Muun Kot—Ewe Minefoon Nemenemen Fonufan
“Ei mwu epwe ataela o arosala ekewe lusun mwu, nge epwe pusin nom tori feilfeilachok.”—TANIEL 2:44.
1. Met sia tongeni luku ussun ewe Paipel?
EWE PAIPEL an Kot minen pwarata ngeni aramas. Ewe aposel Paul a makkei: “Lupwen ami oua angei ewe kapasen Kot, ewe oua rong senikem, ouse angei usun kapasen aramas chok, pwe usun kapasen Kot mi enlet, ewe mi pwal angang leimi chon luku.” (1 Tesalonika 2:13) Poraus ussun Kot mi lamot ngenikich a makketiu lon ewe Paipel: porausen lapalapan kewe, an kewe kokkot, me met Kot a kutta senikich. Ewe fon mi murinno seni meinisin ussun manauen famili me fofforun aramas a pwal nom lon ewe Paipel. Mei wor ekkewe oesini mi fen pwonueta, mi pwoppwonueta iei, me ekkewe repwe pwonueta lon mwach kkan. Ewer, “ekkewe puk meinisin ra pop seni Ngunun Kot, ra pwal lamot ngeni afalafal, ngeni fonou, ngeni amurinnolo, o pwal ngeni angangochun ewe manau mi pung, pwe noun Kot aramas repwe unusoch o pwal lipwakoch ngeni sokkun fofor-murinno meinisin.”—2 Timoti 3:16, 17.
2. Ifa ussun Jises a menlapei itelapen ewe Paipel?
2 Ewe mettoch a lamot seni meinisin lon ewe Paipel ina itelapan: aitochuun an Kot nemenem mi lapalap (pwuungun an nemenem) ren Muun we lon lang. Jises a menlapei ena poraus lon an angangen afalafal. “Oupwe aier, pun muun lang a arapoto.” (Mattu 4:17) Jises a aiti ngenikich met sipwe kutta loom lon manauach lupwen a pesekich: “Oupwe kuttafichi lom an mu o an pung.” (Mattu 6:33) A pwal menlapei ukuukun lamoten ewe Muu ren an ereni noun kewe pwe repwe iotek: “Muom epwe feito, letipom epwe pwonueta, won fonufan usun chok lon lang.”—Mattu 6:10.
Ewe Minefoon Nemenem Won Fonufan
3. Met popun Muun Kot a fokkun lamot ngenikich iei?
3 Met popun Muun Kot a kon watte lamotan ngeni aramas? Pokiten ena muu epwe angang ngeni an epwe siwili nemenemen fonufan ekisilo chok. Iei ewe oesini lon Taniel 2:44: “Iwe, lon fansoun mwun ekewe king, ewe Koten lang epwe aueta eu mwu esap tongeni tala, esap pwal wor eu mwu epwe tongeni akufu. Iwe, ei mwu epwe ataela o arosala ekewe lusun mwu, nge epwe pusin nom tori feilfeilachok.” Lupwen an Kot we Muu lon lang a unusen nemenem, aramas resap tongeni nemenisefalli fonufan. Ewe nemenem mi tufichingau me a kan kinifeseni aramas epwe fen morolo.
4, 5. (a) Pwata a fich ngeni Jises ewe wiis Kingen Muun Kot? (b) Kanoto chok, ifa wiisen Jises?
4 Ewe Sou Nemenem mi Lap fan emmwenien Jiowa lon ewe Muun lang, ina ewe a tufichoch seni meinisin—Kraist Jises. Mwen an feitiu fonufan, a fen piin nonnom lang ussun chok noun Kot “sousile angang,” ewe mi for akkom lein forien Kot kewe meinisin. (An Salomon Fos 8:22-31) “Atewe a weichiki Kot, ewe sise tongeni kuna, usun chok pwe i mwanichien forien Kot kewe meinisin, pun a fori mettoch meinisin ren i, mettochun lang, pwal mettochun fonufan.” (Kolose 1:15, 16) Lupwen Kot a tiinatiu Jises ngeni fonufan, atewe a fori letipen Kot fansoun meinisin. A likiitu fan ewe sossot mi weires seni meinisin me a tuppwol ngeni Seman tori malo.—Jon 4:34; 15:10.
