Auselingaochu An Kot Kapasen Oesini

“Ewe kapasen oesini mi fakkun nukuchar a nonnom rech. Iwe, epwe chok murinno are oupwe tumunu ekkeei kapas.”​—2 PITER 1:19.

1, 2. Aporausa porausen ekkewe messaia chofona.

REN fite puku ier, messaia mi chofona ra sotun le oesini met epwe fis lon mwach kkan. Lon ewe alimuen senturi C.E., ekkewe Jus lon Krit ra luku pwe emon mwan itan Moses ewe messaia me i atewe epwe ita angaseerelo seni ar riaffou. Lon ranin ar ngaselo, ra tapwelo mwirin me ewe mwan a emmweniireta ngeni eu leeni mi tekia ia repwe tongeni ukkutiu ewe saat Mediterranean. Alon atewe pwe ika repwe pwisin otureerelong lon ewe saat, epwe suukulo mweer. Chommong lein ekkewe aramas mi otureeretiu lon ewe saat ra mop, me ewe messaia chofona a chok su seniir.

² Lon ewe 12en senturi, emon “messaia” a pwa lon Yemen. Ewe caliph, are sou nemenem, a tingor seni atewe eu esissin ren an epwe anneta pwe i ewe messaia. Ewe “messaia” a apasa pwe ewe caliph epwe tunu uwan. A oesini pwe epwe muttir manausefal. Ewe caliph a tipeeu​—iwe a wes ena “messaia.”

3. Io ewe Messaia mi enlet, me met an angangen afalafal a annetata?

³ Messaia chofona me ar kewe oesini ra unusen kkuf, nge sisap lichipung ika sia auselinga an Kot kewe kapasen oesini. Chommong oesini lon ewe Paipel ra pwonueta lon manauen ewe Messaia mi enlet, Jises Kraist. Ren chok awewe, ewe sou makkei Kapas Allim, Mattu, a makkei ekkeei kapas seni an Aisea we oesini: “‘Fonuen Sepulon o fonuen Naftali, orun ewe noom, pekilon Jortan, Kalilien ekkewe re Jentail​—ekkewe aramas mi mottiu lon rochopwak, ra kuna saram chapur; o chokewe mi mottiu lon fonuen malo me fan nurun malo, saram a tota ngenir.’ Seni ewe fansoun, Jises a popueta afalafal o a apasa, ‘oupwe aier, pun muun lang a arapato.’” (Mattu 4:15-​17; Aisea 9:1, 2) Jises ewe “saram,” me an we angangen afalafal a anneta pwe i ewe Soufos Moses a oesini ussun. Chokkewe rese auselinga Jises repwe malo.​—Tuteronomi 18:18, 19; Fofor 3:22, 23.

4. Ifa ussun Jises a apwonueta Aisea 53:12?

⁴ Jises a pwal apwonueta ekkewe kapasen oesini lon Aisea 53:12: “Pun a fangalo manauan o mala, a pwal alealong lein chon pupungau; Iwe, a uwei tipisin chomong aramas o iotek fan iten chon pupungau.” Pokiten a silei pwe epwe muttir fangelo manauan, Jises a apochokkula lukuen noun kewe chon kaeo. (Mark 10:45) Jises a apwonueta ei mettoch lon eu lapalap mi amwarar lupwen a wililo.

An Jises Wililo A Apochokkula Luku

5. Awewei mwo an Jises wililo lon pwisin om fos.

⁵ Ewe fansoun Jises a wililo a ussun eu oesini. Jises a apasa: “Pun ewe Noun-Aramas epwe feito lon lingen Seman, eti noun kewe chonlang . . . Enlet, upwe apasa ngenikemi, pwe mi wor ekkoch leir kewe mi uta ikei resap malo pwe repwe mo kuna an ewe Noun-Aramas waroto lon muun.” (Mattu 16:27, 28) Ekkoch ekkewe aposel ra kuna an Jises waroto lon Muun we? A mak lon Mattu 17:1-7: “Iwe, mwirin wonu ran, Jises a eweina Piter me Jemes me Jon pwin, o a eweinerata won ewe chuk mi tekia, ir chok fomon. Iwe a pwisin wililo me fan meser.” A ifa me amwararen ena foffor! “Won mesan a molupolup usun akkar, nge ufan a pwechepwech maruoru usun chok saram. O nengeni, Moses me Ilaijo ra pwato rer, o ra kakapasfengen me Jises.” Pwal och, “eu kuchu mi saramaram a anuralo ir,” me ra rong leuwen Kot lupwen a apasa: “‘Iei nei at mi achengicheng rei, ua unusen pwapwa ren. Oupwe auselinga i.’ Iwe, lupwen ekkewe chon kaeo ra rong, ra chok chapelo won meser o ra fakkun niuokus chapur. Nge Jises a attaper, o a apasa. ‘Ou pwata, nge ousap niuokus.’”

