan iten manamanen Jiowa sia kan kukkuna lon forian kkewe?
5 Ika sipwe ‘kaeo forien Kot kkewe’ ussun chok Tafit, epwe pwalo ngeni mesach an manaman ekis meinisin—lon ewe asapwal me ekkewe no, lon ewe chopulap me fiifi fan lang, lon ekkewe chanpupu watte me chuuk tekia. (Kol Fel 111:2; Hiop 26:12-14) Pwal och, ussun Jiowa a achema ngeni Jop, ekkewe man ra anneta watteen an pochokkul. A nom leir ewe Behemoth, are hippopotamus. Iei alon Jiowa ngeni Jop: “Kopwe nengeni pochokulen wanukun . . . Chun ra pochokul usun piras, nge pechen kana ra usun chok fochun macha.” (Hiop 40:15-18) Ewe manaman mi aniuaniu a nom ren ewe atemwanin kowu mi mwocho a pwal sinnelo lon fansoun an we a mak Paipel, me Tafit a iotek pwe esap feiengau ren “auen ewe laion,” me pwal “ren ekkewe mechan koumwocho.”—Kol Fel 22:21; Hiop 39:9-11.
6. Ewe atemwanin kowu a liosueta met lon Paipel, me met popun? (Pi ewe footnote.)
6 Pokiten pochokkulan, ewe Paipel a nounou ewe kowu pwe epwe liosueta an Jiowa manaman.c Lon ewe langepwi ewe aposel Jon a kuna ussun an Jiowa leenien nemenem, a wor fomon monumanau, nge emon leir a meseni mesen emon atemwanin kowu. (Pwarata 4:6, 7) Neman manaman eu me lein ekkewe ruaanu lapalap ekkena kerop ra liosueta, nge ikkena ekkewe ruaanu lapalap mi kon auchea a nom ren Jiowa. Ikkeei ekkewe lusun, tong, tipachchem, me pwung. Pokiten manaman a mmen lamot lein lapalapen Kot kkewe, ach wewefichiiti an manaman me ifa ussun a kan akkaea epwe efisata ach ririoch ngeni i me epwe alisikich le appiru ewe leenien appiru a isetiu ren ach aeafichi sokkun manaman are pochokkul meinisin mi nom rech.—Efisus 5:1.
“Jiowa Meilapen Mwichen Sounfiu, ewe Emon mi Manaman”
7. Met a alukulukatiu ngenikich pwe minne mi pwung epwe pworaiti minne mi ngau?
7 Lon ewe Paipel, Jiowa a iteni “Kot mi Unusen Tekia,” me ei itelap a achema ngenikich pwe sisap ekieki pwe an manaman a kisikis are tipemwaramwareiti an tufichin akkufu chon koputan kkewe. (Keneses 17:1; Ekistos 6:3) Eli a ussun ita nge mi pochokkul longolongun an Setan we otot mi ngau, nge lon mesen Jiowa “ekewe mwu ra usun chok eu chiin koluk lon eu pwekit, ra pwal wewe ngeni pwul moromor won eu kilo.” (Aisea 40:15) Pokiten a wor ena esin manamanen lang, esor tipemwaramwar pwe minne mi pwung epwe pworaiti minne mi ngau. Lon ei fansoun lupwen fofforingau a kon choufetal, ach silei pwe “ewe Samol mi Unusen Manaman, ewe Koten Israel” epwe amoielo fofforingau tori feilfeilo chok epwe tongeni aururukich.—Aisea 1:24; Kol Fel 37:9, 10.
8. Ikkefa ekkewe mwichen sounfiu mi nom fan nemenien Jiowa lon lang, me ar manaman a pwa ngenikich ren met?
8 Ewe kapas “Jiowa meilapen mwichen sounfiu,” ewe mi mak fan 285 lon Paipel, a pwal achema ngenikich ussun manamanen Kot. Ekkewe “mwichen sounfiu” a wewe ngeni ekkewe chommong, chommong ngun mi nom fan nemenien Jiowa. (Kol Fel 103:20, 21; 148:2) Lon eu pwinin, emon chok me lein ekkena chonlang a nnielo 185,000 sounfiun Asiria mi mmolneta pwe repwe maun ngeni Jerusalem. (2 King 19:35) Ika sia kan miritiiti manamanen an Jiowa kkewe mwichen sounfiu lon lang, sap minne sipwe muttir niueiti chon u ngenikich. Ewe soufos Elisa ese lolilen lupwen eu mwichen sounfiu a pwelli i pun a tongeni kuna ren mesan kkewe, mesen lukuluk, eu mwichen sounfiun lang mi peni i, nge esap ina ussun noun we chon angang.—2 King 6:15-17.
