Ekkewe Chón Kraist lón ei Fansoun Repwe Angolong lón Politics?

EKKEWE Chón Kraist mi enlet rese angolong lón politics. Met popun? Pun ra áppirú án Jesus leenien áppirú. Iei alón usun pwisin i: “Ngang üsap pwal peekini fönüfan.” Iei met a erá usun néún kewe chón áppirú: “Ämi öüsap peekini fönüfan.” (Johannes 15:19; 17:14, Paipel: Än Kot Kapas Testament Söfö) Sipwe nengeni ekkóch popun pwata itá ekkewe Chón Kraist resap angolong lón politics.

1. Án aramas tufich mi chék aúkúk. Ewe Paipel a erá pwe esor án aramas tufich me ar pwúúng le nemeni pwisin iir. Ewe soufós Jeremaia a makkeei: “Aramas resap püsin nemeni manauer, resap pwal tongeni akota mine repwe föri.”​—Jeremaia 10:23.

Usun chék án Kot ese féri aramas an epwe wor péúkássir pwe repwe chang usun machchang, Kot ese pwal féri aramas ar repwe tongeni pwisin nemeniéchúúr. Iei makkeien emén sou uruwo itan David Fromkin lón ewe puk itelapan The Question of Government usun tufichingawen mwúún aramas: “Ekkewe sou nemenemen mwú, iir aramas, ina popun ra kan mwámmwáálliló me a kan sópwongaw ar kókkót. Ra áeá ar péchékkúlen nemenem, nge mi chék aúkúk.” Ina popun, ewe Paipel a éúréúrakich ach sisap lúkúlúk wóón aramas!​—Kölfel 146:3.

2. Ra nom fán etipetipaen ekkewe chónláng mi ngaw. Lupwen Satan a sótuni Jesus ren an epwe fang ngeni mwúún fénúfan meinisin, Jesus ese affata pwe esor án Satan pwúúng le liffang ngeni ekkena mwú pun esap an. Nge lón pwal eú fansoun, Jesus a eita ngeni Satan “samolun ei fanüfan.” Mwirin fitu ier, aposel Paulus a áweweei pwe Satan i “ewe koten ei fanüfan.” (Johannes 14:30; 2 Korint 4:4) Paulus a mak ngeni chienan kewe Chón Kraist pwe a wor ar fiu “ngeni ekkewe chon nemeni rochopwak won ei fonufan, pwal ngeni ekkewe chommong sokkun [chónláng mi ngaw].” (Efisos 6:12, TF) Ekkewe chónláng mi ngaw lón ei fansoun iir wesewesen ekkewe chón nemeni ei fénúfan. Iwe, itá epwele ifa ach ekiek ren ach sia silei ena mettóch?

Ekieki usun ei kapas áwewe: Usun eú éút mi péchékkúl a luki efóch mwoota, ina usun ekkewe chónláng mi ngaw mi fókkun watte ar manaman, ra kan nemeni ekkewe mwúún aramas. Pwal usun chék ekkewe sáló, iir rese fókkun tongeni erikaló ewe éút mi péchékkúl, ekkewe sou nemenemen fénúfan rese pwal fókkun tongeni eppeti etipetipaen ekkewe chónláng mi ngaw. Ekkewe chónláng mi ngaw ra fókkun akkachocho le eingawaló aramas me efisi “riaffou ngeni fonufan.” (Pwärätä 12:12) Ina minne, a chék wor emén mi fókkun péchékkúl seni Satan me néún kewe chónláng mi ngaw a tongeni efisi eú siwil watte wóón ei fénúfan. Ina i Jiowa Kot.a​—Kölfel 83:18; Jeremaia 10:7, 10.

3. Ekkewe Chón Kraist mi enlet ra chék tuppwél ngeni án Kot we mwú. Jesus me néún kewe chón káé ra silei pwe lón ewe fansoun mi fen fil me ren Kot, i epwe isetiw eú mwú lón láng pwe epwe nemeni unusen fénúfan. Me ren ewe Paipel, ina án Kot we mwú me Jesus Kraist i ewe King Kot a fen seikaatá. (Pwärätä 11:15) Pokiten ena mwú a kkúú manawen aramas meinisin, Jesus a menlapei “ewe kapas allim usun muun Kot” pwe ina itelapen an kewe afalafal. (Lukas 4:43, TF) A pwal áiti ngeni néún kewe chón káé ar repwe iótek: “Mwum epwe war.” Met popun? Pun fán nemenemen án Kot we mwú, epwe wesewesen pwénúetá letipen Kot wóón fénúfan usun chék lón láng.​—Mateus 6:9, 10.

Iwe, met epwele fis ngeni ekkewe mwúún aramas? Ewe Paipel a apasa pwe ekkewe mwú wóón “unusen fanüfan” repwe taló. (Pwärätä 16:14; 19:19-21) Ika emén a wesewesen lúkú pwe án Kot we mwú epwele amóeló mwúún aramas meinisin, iwe, itá esap álisatá mwékútúkútúr. Pun ika a álisatá ekkena mwúún aramas a fen pwúngúló me ren Kot pwe repwe taló, iwe, a wesewesen ú ngeni Kot.

[Ekis Pwóróus lón pekin taropwe 6]

Chón Pwáraatá Jiowa ra achocho le álisatá án Kot we mwú, nge rese angolong lón mwékútúkútún mwúún fénúfan