5 Kot a efeiochu Jises ren an tuppwol tori malo. A amanauasefallieta Jises ngeni manau lon lang me a ngeni ewe pwuungun nemenem lon ewe Muun lang. (Fofor 2:32-36) Pokiten Jises Kraist Kingen ewe Muu, epwe pwal eani ewe wiis mi amwarar seni Kot le emmweni chommong chonlang mi manaman ren an epwe awesalo an aramas nemenem me limetawu fofforingau meinisin seni fonufan. (An Salomon Fos 2:21, 22; 2 Tesalonika 1:6-9; Pwarata 19:11-21; 20:1-3) Lon ena fansoun an Kot we Muun lang fan Kraist epwe fen wiliiti ewe minefoon minen nemenem, ewe eu chok muu won unusen fonufan.—Pwarata 11:15.
6. Met sokkun nemenem sia ekiekin kuna seni Kingen ewe Muu?
6 Iei met an Kot we Kapas a apasa ussun ewe minefoon sou nemenemen fonufan: “Iwe, a angei an nemenem me lingan me mwun, pwe aramasen fanu me mwu, pwal aramas mi eani sokopaten fos repwe angang ngeni.” (Taniel 7:14) Pokiten an Jises akkappiru an Kot tong, ewe kinamwe me pwapwa fan an nemenem epwe fokkun lapalap. (Mattu 5:5; Jon 3:16; 1 Jon 4:7-10) “Lapeloon an we muu me kinamwe esap mucholo, . . . epwe pochokkelo ren apwung me pwunguoch.” (Aisea 9:7, Revised Standard Version) A ifa me watteen ach feioch lupwen mei wor emon mi nemenikich ren tong, apwung, me pwunguoch! Ina popun, 2 Piter 3:13 a oesini: “Nge usun an we pwon, sia witiwiti lang sefo [an Kot muun lang] o pwal fonufan sefo [eu minefoon kokkot won fonufan], ikewe pung epwe nonnom ie.”
7. Ifa ussun Mattu 24:14 a pwoppwonuta ikenai?
7 Pwungun pwe Muun Kot ewe poraus mi murinno seni meinisin fan iten chokkewe mi tongei minne mi pwung. Ina popun, eu kinikin lon ewe esissin mi pwaralo ach nonnom lon ekkewe “ranin le sopolon” an ei otot mi ngau, Jises a oesini: “Ei kapas allim usun ewe mu epwe esineifeili won unusen fonufan, pwe epwe pwar ngeni einang meinisin. Iwe, a ina sopolon.” (2 Timoti 3:1-5; Mattu 24:14) Ei oesini a pwoppwonuta iei, ren wonu milion som Chon Pwarata Jiowa lon 234 fonu mi eani lap seni eu bilion awa le afalafala aramas ussun Muun Kot. A fich iten ekkewe leeni ra mwichfengen lon. Iter Kingdom Hall me a wor 90,000 som mwichefel mi mwichfengen lor. Aramas repwe feilo ikewe ie le kaeo ussun ei minefoon muu.
Pwal Ekkoch Sou Nemenem
8, 9. (a) Chokkewe mi nemenem ren Jises ra feito me ia? (b) Met sia luku ussun nemenemen ewe King me chiechian kewe?
8 Epwe wor chienen Jises mi nemenem lon an Kot Muun lang. Pwarata 14:1-4 a oesini pwe 144,000 repwe “kamoto seni fonufan” me repwe manausefal ngeni manau lon lang. Ei mwichen aramas a kapachelong mwan me fefin. Rese chok ekieki ussun met Kot epwe fori fan iter nge, ra angang ngeni Kot me chiener chon fonufan fan tipetekison. “Repwe wiliti noun Kot samol-fel o pwal noun Kraist; o repwe eti i le nemeni ukukun engerou ier.” (Pwarata 20:6) Chochoor a kisikis seni ewe “mwich mi fakkun lapalap, esor emon mi tongeni alleani iteiter, seni ekkewe muu meinisin, o ekkewe einang meinisin, o sokkun aramas meinisin, o sokkun kapas meinisin,” chokkewe repwe manau seni sopwoloon ei otot mi ngau. Ra pwal “angang ngeni i le ran me lepwin,” nge rese ekiekin feita lang. (Pwarata 7:9, 15) Pokiten ar nonom fan nemenien an Kot Muun lang, ir longolongun ewe fonufan sefo.—Kol Fel 37:29; Jon 10:16.
