An Kraist Emmwen Eu Emmwen Mi Wesewesan Ngonuk?
“Oute pwal eiten ngenikemi ‘sou emmwen,’ pun ami Sou Emmwen emon chok, ewe Kraist.”—MATTU 23:10, New World Translation.
1. Io chok ewe Sou Emmwennin Chon Kraist mi enlet?
ASERENI ewe ran Oruu, Nisan 11. Mwirin ulungat ran, Jises Kraist epwele ninniilo. Iei saingoon an a feilo ngeni ewe imwen fel. Lon ei ran, Jises a aiti ngeni ewe pwiin aramas me noun kewe chon kaeo eu lesen mi lamot. A apasa: “Ousap eiten ngenikemi Rappai, pun mei wor emon chok noumi sense, nge ami meinisin pwipwi eu chok. Pwal och, osap eiten ngeni emon Sam me won fonufan, pun mei wor emon chok Sememi, ewe lon lang. Ousap pwal eiten ngenikemi ‘sou emmwen,’ pun ami Sou Emmwen emon chok, ewe Kraist.” (Mattu 23:8-10, NW) A ffat pwe Jises Kraist ewe Sou Emmwennin Chon Kraist mi enlet.
2 A ifa me watteen ewe feioch lon manauach an Jises emmwen epwe awora ika sia etiwa! Jiowa a oesini warotoon ei Sou Emmwen ren ewe soufos Aisea: “Ou etto, ami meinisin mi kaka, oupwe feito o un seni ewe koluk. Ami mi woungauen moni, oupwe feito o angei enemi. Oupwe feito o angei unumemi wain me milik, nge ousap moni. . . . Oupwe fokun auselingaei o fori mine ua urenikemi. Iwe, epwe wor enemi mongo mi anno. . . . Nengeni, ua awisa pwe epwe souemwen me samolun mwu kana.”—Aisea 55:1-4.
3 Aisea a eani awewe won mettoch aramas ra ukkunumi, chowean konik, milik, me wain, ren an epwe pwaralo ifa ussun manauach a siwil lupwen sia auselinga Jiowa me tapwelo mwirin ewe Sou Emmwen me Samol Jiowa a fen ngenikich. Ach fori ena epwe asosokich. Epwe ussun chok lupwen sia unumi konik mi pat lon eu ran mi pwichikkar. Ach kaka fan iten enlet me pwung a pwonuta. Ussun chok ewe milik mi apochokkula monukol, “ewe chonun oup mi enlet” a apochukkulakich me a alisata ach chiechioch me Kot. (1 Piter 2:1-3) Me io epwe apasa pwe wain ese alisata chengel lon eu pari? Ussun we chok, ach fel ngeni ewe Kot mi enlet me ach tapwelo lon ipwen ewe Sou Emmwen Kot a seikata epwe efisi ach sipwe “fokun pwapwa.” (Tuteronomi 16:15) Iwe, a mmen lamot pwe kich meinisin—kukkun me watte, mwan me fefin—sipwe pwarata pwe an Kraist emmwen eu emmwen mi wesewesan ngenikich. Iwe, ifa ussun sipwe pwarata pwe ewe Messaia ach Sou Emmwen lon manauach ran me ran?
Sarafo—Oupwe “Tipatchemelo”
4 Ekieki mwo ewe leenien appiru nouch we Sou Emmwen a isetiu fan iten ekkewe kukkun. Inaamwo ika a kisikis chok ach sile ussun porausen Jises me le kukkunun nge, eu poraus a fokkun alisikich. Lupwen Jises a chok 12 ierin, seman me inan ra uwei ngeni Jerusalem, ikewe ra feilo ie iteiten ier fan iten ewe Pasofer. Lon ei fansoun, atun ewe famili a mmonleta ngeni ar liwinlo, Jises a popporaus ussun ewe Paipel me an we famili a likitalo lon Jerusalem. Mwirin ulungat ran Josef me Meri ra fokkun osukosuk me loliilen lupwen ra kunasefalli Jises me lon ewe imwen fel, nge a “momot lein ekkewe soupetak pwe epwe auselinga ar kapas eis.” Pwal och, “ir meinisin mi auselinga i ra weitifengennir ren an tipatchem o ren an kapas.” Mwa met! Jises a chok 12 ierin nge a fen tongeni eani kapas eis mi lamot mi weneiti mettochun ngun, me a pwal tongeni polueni ena esin kapas eis! Ese mwaal a kuna alillis watte seni an seman me inan emiriiti i.—Luk 2:41-50.