6. (a) Met popun Jises a apasa pwe ena wililo eu langepwi? (b) An Jises wililo a liosueta met?

⁶ Neman leenien an Jises wililo eu kinikinin ewe chuuk Hermon ia Jises me ekkewe ulumon aposel ra nonnom unusen ewe pwin. Ach ekiek pwe a fis le pwin me ika a ina ussun, met ra kuna epwe fokkun achungu letiper. Eu popun Jises a iteni met ra kuna eu langepwi, pokiten Moses me Elias ra fen malo me loom, loom, me rese wesewesen nom. Jises chok a wesewesen nom. (Mattu 17:8, 9) Met ra kuna a ngeni Piter, Jemes, me Jon eu lios mi amwarar, liosun lingen Jises lupwen a angei an manamanen King. Moses me Elias ra liosueta noun Jises kewe mi kepit, chokkewe repwe pwal alemwiri ewe Muu, me ewe langepwi a fokkun anneta an afalafal ussun ewe Muu me an wiliiti King lon mwach kkan.

7. Pwata sia silei pwe Piter a fokkun chechchemeni ewe fansoun Jises a wililo?

⁷ Ewe wililo a apochokkula lukuen ekkewe ulumon aposel repwe wiisen emmweniochu ewe mwichefel. Mesen Jises mi saramaram me ufan kewe mi merueru, me leuwen Kot mi apasa pwe Jises Noun we mi achengicheng, ewe emon repwe auselinga​—ekkeei mettoch meinisin ra fokkun alisata ar luku. Nge ekkewe aposel rese tongeni apasawu porausen ewe wililo tori Jises a fen manausefal. Mwirin 32 ier, Piter a chuen tongeni chechchemeni mettoch meinisin lon ewe langepwi. Piter a menlapei lamoten ewe langepwi lupwen a makkei: “Pun am aise mo tapwelo mwirin ekkewe tuttunlapen rochopwak mi otuputup lupwen am aia afalafala ngenikemi ewe manamanen ach Samol Jises Kraist o an we liwinsefallito, pwe am aia pwisin kuna an we ling mi lap ren mesem. Pun lon ewe fansoun a angei an we iteuoch o ling me ren Semach Kot, lupwen ewe mongungu a feito ren ewe ling mi lapalap, ‘Iei nei at mi achengicheng rei, ua unusen pwapwa ren,’ am aia rong ewe mongungu mi feitiu seni lang pun am aia pwal eti i won ewe chuk mi fel.”​—2 Piter 1:16-18.

8. (a) An Kot kapas ussun Noun we a efisi ach ekkekieki met? (b) Met sia kaeo seni pwaloon ewe kuchu atun Jises a wililo?

⁸ Mi lamot seni meinisin an Kot kapas: “Iei nei at mi achengicheng rei, ua unusen pwapwa ren, oupwe auseling ngeni i.” Ei kapas a efisi ach ekieki Jises lon wiisan we noun Jiowa we King mi fen poputa an nemenem, ewe emon forien Kot kewe meinisin repwe alleasochisi. Nonnomun ewe kuchu a affata pwe sisap kuna pwonutaan ewe langepwi ren mesach. Chokkewe mi esinna “esissinnen” an Jises nonnom le monomon lon ewe wiis King, repwe tongeni miritiiti pwonutaan. (Mattu 24:3) Iwe, an Jises aporauseer pwe resap ereni aramas porausen ewe langepwi tori a fen manausefal a aiti ngenikich pwe tekiatan me an lingelo epwap fisita mwirin an manausefal.

