En Mi Tongeni Kuna Letip Mi Kinamwe?

Lon ewe 1854, emon chon Merika sou mak Henry Thoreau a makkei: “Lap ngeni aramas ra manaueni ewe manau mi letipechou le monomon.”

A pwalo pwe lon an we fansoun lap ngeni aramas rese nom rer ewe letip mi kinamwe. Iwe nge, a fis ena lon 150 ier loom. A sokkolo ach ei fansoun ikenai? Are an Thoreau kapas mi chuen weneitikich ikenai? Ifa ussun meefiom? En mi menemenoch ika kinamwe? Are en mi lukulukungau me tipemwaramwareiti met epwe fis lon mwaach, ‘letipechou le monomon,’ ika sipwe aloni alon Thoreau?

SIA letipechou pokiten mei wor chommong mettoch lon ei fonufan a kan atai an aramas letip mi kinamwe. Sipwe eiteita ekkoch leir. Lon chommong fonu aramas rese angang pun rese kunakun ar angang me nafangauen moni tolong lon ewe famili a efisata mwelele me epwe pwal kapachelong osupwangen ewe muu. Lon ekkoch leeni ekkoch ra aea unusen ar pochokkul le chei moni me pisek. Iwe nge, ewe akkuffengen ren nonnomun manauer, a atoto aurek, nge esap kinamwe. Samau, maun, ipweri alluk, pwungungaw, me riaffou ra atai an aramas kinamwe.

Ra Kutta Letip Mi Kinamwe

Chommong rese tipeeu met a fiffis won fonufan. Antônioa emon meilapen ewe mwichen chon angang lon ewe leenien for pisek mi watte lon São Paulo, Brazil. Ren an ekieki pwe epwe tongeni aochulo nonnomun aramas, a fiti mwichen chon u ngeni nemenem, nge ei mettoch ese atoto ren letip mi kinamwe.

Ekkoch ra lukuluk pwe pupulu epwe wato och kinamwe lon manauer, nge ra lichipung. Marcos emon mi angangoch lon business. A fitipach ngeni politics me a wiliiti emon mayor lon eu telinimw mi pisekisek. Iwe nge, pwisin manauan lon an famili a sopwongau. Lupwen noun kewe ra imulo seni, ir me puluan we ra nomfesen pokiten ra polungau.

Gerson, esor pukun leenian, a chok feilfetal me marita won ekkewe aal lon Salvador, Brazil, a kan sou kutta mettoch mi apwapwa. A sai ngeni telenimw me telenimw nge a lamotongau an sai ewe mi chok fiti fetallin ekkewe chon uwei taraku mi watte. Ekiselo chok, a wiliiti emon chon unumi safeien opuchupuch. Fan chommong ekkewe police ra aresi. Innamwo ika i emon mi sikesik, lapalapan mi akkachofesa, Gerson a tipeni letip mi kinamwe. Epwe tongeni kuna ena?

Lupwen Vania a kukkun, inan we a malo, me Vania a wiisen tumunu pisekin imwan me chon le imwan kewe, kapachelong an epwe tumunu pwiin we kukkun. Vania a fiti fel nge a meefi pwe Kot a likitalo i. Pwungun pwe esor kinamwe lon an ekiek.

Mei pwal wor emon itan Marcelo. Marcelo a chok mochen epwe kutta pwisin an we pwapwa. A pwapwaiti an fiti pari ren ekkewe sarafo​—pworuk, un sakau, me unumi safeien opuchupuch. Eu fansoun a fiu ngeni emon sarafo nge a efeiengaua ena emon. Mwirin, a fokkun niamaam ren ewe mettoch a fori me a iotek ngeni Kot ren alillis. A pwal mochen kutta kinamween ekiek.

Ekkeei poraus ra menlapei pwe ekkoch nonnomun manauan aramas ra tongeni atailo kinamween ekiek. Mei wor och mettoch epwe tongeni alisi meilapen ewe mwichen chon angang, ewe nouwisin muu, ewe mi marita won aal, ewe nengngin mi angang weires, me ewe sou fiti pari pwe repwe angei kinamween letiper ewe ra kukutta? Met a fis ngenir a tongeni aiti ngenikich och lesen? Poluen ekkeei ruu kapas eis, ewer, ussun met sipwe kuna lon ewe poraus mwirin.

[Pworous fan]

[Sasing lon pekin taropwe 3]

En mi kukkuta kinamween letipom?