Oupwe Uta O Unusoch Ren Luku Mi Lukuchar
“Fansoun meinisin atei a achocho fan asengesimi, pwe oupwe uta o unusoch ren luku mi lukuchar lon letipen Kot meinisin.”—KOLOSE 4:12, New World Translation.
1, 2. (a) Met ekkewe chon lukun ra esinna ussun Chon Kraist loom? (b) Ifa ussun ewe puken Kolose a pwari ei sokkun tong?
NOUN Jises kewe chon kaeo ra fokkun tongei chiener chon luku. Tertullian (emon sou mak lon ewe oruuen me aulungatin senturi C.E.) a awewe won ewe kirokiroch ra pwarata ngeni semirit mi ma sen, ekkewe mi woungau, me ekkewe chinnap. Aramas ra kon ingelo ren ekkena foffor mi pwarata tong pwe iei met ekkoch me leir ra apasa ussun ekkewe Chon Kraist, ‘Nengeni ifa ussun ra tongefengenniir.’
2 Ewe puken Kolose a pwaraalo an Paul me chienan we Epafras tongei ekkewe brother me sister lon Kolose. Paul a mak ngeniir ussun Epafras: “Fansoun meinisin atei a achocho lon an iotek fan asengesimi, pwe oupwe uta o unusoch ren luku mi lukuchar lon letipen Kot meinisin.” Lon 2001, Chon Pwarata Jiowa repwe pwal eani ekkeei kapas lon Kolose 4:12: “Oupwe uta o unusoch ren luku mi lukuchar lon letipen Kot meinisin,” fan iten ewe lesenin ier.
3. Ikkefa ekkewe ruu mettoch Epafras a tingor lon an iotek?
3 Kopwe kuna pwe mei wor ruu mettoch mi lamot lon an Epafras iotek fan iten atongan kewe: (1) pwe repwe “uta o unusoch” me (2) uta “ren luku mi lukuchar lon letipen Kot meinisin.” Ei poraus a kapachelong lon ewe Paipel fan iten feiochuch. Kopwe pwisin eisinuk, ‘Met ngang upwe wiisen fori ren ai upwe uta o unusoch ren luku mi lukuchar lon letipen Kot meinisin? Me lupwen upwe fori ena, met epwe fisita seni?’ Sipwe ppi.
Achocho Le “Uta O Unusoch”
4. Ifa ussun Chon Kolose repwe “unusoch”?
4 Epafras a fokkun mochen pwe pwiin kewe lon pekin ngun lon Kolose repwe “uta o unusoch.” Ewe kapas Paul a nounou ikei a wewe ngeni “unusoch,” epwe pwal tongeni wewe ngeni unus, tipen mwan, are asimau. (Mattu 19:21; Ipru 5:14; Jemes 1:4, 25) Kopwe fen silei pwe sap minne emon a wiliiti Chon Pwarata Jiowa mi asimau pokiten chok an papatais. Paul a mak ngeni Chon Efisus, mei nonnom notoun Kolose, pwe chon mas me sense repwe sotun alisi aramas meinisin ren ar repwe “tipeeufengen lon ewe luku, o . . . sineifichi usun ewe Noun Kot, . . . tori [ar] tipen mwan, ngeni ukukun lapalapen unusochun Kraist.” Lon pwal ekkoch wokisin Paul a pesei Chon Kraist: “Ren ami ekiek, oupwe usun ekkewe mi tipemwan.” —Efisus 4:8-13; 1 Korint 14:20.
5. Ifa ussun ach unusolo epwe wiliiti eu mettoch mi lamot sipwe achocho ngeni?
5 Ika ekkoch lon Kolose resaamwo tipen mwan are asimau lon pekin ngun, ina met repwe achocho ngeni. Esap pwe sipwe fori ina chok ussun ikenai? Ika sia fen papatais fite fite ier loom are kanoto chok, iwe ita sipwe tongeni kuna pwe sia fen feffeita lon pekin miritiiti me weweiti sokkopaten poraus? Sia kan kutta ekkewe kapasen emmwen seni Paipel mwen ach sipwe filata met sipwe fori? Ekkewe mettoch mi weneiti Kot me ewe mwichefel sia fen alamota lon manauach, nge esap ekkewe mettoch sipwe ekieki ika kich mi tawe ngeni chok? Sise tongeni awewe won ekkewe lapalap meinisin mi pwaraalo ach feffeita ngeni unusoch, nge sipwe ekieki ussun ruu chok me leir.