9. Met popun porausen an Jises wililo epwe apochokkula ach luku?

⁹ Mwirin an awewe won an Jises wililo, Piter a apasa: “O ewe kapasen oesini mi fakkun nukuchar a nonnom rech. Iwe, epwe chok murinno are oupwe tumunu ekkeei kapas usun chok eu lamp mi titin lon eu leeni mi rochopwak, tori fansoun epwe ranilo, o ewe fu ran epwe pwata lon letipemi. Aeuin, mwen mettoch meinisin, oupwe fakkun wewe ren ei mettoch: Esor och kapasen oesini lon ewe puk mi fel mi weween a feito seni emon chok aramas, pwe noun Kot kewe aramas mi mwokutukut ren ewe Ngun mi Fel ra fen apasata kapas me ren Kot.” (2 Piter 1:19-​21) Ewe wililo a menlapei lukucharen an Kot kapasen oesini. Sipwe auselingaochu ena kapas, sap ngeni “ekkewe tuttunlapen rochopwak mi otuputup” Kot ese tipeeu ngeni. Ach luku lon ewe kapasen oesini epwe pochokkulelo ren an Jises wililo pokiten ena liosun an ling me manaman a fen fisita. Ewer, mei wor pisekin annet pwe Jises a nonnom lon lang lon wiisan we wiisen King.

Ifa Ussun Ewe Fuu Ran A Tota

10. Io are met ewe “fu ran” Piter a fos ussun, me pwata ka luku ina ussun?

¹⁰ Piter a makkei: “Epwe chok murinno are oupwe tumunu ekkeei kapas usun chok eu lamp mi titin lon eu leeni mi rochopwak, tori fansoun epwe ranilo, o ewe fu ran epwe pwata.” Io are met ewe “fu ran”? A mak fan eu chok “fu ran” lon ewe Paipel, me a ekis wewe chok me ewe “fuun lesossor.” Pwarata 22:16 lon ewe New World Translation a affata pwe Jises Kraist ewe: “fu ran mi saramaram.” Fan ekkoch lon eu ier, ekkeei fuu ra saingo le tota me oroppeinen otiu, me ra ussun ita esilefeili poputaan eu minefoon ran. Piter a nounou ekkewe kapas “fuun lesossor” ren an epwe awewe won Jises mwirin an angei an manamanen King. Lon ena fansoun, Jises a tota won unusen lang me fonufan! Lon wiisan Messaia, ei Fuu Ran a esilefeili poputaan eu minefoon ran, are fansoun, fan iten aramas mi alleasochis.

11. (a) Met popun 2 Piter 1:19 esap wewe ngeni totaan “eu fu ran” lon letipen aramas? (b) Ifa ussun kopwe awewei 2 Piter 1:19?

¹¹ Chommong chon chiyakuni Paipel ra alisata ewe ekiek pwe an Piter kewe kapas lon 2 Piter 1:19 ra weneiti letipen aramas. Choun foun ngasangasen emon watte, 9 tori 11 ounce chok. Ifa ussun Jises​—emon ngun lon lang mi ling me ese chuen tongeni malo​—epwe pwata lon letipen aramas? (1 Timoti 6:16) Pwungun pwe letipach kewe mi lamot lon ei poraus, pun sia auselingaochu an Kot kapasen oesini ren letipach. Iwe nge, atittinafichi 2 Piter 1:19, me kopwe kuna ifa ussun ekkewe comma lon ewe New World Translation ra affata weween ei poraus ren ar aimuolo ewe sentence “tori ei fuu ran a tota” lon ena wokisin seni ewe sentence “lon letipemi.” Ei wokisin epwe pwal tongeni makkei iei ussun: ‘Ewe kapasen oesini a fen lukulukolo fan itach; me oua fen angangoch lon am auselingaochu, ussun chok oupwe akkatola saramen eu lamp mi tittin lon eu leeni mi kiroch, weween pwe, lon letipemi, tori unumweiran me ewe fuu ran a tota.’

12. Ifa lapalapen letipen aramas, me ifa lapalapen letipen Chon Kraist mi enlet?

¹² Ifa lapalapen letipen chon fonufan mi tipis? Iwe, letiper ra kiroch lon pekin ngun! Ika kich chon Kraist mi enlet, a ussun ita pwe mei wor eu lamp mi tittin lon letipach, nge letipach repwe pwal kiroch ika ewe lamp ese tittin. Ussun chok an Piter kewe kapas ra affata, ar auselingaochu ewe saram lon an Kot kapasen oesini epwe efisi an Chon Kraist nennelo me saramelo ngeni poputaan ewe minefoon ran. Repwe fen silei pwe ewe Fuu Ran a fen tota, sap lon letiper, nge mwen forien Kot kewe meinisin.

