Emmwen Mi Murinno Ia Sipwe Kuna Me Ie?

“EWE PAIPEL a apasa: “Pun ren imw meinisin mi wor chon auta, nge ewe mi auta mettoch meinisin, iei i Kot.” (Ipru 3:4; Pwarata 4:​11) Pokiten ewe Kot mi enlet, Jiowa, a forikich, a “sinei usun meeta sia fisita seni.” (Kol Fel 103:14) A unusen silei ussun ach kewe apwangapwang me osupwang. Me pokiten i emon Kot mi tong, a mochen awora minne sia osupwang ren. (Kol Fel 145:16; 1 Jon 4:8) Epwe pwal alisikich ren ach osupwangen emmwen mi murinno.

Jiowa a nounou ewe soufos Aisea le esilefetalei: “Nengeni, ua awisa pwe epwe souemwen me samolun mwu kana.” (Aisea 55:4) Epwe pwak ewe osupwangen sou emmwen mi murinno lupwen sipwe esinna io ewe sou emmwen ewe Kot Mi Lapalap a seikata me, ren ach etiwa an emmwen. Iwe, io ena sou emmwen me samol mi pwonetiu? Met popun a fich ngeni wiisan na sou emmwen? Ia epwe emmwenikichelo ie? Met sipwe fori ren ach sipwe kuna feioch seni an emmwen?

A Waroto Ewe Sou Emmwen Mi Pwonetiu

Orun 2,500 ier me loom, ewe chonlang Kapriel a pwa ngeni ewe soufos Taniel me a apasa: “Kopwe sinei o weweiti: Seni ewe fansoun ewe annuk a touu pwe Jerusalem epwe ne kousefanita fiti anan kewe me tittin kewe mi pochokun, iwe epwe nom non ukukun wone-me-ruu ier fan fisu, nge ei atun epwe ew fansoun fitikoko.”​—Taniel 9:​25.

A ffat pwe ewe chonlang a fen esile ngeni Taniel ewe fansoun ena sou emmwen Jiowa a seikata epwe waroto. “Ewe sou-emwen” epwe pwalo le muchuloon 69 wiik, are 483 ier mwirin 455 B.C.E., lupwen a katowu ewe alluk pwe Jerusalem epwe kausefal.a (Nehemia 2:​1-8) Iwe, met a fisita le muchuloon ena fansoun? Ewe soumak Kapas Allim itan Luk a apasa: “Lon ewe engol-me-limuen ierin muun Taipirios Sisar, lupwen Pontios Pailat mi Kepinan Jutia, o Erot mi Titraken Kalili [29 C.E.], . . . ewe kapasen Kot a feilo ren Jon, noun Sekaraia, lon ewe fonu-pon. Iwe, atewe a feilfetal won ekkewe fonu meinisin orun Jortan, o a afalafala ewe papataisin aier ren omusamusen tipis.” Ina ewe atun “a wor apilukuluk ren ekkewe aramas” pwe Messaia, ina i ewe Sou Emmwen, epwe pwalo. (Luk 3:​1-3, 15) Chommong ra chuuto ren Jon, nge Jon esap i ewe Sou Emmwen.

Iwe, orun October 29 C.E., Jises seni Nasaret a feilo ngeni Jon ren an epwe papatais. Jon a pwarata: “Ua kuna ewe ngun mi feitiu seni lang, usun chok emon lisom, o a nonnom won atei. Iwe, ngang use mo sinei i, nge ewe emon a tinieito pwe upwe papatais ren konik a pwal apasa ngeniei, ‘Lupwen kopwe kuna pwe ewe Ngun a sotiu o nonnom won emon, iwe, ina i atewe epwe papatais ren Ngun mi Fel.’ Iwe, ngang ua fen kuna, o ua pwal pwarata pwe atei Noun Kot.” (Jon 1:​32-​34) Lupwen a papatais, Jises a wiliiti ewe Sou Emmwen mi kepit​—⁠ewe Messaia, are ewe Kraist.

Ewer, Jises Kraist ewe “souemwen me samolun ekewe mwu” mi pwonetiu. Me lupwen sia atittina lapalapan kewe mi fich ngeni wiisan we sou emmwen, sia muttir miritiiti pwe murinnoon an emmwen a fokkun lu seni an aramas fich ngeni ena wiis.

