“Manau A Oromalo Mälo Reen An Pworaacho”
ANCHANGEI pwe ka älleääni eü simpung, nge ina itelapan. Pwüngün pwe ese fokkun pwä fän eü ena itelap lon eü simpung. Nge ekkena kapas mi mak asan ra pwä lon eü puk mi mak fite ngeröü ier loom—ina ewe Paipel.
Ewe Paipel a affataöchü weween mälo. Pwal eü, ewe Paipel ese chök pwäralo ewe popun sia kan mälo, nge a pwal awewei lapalapen ekkewe mi mälo me pwal awora eü apilükülük allim fän iten attongach kewe mi fen mälo. Säingoon, a kapas ussun eü fansoun mi amwarar lupwen epwe wor ewe apio: “Manau a oromalo mälo reen an pworaacho.”—1 Korint 15:54.
Ewe Paipel a awewei ussun mälo lon kapas mi ffatöch nge ese nöunöu kapas alollool. Awewe chök, fän choommong, a alöllöfengenni mälo me ‘möür’ me a erä pwe chokkewe mi mälo ra “onnut lon mälo.”—Köl Fel 13:3; 1 Tesalonika 4:13; Jon 11:11-14.
A ffatöch pwe Jises Kraist a eäni ewe wiis mi fokkun lamot le amoielo mälo. A erä pwe a feitiu fönüfan “pwe epwe penmanauen aramas mi chommong.” (Mattu 20:28) A ussun chök minne a fis lupwen emön a su fän emön, nge epwe chök tongeni ngaselo ika a kamötiu. Iwe, manauen Jises mi unusöch, ina ewe möön kepich mi tongeni angasakichelo seni tipis me mälo.—Föför 10:39-43.
Mälo a ussun chök emön chon oput. Mei wor chommong chon oput aramas, awewe chök, semmwen me an aramas chinnapelo, ra efisaatä watteen riääfföü. Kot a pwoneetiu pwe epwe pworaitiir meinisin, iwe, sopwolon, epwe orosalo ewe chon oput mi lapalap seni meinisin. “Äterielon mettoch meinisin, epwe nielo ewe chon oput, iei i mälo.”—1 Korint 15:26.
Lupwen epwe pwönutä ena pwon, aramas repwe pwaapwaesini manau mi unusöch, nge esap chüen wor tipis me mälo. Nge iei, epwe auruuruukich ach silei pwe attongach kewe ra chök asöösö. Iwe, ika Kot a chechchemenir, repwe manauetä lon fansoun mi fich me reen Kot.
“Mälo, Ifai Oom Mächeü?”
A ffatöch pwe ach weweiti lapalapen ekkewe mi mälo epwe alisikich le eäni ekiek mi itepök me ruuepek ussun manau. Sap minne mälo epwe eü mettoch mi monomon. Sipwe tongeni pwaapwaiti manau nge sisap niueiti mälo. Iwe, pokiten sia weweiti pwe mälo esap amuchaalo manauach toori feilfeilo chök, sisap chök chechchei pwapwaan inisich puun sisap chüen luku pwe “manau a kon mwochomwoch.”Ach silei pwe Kot a chök chechchemeni attongach kewe mi mourelo lon mälo me witiwiti ewe manausefal epwe auruuru letipach me achchungu letipach pwe sipwe mochen sopwosopweelo lon manauach.
Ewer, sipwe nenneloi mwachkkan reen lukuluköch lupwen Jiowa Kot, ewe Chon Liffangoto manau, epwe unusen amoielo mälo. Epwe ifa me watteen feiöchuch lupwen sipwe tongeni eis, “Mälo, ifai oom pworaacho? Mälo, ifai oom mächeü?”—1 Korint 15:55.