Chon Kraist Ra Kan Kuna Pwapwa Seni Ar Angang Fan Iten Aramas
“Ewe pwapwaan liffangelo a lap seni ewe pwapwaan angei.”—FOFOR 20:35, New World Translation.
1. Menni ekiek mi mwaal a choufetal ikenai, me pwata a ngau?
LON ekkewe ruwe som ier le sopwoloon ewe aruween senturi, fan chommong aramas ra rong ei kapas “me-ism.” “Me-ism” a wewe ngeni “ngang akkom” iwe, a chu lon ei sokkun ekiek kichingau me tipemmong fitifengen me nafangauen tong ngeni aramas. A wenewenen enlet pwe lon ewe ier 2000, mi chuen chok pwapwaalo ena sokkun ekiek. Fan fite sia kan rong ekkeei kapas eis: “Met sokkun feioch epwe toto rei?” are “Met upwe tongeni winneni?” Ena sokkun ekiek mi popu seni kichingau ese kan efisata pwapwa. Ena ekiek a mwaalfesen me ei kapasen emmwen seni Jises: “Ewe pwapwaan liffangelo a lap seni ewe pwapwaan angei.”—Fofor 20:35.
2. Ifa ussun a pwalo pwe fofforun liffangelo a kan atoto pwapwa?
2 A ita enlet pwe ewe fofforun liffangelo a kan atoto pwapwa mi lap seni ewe fofforun angei? Ewer. Ekieki mwo ussun Jiowa Kot. I “ewe puachen manau.” (Kol Fel 36:9) A akkawora mettoch meinisin fan iten manauach epwe ur ren pwapwa me angang mi auchea. A enlet pwe i ewe Chon Awora “iteiten liffang mi murinno me iteiten liffang mi unusoch.” (Jemes 1:17) Jiowa, “ewe Kot mi pwapwa,” a kan lilliffang fansoun meinisin. (1 Timoti 1:11, NW) A tongei forian kewe chon fonufan, iwe, a kan liffang ngeniir chommong mettoch. (Jon 3:16) Pwal ekieki mwo chon eu famili. Ika en emon sam are in, ka silei watteen ewe fansoun, alillis, me tumun kopwe awora fan iten an epwe mammaaroch noum we. Iwe, ren chommong ier, noum na ese meefi weiresin om angang fan itan. Ese weweiti ekkewe mettoch meinisin ka foffori fan asengesin i. Iwe nge, ka kan pwapwa lupwen ka kuna noum we an a mammaaroch pokiten om angang weires fan asengesin i. Met popun? Pun ka tongei i.
3. Pwata a eu minen apwapwa ach sipwe angang ngeni Jiowa me chienach kewe chon luku?
3 Iwe, pwal ussun chok, fofforun liffangelo mi longolong won tong eu lapalap a nom ren ewe lamalam mi enlet. Pokiten ach tongei Jiowa me ach tongei chienach kewe chon luku, sia kan pwapwa ren ach angang fan asengesiir me ach awora alillis ngeniir. (Mattu 22:37-39) Emon mi fel ngeni Kot fan iten chok pwisin feiochun esap lien kuna chengel. Nge ir mi angang fan kisaseu pokiten ar akkaewin ekieki met repwe tufichin liffangelo nge esap minne ra ekiekin angei, repwe wesewesen kuna pwapwa. Ena poraus mi enlet epwe ffatolo ren ach nengeni ifa ussun ewe Paipel a nounou ekkoch kapas mi riri ngeni ach fel ngeni Kot. Sipwe kaeo ussun ulungat ekkena kapas lon ei lesen me ena eu epwap tapwoto.
