Jiowa A Kan Alinga noun Kewe Aramas Ren Saram

“Kopwe uta, en fefin, me attina saram, pun om saram a fen war me wesewesen lingen Jiowa a fen ttineituk.”​—AISEA 60:​1, NW.

1, 2. (a) Mei fet lapalapen chon fonufan? (b) Rochopwaken chon fonufan a popu seni io?

“AMWO epwe nom rech emon mi ussun Aisea are ewe Aposel Paul!” Ina alon President Harry Truman lon ewe U.S. mwirin ewe ier 1940. Met popun an apasa ena? Popun, pun a meefi lamoten an epwe wor sou emmwen mi wesewesen limoch me wenechar manauer won fonufan lon ena fansoun. Chon fonufan ra fen keran towu seni ewe fansoun mi kon rochopwak seni meinisin lon ewe aruween senturi, weween, ewe oruuen maunen fonufan. Iwe nge, inaamwo ika a fen wes ena maun, nge esor kinamwe won fonufan. Ewe rochopwak a chuen sopwosopwolo. A enlet pwe 57 ier mwirin wesin ena maun, fonufan a chuen nonnom lon rochopwak. Ika President Truman a chuen manau tori ikenai, esor tipemwaramwar pwe epwe chuen kuna lamoten an epwe wor sou emmwen mi wesewesen limoch me wenechar manauer ussun Aisea are ewe aposel Paul.

² Ese ffat ika President Truman a silei ei mettoch, nge ewe aposel Paul a kapas ussun ewe rochopwak mi ekkeriaffou chon fonufan, iwe, lon makkeian kewe a ouroura aramas ussun. Ren chok awewe, iei an ourour ngeni chienan kewe chon luku: “Pun saminne sipwe maun ngeni fituk me cha, pwe ngeni ekkewe mu, are ekkewe nemenem, are ngeni ekkewe chon nemeni rochopwak won ei fonufan, pwal ngeni ekkewe chommong sokkun ngun ingau lon lang.” (Efisus 6:​12) Ren alon na, sap minne Paul a chok pwarata pwe a silei ussun ewe rochopwak lon pekin ngun mi pwoluelo fonufan, nge a pwal silei met a popu seni​—weween, seni ekkewe timon mi fokkun pochokkul, nge a nounou ei kapas “chon nemeni rochopwak won ei fonufan” fan asengesir. Pokiten ewe rochopwak won fonufan a popu seni ekkewe ngun mi fokkun pochokkul, met aramas repwe tongeni fori ren ar repwe amoielo?

³ Aisea a pwal kapas ussun ewe rochopwak mi ekkeriaffou chon fonufan. (Aisea 8:​22; 59:9) Iwe nge, fan iten ach ei fansoun, a oesini fan emmwenien lang pwe lon pwal mwo nge ekkeei fansoun rochopwak, Jiowa epwe awora eu apilukulukoch ren chokewe mi tongei saram. Ewer, inaamwo ika ese wesewesen nom rech Paul are Aisea, nge a nom rech makkeier kewe mi fel pwe repwe ekkemmwenikich. Ren ach sipwe kuna weween ena feioch ren chokewe mi tongei Jiowa, sipwe pi an Aisea we oesini mi mak lon ewe puken Aisea sopwun 60.

Emon Fefin lon Kapasen Oesini a Attina Saram

⁴ Ekkewe kapas akkom lon Aisea sopwun 60 ra weneiti emon fefin mi fokkun attong​—a chappelo le ppwul lon rochopwak. Muttir chok och saram a ttin lon ewe rochopwak, me Jiowa a kokko ngeni: “Kopwe uta, en fefin, me kopwe attina saram, pun om saram a fen war me wesewesen lingen Jiowa a fen ttineituk.” (Aisea 60:1) Ewe fansoun a fen war fan iten an ewe fefin epwe uta me attina saramen Kot, are lingan. Pwata? Sia kuna poluan lon ewe wokisin mwirin: “Pun nengeni, rochopwak epwe pwoluela fanufan, nge kiroch epwe tori chon ekewe mwu. Nge ewe Samol mi Lapalap me lingan epwe pwala o tittin womw.” (Aisea 60:2) Lupwen ewe fefin epwe alleasochisi an Jiowa alluk, mi anukunuk ngeni och feioch le sopwoloon. Iei alon Jiowa: “Iwe, chon ekewe mwu repwe feito ren saramom, nge ekewe king repwe feito ren saramen tinom we.”​—Aisea 60:3.