6. Ifa eu mettoch sipwe tongeni unusochulo lon, ren ach sipwe ussun chok Jiowa?
6 Aewin poraus: Ifa ussun ika leeniach, seni le kukkunuch, ewe sokkun leeni aramas ra kan lifilifil ika oput aramas mi sokkolo aluwel unucher, fonuer, are leenier. Sia fen kaeo pwe Kot ese lifilifil aramas me kich sisap pwal lifilifil. (Fofor 10:14, 15, 34, 35) Lon ach mwichefel are circuit, mei wor ena esin aramas, me sia chok nomfengen. Iwe nge, ifa ukuukun ach amwochu ekiek mi ngau ussur lon letipach? Sia kan muttir tipimwaal ngeni emon lupwen a fori are apasa och mettoch sise kon lien saani? Kopwe pwisin eisinuk, ‘Mei lamot ai upwe angang ngeni le appiru an Kot ese lifilifil aramas?’
7. Ach unusolo lon pekin Chon Kraist mi tongeni wewe ngeni ach eani menni ekiek ussun aramas?
7 Oruuen poraus: Me ren Filipai 2:3, sisap fori och mettoch ‘ren kirikiringau are ren lamalam tekia, nge lon ach tipetekison sipwe chok ekieki pwe ekkewe ekkoch ra murinno senikich.’ Ifa ussun ach feffeita lon ei pekin? Emon me emon a wor an pwisin kewe lapalap mi apwangapwang me pochokkul. Ika, me loom, sia kan muttir le kutta an aramas kewe apwangapwang, iei sia fen feffeita ren ach sise chuen eani ekiek pwe ra “unusoch”? (Jemes 3:2) Iei, a lap seni loom, ach sia tongeni kuna—pwal mwo nge ach kutta ifa ussun aramas ra tekia senikich? ‘Pwungun pwe, ei sister a fokkun mosonottam lap seniei.’ ‘An luku a pochokkul seni ai.’ ‘Atennan emon sense mi fokkun angangoch seniei.’ ‘Neminnan a murinno seniei ren an tongeni nemeni an song.’ Ekkoch Chon Kolose ra wiisen feffeita lon ei mettoch. Pwal kich?
8, 9. (a) Ifa weween an Epafras iotek pwe Chon Kolose repwe “uta” o unusoch? (b) ‘Uta o unusoch’ a weneiti met ussun mwach kkan?
8 Epafras a eani iotek pwe Chon Kolose repwe “uta o unusoch.” A ffat pwe Epafras a iotek ngeni Kot pwe Chon Kolose, me ren ukuukun ar unusoch, asimau, tipen mwan ussun chok Chon Kraist, repwe “uta” are amwochu ngeni ar unusoch, asimau, me tipen mwan.
9 Sisap chok luku pwe meinisin me lein ekkewe ra fen wiliiti Chon Kraist, pwal mwo nge ekkewe mi asimau, repwe likiitu. Jises a apasa pwe emon chon lang “ese mo nonnom lon minne mi enlet.” (Jon 8:44) Me Paul a fen achema ngeni ekkewe Chon Korint ussun ekkoch ra fen angang ngeni Jiowa nge mwirin ra kkuf. A ouroura pwiin kewe mi kepit: “Are emon a meefi pwe a uta, atewe epwe tumunu pwisin i pwe ete turutiu.” (1 Korint 10:12) Ei poraus a menlapei ewe tingor pwe Chon Kolose repwe “uta o unusoch.” Mwirin ra fen unusolo, asimauolo, a lamot ar likiitu, nge resap limaramarsefal, achanu, are paselo. (Ipru 2:1; 3:12; 6:6; 10:39; 12:25) Ina ussun, ar repwe “unusoch” lon ranin ar atittin me feioch.—2 Korint 5:10; 1 Piter 2:12.
10, 11. (a) Epafras a isetiu menni leenien appriu fan itach ussun ach iotek? (b) Me ren fofforun Epafras, met ka mochen apposa letipom ngeni?
10 Sia fen fos ussun ewe lamoten nounoun iten aramas lupwen sia iotek fan iter me tingor pwe Jiowa epwe alisiir, aururuur, efeiochuur, me ngeniir ngun mi fel. Ina ussun ewe sokkun iotek Epafras a eani fan iten Chon Kolose. Sipwe tongeni—nge pwungun mi fen lamot ach sipwe kuna och emmwen lon an Epafras iotek ussun met sipwe ereni Jiowa lupwen sia iotek ussun pwisin kich. Pwungun pwe, mi lamot ach sipwe tingor an Jiowa alillis ren ach sipwe “uta o unusoch.” Ka fen foffori?