An Jises Angang fan iten Aramas Meinisin ese Lifilifil
4. Mei fet ewe “angang fan iten aramas meinisin ese lifilifil” lon Christendom?
4 Lon ewe fosun Kriik ewe Paipel a akkom mak lon, iei eu kapas mi lamot a weneiti ach fel ngeni Kot: lei·tour·giʹa. Lon ewe New World Translation a affou ngeni “angang fan iten aramas meinisin ese lifilifil.” Lon Christendom lei·tour·giʹa a fen efisata ewe kapas “liturgy.”a Iwe nge, an Christendom kewe liturgy are afalafal rese enletin efeiochu aramas.
5, 6. (a) A wor menni angang fan iten aramas meinisin ese lifilifil lon Israel, me a atoto met sokkun feioch? (b) Menni angang mi fokkun lapalap a siwili ewe lon Israel, me met popun?
5 Ewe aposel Paul a nounou eu kapasen Kriik mi kan ngeni lei·tour·giʹa fan iten ekkewe samol felin Israel. Iei alon: “Iteiten samol fel a tolong lon leenian ran me ran pwe epwe apwonueta an angang ngeni aramas meinisin ese lifilifil [eu kapas mi ussun lei·tour·giʹa] me iseta ekkewe chok asor fan chommong.” (Ipru 10:11, NW) Ekkewe samol fel seni Lifai ra fori eu angang mi fokkun auchea fan iten aramas meinisin ese lifilifil. Ra asukuler ussun an Kot Alluk me ra fori ekkewe asor mi pwoluelo tipisir. (2 Kronika 15:3; Malakai 2:7) Lupwen ekkewe samol fel me aramas ra apwonueta an Jiowa we Alluk, a wor popun ewe muu epwe chengel.—Tuteronomi 16:15.
6 Ar angang fan iten aramas meinisin ese lifilifil wesewesen eu wiis mi auchea ren ekkewe samol felin Israel, nge a ukutiu aucheaan ar angang lupwen Israel a koturulo pokiten an ese tuppwol. (Mattu 21:43) Jiowa a akkota eu mettoch mi fokkun lap seni ewe kokkot minen lom—nge iei ewe angang fan iten aramas meinisin ese lifilifil Jises a fori lon wiisan we, wiisen Samol Fel mi Lapalap. Iei ewe poraus mi mak ussun i: “Nge atei a chok amwochu wisan samol-fel, pun epwe nonnom feilfeilo chok. Iei minne, lon fansoun meinisin a tongeni amanauata ir mi arap ngeni Kot pokiten i, pun a chok manaufochofoch pwe epwe tingormau fan asengesir.”—Ipru 7:24, 25.
7. Pwata an Jises angang ngeni aramas meinisin ese lifilifil a kan atoto feioch mi sokkolo watteen?
7 Jises epwe wiisen samol fel tori feilfeilo chok, nge esap wor siwilin. Ina minne, i chok epwe tufichin unusen amanaua aramas. A fori ena angang mi tekia seni meinisin fan iten aramas meinisin ese lifilifil, esap lon eu imwen fel forien aramas, nge lon ewe imwen fel lon kapas awewe, ewe mi liosueta an Jiowa we kokkot mi lapalap, kokkkotun an aramas fel ngeni i, ewe mi poputa lon 29 C.E. Iei Jises a akkangang lon ewe Leeni mi Unusen Fel lon ena imwen fel, lon lang. I “emon chon angang ngeni aramas meinisin ese lifilifil, [lei·tour·gosʹ] lon ewe leeni mi fel me lon ewe imw mangaku mi enlet, ewe imw Jiowa a aueta, nge esap aramas. (Ipru 8:2; 9:11, 12, NW) Inaamwo ika a mmen tekia wiisen Jises, nge i mi chuen “emon chon angang fan iten aramas meinisin, ese lifilifil.” A akkaea an nemenem mi watte pwe epwe eani fofforun liffangelo, nge esap fofforun angei. Iwe, ena sokkun foffor a atoto ngeni pwapwa. Ina och “ewe pwapwa mi nom mwen i,” iwe, a apochokkula i pwe epwe tufichin likiitu lon unusen manauan we won fonufan.—Ipru 12:2.