9. Ussun Jises, pwata sipwe anomu ach lukuluk won an lang tumun?
9 Jises a pwal meefi alillisin ekkewe chonlang lupwen eu pwin aramas mi uwei ketilas me wok a rangeiti i lon Ketsemeni. Mwirin an ereni Piter pwe epwe aliwinalong noun we ketilas lon leenian we, Jises a ereni pwe ika mi lamot, epwe tongeni tingorei Seman we ren “lap seni engol-me-ruu mwichen chonlang.” (Mattu 26:47, 52, 53) Ika sia pwal miritiiti pwe a wor mwichen sounfiun lang mi nom fan nemenien Kot, iwe, sipwe pwal anomu unusen ach lukuluk won alillisin lang. Iei makkeien ewe aposel Paul: “Iwe, meeta sipwe apasa ren ekkeei mettoch? Are Kot epwe penikich, io epwe u ngenikich?”—Rom 8:31.
10. Jiowa a kan akkaea an manaman fan iten io?
10 Iwe, a wor popun ach sipwe luku an Jiowa tumun. Fansoun meinisin a kan aea an manaman fan iten minne mi pwung me a kan tipeeu ngeni lusun lapalapan kkewe—pwung, tipachchem, me tong. (Hiop 37:23; Jeremaia 10:12) Inaamwo ika fan chommong aramas mi watte ar nemenem ra kan puppuuri ir mi woungau me tekisosson fan iten pwisin winner, nge Jiowa a kan ‘apwatai ekkewe aramas mi woungau seni lon pwul moromor’ me a wor an ‘pochokkul mi lapalap’ pwe epwe ‘tufichin amanaua aramas.’ (Kol Fel 113:5-7; Aisea 63:1) Inen Jises we, Meri, emon fefin mi mosonoson me tipekukkun, a weweiti pwe “ewe Emon mi manaman” a kan kichioch le akkaea an manaman fan asengesin ir mi menniniiti i, iwe, a kan atekisonatiu ir mi tipetekia me atekiata ir mi tipetekison.—Luk 1:46-53.
Jiowa a kan Pwarata An Manaman ngeni Noun kkewe Chon Angang
11. Chon Israel ra kuna menni pisekin annet ussun an Kot manaman lon ewe ier 1513 B.C.E.?
11 Fan fitu Jiowa a pwarata an manaman ngeni noun kkewe chon angang. Eu leir a fis ren ewe Chuukun Sainai lon 1513 B.C.E. Lon ena ier chon Israel ra fen kuna pwaloon an Kot manaman lon lapalap mi eingeing. Engol riaffou watte a pwari poun Jiowa mi pochokkul me apwangapwangen ekkewe koten Isip. Ekiselo mwirin, an chon Israel feilo pekiloon ewe Setipar me nninniiloon an Farao we mwichen sounfiu a pwal anneta manamanen lang. Ulungat maram mwirin, me fan ewe Chuukun Sainai, Jiowa a etiwa chon Israel pwe repwe ‘wesewesen noun aramas’ ren an ‘filiireta me lein aramas meinisin.’ Iwe, ra pwonei pwe “Meinisin mine ewe Samol mi Lapalap a apasa aipwe fori.” (Ekistos 19:5, 8) Iwe, Jiowa a pwarochu an manaman. Ewe Chuukun Sainai a otuot me chchech fan chopulap me nikeit me ttikimmongun eu rappwa. Ekkewe aramas mi ukkuta towau ra niuokkus. Nge Moses a ereniir pwe minne ra kuna epwe aiti ngeniir pwe repwe niuokkusiiti Kot, iwe, ena sokkun niuokkus epwe amwokutuur pwe repwe alleasochisi ar we Kot mi unusen manaman, Jiowa, nge i ewe emon chok Kot mi enlet.—Ekistos 19:16-19; 20:18-20.
12, 13. Met popun Elias a likitalo wiisan we, nge ifa ussun Jiowa a apochokkula i?