9 Lupwen Jiowa a filata ekkewe chon tuppwol repwe fiti Jises le nemenem, a filata chokkewe mi fen kuna ekkewe sokkopaten osukosuk meinisin lon manauer. Esap wor och mettoch mi fen aosukosuka aramas ekkeei king-samol fel rese fen pwisin kuna lon manauer. Ina popun, manauer won fonufan akkom epwe alisata ar tufichin nemeniochu aramas. Jises a pwal “kaeo alleasochis ren an kewe riaffou.” (Ipru 5:8) Ewe aposel Paul a apasa ussun Jises: “Pun esor rech emon samol fel lapalap mi ese tongeni meefi ach kewe apwangapwang, pwe emon mi fen kuna sosot ren mettoch meinisin usun chok kich, nge esor an tipis.” (Ipru 4:15) A ifa me watteen aururuun letipach ren ach silei pwe lon an Kot we fonufan sefo mi pwung, ekkewe king me samol fel repwe tongei me weweiti chokkewe ra nemeni!
Kot A Fen Akkota Eu Muu Seni Le Poputaan?
10. Met popun ewe Muun lang ese kapachelong lon an Kot we kokkot me le poputaan?
10 Ewe Muun lang a fen kapachelong lon an Kot we kokkot lupwen a keran forata Atam me If? Lon ewe puken Keneses, esor porausen eu Muu epwe nemeni aramas. Jiowa a pwisin nemeniir, me ika ra alleasochis, esap wor lamoten pwal och nemenem. Ewe puken Keneses sopwun 1 a pwaralo ifa ussun Jiowa, neman ren noun we mwanichi, a fos ngeni Atam me If. Sia kuna ekkewe kapas ussun chok “Kot a . . . ureniir” me “Kot a pwal apasa.”—Keneses 1:28, 29; Jon 1:1.
11. Ifa ussun manauen aramas me le poputaan?
11 Ewe Paipel a apasa: “Iwe, Kot a nengeni meinisin mine a fori o kuna pwe a fokun och.” (Keneses 1:31) Mettoch meinisin lon ewe malamalen Ichen a unusoch. Atam me If ra nonnom lon eu paratis. Tupuwer me inisir mi unusoch. Repwe tongeni fos ngeni ewe Chon Forata me a tongeni fos ngeniir. Ika repwe amwochu ar tuppwol, repwe nounatiu semirit mi unusoch. Esap wor lamoten eu minefoon Muun lang.
12, 13. Lupwen aramas mi unusoch ra fen chommongolo, ifa ussun epwe chuen wor porausfengen lefiler me Kot?
12 Lupwen aramas ra chommongolo, ifa ussun Kot epwe tongeni fos ngeniir meinisin? Ekieki mwo ekkewe fuu lon lang. Ekkewe fuu ra mwichfengen lon mwichen fuu iter galaxy. Mei wor eu bilion fuu lon ekkoch galaxy. Mei wor lon pwal ekkoch galaxy eu trilion fuu. Chon science ra esissin pwe mei wor 100 bilion galaxy lon ewe lang aramas mi tongeni kuna! Iwe nge, ewe Chon Forata a apasa: “Oupwe neta lang. Io a forata masouan meinisin? Iwe, Kot a emwenawu mwicheicher meinisin, a pwal aita ngeniir iter. Meinisin ra nom pokiten watten an tufich, pwal ren pochokulen an manaman.”—Aisea 40:26.
13 Ika Kot a tongeni chechchemeni ekkewe fuu meinisin, esap wor an osukosuk le chechchemeni aramas pun chochoon chon fonufan meinisin a kon kisikis seni chochoon ekkewe fuu. Pwal mwo nge iei, fite milion noun kewe chon angang ra iotek ngeni iteiten ran. Ekkena iotek ra tori Kot lon eu chok seken. Iwe, esap fen wor och osukosuk ren an epwe poraus me ekkewe aramas mi unusoch meinisin. Esap fen wor lamoten eu Muun lang ren an epwe chechchemeniir meinisin. A ifa me amwararen ena kokkot—Jiowa ewe Sou Nemenem, ewe tufichin poraus me Kot, me ewe apilukulukun manau tori feilfeilo chok lon ewe paratis won fonufan!