13. (a) Met popun sia silei pwe ewe Fuu Ran a fen tota? (b) Met popun ekkewe Chon Kraist mi tongeni likiitu fan ekkewe fansoun weires Jises a oesini ussun?

¹³ Ewe Fuu Ran a fen tota! Sia fen silei pokiten ach auselingaochu an Jises oesini mi lap ussun an nonnom. Iei sia kukkuna pwonuetaan ren ekkewe maun mi lap, lengita, chechchechin fonu, me ewe angangen afalafala ewe kapas allim won unusen fonufan. (Mattu 24:3-​14) Inaamwo ika ena fansoun weires a pwal kkukich Chon Kraist, nge sia tongeni likiitu ren kinamwe me chengel lon letipach. Pwata? Pokiten sia auselingaochu an Kot kapasen oesini me pokiten ach lukuluk lon minne a fen pwon ngenikich lon mwach kkan. Sia silei pwe sia arap ngeni ewe fansoun mi murinno seni meinisin pun a fen lu senikich chommong ierin ewe ‘fansoun sopwoloon’! (Taniel 12:4) Ewe fonufan a osukosuk ussun a fen oesini lon Aisea 60:2: “Pun nengeni, rochopwak epwe pwoluela fanufan, nge kiroch epwe tori chon ekewe mwu.” Ifa ussun emon mi tongeni fetalfeil lon ewe kiroch? Emon epwe tipetekison le auselingaochu an Kot kapasen oesini iei, mwen a kon mmang. A lamot pwe aramas mi letip wenechar repwe kul ngeni Jiowa Kot ewe Popun manau me saram. (Kol Fel 36:9; Fofor 17:28) Ar saramelo me ar apilukulukun pwapwaesini ewe manau mi amwarar Kot a fen akkota ngeni aramas mi alleasochis a alongolong won ar fori ena mettoch.​—Pwarata 21:1-5.

“Ewe Saram A Fen Feito Ngeni Fonufan”

14. Met sipwe fori ika sia mochen pwapwaeisini pwonuetaan ekkewe oesini mi amwarar mi makketiu lon ewe Paipel?

¹⁴ Ewe Paipel a affata pwe a fen poputa an Jises nemenemen King. Pokiten an angei manamanan lon 1914, epwe chuen fis pwonutaan chommong oesini mi amwarar. Ika sipwe kuna ifa ussun repwe pwonuta, sipwe nom lein ekkewe aramas mi mosonoson ra anganga ar luku lon Jises Kraist, me aier seni ar foffor mi ngau me ekkewe tipis ra fori pokiten nafangauen ar sile. Pwungun pwe, chokkewe mi tongei ewe kiroch resap angei manau esemuch. Jises a apasa: “O iei ewe apung, pwe ewe saram a fen feito ngeni fonufan, nge aramas ra tongei rochopwak lap seni saram, pun ar fofor mi chok ingau. Pun iteiten aramas meinisin mi fori minne mi ingau a chok oput saram, o ese feito ren saram, pwe an kewe fofor rete pwalo. Nge ewe mi fori minne mi enlet a feito ren saram, pwe epwe pwapwalo pwe an kewe fofor a fen fori lon Kot.”​—Jon 3:19-​21.