11 Pwata kesap fos ussun pwisin nonnomum lon iotek? Fos ngeni Kot ussun ukuukun om feffeita ngeni “unusoch,” tipen mwan, asimau. Tingormau ngeni pwe epwe alisuk le esinna ekkewe mettoch kopwe angang won fan iten om maar lon pekin ngun. (Kol Fel 17:3; 139:23, 24) Esor tipemwaramwar pwe a fen wor ekkoch lapalap kopwe amurinnoolo. Iwe, kesap letipengau, nge kopwe tingorei Jiowa ren kapas mi ffatoch me titchik ren alillis mi tongeni alisuk le feffeita. Kesap fori fan eu chok. Pwata kesap apposa letipom pwe lon en wiik epwe feito kopwe iotek ussun om kopwe “uta o unusoch.” Me kopwe akkota ifa ussun kopwe alapalo om fori atun om alleani ewe wokisin fan iten 2001. Lon om iotek, kopwe menlapei ekkewe mettoch ra kan ammeef ngonuk om kopwe limaramarsefal, achanu, are paselo me towauolo seni an Kot angang me ifa ussun kesap kkuf rer.—Efisus 6:11, 13, 14, 18.
Iotek Fan Iten Luku Mi Lukuchar
12. Met popun a lamot pwe epwe nom ren Chon Kolose eu “luku mi lukuchar”?
12 Epafras a pwal iotek fan iten och mettoch mi lamot pwe Chon Kolose repwe uoch mwen mesen Kot. A pwal lamot ngenikich ena. Met ena? A iotek pwe repwe uta “ren luku mi nukuchar lon letipen Kot meinisin.” Chon Kolose ra kan rongorong afalafal chofona me sokkopaten poraus mi tongeni aingauaalo ar luku, nge ekkoch ekkewe poraus ra ussun ita nikinikin afalafal mi enlet. Ren chok awewe, ekkoch ra etipetipeer pwe repwe chechchemeni ekkoch ran mi lamot ren echikipin are kametip, ekkewe mettoch mi fen pin lamot me ren allukun ewe lamalamen Jus. Sense chofona ra menlapei ewe lamoten chonlang, ekkewe ngun mi manaman ra fen uwei ewe Alluk ngeni Moses. Anchangei mwo ika epwe met meefiom ren etipetipaen ekkena aramas! A fokkun fitikoko chommongun ar kewe ekiek mi sokkopat.—Kalesia 3:19; Kolose 2:8, 16-18.
13. Ar miritiiti met sokkun poraus epwe alisi Chon Kolose, me ifa ussun epwe pwal alisikich?
13 Paul a polueni ren an menlapei ewe lamoten wiisen Jises Kraist. “Usun chok oua angei Kraist Jises ach Samol, iei usun oupwe manau lon i, waremi epwe nom lon i, o oupwe aukemita lon i; oupwe uta nukuchar lon ewe luku usun chok oua fen kaeo.” Ewer, a lamot (ngeni Chon Kolose me kich) eu luku mi unus ussun wiisen Kraist ren pwonutaan letipen Kot me lon manauach. Paul a awewei: “Pun masouen Kot meinisin a nonnom lon Kraist, usun chok lon inisin. Oua fen kuna unusochun manauen lon i, ewe mi mokuren sokkun mu are nemenem meinisin.”—Kolose 2:6-10.
14. Pwata an Chon Kolose apilukuluk eu enletin mettoch mi manau?
14 Chon Kolose ir Chon Kraist mi kepit. Mei wor ar apilukulukun manau lon lang me a wor popun repwe tumunu lingen ena apilukuluk. (Kolose 1:5) “Letipen Kot” pwe repwe eani luku mi lukuchar ussun pwonutaan ar apilukuluk. Repwe fen tipemwaramwareiti ar apilukuluk? Aapwi! Epwe pwal sokkolo ren chokkewe mi angei seni Kot ewe apilukulukun manau esemuch lon paratis won fonufan? Aapwi! Ei apilukuluk kinikinin “letipen Kot.” Ekieki mwo ekkeei kapas eis: Ika en mi achocho le choni ewe “mwich mi lapalap” ir kewe repwe manau seni ewe “riaffou mi lapalap,” a ifa pochokkulen om apilukuluk? (Pwarata 7:9, 14) Ina kinikinin om “luku mi lukuchar lon letipen Kot meinisin”?