“Esap Filien Emon”
14. Met popun aramas repwe osupwangen an Kot nemenem tori feilfeilo chok?
14 Iwe nge, aramas—pwal mwo nge ir mi unusoch—repwe osupwangen an Jiowa nemenem tori feilfeilo chok. Met popun? Pokiten Jiowa ese foriireta ren ewe tufich le sopwoch lon manauer ika ra imulo seni an Kot nemenem. Iei ewe alluk fan iten aramas meinisin ewe soufos Jeremaia a fos ussun: “Ua fokkun silei, O Jiowa, pwe filien ewe aal esap filien chon fonufan. Esap filien emon mi feffetal an epwe pwisin emmweni impwan. Apwunguei, O Jiowa.” (Jeremaia 10:23, 24, New World Translation) Epwe umwes ika aramas repwe eani ekiek pwe repwe tongeni nemeniochu chon fonufan meinisin nge Jiowa esap nemeniir. Ena esin ekiek epwe u ngeni ifa ussun Kot a foriireta. An aramas eimurolo seni an Kot nemenem epwe efisi ar maicha, oput, kirikiringau, mwanesol, maun, me malo. ‘Aramas repwe nemeni aramas o ariafouur.’—An Salomon Afalafal 8:9.
15. Filingauen semach me inach akkom a uwani met?
15 Solap pwe semach me inach akkom ra filata pwe ese chuen lamot ngeniir pwe Kot epwe ar Sou Nemenem, me ra filata le imurelo seni Kot. Ina popun Kot ese chuen alisata ar unusoch. Ir ussun eu mwesin mi mwokut ren fifi nge emon a fen uttau ewe sal. Iwe, repwe mammangolo ekis me ekis me kaulo—weween pwe repwe malo. Ir ussun eu kauk mi ngau, me ina ewe lapalap repwe ngeni nour kewe. (Rom 5:12) “I [Jiowa] ewe achau, an fofor ra unusen murina, pun an kewe al meinisin ra pwung. . . . Oua fori fofor mi ngau ngeni Kot. Ousap chuen iteni noun, pun a wor terimi.” (Tuteronomi 32:4, 5) Pwungun, ewe ngun mi u ngeni Kot, ewe a wiliiti Setan, a etipetipa Atam me If, nge ekiekir mi unusoch me ir mi tongeni tunalo an Setan ekiek mi mwaal.—Keneses 3:1-19; Jemes 4:7.
16. Ifa ussun uruwoon fonufan a pwaralo mwiriloon an aramas imulo seni Kot?
16 Porausen uruwo a pwaralo mwiriloon an aramas imulo seni Kot. Ren fite ngerou ier, aramas ra fen sotuni sokkopaten muun aramas, kkotun moni, me minen alisi aramas meinisin. Iwe nge, aramas ra chok “alapalo ar fofor-ingau.” (2 Timoti 3:13) Ena poraus a fen letelo ren ewe 20en senturi. A fen ur ren oput me ewe mwanesol, maun, echik, woungau, me riaffou mi lapalap seni meinisin. Ese lifilifil feffeitaan an toktor sile nge, aramas meinisin repwe malo. (An Salomon Afalafal 9:5, 10) Ren ar sotun le pwisin emmweni ipwer, aramas ra fen kkuf ren Setan me noun kewe timon. A kon chommong ekkewe aramas fan an Setan nemenem pwe Setan a iteni ewe “koten ei fonufan.”—2 Korint 4:4.
Ewe Liffangen Ach Pwisin Filata
17. Ita ifa ussun aramas repwe aea ar tufich le pwisin filata?
17 Met popun Jiowa epwe mut ngeni aramas ewe pwuungun pwisin filata ar we aal? Lupwen a foriireta, a liffang ngeniir ewe tufich pwe repwe pwisin filata met repwe fori. Ewe aposel Paul a apasa: “Ikewe Ngunun ewe Samol a nonnom ie, iei ewe leenien ngaselo.” (2 Korint 3:17) Esor emon a mochen nikinikin mwesin, me iteiten seken pwal emon epwe filata met epwe fori me apasa. Nge Jiowa a awiisa ngeni aramas wiiser le aeaochu ena liffangen pwisin filata, ar repwe miritiiti pwe ar foffori letipen Kot ina ewe alen tipatchem, me repwe nonnom fan an nemenem. (Kalesia 5:13) Ina popun an aramas ngaselo esap unus nge, epwe fen fis fan alluk, pun ika esor alluk, epwe wor fitikoko me osukosuk watte. Epwe fisoch fan nemenemen an Kot kewe alluk mi tong.