15. Met epwe fis ika sia tunalo ewe amanau Jiowa a suuk ngenikich ren Noun we?

¹⁵ Saram lon pekin ngun a tori fonufan ren Jises, me a lamot ach auseling ngeni i. Paul a makkei: “Lon ekkewe fansoun lom Kot a kapas ngeni semach kewe ren ekkewe soufos lon chommong sokkun mi sokkofesen; iwe, lon ekkeei ran le sopolon Kot a kapas ngenikich ren Noun we, atewe a seikata pwe epwe alemwiri mettoch meinisin.” (Ipru 1:1, 2) Met epwe fis ika sia chok tunalo ewe amanau Kot a awora ngenikich ren Noun we? Paul a sopweilo: “Are ewe kapas a fen nukuchar, ewe kapas ekkewe chonlang ra apasa, o are sokkun tipis meinisin, o pwal sokkun allesolap meinisin, epwe fen kuna apung mi pung, iwe, ifa usun ach sipwe tongeni su seni, are sia tumunungau ei sokkun amanau mi lapalap? Ewe amanau ewe Samol a apasata lom, o ir mi rong seni i ra fen aronga ngenikich, o Kot a pwal pwarata usun, ren ekkewe esisin o ren ekkewe minen amwarar, ren ekkewe chommong sokkun manaman, o pwal ren liffangen Ngun mi Fel mi inetfeseni usun minne mi fich ngeni pwisin letipan.” (Ipru 2:2-4) Ewer, Jises longolongun ewe angangen esilefeili ewe kapasen oesini.​—Pwarata 19:10.

16. Met popun sia tongeni luku pwe an Jiowa kewe oesini meinisin repwe pwonueta?

¹⁶ Piter a apasa: “Esor och kapasen oesini lon ewe puk mi fel mi weween a feito seni emon chok aramas.” Aramas rese tongeni apasa ekkewe oesini mi enlet, nge sia tongeni lukulukoch lon an Kot kewe oesini. Ra pop seni Jiowa Kot. Ren an we ngun mi fel, a fen atufichi an noun kewe chon angang weweiti ifa ussun ekkewe oesini lon ewe Paipel ra fen pwonueta. Sia fokkun kilisou ngeni Jiowa pwe sia fen kuna pwonuetaan chommong oesini seni ewe ier 1914. Sia unusen luku pwe ekkewe lusun oesini repwe pwonueta. A fokkun lamot pwe sipwe auselingaochu ekkewe oesini seni lang atun sia asaramalo ewe saram sia fen kaeo. (Mattu 5:16) Sia kilisou pwe Jiowa a ngenikich “saram usun chok leoloas” lon ei fonufan mi kiroch ikenai!​—Aisea 58:10.

17. Pwata a lamot ngenikich saram lon pekin ngun seni Kot?

¹⁷ Saram a atufichi ach kuna. A atufichi maarin sokkopaten uwaan atake mi awora anach mongo. Sisap tongeni manau ika esor saram. Nge, ifa ussun saram lon pekin ngun? A ngenikich emmwen me a pwaralo met a mak lon an Kot we Kapas, ewe Paipel, ussun mwach kkan. (Kol Fel 119:105) Ren tong, Jiowa a tiinalo ‘an we saram me an we enlet.’ (Kol Fel 43:3) Sia mochen pwaralo ach aucheani minne Kot a awora. Amwo sipwe tinikken le angei “saramen sineilap usun ewe lingen Kot” pwe epwe asarama letipach.​—2 Korint 4:6; Efisus 1:18.

18. Noun Jiowa we Fuu Ran a fen mmonleta le fori met iei?

¹⁸ A ifa me watteen ach feioch pokiten ach sile pwe Jises Kraist, ewe Fuu Ran, a tota won unusen lang me fonufan lon 1914 me a poputa le apwonueta ewe langepwi ussun an wililo. Noun Jiowa Fuu Ran a fen a nonnom lon leenian me a mmonleta le apwonueta letipen Kot ren sopwosopwoloon pwonuetaan ena wililo​—“maun lon ran mi lap, ranin Kot mi Lapalap.” (Pwarata 16:14, 16) Mwirin ei otot minen loom a fen morolo, Jiowa epwe apwonueta an pwon ren “lang sefo me fonufan sefo” ia sipwe tongeni mwareiti i, ewe Epinikepiisom won lang me fonufan me ewe Koten oesini mi enlet, tori feilfeilo chok. (2 Piter 3:13) Tori ena ran mi lap, amwo sipwe feffetal me ren ewe saram seni lang ren ach auselingaochu an Kot kapasen oesini.

Ifa Ussun Kopwe Polueni?

• Ifa ussun kopwe awewei an Jises wililo?

• Ifa ussun porausen an Jises wililo a apochokkula luku?

• Io are met an Jiowa we Fuu Ran, me ineet a tota?

• Met popun sipwe auselingaochu an Kot kapasen oesini?

[Sasing lon pekin taropwe 21]

En mi tongeni awewei weween an Jises wililo?

[Sasing lon pekin taropwe 23]

Ewe Fuu Ran a fen tota. En mi silei ifa ussun me ineet?