Kakkamo Fansoun Fan Iten Allea Me Kaeo
“[Kamo] fansoun mi fich fan asengesimi, pun a ngau ekkeei ran.”—EFISUS 5:16, New World Translation.
1. Pwata sipwe mirit ika sipwe akkotaochu ach fansoun, me lapalapen ach aea ach fansoun epwe tongeni pwari met ussuch?
A WOR och kapas mi era “ach akkotaochu ach fansoun a wewe ngeni ach aeafichi ach fansoun.” Fan chommong, emon aramas mi akkota an fansoun fan iten an epwe fori ekkewe mettoch mi lamot epwe aeafichi an fansoun. Iei makkeien ewe emon mi tipachchem, King Solomon: “Mettoch meinisin a wor en me an fansoun, a wor eu fansoun fan iten mettoch meinisin fan lang.” (Eklesiastis 3:1, Moffatt) Mi lollo chok ewe fansoun mi nom ren oukich meinisin, nge pwisin filiach ifa ussun sipwe akkaea. Minne sia kan akkomwa lon manauach me ifa ussun sia kan akkota ach fansoun a pwari minne letipach a akkaewin aucheani. —Mattu 6:21.
2. (a) Lon an we Afalafal won ewe Chuuk, met Jises a apasa ussun minne a lamot ngenikich lon pekin ngun? (b) Epwe pwung an epwe wor met sokkun atittin fan iten pwisin kich?
2 Sipwe awora fansoun fan iten ach mongo me onnut pun ekkeei mettoch mi lamot ngeni inisich. Nge ifa ussun ekkewe mettoch mi lamot ngenikich lon pekin ngun? Sia silei pwe pwal ir mi wenewenen lamot ngenikich. Iei alon Jises lon an we Afalafal won ewe Chuuk: “Mi pwapwa ir mi meefi minne a lamot ngeniir lon pekin ngun.” (Mattu 5:3, NW) Ina ewe popun “ewe chon angang mi tuppwel me tipatchem” a kan akkachema ngenikich ussun lamoten ach sipwe akkawora fansoun fan iten ach alleani me kaeo Paipel. (Mattu 24:45) Eli kopwe weweiti lamoten ena mettoch, nge eli kopwe meefi pwe ese chok wor om fansoun fan iten om kopwe kaeo are alleani ewe Paipel. Ika ina, sipwe pi ifa ussun sipwe tufichin alapalo ewe fansoun sipwe aea fan iten ach alleani an Kot we kapas, ach pwisin kaeo, me ach ekiekfich won minne sipwe kaeo.
Kuttaen Fansoun fan iten Allean me Kaeon Paipel
3, 4. (a) Menni fon ewe aposel Paul a makkei ussun aean ach fansoun, me met a kapachelong lon? (b) Met weween alon Paul lupwen a fonoukich pwe sipwe ‘kamo ewe fansoun mi fich fan asengesich’?
3 Pokiten an a sokkolo ngauen ekkeei fansoun sia manau lon, a lamot ach sipwe fori minne Paul a makkei: “Oupwe tumunufichi pwe ami feffetal esap ussun fetalin ekkan aramas mi tiparoch, nge epwe ussun fetalin aramas mi mirit, iwe, oupwe kakkamo fansoun mi fich fan asengesimi, pun a ngau ekkeei ran. Ina minne, ousap chuen tipeforea, nge oupwe akkalapalo ami weweiti ika ifa letipen Jiowa.” (Efisus 5:15-17, NW) A pwung pwe ena fon a weneiti mettoch meinisin lon manauach, manauen chon Kraist mi angang ngeni Kot lon unusen manauach, pachelong ach awora fansoun fan iten iotek, kaeo, fiti mwich, me ach afalafala ewe “poraus allimen ewe muu” ren unusen ach tufich.—Mattu 24:14; 28:19, 20.
4 Ikenai a ussun ita mi weires ngeni chommong noun Jiowa chon angang ar repwe akkota fansoun fan iten ar repwe alleani Paipel me kaeo mettoch mi alollol. A ffat pwe sisap tongeni pacheta eu awa lon eu ran, ina minne, ese mwaal an Paul fon a wewe ngeni och mettoch mi sokkolo. Lon kapasen Kriik, ewe kapas “kakkamo fansoun mi fich” a wewe ngeni ach mooni ewe fansoun seni pwal och mettoch. Ewe Expository Dictionary, makkeien W. E. Vine, a apasa pwe ena kapas a wewe ngeni “alamota meinisin ekkewe fansoun mi suuk ngenikich, iwe, aeafichi eu me eu fansoun pun ika och fansoun epwe lulo, sisap tongeni angeisefalli.” Nge sipwe tongeni kamo seni met ewe fansoun fan iten ach sipwe alleani me kaeo ewe Paipel?