8. Ifa ussun Jises a fori eu angang fan asengesin aramas meinisin ese lifilifil pwe epwe wor siwilin ewe Alluk fan iten ewe atipeeu?
8 A wor pwal eu mettoch mi pacheri an Jises angang fan iten aramas meinisin ese lifilifil. Iei makkeien Paul: “Jises a fen wiiseni eu angang fan iten aramas meinisin ese lifilifil, eu angang mi murinno seni ewe, ina minne, pwal i ewe chon affor fan iten eu atipeeu mi murinno seni ewe mi akkom mwan, nge a fen longolong fan pwungun alluk won ekkewe pwon mi murinno seni ekkewe mesemwan.” (Ipru 8:6) Moses ewe chon affor fan iten ewe atipeeu an Israel riri ngeni Jiowa a longolong won. (Ekistos 19:4, 5) Jises ewe chon affor fan iten eu atipeeu sefo, ewe mi atufichi uputiuen eu muu mi fo, “ewe Israelin Kot,” ewe mi foruta seni chon Kraist mi kepit ren ewe ngun mi fel, nge ir seni chommong muu. (Kalesia 6:16; Ipru 8:8, 13; Pwarata 5:9, 10) A fet ochchun ena angang fan iten aramas meinisin ese lifilifil! A ifa me watteen ach pwapwa pokiten ach silei Jises, nge i emon chon angang fan iten aramas meinisin ese lifilifil, iwe, sipwe tongeni fel ngeni Jiowa lon ewe lapalap mi apwapwai i ren ena emon!—Jon 14:6.
Chon Kraist ra Pwal Angang fan iten Aramas Meinisin ese Lifilifil
9, 10. Ikkefa ekkoch sokkun angang fan iten aramas meinisin ese lifilifil chon Kraist ra kan foffori?
9 Esor emon aramas mi fori ewe sokkun angang mi fokkun tekia fan iten aramas meinisin ese lifilifil ussun an Jises we. Iwe nge, lupwen chon Kraist mi kepit ra angei liwinir lon lang, ra tolong lon leenier unukkun Jises me ra eti i lon an angang fan iten aramas meinisin ese lifilfil lon ewe wiis king me samol fel lon lang. (Pwarata 20:6; 22:1-5) Iwe nge, chon Kraist won fonufan ra kan foffori angang fan iten aramas meinisin ese lifilifil, me ra kan kuna pwapwa watte seni. Ren chok awewe, lupwen a wor nafangauen mongo lon Palestine, ewe aposel Paul a uwei liffang seni ekkewe brother lon Europe fan iten ar repwe pwakini riaffoun ekkewe chon Jus mi wiliiti chon Kraist, nge ra nonnom lon Jutia. Ina eu angang fan iten aramas meinisin ese lifilifil. (Rom 15:27; 2 Korint 9:12) Ikenai, chon Kraist ra pwapwa le fori eu angang mi ussun chok ena, iwe, ra muttir awora alillis lupwen pwiir kewe ra kuna riaffou, osupwang pokiten minen efeiengau, are pwal och sokkun osukosuk.—An Salomon Fos 14:21.