18. Met Kot a pwaralo ngenikich ren an mut ngeni aramas ar pwuungun pwisin filata?
18 Ren mumutaan an aramas pwisin filata ewe aal, Kot a wesewesen aiti ngeni meinisin pwe sia osupwangen an nemenem. An Kot nemenem, an nemenem mi tekia seni meinisin, ina ewe eu chok nemenem mi murinno. A wato ewe pwapwa, menemenoch, me wouoch mi lapalap seni meinisin. A ina ussun pokiten Kot a fen alapalapa ekiekich me inisich pwe repwe angangoch lupwen ra mwokutukut me ren an Kot kewe alluk. “Ngang, ewe Samol mi Lapalap om we Kot. Ua aiti ngonuk mine kopwe feioch ren, ua pwal emweni ngonuk ewe al kopwe fetal won.” (Aisea 48:17) An aramas pwisin filata me ren ekkewe kia an Kot kewe alluk ra awora esap eu mettoch mi chou, nge epwe efisi ekkewe sokkopaten mongo, imw, chunga, me kol. An aramas tufich le pwisin filata, ika aramas ra aeaochu, epwe fen atoto manau mi amwarar won eu fonufan mi ling.
19. Ifa ewe minen alillis Kot a aea ren an epwe achasefalli aramas ngeni i?
19 Pokiten ar filingau, aramas ra pwisin imuurelo seni Kot me ra wiliiti aramas rese unusoch. Ra apwangapwangelo me ra fetal ngeni malo. A lamot pwe emon epwe angei seniir ena riaffou ren an moonisefalliir me repwe chasefal ngeni Kot ussun chok pwe ir noun kewe at me nengngin. Ewe minen alillis Kot a filata ren an epwe fori, ina ewe Muu, me ewe Chon Moonisefalli aramas ina Jises Kraist. (Jon 3:16) Ren ei kokkot, aramas mi fen aier—ussun chok ewe anuwol mi mwalechelo lon an Jises awewe—repwe chasefel ngeni Kot me wiliisefalliti noun kewe.—Luk 15:11-24; Rom 8:21; 2 Korint 6:18.
20. Ifa ussun letipen Kot epwe pwonueta ren ewe Muu?
20 Pwungun pwe letipen Jiowa epwe pwonueta won fonufan. (Aisea 14:24, 27; 55:11) Ren Muun we fan an Jises nemenem, Kot epwe unusen aitochuelo (apwunguochu are anneta) pwuungun an epwe ach we Sou Nemenem Mi Lapalap. Ewe Muu epwe awesalo nemenemen aramas me timon won fonufan, me epwe nemenem seni lang ren engerou ier. (Rom 16:20; Pwarata 20:1-6) Nge, atun ena fansoun, ifa ussun ochchun an Jiowa nemenem epwe pwalo? Me, mwirin ewe engerou ier, epwe ifa wiisen ena Muu? Ewe lesen mwirin ei epwe poraus won ekkeei kapas eis.
Poraus Sipwe Enniwili
• Ifa itelapen ewe Paipel?
• Io kewe repwe nemenem lon ewe minefoon muu epwe nemeni ewe fonufan?
• Met popun aramas mi imulo seni Kot rese tongeni sopwoch lon ar nemenem?
• Ifa ussun aramas repwe aea ar tufich le pwisin filata?
[Picture on page 18]
An Jises afalafal a menlapei an Kot nemenem ren ewe Muu
[Picture on page 20]
Lon ekkewe fonu meinisin Chon Pwarata Jiowa ra itelapei ewe Muu lon ar angangen asukul
[Pictures on page 22]
Uruwo a pwarata ngauen an aramas imulo seni Kot
[Credit Lines]
WWI sounfiu: U.S. National Archives photo; concentration camp: Oświęcim Museum; semirit: UN PHOTO 186156/J. Isaac