15. Ifa ewe tettellin poraus apilukuluk a kapachelong lon, Paul a awewe won?
15 Ei “apilukuluk” esap chok och minen anean are anchang. Sia weweiti ena seni ewe tettellin poraus Paul a awewei ngeni Chon Rom. Eu me eu poraus a ririfengen me a emmwen ngeni ewe epwe tapweto mwirin. Nengeni mwo ewe ia Paul a apachaalong “apilukuluk” lon an we poraus: “Sia pwal pwapwa ren ach riaffou, o sia meefi pwe riaffou epwe efisata likiitu, o likiitu epwe efisata manauoch, o manauoch epwe efisata apilukuluk allim. Iwe ewe apilukuluk allim esap alichipungukich, pun Kot a fen niinalong an we tong lon letipach ren ewe Ngun mi Fel a pwal ngenikich.”—Rom 5:3-5.
16. Ifa ewe apilukuluk ka fen angei lupwen ka keran kaeo ewe enlet lon Paipel?
16 Neman eu poraus mi enlet, ussun chok lapalapen ekkewe mi malo are porausen ewe manausefal, a achungu letipom lupwen Chon Pwarata Jiowa ra keran fos ngonuk. Fan iten chommong, ewe minefoon poraus mi lamot seni meinisin, ina ewe tufichin manau lon eu paratis won fonufan. Chechchemeni mwo meefiom lupwen ka keran rong ena afalafal. A ifa me watten ena apilukuluk pwe—semmwen me chinnap repwe morolo, kopwe tongeni pwapwaesini manauom me kuna uwaan om kewe angang, me epwe pwal wor kinamwe lefilen aramas me ekkewe man! (An Salomon Afalafal 9:5, 10; Aisea 65:17-25; Jon 5:28, 29; Pwarata 21:3, 4) A mmen amwarar ewe apilukuluk ka fen angei!
17, 18. (a) Ifa ussun ena tettellin poraus Paul a awewe won a emmweni Chon Rom ngeni apilukulukoch? (b) Met sokkun ewe apilukuluk Rom 5:4, 5 a awewe won, me a nom reom?
17 Lo, lo, lo, neman ka kuna an aramas u ngonuk are och riaffou mwaal. (Mattu 10:34-39; 24:9) Pwal mwo nge iei, aramas ra fen sola seni pwiich kewe pisekin imwer kewe meinisin are pwiich kewe ra su seni fonuer fan osopwisek. Ekkoch ra fen kawet, are a fen pout seniir nour kewe puk me chassi meinisin, are a fen mak poraus mi chofona ussur lon ekkewe simpung. Ese lifilifil ewe sokkun riaffou mwaal ka fen kuna, ussun chok a mak lon Rom 5:3, kopwe pwapwa pokiten ewe riaffou a fen efisata uwa mi murinno. Ussun chok Paul a makkeei, ewe riaffou a efisata likiitu. Ewe likiitu a emmwen ngeni uoch mwen mesen Kot. Ka fen silei pwe ka foffori minne mi pwung, letipen Kot we, ina popun ka fen silei pwe Kot a pwapwa reom. Lon an Paul kewe kapas, ka fen meefi pwe ka manaueni eu “manauoch.” Paul a sopweilo pwe “ewe manauoch epwe efisata apilukuluk allim.” Eli ese kon lien ffatoch ena. Met popun Paul a apachaalong “apilukuluk” le muchuloon ewe tettellin poraus? Esap pwe a fen nom reom om apilukuluk me mwan, lupwen ka keran rong ewe kapas allim?
18 A ffat pwe Paul ese foffos ussun ewe apilukulukun manau mi unusoch sia apilukuluku akkom. Met Paul a fos ussun a lap seni ena. A fokkun alollon me a pochokkul le amwokutukich. Lupwen sia likiitu lon tuppwol me sia meefi pwe Kot a pwapwa rech, ena memmeef epwe fokkun apochokkula ewe apilukuluk a nom rech me le poputaan. Ewe apilukuluk a nom rech iei a ffatolo, lukucharelo, me sia meefi ukuukun an weneitikich. Ei apilukuluk mi fen alollonolo a pwal tinoch lap seni me loom. A auralo unusen letipach me ekiekich. “Iwe, ewe apilukuluk allim esap alichipungukich, pun Kot a fen niinalong an we tong lon letipach ren ewe Ngun mi Fel a pwal ngenikich.”