Sipwe Akkomwa Minne mi Lamot
5. Met popun me ifa ussun sipwe “akkom alukulukatiu ekkewe mettoch mi lamot”?
5 Lukun wiisach kewe fan iten ach angang me met kewe, a pwal wor chommong mettoch sipwe fori fan iten ekkewe mettochun ngun. Pokiten sia fen fangolo manauach ngeni Jiowa, a wor “chommong mettoch sipwe fori lon angangen ewe Samol.” (1 Korint 15:58, NW) Ina ewe popun Paul a mak ngeni ekkewe chon Kraist lon Filipai pwe repwe “akkom alukulukatiu ekkewe mettoch mi lamot.” (Filipai 1:10, NW) A wewe ngeni ach sipwe akkomwa ekkewe mettoch mi lamot. Fansoun meinisin ekkewe mettochun ngun repwe ita akkom mwen ekkewe mettochun aion. (Mattu 6:31-33) Iwe nge, a pwal lamot itepok me ruuepek lupwen sipwe apwonueta wiisach kewe lon pekin ngun. A kan ifa ussun ach akkota ach fansoun fan iten ekkewe mettoch mi sokkopat lon manauach, manauen chon Kraist? Ekkewe elter mi wiisen saifetal ra makkei pwe me lein “ekkewe mettoch mi lamot” chon Kraist repwe ita fori, ra kan tunalo ar pwisin kaeo me ar alleani Paipel.
6. Ach kamo ewe fansoun mi fich epwe tongeni wewe ngeni met fan iten ach angangen lukun are angangen lon imwach?
6 Ussun sia fen kuna, ach kamo fansoun mi fich a wewe ngeni ach “alamota meinisin ekkewe fansoun mi suuk ngenikich” me ach “aeafichi eu me eu fansoun.” Iwe, ika sise lien akkalleani me kakkaeo Paipel, epwe murinno ach sipwe atittina pwisin kich ren ifa ussun sia kan aea ach fansoun. Ika ach we angang fan iten tufichin manauach a kon chounikich me a kan itelo ach fansoun me pochokkul ren, iwe, sipwe iotek ngeni Jiowa ussun. (Kol Fel 55:22) Eli sipwe tongeni siwili ekkoch kokkot lon ach we angang, iwe mwirin, epwe lapalo ach fansoun fan iten ekkewe mettoch mi lamot mi chu ngeni ach fel ngeni Jiowa, pachelong ach kaeo me alleani Paipel. A pwung an aramas apasa pwe esap tongeni much an fefin angang. Ina minne, fin Kraist repwe pwal akkomwa minne mi lamot me akkota fansoun fan iten ar repwe alleani me kaeofichi Paipel.
7, 8. (a) Fan chommong sipwe tongeni kamo fansoun seni met sokkun foffor fan iten allea me kaeo? (b) Ifa lamoten kunou, me ifa ussun ach chechchemeni ena mettoch epwe tongeni alisikich le akkomwa minne mi lamot?
7 A lap me leich mi tufichin kamo fansoun fan iten kaeo ren ach likiti ekkoch mettoch ese lien lamot. Eli sipwe tongeni eisini pwisin kich, ‘Ifa ukuukun ewe fansoun ua kan aea le alleani chassiin lukun me simpung are katol TV, auseling ngeni kolun lukun, are urumot won video game? Ewe fansoun ua nounou computer a lap seni ewe fansoun ai alleani Paipel? Iei alon Paul: “Ousap chuen tipeforea, nge oupwe akkalapalo ami weweiti ika ifa letipen Jiowa.” (Efisus 5:17) A ussun ita watte fansoun katol TV, iei eu populapen an ese nafoch fansoun kaeo me alleani Paipel ren chommong Chon Pwarata.—Kol Fel 101:3; 119:37, 47, 48.
8 Eli ekkoch repwe apasa pwe resap tongeni kaeo fansoun meinisin, me a lamot repwe lo kunou fan ekkoch. Inaamwo ika mi enlet ena, nge epwe murinno ach sipwe pi ewe fansoun sia kan aea fan iten asoso me alollo ngeni ewe fansoun sia awora fan iten ach kaeo are alleani Paipel. Eli sipwe mairu ren minne sipwe kuna. A lamot kunou me asoso, nge esap ssenuk ekkena mettoch. Repwe ita awora asoso fan iten ach sipwe tinikken ngeni wiisach kewe lon pekin ngun. Chommong TV prokram me video game ra kan amolulu aramas, nge ach akkalleani me kakkaeo Paipel a kan apochokkulakich.—Kol Fel 19:7, 8.
