Ia Kopwe Kutta Me Ie Kinamween Letipom?
Mi sokkofesen ranich me ranin Thoreau, mi awewe won lon ewe poraus mwen ei. Eu mettoch mi sokkofesen, iei mei wor chommong poraus mi awewei ifa ussun emon epwe kuna kinamween letipan. Tokter mi kaeo fofforun aramas, sou mak puken alillis, pwal mwo nge sou mak poraus lon simpung, ra awora ar ekiek ussun met epwe alisi aramas. Neman ar we fon epwe awora alillis ren fansoun mwochomwoch; nge ren alillis epwe nomottam, a lamot alillis mi alollon. A ina met ekkewe aramas lon ewe lesen mwen ei ra fen kuna.
ANTÔNIO, Marcos, Gerson, Vania, me Marcelo, mi sokkolo nonnomur me ar kewe osukosuk. Nge mei wor ulungat mettoch mi wewe chok rer. Akkom, mei wor eu fansoun lupwen ese wor ar “apilukuluk allim . . . pwal chon lukun Kot won fonufan.” (Efisus 2:12) Oruuen, ra fokkun mochen meefi kinamwe lon letiper. Me aulungatin, ir meinisin ra kuna ewe kinamween letiper ra kukkutta mwirin ar poputa le kaeo ewe Paipel ren Chon Pwarata Jiowa. Atun ar feffeita, ra fen miritiiti pwe Jiowa a tongeer. Mei pwung minne Paul a ereni ekkewe Chon Atens lon ranin we, Kot “ese touau seni emon me emon leich.” (Fofor 17:27) Ach eani lukuluk won ena poraus a lamot ngeni ach meefi kinamween letip.
Met Popun A Chokisikis Kinamwe?
Me ren ewe Paipel, mei wor ruu popun a chokisikis kinamwe won fonufan, ese lifilifil ika kinamween letip are lefilen aramas. A makketiu ewe aewin popun lon Jeremaia 10:23: “Aramas resap pusin nemeni manauer, resap pwal tongeni akota mine repwe fori.” Ese nom ren aramas ewe sile me mirit mi lamot fan iten ar repwe pwisin nemenemeniir ika resap angei alillis, me ewe alillis mi auchea a chok feito seni Kot. Aramas resap kuna kinamwe mi nomofoch ika rese kutta an Kot emmwen. Ewe oruuen popun ese wor kinamwe a pwalo ngenikich lon alon ewe aposel Jon: “Fonufan meinisin a nonnom fan nemenien ewe mi ingau.” (1 Jon 5:19) Ika esor an Kot emmwen, an aramas kukkutta kinamwe epwe sopwongau pokiten angangen ewe emon mi monomon—me a fokkun manaman—ewe “mi ingau,” Setan.
Pokiten ekkeei ruu popun—pwe lape ngeni aramas rese kukkutta emmwen seni Kot, me an Setan achocho ngeni an angang lon ei fonufan—chon fonufan ra fokkun osukosuk. A fich an Paul awewe won: “Masouen lang me fonufan meinisin ra chok ngungufengen tori ei fansoun, usun chok emon fefin lupwen an epwele nounou.” (Rom 8:22) Io esap tipeeu ngeni ena poraus? Lon fonu mi wouoch me woungau, osukosuk lon famili, atai alluk, pwungungau, osukosuk lefilen aramas, lolilen ussun moni, koput lefilen einang me aramas mi sokkolo ar lewo, letipengau, semmwen, me pwal chommong mettoch ra angei seni aramas kinamween letiper.
Ia A Nonnom Ie Kinamween Letip
Lupwen Antônio, Marcos, Gerson, Vania, me Marcelo ra kaeo an Kot we Kapas, ewe Paipel, ra fen kuna poraus a siwili manauer. Eu mettoch ra kaeo pwe lapalapen ei fonufan epwe siwil lon mwach kkan. Ei mettoch esap eu luku mi poon chok. Mei wor longolongun ewe luku pwe a wor an Kot kokkot fan iten aramas me pwal mwo nge iei sipwe tongeni kuna feioch ika sia apwonueta letipan we. Ekkena aramas ra apwonueta lon manauer minne ra fen kaeo lon ewe Paipel me a amurinnoolo manauer. Ra kuna pwapwa me kinamwe mi lap seni minne ra ekieki a tufich.
Antônio ese chuen angolong lon eu mwichen u ngeni nemenem me osukosuk lefilen boss me chon angang. A silei pwe alillis a pop seni ekkena mettoch mi aukuk me ekkewe siwil resap nomofoch. Ei mwan a pin meilapen mwichen chon angang, a kaeo ussun an Kot we Muu. Ina ewe Muu chommong aramas ra ioteki ussun lupwen ra eani ewe Iotekin Ach Samol ren ar apasa: “Muuom epwe feito.” (Mattu 6:10a, New International Version) Antônio a fen kaeo pwe Muun Kot wesewesen eu Muu me ena Muu epwe wato kinamwe mi enlet ngeni aramas.