Ewe Messaia​—Ewe Sou Emmwen Mi Murinno

Emon sou emmwen mi murinno a awora emmwen mi ffat me a alisi aramas fan an nemenem ren ar repwe angei pochokkul me tufich pwe repwe tongeni pwakini ar kewe osukosuk. ‘Iei ewe kokkot fan iten emon sou emmwen mi sopwoch lon ewe 21en senturi,’ alon ewe puk 21st Century Leadership: Dialogues With 100 Top Leaders. A ifa me murinnoon an Jises ammonlata aramas fan iten ar repwe pwakini osukosuk lon manauer iteiten ran! Ekieki mwo an afalafal mi itefoulo​—⁠ewe Afalafal won ewe Chuuk. Mei wor chommong fon mi auchea mi makketiu lon Mattu sopwun 5 tori 7.

Ekieki mwo an Jises fon mi alisata ach pwakini osukosuk lefilen aramas. A apasa: “Iwe, are ka walo om asor won ewe rong, o ka chechemeni me ikewe pwe mi wor och lefilom me pwiom, iwe, kopwe isetiu om asor fan ewe rong o feilo. Kopwe chasefal lom ngeni pwiom. Iwe, kopwap liwinsefallilo o iseta om we asor.” (Mattu 5:​23, 24) Ach achocho le efisi kinamwe lefilach me ekkewe ekkoch a lamot seni meinisin​—⁠a pwal lamot seni ach apwonueta wiisach lon pekin lamalam, ussun chok ach iseta asor won ewe rong lon ewe imwen fel me ren ewe Allukun Moses. Ika esor kinamwe lefilach me pwiich we, Kot esap etiwa ach fel. An Jises we fon a alisikich iei, ussun chok a fen alisi aramas fite puku ier me loom.

Jises a pwal alisi chokkewe mi auselinga an we poraus pwe repwe ti seni ewe ssarin lisowu mwaal. A fonoor: “Oua fen rong pwe a apasa, ‘Kote lisou.’ Nge ngang upwe apasa ngenikemi, pwe ir meinisin mi nennengeni emon fefin o mochenia ngeni, ra fen lisou ngeni ren letiper.” (Mattu 5:​27, 28) A ina eu kapasen ourour mi murinno! Met popun sipwe poputa le fetal won ewe alen lisowu mwaal ren ach ekkekieki ussun lisowu mwaal? Jises a apasa pwe lisowu mwaal me mocheisou a towu seni ewe letip. (Mattu 15:18, 19) Sia tipatchem ika sia tumunu letipach.​—An Salomon Fos 4:​23.

Fon mi murinno ussun ach tongei chon oput kich, kisaseu, ekiekoch ussun pisek me mettochun ngun, me metakan a nom lon ewe Afalafal won ewe Chuuk. (Mattu 5:​43-​47; 6:​1-4, 19-​21, 24-​34) Jises a pwal aiti ngeni aramas ifa ussun repwe kutta alillis seni Kot ren an aiti ngeniir ifa ussun repwe iotek. (Mattu 6:​9-​13) Messaia ewe Sou Emmwen a apochokkula me ammonla aramas pwe repwe tongeni pwakini ekkewe osukosuk a toriir iteiten ran.

Fan wonu lon ewe Afalafal won ewe Chuuk, Jises a poputaani och poraus ren ewe kapas “oua fen rong” are “iwe, a pwal apasa,” nge mwirin Jises a pwal ngeniir pwal eu ekiek ren an apasa: “Nge, ngang upwe apasa ngenikemi.” (Mattu 5:​21, 22, 27, 28, 31-​34, 38, 39, 43, 44) Ei itiitin kapas a aiti ngenikich pwe ekkewe mi auseling ra kan mwokutukut me ren eorenien ekkewe Farisi. Nge iei Jises a aiti ngeniir eu alen manau mi sokkolo, eu aal mi pwaralo enletin weween ewe Allukun Moses. Jises a awewei eu siwil, me lapalapen an awewei a fen amecheresi an aramas etiwa ewe siwil. Ewer, Jises a achungu letipen aramas me ra siwili lapalapen manauer. A wor siwil lon pekin ngun me lon ar ekiek ussun minne mi pwung me minne mi mwaal. Ena tufich esissinnen emon sou emmwen mi murinno.