5 Neman en emon sarafo. Ika semom me inom ra angang ngeni Kot, ese mwaal mei wor ami kokkotun kaeo Paipel. Ifa ekiekum ngeni an om famili kaeofengen? Pwata kese ekieki ussun ekkeei kapas eis: ‘Ua alisata an ai famili kaeo ewe Paipel ren letip unus? Ua tipeeu ngeni ewe fansoun kaeo me use fori och le ataielo ewe kokkot?’ (Filipai 3:16) ‘Ua alisata ewe fansoun kaeo ren ai uwawu meefiei? Lupwen a fich ngeni ua pwal eani kapas eis me awewei ifa ussun upwe apwonueta ewe poraus lon manauei? Atun ai feffeita lon pekin ngun, ua amaaraata ai mwoneiti “mongo mi pochokkul a och ngeni aramas mi asimau”?’—Ipru 5:13, 14.
6 Eu kkotun alleaan Paipel iteiten ran a pwal lamot. Ewe soumak kol mi fel a kolu: “Mi feioch ewe mwan mi esap fetal lon pungupungun aramas mi ngau, . . . nge a fakkun pwapwaiti allukun ewe SAMOL, o a fakkun ekieki usun an we alluk, le ran me lepwin.” (Kol Fel 1:1, 2) Ewe emon a siwili Moses, Josua, a ‘allea lon ewe puken alluk le ran me le pwin.’ Ei alleaan Paipel a alisi Josua ren an epwe tipatchem lon an apwonueta ewe wiis Kot a awiisa ngeni. (Josua 1:8, NW) Nouch we Sou Emmwen, Jises Kraist, a apasa: “A makketiu, ‘Aramas resap manau ren pilaua chok, pwe ren iteiten kapas meinisin mi tou seni auen Kot.’ ” (Mattu 4:4) Ika a lamot ach mongo iteiten ran, ifa lamoten ach mongo lon pekin ngun iteitan!
7 Nicole a esinna an osupwang lon pekin ngun lupwen a 13 ierin, me a poputa le alleaani ewe Paipel iteiten ran.a Iei a 16 ierin me a fen alleaani unusen ewe Paipel fan eu me iei a tori lesopwun. An kokkot a mecheres. A apasa: “Ua chok achocho ngeni ai upwe alleaani eu sopwun iteiten ran.” Ifa ussun an alleaan Paipel a fen alisi? A polueni: “Ikenai a fokkun tepetep etipetip mi ngau. Ua kuna sossotun ai luku mi weires iteiten ran lon sukul me lon pwal ekkoch leeni. Ai alleaani ewe Paipel iteiten ran a alisiei le muttir chechchemeni alluk me kapasen emmwen mi apochokkulaei pwe upwe tongeni u ngeni ekkewe sossot. Ina popun ua meefi ai arap ngeni Jiowa me Jises.”
8 Eorenien Jises, a kan auselinga me poraus ussun ewe alleaan Paipel a fiffis lon ewe sinakok. (Luk 4:16; Fofor 15:21) A ifa me murinnoon pwe ekkewe sarafo repwe tapwelo lon ipwen Jises ren ar fiffiti ekkewe mwichen Chon Kraist, ikewe a wor alleaan me kaeoon Paipel ie! Richard a 14 ierin me a apasawu an aucheaani ekkewe mwich: “Ekkewe mwich mi auchea ngeniei. Ra akkachema ngeniei met a murinno me ngau, met a limoch me limengau, met a fich ngeni Chon Kraist me met ese fich ngeni. Use kaeo seni ewe riaffou upwe kuna ika ua tipis.” Ewer, “an ewe SAMOL pwarata mi chok enlet, a atipatchemalo ekkewe aramas mi tiparoch.” (Kol Fel 19:7) Nicole a pwal achocho le fiti ekkewe limu mwich iteiten wiik. A pwal eani ruu are ulungat awa ren an epwe ammonlata fan iten ekkena mwich.—Efisus 5:15, 16.
9 Le kukkunuch eu fansoun murinno ren ach sipwe angei ‘sile ussun ewe emon chok Kot mi enlet, me ussun Jises Kraist ewe emon a akunooto.’ (Jon 17:3) Neman ka chiechi ngeni chommong sarafo mi eani chommong awa ren ar repwe alleaani comic puk, katon TV, play game won computer, are Internet. Met popun kopwe appiruur lupwen kopwe tongeni appiru ewe leenien appiru mi unusoch nouch we Sou Emmwen a isetiu? Lupwen Jises emon kukkun at a pwapwaiti an kaeo ussun Jiowa. Met mwiriloon an fori ena? Pokiten a tongei mettochun ngun, “Jises a tipatchemelo o mamarita.” (Luk 2:52) Kopwe pwal tongeni fori.