Marcos a kaeo ifa ussun epwe tongeni apwonueta an ewe Paipel fon ussun pupulu. Pokiten ena, ei mwan, a pin nouwisin muu, a nomsefal me puluwan we. Atewe a pwal kukkutta ewe fansoun lupwen Muun Kot epwe siwili ei ototen fonufan mi tipemmong me maicha ren eu nemenem mi murinno seni. A fen lapelo an Marcos weweiti ewe poraus lon ewe Iotekin Ach Samol: “Letipom epwe pwonueta, won fonufan usun chok lon lang.” (Mattu 6:10b, NIV) Lupwen letipen Kot a fis won fonufan, aramas repwe manaueni ewe sokkun manau mi murinno seni meinisin.
Nge, met a fis ngeni Gerson? Manauan ese chuen lamot mwaal me ese chuen sola. Manauen atei, me loom a chok nomofetal won aal, a pwapwa iei pokiten an achocho le alisi aramas ren ar kukkutta kinamween letip. Ekkeei poraus a pwarata pwe ach kakkaeo ewe Paipel me apwonueta alon, epwe tongeni amurinnoolo manauach.
Kinamween Letip Lon Eu Fonufan Mi Osukosuk
Jises Kraist ewe emon a lamot seni meinisin ren pwonutaan an Kot kokkot, me lupwen aramas ra kaeo ewe Paipel ren Chon Pwarata Jiowa, ra kaeofichi ussun i. Pwinin an uputiu, ekkewe chonlang ra mwareiti Kot ren kol: “Ling ngeni Kot won lang, kinamwe ngeni aramas meinisin mi apwapwai i won fonufan.” (Luk 2:14) Lupwen Jises a wateelo, a mochen amurinnoolo manauen aramas. A weweiti meefien letiper me a fokkun tongei chokkewe mi riaffou me semmwen. Ussun chok an ekkewe chonlang kol, Jises a fen ngeni chokkewe mi mosonoson och kinamween letiper. Le muchuloon an angangen afalafal, Jises a ereni noun kewe chon kaeo: “Iwe, upwe likiti ngenikemi kinamwe. Ai kinamwe upwe fang ngenikemi. Ai fang ngenikemi esap usun chok fangenen fonufan. Letipemi esap pwal niuokus.”—Jon 14:27.
Nge Jises esap emon a chok tongei aramas. A apasa pwe i a ussun chok emon chon masen siip, me noun kewe chon kaeo ra ussun chok siip lupwen a apasa: “Ngang ua feito pwe repwe kuna manau, o repwe pwal alapalo manauer. Ngang ewe chon masen siip mi murinno. Ewe chon masen siip mi murinno epwe fangelo manauan fan iten ekkewe siip.” (Jon 10:10, 11) Ewer, Jises a mwaalfesen me chommong lein ekkewe nouwis ikenai, chokkewe mi tongei pwisin ir akkom mwen meinisin. Jises a fangelo manauan fan iten noun ekkewe siip.
Ifa ussun sipwe tongeni kuna feioch seni minne Jises a fen fori? Chommong repwe chechchemeni ekkeei kapas: “Pwe a chok iei usun an Kot tongei fonufan, pwe a fangelo Noun we Alaemon pwe iteiten aramas meinisin mi luku i esap poutmwalilo, nge epwe kuna manau esemuch.” (Jon 3:16) Ika emon epwe anganga an luku lon Jises, epwe akkom angei sile ussun Jises me Seman we. Sileen Kot me Jises Kraist mi tongeni emmwen ngeni chiechioch ngeni Jiowa Kot mi alisaata kinamween letipach.
Jises a apasa: “Nei kewe siip ra auseling leuwei; o ua sinei ir, o ra pwal tapwelo mwiri. Iwe, ua ngenir manau esemuch, o resap mo poutmwalilo feilfeilo chok. O esap pwal wor emon epwe weiti ir seni lon pei.” (Jon 10:27, 28) A ifa me watten ewe aururu seni ekkena kapas! Enlet pwe Jises a apasawu ekkena kapas arapakan ruu ngerou ier me loom, nge manamanen ekkena kapas ra wewe chok iei me ena fansoun. Chechchemeni mwo pwe Jises Kraist mi manau me a akangang iei. A nemenem ussun Kingen an Kot we Muu. Ussun chok ewe fansoun loom lupwen a feffetal won fonufan, Jises a chuen tongei chokkewe mi mosonoson mi kukkutta kinamween letiper. Pwal och, Jises a chuen Chon Masen noun kewe siip. Ika sia tapweilo lon ipwen Jises kewe, epwe alisikich le angei kinamween letipach me a kapachelong lon ena kinamwe ewe lukuluk pwe sipwe kuna kinamwe mi unnus lon mwach kkan—weween pwe esap chuen wor foffor mwanesol, maun, me atai alluk.