10 Iei makkeien Paul ussun pwal eu sokkun angang fan iten aramas meinisin ese lifilifil: “Inaamwo ika ngang mi niniitiu ussun eu kapen asor won ewe leenien asor me ewe angang fan iten aramas meinisin ese lifilifil luku a fen emmwen ngenikemi, nge ua pwapwa me chengel fitifengen me ami meinisin.” (Filipai 2:17, NW) An Paul angang weires fan iten chon Filipai eu angang a fori fan iten aramas meinisin ese lifilifil, nge a pwarata tong me tinikken lon. Eu angang mi ussun ena, eu angang fan iten aramas meinisin ese lifilifil, a pwopwonuta ikenai, akkaewin ren chon Kraist mi kepit, nge ir “ewe chon angang mi tuppwel me tipatchem,” iwe, ra akkawora mongoon ngun lon fansoun mi fich. (Mattu 24:45-47) Pwal och, chon ena mwich “eu mwich mi fel, mwichen samol fel,” iwe, wiiser ar repwe “ikkiseta asor lon pekin ngun mi apwapwai Kot ren Jises Kraist” me “ekkesilefeili lapalapochun ewe emon mi koriirowu seni rochopwak ngeni an saram mi amwarar.” (1 Piter 2:5, 9, NW) Ussun Paul, ra kan pwapwa ren wiiser kana lupwen ra ‘ninatiu manauer’ le akkapwonueta wiiser kewe. Iwe, chiener kewe “pwal fitemon siip” ra etiir me peniir lon ewe angangen esilei ngeni aramas porausen Jiowa me an kewe kokkot.b (Jon 10:16; Mattu 24:14) A ifa me watteen amwararen me chengelin ena angang fan iten aramas meinisin ese lifilifil!—Kol Fel 107:21, 22.
Foffori Angang mi Fel
11. Ifa ussun ewe soufos Anna a awora eu leenien appiru mi murinno fan iten chon Kraist meinisin?
11 A wor pwal eu kapasen Kriik mi weneiti ach fel ngeni Kot, nge iei ewe kapas la·treiʹa, iwe, a affou ngeni “angang mi fel” lon ewe New World Translation. Angang mi fel a wewe ngeni fofforun fel ngeni Jiowa. Ren chok awewe, a mak pwe emon fefin mi ierini 84 itan Anna, emon mi fen ma seni puluwan, nge i emon soufos, “esap fan eu an ukutiu seni an etilong lon ewe imwen fel, iwe, a foffori angang mi fel [eu kapasen Kriik mi kan ngeni la·treiʹa] le ran me le pwin ren echikifel me iotek.” (Luk 2:36, 37, NW) Anna a tuppwol le fel ngeni Jiowa. Neminnewe eu leenien appiru mi murinno ngenikich meinisin—kukkun me watte, mwan me fefin. Ussun Anna a tinikken le iotek ngeni Jiowa me a fel ngeni i iteiten ran lon ewe imwen fel, iwe, ach iotek me ach fiti mwich a kapachelong lon ach angang mi fel.—Rom 12:12; Ipru 10:24, 25.
12. Ifa eu mettoch mi wenewenen lamot mi kapachelong lon ach angang mi fel, me ifa ussun ina pwal och angang fan iten aramas meinisin ese lifilifil?
12 Ewe aposel Paul a mak ussun eu mettoch mi wenewenen lamot lon ach angang mi fel: “Kot, ewe emon ua fori angang mi fel fan asengesin fiti nguni fan iten ewe poraus allim ussun Noun we, i nei chon pwarata ren ifa ussun ai use ukutiu seni ai iotekikemi fansoun meinisin.” (Rom 1:9, NW) Ewer, ewe angangen afalafala ewe poraus allim esap eu angang fan iten chok ir mi rong, nge pwal iei eu fofforun fel ngeni Jiowa Kot. Ese lifilifil ika aramas repwe auseling are resap auseling, nge ewe angangen afalafal eu angang mi fel sia foffori fan asengesin Jiowa. Ach achocho le ereni aramas ussun ekkewe lapalap mi murinno a nom ren Semach we mi achengicheng lon lang me an kewe kokkot mi efeiochu aramas a wesewesen atoto rech chengel mi lapalap.—Kol Fel 71:23.
Ia Sia Foffori Ia Angang mi Fel?
13. Ifa ewe apilukuluk a nom ren ir mi fori angang mi fel lon pwalangen an Jiowa we imwen fel me kukkulong, me io kewe mi fitiir lon ar chengel?