⁵ Ekkena kapas mi amwarar lon ekkena ulungat wokisin, ir kapasen suukun poraus me ra pwal awewei masouen Aisea sopwun 60. A oesini met epwe fis ngeni emon fefin lon kapas awewe me a awewei ifa ussun sipwe tongeni nonnom lon saramen Jiowa, inaamwo ika ewe rochopwak a fen pwoluelo chon fonufan. Iwe nge, met weween ekkena kapas awewe lon ekkena ulungat wokisin fan iten suukun poraus?

⁶ Ewe fefin lon Aisea 60:​1-3 a wewe ngeni Saion, nge ina an Jiowa we mwicheichen chonlang lon lang. Ikenai, lusun chon “ewe Israelin Kot” ra tupuni Saion won fonufan, nge ina ewe mwichefel mi nonnom won unusen fonufan, mwichefelin chon Kraist mi kepit ren ewe ngun mi fel, iwe, ra eani ewe apilukulukun ar repwe eti Kraist le nemenem lon lang. (Kalesia 6:​16) Kapachelapen chon fiti ena muu lon pekin ngun a ukuukun 144,000, me ikenai pwonutaan Aisea sopwun 60 a weneiti ir kewe mi manau won fonufan lon “ekkewe sopwoloon ran.” (2 Timoti 3:1; Pwarata 14:1) A pwal mak lon ena oesini chommong poraus ussun chienen ekkena chon Kraist mi kepit, weween, ewe “mwich mi lapalap” are “ekkewe pwal fitemon siip.”​—Pwarata 7:9; Jon 10:16.

⁷ A ita wor eu fansoun lupwen “ewe Israelin Kot” a nonnom lon rochopwak, ussun minne a fis ngeni ewe fefin lon kapasen oesini? Ewer, ena mettoch a fis lap seni 80 ier lom. Atun ewe aewin maunen fonufan, chon Kraist mi kepit ra weiresin achocho le sopweelo ewe angangen afalafal. Nge lon 1918, ewe saingoon ierin ena maun, a ukutiu kokkotun ewe angangen afalafal. Joseph F. Rutherford, ewe mi wiisen sou emmwen ren ewe angangen afalafal won unusen fonufan, me pwal fitemon chon Kraist mi wiis tekia repwe ita kalapus fansoun langattam pokiten ekkoch tipimwaal lupwen ra kapwung. Lon ewe puken Pwarata, eu oesini a apasa pwe chon Kraist mi nom won fonufan lon ena atun ra ussun soma mi “nonnom lon alen ewe telinimw mi lap, ewe a iteni Sotom me Isip lon sokkun kapas monomonen ngun.” (Pwarata 11:8) Ina wesewesen eu fansoun rochopwak ren Saion, nge noun kewe mi kepit ra tupuni i won fonufan!

⁸ Iwe nge, a fis och siwil watte lon ewe ier 1919. Jiowa a attina saram won Saion! Chon ewe Israelin Kot mi chuen manau ra mwokut ren ar repwe attina saramen Kot, iwe, fan pwora ra poputasefalli ewe angangen esilefeili ewe poraus allim. (Mattu 5:​14-​16) Pokiten tinikkenin ekkena chon Kraist mi kepit, ra luki ngeni saramen Jiowa pwal fitemon. Le poputaan, ekkena minefo ra kepit pwe repwe kapachelong lon ewe Israelin Kot. Aisea 60:3 a apasa pwe ir king, pun repwe chon alemwir fiti Kraist lon an Kot we Muu lon lang. (Pwarata 20:6) Mwirin, eu mwich mi lapalap, mwichen pwal fitemon siip, ra poputa le kito ren saramen Jiowa. Ikkena ekkewe “muu” ewe oesini a kapas ussur.

Noun ewe Fefin kewe Ra Liwiniti Leenier!