Eu puk mi for fan iten ekkewe manager a awewei weiresin fisitaan ena esin siwil. A mak lon ewe puk: “Ewe sou emmwen mi efisi ena siwil epwe tongei aramas ussun chok emon social worker, epwe mirit ussun tokterin tupuw, epwe pochokkul ussun chok emon mi ssa lon maroson, epwe likiitu ussun chok emon konak mi mwocho, epwe tufichin pwisin uta ussun chok emon mi alaemon chok iteitan, me epwe mosonottam ussun chok emon aramas mi pin. Me neman pwal mwo nge ren ekkeei lapalap meinisin ewe sou emmwen esap sopwoch lon an angang.”

Eu poraus, itelapan “Emmwen: Mi Lamot Lapalap?” a affata pwe “a lamot pwe ekkewe sou emmwen repwe pwisin lapalapeni ekkewe lapalap ra kutta seni aramas ra nemeni.” Pwungun pwe emon sou emmwen mi murinno epwe foffori met a afalafal ngeni aramas. A ina ussun Jises! Ewer, a aiti ngeni noun kewe pwe repwe tipetekison, nge a pwal awora eu pisekin nengeni ren tipetekison lupwen a tolu pecher. (Jon 13:​5-​15) Ese chok tiinaalo ekkewe chon kaeo lon ewe angangen afalafal nge a pwal angang weires lon ena angang. (Mattu 4:​18-​25; Luk 8:​1-3; 9:​1-6; 10:​1-​24; Jon 10:40-​42) Jises a isetiu eu leenien appiru mi murinno ren an etiwa emmwen. A apasa: “Ewe Nau ese tongeni fori och seni pwisin i, pwe minne chok a kuna pwe ewe Sam a fori.”​—Jon 5:​19.

Porausen minne Jises a apasa me fori a affata pwe i emon Sou Emmwen mi murinno. Ukuukun an Jises fich ngeni ewe wiis sou emmwen a kon lu seni an aramas kokkot fan iten ena wiis. Jises mi unusoch. Mwirin an manausefal, Jises ese chuen tongeni malo, pwe a manau tori feilfeilo. (1 Piter 3:​18; Pwarata 1:​13-​18) Mei wor emon sou emmwen won fonufan epwe tongeni lolloppok me Jises?

Met Sipwe Fori?

Pokiten ewe Messaia kingen Muun Kot, i ewe sou emmwen epwe efeiochu aramas meinisin mi alleasochis. Iei ussun an ewe Paipel pwon: “An chon fanufan silei ewe Samol mi Lapalap epwe alolon usun chok alololun matau.” (Aisea 11:9) “Nge ir ekkewe mi mosonoson repwele fonueni ewe fonu, o repwe pwapwaesini chommongun ar pisek.” (Kol Fel 37:11) “Iwe, eman me eman epwe nom lon an tanipin wain me fan an ira fiik fan kinamwe, nge esap wor eman epwe eniuokusu.” (Mika 4:4) “Kot epwe pwisin nonnom rer. I epwe tolu seni meser chonun meser meinisin, o esap chuen wor malo, esap pwal chuen wor kechiu, are akurang, are metek, pun ekkewe mettochun lom ra fen morelo.”​—Pwarata 21:​3, 4.

Iei mei wor eu nafangauen sou emmwen mi murinno won fonufan. Nge Jises Kraist a emmweni aramas mi mosonoson ngeni eu fonufan sefo mi kinamwe ikewe ia aramas meinisin mi alleasochis repwe tipeeu lon ar fel ngeni Jiowa Kot me repwe feffeita ngeni unusoch. A ifa me lamoten ach aea ach fansoun le angei sile ussun ewe Kot mi enlet me ewe sou emmwen a seikata, Jises Kraist, me manaueni manauach me ren ena sile!​—Jon 17:3.

Sia apunga emon lupwen sia appiru i. Iwe, sisap pwal achocho le appiru ewe sou emmwen mi murinno seni meinisin lon unusen uruwoon ei fonufan​—⁠Jises Kraist? Ifa ussun sipwe fori? Ifa ussun ach etiwa an emmwen epwe kku manauach? Ekkeei pwal ekkoch kapas eis repwe polu lon ekkewe ruu lesen mwirin ei.

[Footnote]

[Picture on page 4]

Taniel a oesini ussun waren ewe Sou Emmwen mi seikita me ren Kot

[Pictures on page 7]

Aitien Jises a ammonla aramas pwe repwe tongeni pwakini ekkewe osukosuk lon manauer

[Picture on page 7]

Jises epwe emmweni aramas mi alleasochis ngeni eu fonufan sefo mi kinamwe