“Oupwe Alleasochikfengen Lefilemi”
10 Ewe imw mi tongeni eu leenien kinamwe me menemenoch are ussun chok eu leenien maun ren fiu me anini. (An Salomon Fos 21:19; 26:21) Ach etiwa an Kraist emmwen epwe alisata kinamwe me pwapwa lon ewe famili. An Jises leenien appiru ina ewe minen appiru fan iten chiechioch lon famili. Ewe Paipel a apasa: “Iwe, ren ami niueiti Kraist, oupwe alleasochikfengen lefilemi. Ami fefin kena, oupwe alleasochisi puluemi usun chok ach Samol. Pun ewe mwan i mi mokuren puluan, usun chok Kraist mokuren inisin, ewe mwichefel, o i mi pwal Chon Amanaua ewe mwichefel. Iwe, usun ewe mwichefel a nonnom fan nemenien Kraist, epwe pwal iei usun ren fefin ngeni puluer lon mettoch meinisin. Ami mwan kena, oupwe tongei puluemi, usun chok Kraist a pwal tongei ewe mwichefel, o a pwisin fangelo manauan fan asengesin i.” (Efisus 5:21-25) Paul a makkeei ei poraus ngeni ewe mwichefel lon Kolose: “Ami semirit kena, oupwe alleasochisi sememi kewe me inemi ren mettoch meinisin, pun ach Samol epwe pwapwa ren ei sokun fofor.”—Kolose 3:18-20.
11 Weween ei fon pwe ewe mwan epwe emmweni ewe famili, ewe fefin epwe alisi i fan tuppwol, me ekkewe nau repwe alleasochisi semer kewe me iner. An aramas mokureni ewe famili epwe atoto pwapwa ika repwe forochu wiiser kewe. Emon mwan pupulu mi tipatchem epwe kaeo ifa ussun epwe anganga wiisan we wiisen mokuren famili ren an appiru pwisin mokuran we me noun we Sou Emmwen, Kraist Jises. (1 Korint 11:3) Inaamwo ika Jises a wiliiti “mokuren mettoch meinisin ren ewe mwichefel” nge, a feito fonufan “pwe epwe alisi aramas.” (Efisus 1:22; Mattu 20:28) Ussun we chok, emon mwan Chon Kraist mi pupulu esap anganga wiisan mokuren famili fan iten pwisin an feioch nge fan iten feiochun puluwan we me noun kewe—ewer, fan iten unusen ewe famili. (1 Korint 13:4, 5) A sotun appiru lapalapen mokuran we, Jises Kraist, ekkewe lapalap mi fich ngeni Kot. Ussun chok Jises, atewe a mosonoson me tipetekison. (Mattu 11:28-30) Ese weires ngeni an epwe apasawu ekkewe kapas chowean “omusalo tipis” are “mei pwung reom” lupwen a mwaallilo. An leenien appiru mi murinno a amecheresi an puluwan we wiliiti chon “alisian,” emon ‘chiechian’ me emon ‘pwuluan,’ me a amecheresi an kaeo seni me ar angangfengen.—Keneses 2:20; Malakai 2:14.
12 Ewe fin pupulu a wiisen anomu pwisin i fan emmwenien puluwan we. Iwe nge, ika ngunun fonufan a etipetipa i, a tongeni ngauolo ekiekin ussun ei kkotun emmwen, me an ekiekin nonnom fan emmwenien puluwan we esap chuen och mettoch mi murinno ngeni. Ewe Paipel ese apasa pwe ewe mwan epwe nikinikin meilap, nge a mak pwe ekkewe fefin repwe anomuur fan emmwenien puluwer. (Efisus 5:24) Alon ewe Paipel, ewe mwan pupulu are ewe sam epwe atittin me ren Kot, me an apwonueta ewe fon lon Paipel a alisata kinamween me kokkotochun ewe famili.—Filipai 2:5.
13 Ekkewe nau repwe alleasochisi semer kewe me iner. Jises a isetiu eu leenien appiru mi murinno. Mwirin ewe osukosuk lon ewe imwen fel lupwen Jises a 12 ierin me a poutulo seni inan me seman ren ulungat ran, “a eti ir [seman we me inan] feitiu Nasaret, o a chok alleasochisi ir.” (Luk 2:51) An ekkewe nau anomuur fan nemenien semer kewe me iner a alisata kinamwe me tipeeu lon ewe famili. Lupwen meinisin repwe anomuur fan an Kraist emmwen, ewe famili epwe pwapwa.
