Ifa Om Ekiek Ussun Malo?
EKIEK ussun malo a kan alolilenikich ran me ran lon manauach, ese lifilifil pochokkulach are wouochuch. Malo mi tongeni kku kich lupwen sia fetal won aal are kokkon won pet. Feiengau watte ussun chok ewe feiengau a fis fan ewe September 11, 2001, ren ekkewe terrorist lon New York City me Washington, D.C., a achema ngenikich pwe ewe “chon oput,” malo, a efeiengaua aramas tekia me tekison, chinnap me kukkun, me fan ekkoch epwe nnielo fite ngerou lon fitu chok minich.—1 Korint 15:26.
Inaamwo ika malo och mettoch mi anniuokkus nge, a ussun ita pwe aramas ra asuku me mochen alleani me ekieki ussun porausen malo. Ar mooni simpung are katon TV a lapelo lupwen a wor porausen malo, akkaewin ika chommong ra malo fan feiengau watte. Rese chipwang le alleani are katon ena esin poraus, ese lifilifil ika ewe malo a fen fisita pokiten maun, chechchechin fonu are molumol, atai alluk are semmwen. Ewe mettoch mi amairu seni meinisin ren an aramas ekiekifichi malo ina ewe riaffou wachemuk a pwalo lupwen emon mi itefoulo a malo.
Ei poraus mi enlet. Aramas ra chuen mochen silei ussun malo—maloon ekkewe ekkoch. Ren pwisin ar malo, rese mochen ekiek ussun. Pwisin ach malo och mettoch lape-ngenikich sise mochen pwungupwung won.
Mei Wor Om Kapas Eis Ussun Malo?
Sise kan pwapwaiti ach ekieki ussun pwisin ach malo me meefiach esap siwil. Met popun? A ina ussun pokiten Kot a fotukalong lon letipach ewe mochen pwe sipwe manau tori feilfeilo chok. A mak lon An Salomon Afalafal 3:11 pwe “a pwal atolonga ekiekin fansoun esemwuch lon letipen aramas.” Pun sise tongeni ssu seni malo, a wor och fitikoko a chok nonnomelo lon letipach. Ren ar repwe pwakini ena fitikoko lon letiper me apwonueta ewe mochen pwe repwe manaufoch, aramas ra fen efisata sokkopaten luku ussun chowean ewe luku pwe a wor ngunuch esap tongeni malo me ewe luku pwe ngunuch a towu seni inisich ren an epwe feilo ngeni pwal eu sokkun monumanau lupwen sia malo.
Iwe, malo a aosukosukakich me aniuokkusukich, me niuokkusun malo a nom ekis meinisin. Sisap mairu pwe lape-ngeni aramas ra osukosuk lupwen ra ekieki ussun ar malo. Iwe, maloon aramas a pwaralo pwe a chok lamot mwaal manauen emon mi unusen achocho ngeni an emon cheei wou me nemenem.
Alaemon Chok Atun Ewe Fansoun Malo?
Me loom, emon mi uri eu semmwenichou are mi efeiengau, epwe tongeni malo lon pwisin imwan, ewe leeni a silei me eoreni. A ina ussun lon ewe fansoun an a mak ewe Paipel, me a chuen ina ussun lon ekkoch fonu. (Keneses 49:1, 2, 33) Lupwen emon epwe malo, aramasan kewe ra feito, me ekkewe semirit ra kapachelong lon an aramas porausfengen. Iei ussun, emon me emon lon ewe famili esap meefi pwe a alaemon lon an riaffou me a pwal kawor auruur pokiten chommong mi tongeni awora alillis lon ewe fansoun kechiu.
Mi sokkolo me lein ekkewe aramas mi pireir le fos ussun malo me chokkewe ra kan asualo semirit lupwen emon epwe malo pokiten “epwe kon weires ngeniir.” Ikenai, malo a sokkolo, me fan chommong esap wor aramas mi nonnom ren ewe emon lupwen a malo. Inaamwo ika lape-ngeni aramas ra mochen malo lon imwer, lein attonger kewe nge, fan chommong repwe malo lon eu pioing lein fitu mwesin mi tokorara me anniuokkus. Me a wor chommong aramas mi mammalo nge esor emon mi sileer. Ra malo pokiten aramas ra nnirelo, pokiten echik, AIDS, maun, are pokiten ar woungau.
Eu Poraus Sipwe Ekkekieki
Ewe Paipel ese apasa pwe sisap ekieki ussun malo. Pwungun pwe ewe puken An Salomon Afalafal 7:2 a erenikich: “A murina pwe eman epwe eti eu mwichen letipeta lap seni an epwe eti eu kametip. Pun chokewe mi manau repwe chechemeni pwe malo sopolan aramas meinisin.” Lupwen sia chechchemeni pwe sipwe malo, eli sipwe ekis asoso seni ach kewe lolilen me foffor iteiten ran me ekieki ussun mwochomwochen manauach. Ei sokkun ekiek a tongeni alisata ach meefi aucheaan manauach me alisata ach akkotaochu manauach pwe esap solap.
Ifa om ekiek ussun malo? Ka fen atittina om kewe memmeef me luku, om kewe apilukuluk me met ka niueiti ussun mwuchuloon manauom?
A mmen weires an aramas awewei me weweiti manau me malo. A wor emon chok a tongeni aweweochu malo, ina ewe Chon Forikich. ‘Ewe puachen manau a nonnom ren’ me “ach ngaselo seni malo a nonnom chok ren.” (Kol Fel 36:9; 68:20) Neman sia mairu ren nge, ach atittina ekkoch luku ussun malo mi foulo a tongeni auruuru me asosokich. Epwe pwalo ngenikich pwe neman malo esap mwuchuloon mettoch meinisin.
[Blurb on page 4]
Ewe tufichin malo a alisaata ach manaueni eu manau mi auchea