Ifa Ussun Ekkoch ra Akkota Fansoun fan iten Kaeo
9. Ikkefa ekkewe feioch epwe toto rech ika sipwe apwonueta ewe fon lon ewe kukkun puk Examining the Scriptures Daily—1999?
9 Ikkeei ekkewe kapas a mak le poputaan ewe kukkun puk Examining the Scriptures Daily, minen 1999: “Epwe akkaewin eu feioch ngonuk om kopwe alleani ewe lesenin ran seni ei puk kulokun lesossor. Kopwe meefi pwe Jiowa, ewe Sense mi Lapalap, a kan fongunuk ren an kewe emmwen. Eu oesini a kapas ussun an Jises Kraist kuna feioch seni an Jiowa kewe emmwen iteiten lesossor: ‘I [Jiowa] a kan pwata iteiten lesossor; a fonguni selingei pwe epwe rong ussun chok ekkewe chon kait.’ Pokiten an rong ekkena kapasen emmwen, Jises a eani ‘choonmongoon ekkewe mi fen kait’ pwe epwe ‘silei ifa ussun an epwe polueni ewe emon mi pekkus ren och kapas.’ (Aisea 30:20; 50:4; Mattu 11:28-30, NW) Ach nennelo ngeni fon mi fich seni ewe Kapasen Kot iteiten lesossor esap chok alisikich pwe sipwe tufichin pwakini ach kewe osukosuk, nge epwe pwal atufichikich ach sipwe eani ‘choonmongoon ekkewe mi fen kait’ pwe sipwe tongeni alisi pwal ekkoch.”a
10. Ifa ussun ekkoch ra kan akkota fansoun fan iten ar alleani me kaeo Paipel, me met sokkun feioch ra kan kuna seni?
10 Chommong chon Kraist ra apwonueta ena fon ren ar alleani ewe lesenin ran me ewe Paipel are ren ar kaeo kulokun lesossor. Lon France emon pioneer mi tuppwol a pwaata iteiten lesossor, iwe, a alleani Paipel 30 minich. Met a atufichi neminnewe an epwe fori ena mettoch fitu ier? Iei alon: “A wesewesen chung letipei, me ua kan fitipach ngeni ai kokkotun allea ese lifilifil met epwe fis!” A lamot ach sipwe fitipach ngeni ach kokkotun allea, ese lifilifil menni fansoun sipwe filata. Iei alon Rene Mica, emon mi fen pioneer lap seni 40 ier lon Europe me Africa: “Poputa seni 1950, ua ekiekin alleani unusen Paipel iteiten ier, iwe, iei eu mettoch ua fen fori fan 49. Ua meefi pwe iei eu mettoch mi fokkun lamot ngeni ai upwe alikiitu ai riri ngeni ewe Chon Foriei. Ai ekilapei an Kot Kapas a alisiei le alapalo ai weweiti an Jiowa pwung me lusun lapalapan kewe, iwe, a fen atoto rei pochokkul mi sokkolo watteen.”b
“Mongo lon Fansoun mi Fich”
11, 12. (a) “Ewe chon angang mi tuppwol” a fen awora met sokkun “mongo” lon peking ngun? (b) Ifa ussun ewe “mongo” a fen kawor lon fansoun mi fich?
11 Ukuukochun anach a kan alisi inisich an epwe pochokkul, iwe pwal ussun chok, eu kokkotun kaeo me allean Paipel epwe apochokkulakich lon pekin ngun. Lon makkeien Luk we Poraus Allim, sia alleani alon Jises ei: “Io wesewesen ewe chon angang mi tuppwol, ewe emon mi mirit, nge noun we masta a fen seikata i won noun kewe chon alillis pwe epwe akkawora ngeniir aner mongo lon fansoun mi fich?” (Luk 12:42, NW) Ren lap seni 120 ier, mongo lon pekin ngun, weween, “mongo lon fansoun mi fich,” a fen kawor lon Ewe Leenien Mas, me pwal lon ekkan fitu sokkun puk mi longolong won Paipel.