12 Fitepuku ier mwirin, atun fansoun Elias we, a pwal wor pwapwaaloon an lang manaman. Ena soufos a fen kuna manamanen Kot me mwan. Ren ulungat me esopw ier, Kot ese “apungatiu ut me lang” pokiten rikiloon ewe muun Israel. (2 Kronika 7:13) Le atun ewe fansoun pwasetaan fonu, ekkewe anga ra wiisen amongou Elias lon Kirit, iwe mwirin, ewe ekis chok pilaua me apura a nom ren emon fefin mi ma seni puluwan ese itelo pokiten eu manaman pwe epwe okor enen atewe. Jiowa a pwal awora manaman ngeni Elias pwe epwe tufichin amanauata noun neminnewe we at. Iwe mwirin, lon eu sossot watte won ewe Chuuk Karmel fan iten an epwe ffat ika io ewe Kot mi enlet, ekkei a feitiu seni lang me a kenalo an Elias we asor. (1 King 17:4-24; 18:36-40) Iwe nge, ekiselo mwirin, Elias a niuokkus me letipechou lupwen Jesepel a ekiekin nnielo. (1 King 19:1-4) A su seni ewe fonu pokiten an ekieki pwe a wes an angangen soufos. Fan kirokiroch Jiowa a api ngeni manamanen lang fan iten an epwe aururu me apochokkula atewe.
13 Atun an Elias okkop lon eu pwokungo, a kuna lon eu lapalap mi wenewenen eingeing pwaloon ulungat mettoch mi pochokkul Jiowa a kan nemeni: eu asapwal pochokkul, eu chechchechin fonu, iwe saingoon, och ekkei. Iwe nge, lupwen Jiowa a fos ngeni Elias, a fos lon “eu mongungu mi leuokukun.” A awiisa ngeni pwal ekkoch angang an epwe wiisen fori me a ereni pwe a chuen wor 7,000 mi tuppwol le fel ngeni Jiowa lon ewe fonu. (1 King 19:9-18) Ika sipwe meefi lichipung ussun chok Elias pokiten ese lien wor uwaan ach angangen afalafal, sipwe tongeni tingorei Jiowa ren “pochokkulen ewe manaman mi nonnom ren Kot”—ewe manaman mi tongeni apochokkulakich pwe sipwe chuen chok akkafalafala ewe poraus allim, nge sisap ukutiu seni.—2 Korint 4:7.
An Jiowa Manaman Eu Minen Alukuluk pwe epwe Pwonuta An kkewe Pwon
14. Ewe it Jiowa a pwarata met ussun i, me ifa ussun an manaman a chu ngeni itan we?
14 An Jiowa manaman a pwal chu ngeni itan we me pwonutaan letipan. Jiowa, ewe it mi sokkolo me tekia seni it meinisin, nge mi wewe ngeni “I a Akkota pwe epwe Fisita,” a pwarata pwe i a pwisin mwokut pwe epwe wiliiti Chon Apwonueta an kkewe pwon. Esor emon are och mettoch epwe tongeni pinei Kot seni an apwonueta an kkewe kokkot, inaamwo ika chon lukulukummang repwe meefi pwe esap pwak. Ussun Jises a ereni noun kkewe aposel fan eu, “ren Kot mettoch meinisin a tufich.”—Mattu 19:26.
15. Ifa ussun emon chonlang a achema ngeni Eperiam me Sera pwe esor och mettoch Jiowa esap tongeni fori?
15 Awewe chok, fan eu Jiowa a pwon ngeni Eperiam me Sera pwe epwe akkota nge mwirimwir kkewe repwe wiliiti eu muu mi lapalap. Iwe nge, ren chommong ier rese nounou. Ir me ruuemon ra mmen chinnap lupwen Jiowa a ereniir pwe ewe pwon epwele pwonuta, iwe, Sera a takir. Iei alon ewe chonlang ngeniir: “Epwe wor och ewe Samol mi Lapalap esap tufich ngeni?” (Keneses 12:1-3; 17:4-8; 18:10-14) Fopuku ier mwirin, lupwen Moses a amwichafengenni mwirimwirin Eperiam kkewe le Masiesin Moap—nge ir eu muu mi lapalap lon ena atun—a achema ngeniir pwe Kot a fen apwonueta an we pwon. Iei alon Moses: “Iwe, pokiten [Jiowa] a echeni ami kewe lewo o afili mwirimwirir, a emwenikemiiwu seni Isip ren an nonom ngenikemi, pwal ren an manaman mi lapalap. A asuela me mwemi ekewe mwu mi watte o pochokul senikemi, pwe epwe emwenikemiilong lon fanuer o ngenikemi pwe oupwe fanueni, usun a fis ikenai.”—Tuteronomi 4:37, 38.