13 Iei makkeien Paul ngeni chon Kraist mi kepit: “Pokiten sipwe angei eu muu esap tongeni chunguchung, amwo umoumoch epwe chuen nonnom rech, pwe sipwe tufichin fori fan asengesin Kot angang mi fel i epwe pwapwa ren, fiti niuokkus me sufol.” (Ipru 12:28, NW) Ren ar kamwochunnuk won ewe apilukulukun ar repwe alemwiri ewe muu, chon kepit ra uppos lon ar luku fansoun ar repwe fel ngeni ewe emon mi Unusen Tekia. Ir chok repwe tongeni fori angang mi fel fan asengesin i lon ewe leeni mi Fel me pwal lon ewe pwalang me kukkulong lon an Jiowa we imwen fel lon pekin ngun, me ra mwasangasang ngeni ar repwe eti Jises le angang lon ewe leeni mi Unusen Pin, weween, lang. Chiener kewe, ewe mwichen pwal fitemon siip, ra pwal etiir lon ar chengel pokiten ar eani ena apilukuluk mi amwarar.—Ipru 6:19, 20; 10:19-22.
14. Ifa ussun ewe mwich mi lapalap a kan kuna feioch seni an Jises angang fan iten aramas meinisin ese lifilifil?
14 Iwe nge, ifa ussun ekkena pwal fitemon siip? Ussun ewe aposel Jon a oesini, lon ekkeei ranin le sopwoloon ra fen pwalo lon eu mwich mi lapalap, me “ra fen sopuni o apwechepwechalo ufer mi langattam ren chaan ewe Lam.” (Pwarata 7:14) A wewe ngeni pwe ussun chiener kewe chon fel mi kepit, ra pwarata ar lukuluk won an Jises angang fan iten aramas meinisin ese lifilifil, weween, an asoresini manauan we mi unusoch, manauen aramas, fan asengesin chon fonufan. Ekkena pwal fitemon siip ra pwal kuna feioch seni an Jises angang fan iten aramas meinisin ese lifilifil pokiten ar “kamwochuta won ewe atipeeu [an Jiowa].” (Aisea 56:6, NW) Sap minne ra kapachelong lon ewe atipeeu sefo, nge ra kamwochuta won pokiten ar alleasochisi ekkewe alluk mi popu seni me ra tipeeu ngeni ekkewe kokkot mi fisita seni. Ra fiffiti ewe Israelin Kot, ra akkaea ewe eu chok mongoon ngun, me ra angangfengen me ir mi kapachelong lon ena atipeeu, iwe, ra mwareiti Kot lein aramas meinisin me ra ikkiseta asor lon pekin ngun mi apwapwai i.—Ipru 13:15.
15. Ia ewe mwich mi lapalap a foffori angang mi fel ie, me met ena feioch a efisata lon manauer?
15 Ina minne, a mak pwe ewe mwich mi lapalap a “ukkuta mwen ewe leenien motun king, o mwen mesen ewe Lam, ra ufouf mangaku pwechepwech mi langattam.” Pwal och, “ra nonnom mwen an Kot we leenien motun king, o ra angang ngeni i le ran me lepwin lon an we imwen fel; o i mi mottiu won ewe leenien motun king epwe tumunur.” (Pwarata 7:9, 15) Lon Israel, chon pacheri ewe lamalamen Jus ra fel ngeni Kot lon pwalangen ewe imwen fel me kukuwu, nge ina ewe imwen fel Solomon a aueta. Iwe, pwal ussun chok, ewe mwich mi lapalap a fel ngeni Jiowa lon pwalangen an we imwen fel me kukuwu, nge iei an we imwen fel lon pekin ngun. Ar akkangang ikewe ie a atoto ngeniir chengel. (Kol Fel 122:1) Pwal mwo nge mwirin ewe emon mi mwirifochofoch me lein chiener kewe chon kepit epwe angei alemwirian lon lang, chokana repwe chuen chok foffori angang mi fel fan asengesin Jiowa, pun ir noun aramas.—Pwarata 21:3.
