Ewe Kki Ngeni Eu Fonufan Mi Pwapwa
“EWE mwan mi kon manaman seni meinisin, esap chok lon ekkewe ruu ngerou ier a lo nge lon uruwoon fonufan meinisin, ina i Jises seni Nasaret,” alon eu poraus lon ewe chassi Time. Lupwen Jises a nonnom won fonufan, fite ngerou aramas rese chok esinna pwe Jises emon mi lapalap nge ra pwal esinna an tongei aramas. Ina popun esap eu minen amairu pwe ra mochen pwe epwe king. (Jon 6:10, 14, 15) Iwe nge, ussun chok a fen mak lon ewe poraus mwen ei, Jises ese mochen angolong lon mwokutukutun ekkewe muu.
MEI WOR ulungat mettoch met Jises a polueni mi alongolong won: an Seman we ekiek ussun an aramas pwisin filata ar we aal, kapachelong an aramas pwisin nemenemenir; an Jises silei ussun ekkewe manaman mi monomon ra eppeti sopwochuun an aramas achocho le nemeniochu fonufan; me letipen Kot le efisata eu muu lon lang fan iten an epwe nemeni unusen fonufan. Lupwen sia atittinafichi ekkeei ulungat poraus, sipwe kuna ewe popun an aramas achocho le amurinnoolo fonufan a sopwongau. Sipwe pwal kuna ifa ussun ewe fonufan epwe tongeni murinnoolo.
Aramas Mi Tongeni Pwisin Nemenemenir?
Lupwen Kot a forata aramas, a awiisa ngenniir wiiser le nemeni ekkewe man. (Keneses 1:26) Nge aramas ra nom fan nemenien Kot. Ewe aemonun mwan me fefin repwe pwari ar pwisin anomuur fan an Kot nemenem ren ar likitalo uwaan efoch chok ira, “ewe iraan silei och me ngau.” (Keneses 2:17) A solap pwe Atam me if ra aeamwaalli ar tufichin pwisin filata ren ar alleasolapa Kot. Ar kini foun ewe ira mi pinepin ese chok wewe ngeni ewe tipisin sola. A pwal wewe ngeni ar u ngeni an Kot pwuung le nemenem.
Pokiten ekkewe popun alongolongun kapwung mi lamot a ppiita, Kot a mut ngeni Atam me If me nour kewe ewe pwungun filata ifa ussun repwe manaueni manauer, me ra pwisin efisata ar kewe alluk mi affata minne mi pwung me mwaal. (Kol Fel 147:19, 20; Rom 2:14) Iwe, ina poputaan an aramas sotuni le pwisin nemenemenir. Ra fen sopwoch? Pokiten ach tufichin kaeo uruwoon aramas lon ekkewe fite ngerou ier ra lo, sipwe tongeni apasa pwe aapw! A mak lon An Salomon Afalafal 8:9: “Aramas a nemeni aramas o ariaffouur.” Uruwoon fonufan a fen anneta pwe aramas rese tufichin nemeniochu fonufan lukun an ewe Chon Forata alillis.
Iwe, iei sipwe fos ussun ewe oruuen popun Jises a imuulo seni mwokutukutun ekkewe muun fonufan.
Ewe Sou Nemenemen Fonufan Mi Mononon
Me ren ewe Paipel, Setan a mochen ngeni Jises ekkewe “muun fonufan meinisin me linger” ika Jises epwe fel ngeni i fan eu chok. (Mattu 4:8-10) Jises mi tongeni angei nemenemen unusen fonufan—nge an nemenem epwe fis fan an ewe Tefil kokkot. Jises ese tupulo ren ei sossot. Nge ina wesewesen eu sossot? Setan a tongeni wesewesen ngeni Jises ena nemenem? Ewer, pun Jises pwisin a eiten ngeni ewe Tefil “sou nemenemen fonufan,” me ewe aposel Paul a apasa pwe Setan ewe “koten ei fonufan.”—Jon 14:30; 2 Korint 4:4; Efisus 6:12.
Pwungun pwe Jises a fen piin silei pwe Setan ese kutta ifa ussun aramas repwe feioch. A ffat pwe eu fonufan “a nonnom fan nemenien” emon ngun mi ngau ese tongeni wesewesen pwapwa.—1 Jon 5:19.
Eu Muu Mi Wato Pwapwa
Ewe aulungatin popun Jises ese angolong lon mwokutukutun ekkewe muu, pokiten an silei pwe lon mwach kkan, lon eu fansoun mi filita, Kot epwe forata eu muu lon lang fan iten nemenemen fonufan. Lon ewe Paipel iten ei nemenem, Muun Kot, me ena muu a wewe ngeni meselapen an Jises angangen afalafal. (Luk 4:43; Pwarata 11:15) Jises a aiti ngeni noun kewe chon kaeo ifa ussun repwe iotek pwe ena Muu epwe feito, pokiten fan nemeneman chok ‘letipen Kot epwe fis won fonufan ussun chok lon lang.’ (Mattu 6:9, 10) Neman kopwe ekieki, ‘Ika ei Muu epwe nemeni unusen fonufan, met epwe fis ngeni ekkewe muun aramas?’
Poluen ena kapas eis a nom lon Taniel 2:44: “Iwe, lon fansoun mwun ekewe king, ewe Koten lang epwe aueta eu mwu esap tongeni tala, esap pwal wor eu mwu epwe tongeni akufu. Iwe, ei mwu epwe ataela o arosala ekewe lusun mwu [forien aramas], nge epwe pusin nom tori feilfeilachok.” Met popun Muun Kot epwe “arosala” ekkewe muun aramas? Pokiten ar mochen alikiitu ewe ekiek mwaal pwe repwe tongeni pwisin nemenemenir, ewe ekiek Setan a poputaani lon ewe malamalen Ichen. Chokkewe mi mochen alisata ena ekiek rese chok efisi och feiengau ngeni aramas, nge ra pwal wiliiti chon u ngeni ewe Chon Forata. (Kol Fel 2:6-12; Pwarata 16:14, 16) Iwe, sipwe pwisin eisinikich, ‘sia peni are sia u ngeni an Kot nemenem?’
Ekkewe Feioch Fan Iten Chokkewe Mi Nom Fan Nemenien Ewe Muu
Jises a kutta loom letipen Kot lon an kewe foffor meinisin. Ina popun ese sotun le apochokkula are amurinnoolo ewe otot lon ranin we ren an angolong lon mwokutukutun muu, nge a fen angang weires le alisata an Kot we Muu, ina chok ewe minen pwakini ekkewe osukosuken fonufan meinisin.
Ekkewe fite milion aramas ikenai mi appiru Jises ren ar kutta loom Muun Kot me ren ar anomuur fan letipen Kot, repwe pwal pwapwaiti eu liffang mi amwarar—wiiser mi auchea le nom won fonufan fan nemenien ena Muu. (Mattu 6:33) Fan an nemenem mi tong, repwe tongeni unusochulo, ren ewe tufichin manau tori feilfeilochok.—Pwarata 21:3, 4.
Ewer, Muun Kot ewe kkii ngeni eu fonufan mi wesewesen pwapwa, me ewe poraus mi esileefeili a wesewesen wewe ngeni kapas allim. Ika kesaamwo fori, lupwen emon Chon Pwarata Jiowa a chuuruk lon imwom, pwata kesap etiwa ewe kapas allim ra uwei?