12 Nengeni mwo ena kapas “lon fansoun mi fich.” Lon fansoun mi pwungoch, ach we “Chon Asukul mi Lapalap,” Jiowa, a fen awora emmwen ngeni noun kewe aramas fan iten ekkewe afalafal me foffor repwe eani ren an nounou Noun we me ewe mwichen chon angang. A ussun ita oukich meinisin sia fen rongpok leuwen emon mi apasa ngenikich: “Iei ewe al. Oupwe feffetal lon, ami kana aramas,’ ika pwe ami kana aramas oupwe rikilo le peliemwan are ika ami oupwe rikilo le peliefefin.” (Aisea 30:20, 21, NW) Pwal och, lupwen aramas repwe tinikken le alleani ewe Paipel me meinisin ekkewe puken awewei Paipel, fan chommong ra kan meefi pwe ekkewe poraus ra alleani a akkaewin weneitiir. Ewer, fon me emmwen seni Kot epwe toto rech lon fansoun mi fich, iwe, sipwe tufichin likiitu fan sossot are filata minne mi pwung.
Forata Eu Kokkotun Kaeo mi Murinno
13. Ikkefa ekkoch lapalap mi pwarata tumungau ngeni anach mongo lon pekin ngun?
13 Ren ach sipwe unusen feioch seni ekkena “mongo” mi kawor lon fansoun mi fich, mi lamot ach sipwe eani eu kokkotun kaeo mi murinno. Mi lamot an epwe wor eu kokkot fan iten ach sipwe alleani Paipel me pwisin kaeo, nge sipwe pwal fitipach ngeni ena kokkot. A wor om kokkot fan iten om mommongo lon pekin ngun me om pwisin kakkaeo mettoch mi alollol? Are, ka kan mommongo ekis chok, are a pwal mwo nge lu sonuk ekkoch fansoun mongo? Pokiten an ekkoch tumunungau ngeni ar mongo lon pekin ngun, a fen efisata ar apwangapwangelo lon ar luku, are pwal mwo nge ar unusen turulo.—1 Timoti 1:19; 4:15, 16.
14. Pwata sipwe kuna feioch ika sipwe kaeofichi ekkewe poraus sia fen kaeo ussun fan chommong me mwan?
14 Eli ekkoch ra meefi pwe ra fen silei ekkewe afalafal ach luku a longolong won me meefier pwe sap minne iteiten lesen a wor och poraus mi fo lon. Ina minne, me rer nge ese lamot eu kokkotun kaeo me ach fiffiti mwich iteitan. Iwe nge, ewe Paipel a affata pwe mi lamot ngenikich kapasen achechchem ussun ekkewe mettoch sia fen kaeo. (Kol Fel 119:95, 99; 2 Piter 3:1; Juta 5) Emon mi silelap fforun mongo a tongeni kuuku mongo mi anno ren an akkaea fan fite ekkewe chok nofitin mongo mi nom ren. Iwe, pwal ussun chok, ewe mwichen chon angang a akkawora mongoon ngun mi murinno lon lapalap mi sokkopat. Lon pwal mwo nge ekkewe lesen mi awewei ekkewe mettoch sia fen kaeo fan chommong me mwan, a wor poraus mi tichchik sisap mochen epwe tiuelo senikich. Mi enlet pwe ewe alillis sia angei seni minne sipwe alleani a kan longolong won ewe ukuukun fansoun me achocho sia awora ngeni ach kaeo.
Feioch lon Pekin Ngun Seni Ach Akkallea me Kakkaeo
15. Ifa ussun ach alleani me kaeo ewe Paipel a kan alisikich pwe sipwe angochulo lon wiisach we, wiisen chon afalafala an Kot we Kapas?
15 Mi chommong ekkewe feioch sia akkangei seni ach akkalleani me kakkaeo ewe Paipel. Sia angei alillis fan iten ach sipwe tufichin apwonueta eu wiisach, wiisen chon Kraist, weween, emon me emon epwe wiliiti “emon chon angang esap saueiti och mettoch, emon mi forfichi lon an anganga ewe kapas mi enlet.” (2 Timoti 2:15) Ika epwe lapalo ach alleani me kaeo ewe Paipel, epwe pwal lapalo an tupuwach masou ren ekiekin Kot kewe. Iwe, ussun Paul, sipwe tufichin ‘kapasfengen me aramas fan mirit seni ewe Paipel, iwe, awewei me anneta ren nounoun ekkewe wokisin lon’ minne mi enlet ussun an Jiowa kewe kokkot. (Fofor 17:2, 3) Epwe lapalo angochuch le asukula aramas, me epwe lapalo ach tufichin apochokkula aramas lon pekin ngun ren ach kapas, ach kewe afalafal, me ach kewe fon.—An Salomon Fos 1:5.