Ewe Sokkun Angang mi Fel ese Pwung
16. A wor met sokkun ourour ussun angang mi fel?
16 Lon Israel lom lom, ewe angang mi fel aramas repwe fori epwe tipeeu ngeni an Jiowa kewe alluk. (Ekistos 30:9; Lifitikos 10:1, 2) Iwe, pwal ussun chok, ikenai a wor alluk sipwe apwonueta ren an epwe pwung mwen mesen Jiowa ach angang mi fel. Ina weween an Paul makkei ei mettoch ngeni chon Kolose: “Am . . . ause ukutiu seni am iotekikemi me am tingor pwe ami oupwe ur ren sile mi enlet ussun letipan lon sokkun tipachchem me mirit meinisin lon pekin ngun, ren ami oupwe tufichin feffetal lon ewe lapalap mi fichiiti Jiowa, pwe oupwe unusen apwapwai i fansoun ami oupwe uwaoch lon iteiten angang mi murinno meinisin me akkalapalo ami angei ewe sile mi enlet ussun Kot.” (Kolose 1:9, 10, NW) Esap wiisach ach sipwe filata menni lapalap epwe pwung fan iten an aramas fel ngeni Kot. A lamot sile mi enlet ussun Paipel, mirit lon pekin ngun, me tipachchem seni lang. Ika ese nom rech ekkena mettoch, epwe tongeni fis mettoch mi fokkun ngau.
17. (a) Ifa ussun angang mi fel a ngauolo lon fansoun Moses we? (b) Ifa ussun emon epwe tongeni mwaallilo lon an angang mi fel ikenai?
17 Chechchemeni mwo chon Israel lon fansoun Moses we. Iei porauser: “Kot a kul senir, o a likitirelo pwe repwe fel ngeni ewe mwichen sounfiuun lang.” (Fofor 7:42) Chon Israel kana ra fen kuna an Jiowa kewe manaman fan asengesir. Iwe nge, ra kulliiti ekkewe koten lukun lupwen ra ekieki pwe repwe kuna feioch ren. Ir rese tuppwol, iwe, ach angang mi fel esap tongeni apwapwai Kot ika sise tuppwol ngeni. (Kol Fel 18:25) Mi enlet pwe ikenai esap lien wor aramas epwe kul seni Jiowa pwe repwe fel ngeni ekkewe fuu are liosun appanen kowu mi for seni kolt, nge a wor pwal fitu sokkun fofforun fel ngeni kot chofona. Jises a ouroura aramas ussun ar angang ngeni “mammon,” me Paul a makkei pwe tipemmong a ussun ewe fofforun fel ngeni ululun anu. (Mattu 6:24; Kolose 3:5) Setan a kan atekiata pwisin i pwe epwe ussun emon kot. (2 Korint 4:4) Ekkena sokkun fofforun fel ngeni kot chofona ra choufetal me ir eu ssar. Ren chok awewe, ekieki mwo emon mi apasa pwe a appiru Jises, nge lon unusen manauan a akkaewin achocho ngeni an epwe pisekisek are a wesewesen eani lukuluk won pwisin i me an kewe ekiek. Emonna a wesewesen akkangang ngeni io? A ita sokko seni ekkewe chon Jus lon fansoun Aisea we, ir mi akkapolu iten Jiowa we, nge ra apasa pwe an kewe manaman mi lapalap a fis pokiten ekkewe uluulun anu mi limengau?—Aisea 48:1, 5.