⁹ Iwe, Jiowa a poputa le tichchiki ewe poraus mi mak lon Aisea 60:​1-3. A ngeni ewe fefin pwal eu alluk. Auseling ngeni minne a apasa: “Kopwe nenefeil o kuna mine a fis.” Ewe fefin a alleasochisi alon, iwe, a mmen apwapwa minne a kuna! Noun kewe ra liwinto ngeni leenier. Ena wokisin a pwal apasa pwe “Noum aramas ra chufengen pwe repwe feito reom. Noum mwan repwe feito seni toau, nge aramas repwe ekieto noum fefin.” (Aisea 60:4) Ewe angang mi poputa lon 1919, angangen esilefeili ewe muu, a lukieto fite ngerou minefo ngeni an Jiowa angang. Chokana ra pwal wiliiti “noun” Saion kewe “mwan” me “fefin,” weween, chon kepit lon ewe Israelin Kot. A ina ussun an Jiowa alinga Saion ren an lukieto ngeni ewe saram lusun ekkewe 144,000.

¹⁰ En mi tongeni ekieki ika ifa watteen an Saion chengel pokiten noun kewe ra nom ren? Nge, Jiowa a awora ngeni Saion pwal fitu popun an epwe chengel. Sia alleani pwe “Iwe, lupwen kopwe kuna ei, kopwe wosaramaram, lelukom epwe pwapwa o mwanek. Pun feiochun lematau epwe toruk, kopwe pwal wouni woun ekewe mwu.” (Aisea 60:5) Lon an tipeeu ngeni ekkena kapasen oesini, mwirin 1930, chommong, chommong chon Kraist mi eani ewe apilukulukun ar repwe manau won fonufan tori feilfeilo chok ra fen kito ren Saion. Ra fen towu seni “le matauen” chon fonufan mi imulo seni Kot me ra liosueta ekkewe pisek auchea seni ekkewe muu. Ra wewe ngeni “ekkewe mettoch mi auchea seni meinisin ekkewe muu.” (Akai 2:​7, NW; Aisea 57:20) Pwal nengeni mwo pwe ekkena “mettoch mi auchea” rese angang ngeni Jiowa lon en me lapalapan. Nge ra alapalo lingen Saion ren ar chufengen me pwiir kewe chon kepit le fel ngeni Kot, iwe, ra wiliiti “eu pwin siip” fan “emon chon masen siip.”​—Jon 10:16.

Chon Sopai, Chon Masen Siip, me Chon Amomo ra Feito ren Saion

¹¹ Ren pwonutaan ena oesini ussun ewe angangen ionfengenni aramas, a fokkun chommongolo chon mwareiti Jiowa. Ina ewe mettoch a pwalo lon ekkeei kapasen ena oesini. Anchangei mwo pwe ka ukkuta ren ewe fefin lon kapasen oesini won ewe Chuukun Saion. Ka neta ngeni otiu, iwe, met ka kuna? “Iwe, chommong pwiin kamel repwe nom won fanuom, apanen kamel seni Mitian me Efa. Chon Sepa meinisin repwe feito, repwe uwato kolt me apach mi pwokus o arongafeili iteuochun ewe Samol mi Lapalap.” (Aisea 60:6) Chommong chon sopai ra panato nour kewe kamel won ekkewe al mi ale ngeni Jerusalem. Ekkena kamel ra ussun och pupuun konik mi pwoluelo ewe fonu! Ekkewe chon amomo ra uwei pisek mi mommong, “kolt me apach mi pwokus.” Iwe, ekkena chon sopai ra feito ren saramen Kot ren ar repwe mwareiti i, pwe repwe ‘arongafeili iteuochun ewe Samol mi Lapalap.’

¹² Sap minne ekkena chon sopai chok ra kikkito. Chon masen siip ra pwal kikkito ren Saion. Pwal iei alon ena oesini: “Aramas repwe emwenato reom ekewe pwiin sip seni Ketar, pwal ekewe atemwanin sip seni Napaiot fan iten asor.” (Aisea 60:7a) Ekkewe einang mi nonnom le masies ra feffeito ngeni ewe telinimw mi fel pwe repwe uwei ngeni Jiowa ekkewe man mi fokkun murinno me lein nour kewe pwin man. Ra pwal era pwe pwisin ir repwe angang ngeni Saion! Met meefien Jiowa ussun ekkena chon ekis? Iei alon Kot: “Iwe, ewe Samol mi Lapalap epwe etiwa ewe asor ra keni won an rongen asor. Epwe pwal alingochu imwan mi ling.” (Aisea 60:7b) Fan letip potete Jiowa a etiwa ekkena asor me angang seni ekkena chon ekis. Ar nonnom ikewe ie a kan alinga an we imwen fel.