16. Pwata ekkewe Satusi ra mwaallilo ren ar luku pwe esap wor manausefallin chon malo?
16 Fitepuku ier mwirin, Jises a apwungu ekkewe Satusi, nge ir rese luku ewe manausefal. Pwata rese luku an Kot pwon, pwonen an epwe amanauata chon malo? Iei alon Jises ngeniir: “Ouse sinei ekkewe puk, nge ouse pwal sinei manamanen Kot.” (Mattu 22:29) Ewe Paipel a alukulukatiu ngenikich pwe ‘chon peias meinisin repwe rong leuwen ewe Noun aramas, o repwe tou.’ (Jon 5:27-29) Ika sia silei met Paipel a apasa ussun ewe manausefal, ach lukuluk won manamanen Kot epwe afouneta ngenikich pwe chon malo repwe manaueta. Kot “epwe aukatiu mala, pwe esap chuen wor tori feilfeila chok. . . . Iei alon ewe Samol mi Lapalap.”—Aisea 25:8.
17. Lon mwach kkan, lon menni ran epwe lamot ach sipwe anomu ach lukuluk won Jiowa lon och lapalap mi sokkolo aucheaan?
17 Ekiselo chok lon mwach kkan, epwe wor eu fansoun lupwen epwe lamot ngeni emon me emon leich pwe epwe wesewesen luku an Kot manamanen amanaua aramas lon och lapalap mi sokkolo aucheaan. Setan ewe Tefil epwe maun ngeni noun Kot kkewe aramas, nge epwe ussun ita esor epwe tumunuur. (Isikiel 38:14-16) Iwe, Kot epwe pwarata an manaman mi lapalap fan asengesich, me aramas meinisin repwe silei pwe i Jiowa. (Isikiel 38:21-23) Iei ewe fansoun sipwe alapalo ach luku me ach achifoua ewe Kot mi Unusen Tekia pwe sisap lukulukungau lon ena fansoun sossot watte.
18. (a) Met sokkun feioch sia kan angei seni ach ekkekieki an Jiowa manaman? (b) Ifa ewe kapas eis sipwe kaeo ussun lon ena eu lesen mwirin ei?
18 Esor tipemwaramwar pwe a wor chommong popun ach sipwe ekkekiekifichi manamanen Jiowa. Ach ekilapei fofforun kkewe epwe kan amwokutukich pwe sipwe mwareiti ewe Chon Forikich mi Lapalap fan tipetekison me pwarata ach kilisou ren an akkaea an manaman fan mirit me tong. Sisap nisimwa ika sipwe anomu ach lukuluk won Jiowa meilapen sounfiu. Sisap tiperueru lon ach luku an kkewe pwon. Iwe nge, chechchemeni mwo pwe sia fen for lon nikinikin Kot. Ina minne, a pwal nom rech manaman—nge mi wesewesen kauk. Ifa ussun sipwe tongeni akkappiru ewe Chon Forikich lupwen sipwe aea ach manaman? Sipwe kaeo poluen ena kapas eis lon ena eu lesen mwirin ei.
[Ppii ekkewe pwóróus fan]
a Chommong ra luku pwe ewe oil me sumi mi for seni ira mi manau lom lom, nge aramas ra angei me fan ppwul—ikkena ekkewe mettoch ekkewe tengkia ra akkaewin akkaea fan iten ar repwe forata fiifi—ra angei ar manaman seni ewe akkar.
b Ewe kinsi pakutang mi pochokkul seni meinisin aramas ra apwpwungu a lollo ngeni manamanen 57 megaton TNT.
c Neman ewe atemwanin kowu mi mwocho lon ewe Paipel a wewe ngeni ewe aurochs (Latin urus) [Bos primigenius]. Ruu ngerou ier lom, ekkena man ra nom lon Gaul (iei Franis) me a iei ussun an Julius Caesar awewei lapalaper: “Ekkeei uri ra chok ekis kisikis seni alefan, nge ren lapalaper, aluwer, me inisir, ir atemwanin kowu. Ra mmen pochokkul, me ra mmen muttir le ssa: lupwen ra kuna aramas are man, ra chok muttir pureer.”
En Mi Tongeni Polueni Ekkeei Kapas Eis?
• Ifa ussun ekkewe mettoch mi foruta ra awora pisekin annet ussun an Jiowa manaman?
• Ikkefa ekkewe mwichen sounfiu Jiowa epwe tongeni aea ren an epwe alisi noun kkewe aramas?
• Ikkefa ekkoch fansoun lupwen Jiowa a pwari an manaman?
• Ifa ewe minen alukuluk mi nom rech pwe Jiowa epwe apwonueta an kkewe pwon?
[Ekkewe sasing lon pekin taropwe 8]
“Oupwe neta lang. Io a forata masouan meinisin?”
[Credit Line]
Photo by Malin, © IAC/RGO 1991
[Sasing lon pekin taropwe 11]
Ach ekkekieki pwapwaaloon an Jiowa manaman a akkalapalo ach luku an kkewe pwon