16. Ifa ussun sia kan kuna feioch lon pwisin manauach seni ach akkalleani me kakkaeo an Kot we Kapas?
16 Pwal eu, ewe fansoun sipwe awora fan iten ach kaeofichi an Kot we Kapas epwe atufichikich ach sipwe atipeeufengenni manauach me lapalapen Jiowa kewe. (Kol Fel 25:4; 119:9, 10; An Salomon Fos 6:20-23) Epwe afeffeitai lapalapach kewe lon pekin ngun, awewe chok ren tipetekison, tuppwol, me pwapwa. (Tuteronomi 17:19, 20; Pwarata 1:3) Lupwen sipwe aea sileiach sia angei seni ach akkalleani me kakkaeo ewe Paipel, sipwe pwapwaesini lapaloon alillisin an Kot we ngun mi fel lon manauach, iwe, epwe efisata lapaloon uwaan ena ngun lon mettoch meinisin sipwe fori.—Kalesia 5:22, 23.
17. Ifa ussun ewe ukuukun fansoun me tinikken sia eani fan iten ach pwisin alleani me kaeo Paipel a kku ach riri ngeni Jiowa?
17 Nge lamot seni meinisin, ewe fansoun sipwe kamo seni ekkewe lusun foffor lon manauach fan iten ach sipwe alleani me kaeo an Kot we Kapas epwe atoto feioch mi lapalap mi chu ngeni ach riri ngeni Kot. Paul a iotek pwe chienan kewe chon Kraist repwe “ur ren sile mi enlet ussun letipan lon sokkun tipachchem me mirit meinisin lon pekin ngun, ren ami oupwe tufichin feffetal lon ewe lapalap mi fichiiti Jiowa pwe oupwe unusen apwapwai i.” (Kolose 1:9, 10, NW) Pwal ussun chok, ren ach sipwe tufichin “feffetal lon ewe lapalap mi fichiiti Jiowa,” sipwe akkom “ur ren ewe sile mi enlet ussun letipan lon sokkun tipachchem me mirit meinisin lon pekin ngun.” A ffat pwe ach kuna feioch me chen seni Jiowa a longolong won ewe ukuukun fansoun me tinikken sia eani fan iten ach pwisin kaeo me alleani ewe Paipel.
18. Met sokkun feioch epwe toto rech ika sipwe apwonueta alon Jises lon Jon 17:3?
18 “Iei ewe manau esemuch, pwe repwe sinei en, ewe emon chok Kot mi enlet, pwal Jises Kraist ewe ka akunooto.” (Jon 17:3) Ina eu me lein ekkewe wokisin Chon Pwarata Jiowa ra kan nounou fan chommong pwe repwe alisi aramas ar repwe weweiti lamoten ar repwe kakkaeo an Kot we Kapas. A pwal lamot ngeni emon me emon leich an epwe fori ena mettoch. Ach apilukulukun kuna manau esemuch a longolong won ach alapalo sileiach ussun Jiowa me Noun we, Jises Kraist. Iwe, ekieki mwo weween ena mettoch. Esap much ach kakkaeo ussun Jiowa—iwe, sipwe tongeni kakkaeo ussun i tori feilfeilo chok!—Eklesiastis 3:11; Rom 11:33.
[Ppii ekkewe pwóróus fan]
a Forien ewe Watchtower Bible and Tract Society of New York, Inc.
b Pi ewe poraus “When They Read It and How They Benefit,” a mak lon Ewe Leenien Mas, minen May 1, 1995, pekin taropwe 20-1.
Kapas Eis fan iten Enniwili Poraus
• Lapalapen ach aea ach fansoun a kan pwari met?
• Sipwe tongeni kamo fansoun seni met sokkun foffor fan iten allean me kaeon Paipel?
• Pwata sipwe tumunuochu lapalapen ach mommongo lon pekin ngun?
• Met sokkun feioch epwe toto rech seni ach akkalleani me kakkaeo Paipel?
[Pictures on page 28, 29]
Ach akkalleani me kakkaeo ewe Paipel epwe atufichikich ach sipwe ‘lipwakoch le nounou kapasen ewe enlet’
[Pictures on page 31]
Ach akkotaochu wiisach kewe lon pekin ngun me ekkewe lusun foffor lon manauach mi osukosuk epwe atoto feioch mi lapalap