18. Ifa ussun aramas ra fen mwaallilo lon ar ita fori angang mi fel me lom me pwal ikenai?
18 Iei pwal an Jises ourour: “Ewe fansoun epwe feito lupwen emon mi nnikemilo epwe ekieki pwe a fen fori eu angang mi fel fan asengesin Kot.” (Jon 16:2, NW) Ese mwaal pwe Saul, ewe emon mi wiliiti ewe aposel Paul, a ekieki pwe a angang ngeni Kot lupwen a ‘tipeeu ngeni nninniiloon Stifen’ me a ‘ngasepwichiesini kapasen amosok o kapasen ninni usun noun ewe Samol kewe chon kaeo.’ (Fofor 8:1; 9:1) Ikenai, ekkoch mi poputani nninniiloon chon ekkoch einang ra pwal apasa pwe ra fel ngeni Kot. A wor chommong aramas mi apasa pwe ra fel ngeni Kot, nge ar fofforun fel a wesewesen weneiti ekkewe kot mi fisita fan iten ewe ekiekin acheni en me fonuan are en me an einang, woun fonufan, pwisin ir, are pwal och sokkun kot.
19. (a) Mei fet ekiekich ussun ach angang mi fel? (b) Met sokkun angang mi fel epwe atoto rech chengel?
19 Iei alon Jises: “Ami oupwe fel ngeni Jiowa ami Kot, iwe, oupwe fori angang mi fel fan asengesin i chok.” (Mattu 4:10, NW) A kapas ngeni Setan, nge a lamot ngeni oukich meinisin ach sipwe apwonueta alon! Ach foffori angang mi fel fan asengesin ewe Epinkepiisom eu wiis mi wesewesen tekia me aniuokkus. Iwe, met sipwe tongeni apasa ussun ach foffori angang fan iten aramas meinisin ese lifilifil, nge mi riri ngeni ach fel ngeni Kot? Ach foffori ena angang fan iten chienach kewe chon fonufan eu angang mi apwapwa, iwe, a atoto chengel mi lapalap. (Kol Fel 41:1, 2; 59:16) Iwe nge, ena angang epwe atoto pwapwa mi enlet ika sia foffori chok ren unusen letipach me pwal lon ewe lapalap mi pwung. Io kewe ra wesewesen fel ngeni Kot lon ewe lapalap mi pwung? Io kewe ra foffori ewe angang mi fel Jiowa a kan pwapwa ren? Sipwe tongeni polueni ekkena kapas eis ika sipwe kaeo ewe aulungatin fos lon Paipel mi weneiti ach fel ngeni Kot. Sipwe fori ena mettoch lon ewe lesen mi tapwoto mwirin ei.
[Ppii ekkewe pwóróus fan]
a An Christendom kewe liturgy ra wewe ngeni fansoun fel are eoreni mi pin, awewe chok ren ewe Eucharist lon pekin Katolik.
b Lon Fofor 13:2, a mak pwe ekkewe soufos me sense lon Antiok ra “akkangang [ngeni Jiowa] fan iten aramas meinisin ese lifilifil” (a affou seni eu kapasen Kriik mi kan ngeni lei·tour·giʹa). Neman ena angang fan iten aramas meinisin ese lifilifil a pwal wewe ngeni ar afalafal ngeni aramas meinisin.
Ifa Ussun Kopwe Polueni?
• Menni angang mi lapalap fan iten aramas meinisin ese lifilifil Jises a fori?
• Menni angang chon Kraist ra kan fori fan iten aramas meinisin ese lifilifil?
• Ifa an chon Kraist angang mi fel, me ia a kan fiffis ia?
• Met epwe nom rech ren an epwe apwapwai Kot ach angang mi fel?
[Picture on page 8]
Sam me in ra kukkuna chengel mi lapalap seni ar fofforun liffangelo
[Pictures on page 10, 11]
Chon Kraist ra kan fori angang fan iten aramas meinisin ese lifilifil lupwen ra awora alillis ngeniir me lupwen ra esilefeili ewe poraus allim
[Picture on page 12]
A lamot ngenikich sile mi enlet me weweoch ren an epwe wenewenen ffat ngenikich pwe ach angang mi fel a apwapwai Kot