An Kot Mutata Riaffou Epwele Muchulo
MEI WOR riaffou ekis meinisin. Ewe Paipel a alukulukuukich pwe “Kot mi tong.” (1 Jon 4:8) Iwe, met popun emon Kot mi tong a fen mutata sopwosopwoloon ewe riaffou ren fite puku ier?
Lupwen Kot a forata Atam me If a ngeniir ewe tufichin pwisin filata. Ina eu liffang mi murinno, pun “Kot a nengeni meinisin mine a fori o kuna pwe a fokun och.” (Keneses 1:31) Oukich meinisin sia aucheaani ei liffangen ach tufichin pwisin filata.
Iwe nge, ach pwisin filata, eu liffang mi murinno, mi aukuk. Kot a anomu aramas fan allukun fonufan, awewe chok ewe alluk itan gravity. Me a pwal anomu aramas fan ekkewe alluk mi weneiti pwung me mwaal, ekkewe alluk mi kawor pwe manauen aramas epwe kinamwe. Ina popun, an Kot we Kapas a peseikich: “Kopwe luku ewe Samol mi Lapalap ren unusen lelukom, nge kosap lukuluku pusin om sile.”—An Salomon Fos 3:5.
Popuch kewe, Atam me If, ra aeamwaalli ar tufichin pwisin filata. Ra mwaal lon ar ekieki pwe repwe sopwoch ika repwe imulo seni Kot. Ra pwisin filata pwe repwe towu seni kianin an Kot kewe alluk.—Keneses, sopwun 3.
Ewe Popun Alongolongun Kapwung—Nemenem
Lupwen Atam me If ra u ngeni Kot, ra wesewesen u ngeni an nemenem, weween, an pwuung le nemenem. Jiowa a tongeni nniirelo me fori pwal ruuemon, nge an fori ena esap polueni ewe kapas eis ussun menni nemenem mi pwung me murinno fan iten aramas. Ika a tori aramas nafochun fansoun le pwisin nemenemeniir, epwe pwalo ika nemenem mi imu seni Kot epwe tongeni sopwoch.
Ekkewe fite ngerou ierin uruwoon aramas a pwarata met? Lon ekkena fite puku ier, fofforingau me riaffou a kan sopwosopwolo.
An Jiowa mutata fofforingau me riaffou epwele muchulo. Kot epwe angolong lon fofforun aramas. Epwe atailo ei fonufan mi ppwor me wato eu minefoon kokkot “ikewe pung epwe nonnom ie.”—2 Piter 3:13.
A ifa me murinnoon ei poraus! Sia fokkun osupwangen ena fonufan mi fo. Me sisap witiwit fansoun langattam mwen sipwe kuna. Seni pwonuetaan ekkewe oesini lon ewe Paipel, sia silei pwe an Kot mutata riaffou epwele muchulo.