Feioch mi enlet a torikich ren ach silei me luku pwe Jiowa epwe alisikich ren Jises. Chechchemeni mwo Vania, neminnewe a fokkun watte wiisan me le kukkunun me a eani ekiek pwe Kot ese chuen chechchemeni i? Iei Vania a sile pwe Kot ese likitalo i. A apasa “Ua fen kaeo pwe Kot wesewesen emon mei wor lapalapan mi efisi ach tongei. An tong a amwokutu le tiinalo noun we ngeni fonufan ren an epwe amanauakich. A fokkun lamot ach silei ei poraus.”
Marcelo a pwarata ukuukun auchean an chiechioch me Kot. Ei mwan a chok sou-fiti pari me loom a apasa: “Fan chommong ekkewe sarafo rese silei met repwe fori, me ra chok pwisin efeiengaueer. Ekkoch ra poputa aea safeien opuchupuch ussi. Ai anean pwe chommong leir repwe feioch ussi, ren ar kaeo ewe enlet ussun Kot me Noun we.”
Pokiten ar kaeofichi lon ewe Paipel, Vania me Marcelo ra amaaraata eu luku mi pochokkul won Kot me ra eani lukuluk pwe Kot epwe alisiir le pwakini ar kewe osukosuk. Ika sia fori met ir ra fori—kaeo ewe Paipel me apwonueta alon—sipwe kuna kinamween letip watte, ussun ir ra fen kuna. Iwe, an Paul we poraus epwe wesewesen weneitikich: “Ousap aurek ren och mettoch, pwe ren mettoch meinisin oupwe chok esinei ngeni Kot ami mochen ren iotek o tingor o pwal eti kilisou. Iwe, an Kot we kinamwe, ewe mi somelo seni ach ekiek meinisin, epwe mamasa letipemi o ami ekiek lon Kraist Jises.”—Filipai 4:6, 7.
Kukkuna Kinamwe Mi Enlet Iei
Jises Kraist a ekkemmweni aramas mi echik lon pekin ngun won ewe aal mi emmwen ngeni manau esemuch lon eu paratis won fonufan. Atun a emmweniir ngeni fel mi limelimoch, ra meefi ewe sokkun kinamwe ewe Paipel a awewe won: “Nei aramas repwe manau fan kinamwe, repwe pwal asoso lon imwer, nge esap wor och mine repwe weires ren.” (Aisea 32:18) Ena poputaan chok ewe kinamwe repwe pwapwaiti lon mwach kkan. Sia allea: “Nge ir ekkewe mi mosonoson repwele fonueni ewe fonu, o repwe pwapwaesini chommongun ar pisek. Ekkewe aramas mi pung repwe fonueni ewe fonu, o repwe nonnom lon, feilfeilo chok.”—Kol Fel 37:11, 29.
Iwe, sipwe tongeni meefi kinamween letip iei? Ewer. Pwal och, sia tongeni eani lukuluk pwe, ekiselo chok, Kot epwe efeiochu aramas mi alleasochis ren kinamwe wachemuk esaamwo fis me loom. Pwata kesap tingorei Kot pwe epwe ngonuk an we kinamwe? Ika mei wor om kewe osukosuk mi eppeti sonuk kinamwe, kopwe iotek ussun chok Tafit a iotek: “Kopwe ekisalo riaffoun letipei keei, o kopwe emmweniei seni ai keei riaffou. Kopwe lolileniesini ai riaffou o ai weires, o kopwe omusalo ai tipis meinisin.” (Kol Fel 25:17, 18) Kopwe fokkun luku pwe Kot a akkauselinga ena esin iotek. A eitieelo poun ren an epwe liffangolo kinamwe ngeni aramas mi letip enlet. A torikich ei kapasen alukuluk mi tong: “Ewe Samol a chok arap ngeni ir meinisin ekkewe mi kokori i, ngeni ir meinisin ekkewe mi kokori i ren enlet. Epwe apwonueta minne ir ekkewe mi niuokusiti i ra mochen, epwe pwal rong ar pupuchor, o epwe amanaua ir.”—Kol Fel 145:18, 19.
[Blurb on page 5]
Ese nom ren aramas ewe sile me mirit mi lamot fan iten ar repwe pwisin nemenemeniir ika resap angei alillis, me ewe alillis mi auchea a chok feito seni Kot
[Blurb on page 6]
Sileen Kot me Jises Kraist mi tongeni emmwen ngeni chiechioch ngeni Jiowa Kot mi alisata kinamween letipach
[Sasing lon pekin taropwe 7]
Pwonuetaan fon seni Paipel a alisaata kinamwe lon ewe famili