¹³ Iei kopwe newu ngeni notou me nennefeil. Met ka kuna? Me towau, a wor ussun ita eu kuchu mi pwech an a pwoluelo ewe matau. Jiowa a apasata ewe kapas eis ka fen ekieki ussun: “Meni kana sip ra as usun kuchu, pwal usun lisom mi liwin ngeni faser?” (Aisea 60:8) Jiowa a pwisin polueni an na kapas eis: “Iwe, ekewe fanuen lematau ra witiwitiei. Ekewe sip watte ra akom o uwato noum mwan seni toau, pwal ar silifer me kolt fan iten ewe Samol mi Lapalap om we Kot, ewe mi Pin lon Israel, pun a alingok.”​—Aisea 60:9.

¹⁴ En mi tongeni anchangei ena poraus? Ena kuchu mi pwech a fen kineto, iwe iei, a ussun tikitik mi pwech won ewe saat me notou. A ussun eu pwin machchang mi akkas won saat. Nge lupwen ra kikkineto, ka kuna pwe ir sip mi wor amara pwe ewe asapwal epwe tongeni eniitiir. A wesewesen chommong ekkena sip, ina minne, ra ussun eu pwin lisom. Seni ekkewe fonu towau, ekkena sip ra muttir le sassa, iwe, ra uwouto ngeni Jerusalem chon luku Kot pwe repwe fel ngeni Jiowa.

A Lapalo An Jiowa Mwicheich

¹⁵ A fet ffatochun ekkena kapasen oesini mi mak lon wokisin 4 tori 9 ussun lapaloon an Jiowa angang won unusen fonufan seni 1919! Pwata a ina ussun an Jiowa efeiochu Saion? Popun, pun seni 1919, ewe Israelin Kot ese ukutiu seni an attina saramen Jiowa pokiten an alleasochis ngeni. Iwe nge, en mi kuna pwe me ren wokisin 7, ekkena warefo ra nom “won an [Kot] rongen asor”? Ekkan rong leenien for asor, me ena mettoch lon ena oesini a achchema ngenikich pwe epwe kapachelong asor lon an Jiowa angang. Iei makkeien ewe aposel Paul: “Iwe, upwe fonou ami pwii kena, . . . pwe oupwe fangalo inisimi usun chok asor mi manau, asor mi fel, asor Kot epwe pwapwa ren, pwe iei angangen ami fel lon pekin ngun.” (Rom 12:⁠1) Lon ar tipeeu ngeni alon Paul na, chon Kraist mi enlet rese meefi pwe epwe naf ar repwe chok feffel fan eu iteiten wiik. Ra kan aea ar fansoun, ar pochokkul, me pisekir kewe pwe repwe afeffeitaai ewe fel mi enlet. Esap pwe ekkena chon fel ra kan alinga imwen Jiowa we? An Aisea we oesini a apasa pwe ina ewe mettoch epwe fis. Iwe, sipwe tongeni wesewesen luku pwe ekkena chon fel mi tinikken ra lingoch mwen mesen Jiowa.

¹⁶ Ekkena warefo ra tipeni ar repwe angang. Pwal iei alon ewe oesini: “Chon ekis repwe aueta tittin telinimwom, nge ar kewe king repwe angang ngonuk.” (Aisea 60:10) Lupwen a akkom pwonuta ekkena kapas lon ekkewe ranin ar liwinsefal seni Papilon, ekkoch king me pwal fitemon seni ekkewe muu ra wesewesen awora alillis le forsefalli ewe imwen fel me ewe telinimw Jerusalem. (Esra 3:7; Nehemia 3:​26) Lon pwonutaan ena oesini lon ei fansoun, ewe mwich mi lapalap a fen alisi ekkewe lusun chon kepit le akkaueta ewe fel mi enlet. Ra fen awora ar alillis le forata ekkewe mwichefelin Kraist, iwe, a ina ussun ar apochokkula ita “tittin” an Jiowa we mwicheich, nge ena mwicheich a ussun chok eu telinimw. Ra pwal fiti eu angangen kau imw​—weween, kautaan ekkewe Kingdom Hall, Assembly Hall, me imwen Bethel. Lon ekkena angang meinisin ra alisi pwiir kewe mi kepit le akkawora minne a lamot ngeni an Jiowa we mwicheich, ewe mi lapalapalo!