19. Ifa ussun om apilukuluk epwe kapachelong lon om iotek?
19 Epafras a eani iotek pwe minne pwiin kewe repwe feioch ren lon mwach kkan epwe achungu me nonnom lon letiper fansoun meinisin, pokiten ar “luku mi lukuchar lon letipen Kot meinisin.” Ussun we chok, amwo ita kich sipwe pwal foffos ngeni Kot ussun ach apilukuluk. Lon pwisin om iotek, kopwe apachaalong om apilukuluk ussun ewe fonufan sefo. Pwarata ngeni Jiowa ukuukun watteen om mochen nonnom lon ewe fonufan sefo, ren luku mi unus pwe epwe feito. Tingor pwe epwe alisuk le alapaalo alollonun me cholapen om luku. Epafras a eani iotek pwe epwe nom ren Chon Kolose “luku mi lukuchar lon letipen Kot meinisin.” Kopwe fori ussun chok. Kopwe fori fan chommong.
20. Met popun sisap fokkun letipengau ika ekkoch ra riki seni ewe alen Kraist?
20 Kesap osukosuk are letipengau pwe meinisin rese uta o unusoch ren luku mi lukuchar. Neman ekkoch repwe kkuf, rikilo, are fangeta. A ina met a fis lein noun Jises kewe mi achengicheng, ekkewe aposel. Nge lupwen Jutas a rikilo, ekkewe aposel ra ammangaalo ar angang are kaulo? Aapwi! Piter a nounou ewe poraus lon Kol Fel 109:8 ren an epwe affata pwe pwal emon epwe siwili Jutas. A kefilita ewe emon a wiisen siwili Jutas, me noun Kot kewe mi tuppwol ra sopweilo ar angangen afalafal. (Fofor 1:15-26) Ra fen apposa letiper ren ar repwe uta o unusoch ren luku mi lukuchar.
21, 22. Ifa ussun ekkoch repwe kuna om uta o unusoch ren luku mi lukuchar?
21 Kopwe fokkun silei pwe om uta o unusoch ren luku mi lukuchar lon letipen Kot meinisin epwe pwaalo mwen mesen aramas. Ekkoch repwe kuna me aucheani. Nge io kewe?
22 Iwe, pwiiom kewe, chokkewe mi silei me tongeiok repwe kuna. Inaamwo ika lape ngeniir rese fos ngonuk nge, ifa ussun om luku mi achungu letiper epwe ussun chok minne sia alleani lon 1 Tesalonikia 1:2-6: “Fansoun meinisin am aia chok kilisou ngeni Kot ren ami meinisin. Am aise ukutiu le chechemenikemi lon am iotek. Am aia pwal chechemeni ami angang ren luku, o ami angang ren tong, o pwal ami likiitu ren apilukuluk allim mwen mesen Kot Semach. Iwe, . . . ach kapas allim ese fisita remi lon kapas chok, pwe lon manaman pwal lon ewe Ngun mi Fel me apilukuluk allim chapur [luku mi lukuchar, NW] . . . [me] ami oua appirukem me ach Samol.” Ekkewe Chon Kraist mi tuppwol repwe meefi pwal ussun chok lupwen ra kuna pwe en ka “uta o unusoch ren luku mi lukuchar lon letipen Kot meinisin.”—Kolose 1:23.
23. Lon 2001, kopwe apposa letipom le fori met?
23 Pwungun pwe Semom we lon lang epwe kuna me epwe pwapwa reom. Kopwe lukuluk won ena. Pwata? Popun pun en ka uta o unusoch ren luku mi lukuchar “lon letipen Kot meinisin.” Paul a makkeei poraus mi tongeni pesei ekkewe Chon Kolose ren ewe poraus ussun ar “manaueni ewe sokkun manau mi fich ngeni ach Samol, ewe sokkun manau i epwe unusen pwapwa ren.” (Kolose 1:10) Ewer, a tufich fan iten aramas rese unusoch ar repwe unusen apwapwai Kot. Pwiiom kewe lon Kolose ra fen fori. Chon Kraist lon leeniom ra fen foffori iei. Kopwe pwal tongeni fori! Iwe, lon 2001, amwo om iotek me foffor iteiten ran repwe anneta pwe ka fen apposa letipom le “uta o unusoch ren luku mi lukuchar lon letipen Kot meinisin.”
En Mi Tongeni Chechchemeni?
• Ifa weween om ‘uta o unusoch’?
• Met sokkun mettoch ussun pwisin en epwe kapachelong lon om kewe iotek?
• Ussun a makketiu lon Rom 5:4, 5, met sokkun apilukuluk ka mochen eani?
• Ach kaeo a fen efisi om mochen le achocho ngeni met lon 2001?
[Picture on page 26]
Epafras a eani iotek pwe pwiin kewe repwe uta o unusoch ren luku mi lukuchar ussun Kraist me ussun ar apilukuluk
[Pictures on page 28]
Om apilukuluk me luku mi lukuchar a pwal nom ren fite milion aramas