14 Pwal mwo nge lupwen osukosuk a ppiita lon ewe famili, a lamot pwe sopwochun ar pwakini ewe osukosuk a longolong won ar appiru Jises me nguuri an emmwen. Ren chok awewe, lupwen Jerry, 35 ierin, a puluweni Lana, inen emon sarafo nengngin, a ppiita eu osukosuk rese fen ekieki. Jerry a awewe: “Ua fen silei pwe ai wiliiti mokuren famili mi murinno a longolong won ai apwonueta ekkewe emmwen seni Paipel ra fen atoto pwapwa ngeni ekkewe ekkoch famili. Nge a muttir pwalo pwe ua wiisen apwonuureta ren tipatchem me mirit mi lapalap.” Noun puluwan we a eani ekiek pwe Jerry a aimufesenni i seni inan we me a fokkun songeiti Jerry. A lamot pwe Jerry epwe mirit ren an epwe weweiti pwe ei ekiek a kku met ewe nengngin a apasa me fori. Met Jerry a fori? “Ngang me Lana aua tipeeu pwe ren och fansoun Lana epwe apwungu me emmweni ewe nengngin nge upwe achocho le apochokkula ekkewe riiri lefilach. Mwirin och fansoun, ei kokkot a sopwoch.”
15 Lupwen och osukosuk a ppiita lon ewe famili, a lamot mirit ika sipwe silei ewe popun a ina ussun an chon ewe famili kapas me foffor. A pwal lamot tipatchem ika sipwe apwonuetaochu ekkewe kapasen emmwen seni Kot. Ren chok awewe, Jises a miritiiti ewe popun ewe fefin mi pupuseni chcha a atapa ufan, me an foffor ngeni a pwarata an tipatchem me an tong. (Lifitikos 15:25-27; Mark 5:30-34) Tipatchem me mirit ir ruu me leiin ekkewe lapalap mi pwalo lon nouch we Sou Emmwen. (An Salomon Fos 8:12) Sipwe pwapwa ika ach kewe foffor repwe ussun chok an kewe foffor.
‘Kuttafichi Lom An Mu’
16 Jises a affata ewe mettoch mi lamot seni meinisin lon manauen chokkewe mi etiwa an emmwen. A apasa: “Nge oupwe kuttafichi lom an mu o an pung.” (Mattu 6:33) Ren ifa ussun a fen manaueni manauan, a fen aiti ngenikich ifa ussun sipwe fori. Mwirin ewe 40 ranin echikipin, ekkekiekifichi mettochun ngun, me iotek mwirin an papatais, Jises a kuna sossot. Setan a mochen liffang ngeni Jises nemenemen “ekkewe muun fonufan meinisin.” Ekieki mwo ewe sokkun manau Jises epwe tongeni manaueni ika a fen etiwa met Setan a mochen ngeni! Iwe nge, Kraist a fokkun achocho le fori letipen Seman. A fen weweiti pwe ena esin manau lon an Setan we fonufan epwe eu manau mi mwochomwoch. A muttir tunalo met Setan a era ren an apasa: “A fen makketiu, ‘Kopwe asamolu om Samol Kot, o kopwe angang ngeni i chok.’ ” Ekiselo chok mwirin, Jises a “poputa le afalafal o apasa, ‘Oupwe aier, pun muun lang a arapato.’ ” (Mattu 4:2, 8-10, 17) Ren lusun manauan meinisin, Kraist a eani unusen an we fansoun lon ewe angangen esilefeili porausen an Kot we Muu.
17 Sipwe sopwoch ika sipwe akkappiru nouch we Sou emmwen me sisap mut ngeni etipetipaen Setan an epwe efisi ach kutta loom eu angang mi watte peioffun. (Mark 1:17-21) Epwe tiparoch ika sia kon osukosuk ren mettochun fonufan pwe mettochun ewe Muu ra lamot kisikis ngenikich! Jises a awiisa ngenikich ewe angangen esilei porausen ewe Muu me ewe angangen fori chon kaeo. (Mattu 24:14; 28:19, 20) Ewer, neman sia wiisen tumunu ach we famili are apwonueta pwal ekkoch wiis, nge sise pwapwaiti ach afalafala me asukula aramas le pwin me lon weekend? Sia pochokkulelo ren ewe poraus pwe atun ewe 2001 service ier, orun 780,000 ra tongeni afalafal full time, are pioneer!