¹⁷ A fet murinnoon ekkewe amuchun kapas lon Aisea 60:10! Iei alon Jiowa: “Pun lon ai song ua afeiengauok, nge lon ai umoumoch ua tongeek.” Ewer, lon 1918/19, Jiowa a apwungu noun kewe aramas. Nge sia fen lulo seni ena fansoun. Iei ewe fansoun Jiowa epwe pwarata umoumoch ngeni noun kewe chon angang mi kepit me chiener kewe pwal fitemon siip. Pokiten an a sokkolo chommongoloon chon fitiir, ina och pisekin annet pwe Jiowa a fen efeiochuur, weween, a fen ‘alingerelo.’

¹⁸ Iteiten ier, fitepuku ngerou “chon ekis” ra kapachelong lon an Jiowa we mwicheich, me epwe chuen sussuuk ewe al fan iten pwal chommong ar repwe tapwelo mwiriir. Iei alon Jiowa ngeni Saion: “Iwe, asamalapom kewe repwe suk fochofoch, resap fokun kapungula leran me lepwin, pwe aramas repwe uwato reom woun ekewe mwu, nge ekewe king repwe akom mwer.” (Aisea 60:11) Ekkoch chon u ngeniir ra kan sotuni le apwungalo ekkena “asamalap,” nge sia silei pwe resap tongeni. Jiowa a fen apasa pwe ekkewe asamelap repwe chok sussuuk. Epwe sopwosopwolo lapaloon chon fitiir.

¹⁹ A wor pwal fitu mettoch Jiowa a fen efeiochu noun kewe aramas ren lon ekkeei sopwoloon ran, iwe, a ina ussun an alingerelo. Ekkewe lusun wokisin lon Aisea sopwun 60 ra kan pwarata ren kapasen oesini weween ekkena mettoch.

En mi Tongeni Awewei?

• Met weween etien Kot we, ewe “fefin,” me io kana ra tupuni neminna won fonufan?

• Inet noun Saion kewe ra chappelo le ppwul, nge inet me ifa ussun ra “uta”?

• Ren an nounou ekkoch kapas awewe, ifa ussun Jiowa a oesini pwe epwe lapalo chon afalafala porausen ewe Muu lon ei fansoun?

• Ifa ussun Jiowa a fen attina an we saram won noun kewe aramas?

3. Inaamwo ika chon fonufan ra nom lon rochopwak, nge met Aisea a oesini fan asengesin chon tuppwol?

4, 5. (a) Jiowa a alluku ngeni emon fefin an epwe fet, me ifa an we pwon? (b) Met sokkun poraus mi ammeseik a nom lon Aisea sopwun 60?

6. Menni ena fefin lon Aisea sopwun 60, me io kana ra tupuni neminna won fonufan?

7. Mei fet lapalapen Saion lon 1918, me ifa ussun ena mettoch a pwa lon porausen oesini?

8. Menni siwil mi fokkun watte a fis lon 1919, iwe, met a fis mwirin pokiten ena mettoch?

9, 10. (a) Ifa ewe mettoch mi amwarar ewe fefin a kuna, me ena mettoch a liosueta met? (b) Met popun Saion a tongeni meefi chengel?

11, 12. Awewei mwo ika mei fet ekkewe pwin aramas mi kikkilo ngeni Saion.

13, 14. Met ewe a sassato me notou?

15. (a) Met epwe lapalo me ren ewe oesini lon Aisea 60:​4-9? (b) Chon Kraist mi enlet ra kan pwarata met sokkun ekiek?

16. Io kewe ra awora alillis fan iten ewe angangen kausefal lon fansoun lom lom, me io kewe ra fori ena mettoch lon ach ei fansoun?

17. Ifa eu mettoch Jiowa a kan alinga noun kewe aramas ren?

18, 19. (a) Ifa an Jiowa we pwon ussun ekkewe minefo mi tottolong lon an we mwicheich? (b) Ekkewe lusun wokisin lon Aisea sopwun 60 ra aiti ngenikich ussun met?

[Picture on page 20]

Jiowa a alluku ngeni etian we, ewe “fefin,” pwe epwe uta

[Picture on page 22]

Ewe pwin sip a ussun chok lisom mi assito me epilen