18 Ekkewe puken Kapas Allim ra affata pwe Jises emon mwan mi akkangang, pwal emon mi tongei aramas. Lupwen a kuna an aramas osupwang lon pekin ngun, a tongeer me a mwotores le alisiir. (Mark 6:31-34) Ach angangen afalafal a wiliiti och angang mi apwapwa lupwen sia fori pokiten ach tongei aramas me pokiten ach mochen le alisiir. Nge ifa ussun sipwe angei ena esin mochen? Emon aluwon itan Jayson a apasa: “Lupwen ngang emon sarafo, use kon lien pwapwaiti ewe angangen afalafal.” Met a alisi Jayson le amaaraata an tongei ei angang? Jayson a polueni: “Lon ai we famili, lesossorun Ammon am fansoun afalafal. Ei kokkot a efeiochuei popun, pun ren lapeloon ai fiti ewe angangen afalafal, a pwal lapelo ai kuna ewe murinno a fisita seni me a pwal lapelo ai pwapwaiti.” Kich pwal sipwe tinikken lon ach fiti ewe angangen afalafal iteitan.
19 Pwungun pwe ach etiwa an Kraist emmwen epwe asosokich me efeiochukich. Lupwen sia fori, ewe fansoun sarafo a wiliiti eu fansoun sipwe feffeita lon sile me tipatchem. Manauen famili a wiliiti och mettoch mi atoto kinamwe me pwapwa, me ewe angangen afalafal a wiliiti eu angang mi wato chengel me menemenoch. Iwe, sipwe apposa letipach pwe sipwe pwaralo lon manauach ran me ran pwe an Kraist emmwen wesewesen eu emmwen ngenikich. (Kolose 3:23, 24) Jises Kraist a awora pwal eu minen emmwen—ewe mwichefelin Chon Kraist. Ewe lesen mwirin ei epwe awewe won ifa ussun sipwe tongeni kuna feioch seni ei kokkot.
[Footnotes]
a A fen siwil ekkoch iten ekkewe aramas.
En Mi Chechchemeni?
• Ifa ussun sipwe feioch seni ach etiwa nouch we Sou Emmwen mi seikita me ren Kot?
• Ifa ussun ekkewe sarafo repwe pwaralo pwe ra etiwa an Jises emmwen?
• Lupwen aramas ra anomuur fan an Kraist emmwen, ifa ussun ar fori a kku manauen ewe famili?
• Ifa ussun ach angangen afalafal epwe pwaralo pwe an Kraist emmwen wesewesen eu emmwen ngenikich?
2, 3. Ifa ussun ach auselinga Jiowa me ach etiwa ewe Sou Emmwen Jiowa a seikata epwe kku manauach?
4. (a) Met a fis lupwen Jises a feilo Jerusalem atun Pasofer lupwen a 12 ierin? (b) Ifa ukuukun an Jises sile lupwen a chok 12 ierin?
5. Ifa ussun ekkewe kukkun mi tongeni atittina ekiekir ussun an ar famili kaeofengen lon ewe Paipel?
6, 7. Ifa ukuukun aucheaan eu kkotun alleaan Paipel iteiten ran ngeni ekkewe sarafo?
8. Ifa eorenien Jises lupwen a feilo ngeni ewe sinakok, me ifa ussun ekkewe kukkun mi tongeni appiru i?
9. Ifa ussun ekkewe kukkun mi tongeni “feffeita lon tipatchem”?
10. Met epwe alisata kinamwe me pwapwa lon eu famili?
11. Ifa ussun emon mwan pupulu epwe pwaralo pwe an Kraist emmwen eu emmwen mi wesewesan lon manauan?
12. Met epwe alisi an emon fefin etiwa ewe kkotun emmwen lon famili?
13. Ifa ussun Jises a awora eu leenien appiru ren ifa ussun ekkewe nau repwe anomuur fan emmwenien semer kewe me iner?
14, 15. Met epwe alisata ach sopwoch lupwen a ppiita osukosuk lon ewe famili? Awewei mwo.
16. Ifa ewe mettoch epwe lamot seni meinisin lon manauach, me ifa ussun Jises a pwaralo lon manauan?
17. Ifa ussun sipwe tongeni pwaralo pwe mettochun ewe Muu a lamot seni meinisin lon manauach?
18. Met epwe alisata ach chengel lon ewe angangen afalafal?
19. Sipwe apposa letipach le fori met ussun an Kraist emmwen?
[Pictures on page 9]
Ewe fansoun sarafo eu fansoun mi murinno ren ach sipwe angei sile ussun Kot me ussun nouch we Sou Emmwen mi seikita
[Picture on page 10]
Ach anomukich fan an Kraist emmwen a alisata pwapwaan famili
[Pictures on page 12]
Jises a kutta loom ewe Muu. Nge en?