“Ewe Mi Tekison Leimi” Epwe Wiliti “Eu Cho”
“Ewe mi tekison leimi epwe wiliti eu cho, nge ewe mi kis epwe wiliti eu mwu mi pochokkul.”—AISEA 60:22.
1, 2. (a) Met popun rochopwak a pwoluelo fonufan ikenai? (b) Ifa ussun saramen Jiowa a tittin won noun kewe aramas ekis me ekis?
“ROCHOPWAK epwe pwoluela fanufan, nge kiroch epwe tori chon ekkewe mwu. Nge ewe Samol mi Lapalap me lingan epwe pwala o tittin womw.” (Aisea 60:2) Ekkeei kapas ra weneiti lapalapen fonufan seni 1919. Kirisentom a fen tunalo ewe esissinnen nonnomun an Jises Kraist nemenem, “ewe saramen fonufan.” (Jon 8:12; Mattu 24:3) Pokiten Setan, ewe meilapen “ekkewe chon nemeni rochopwak,” a “song mi lap”, ewe 20en senturi a fen wiliiti ewe fansoun mi eriaffou me efeiengau lon unusen uruwoon aramas. (Pwarata 12:12; Efisus 6:12) Lape ngeni aramas ra nonnom lon rochopwak lon pekin ngun.
2 Nge, saram a chuen tittin ikenai. Jiowa a ‘tineiti’ noun kewe chon angang, ewe lusun mi kepit, ir mi tupuni ewe “fefin” won fonufan. (Aisea 60:1) Akkaewin seni ar ngaselo seni fotek lon Papilon lon 1919, ra fen pwarata an Kot ling me ar ‘saram epwe pwapwalo ngeni aramas.’ (Mattu 5:16) Seni 1919 ngeni 1931, saramen ewe Muu a tittinochulo lupwen chokkei ra poutalo ekkewe minen fotek seni ekiekin Papilon. Chochoor a lapelo won fitu ngerou kit lupwen Jiowa a apwonueta an pwon: “Ngang upwe fokun achufengenikemi, ami chon Israel meinisin mi chuen manau. Upwe achufengenikemi usun sip ra chufengen lon lenier, usun epwi pwiin sip mi nom lon ar lenien mongo. Ewe leni epwe ti ren aramas.” (Mika 2:12) Lon 1931, lingen Jiowa a pwalo won noun kewe aramas lupwen ra nguuri ewe it Chon Pwarata Jiowa.—Aisea 43:10, 12.
3. A ifa ussun a pwalo pwe saramen Jiowa epwe ttin won pwal ekkoch lukun ekkewe mi kepit?
3 Weween pwe Jiowa epwe chok asarama ekkewe lusun ewe “mwich kisikis”? (Luk 12:32) Aapw. Ewe Watch Tower, minen September 1, 1931, a mak ussun pwal eu mwich. Lon eu aweween Isikiel 9:1-11, a pwarata pwe ewe mwan mi uwei eu pisekin mak lepekin a liosueta ewe lusun mi kepit. Ei “mwan” a makkei eu esissin won chamwen io? “Ekkewe ekkoch siip,” ir mi eani apilukulukun manau esemuch lon paratis won fonufan. (Jon 10:16; Kol Fel 37:29) Lon 1935 a ffatolo pwe ei mwichen “ekkewe ekkoch siip” a wewe ngeni ewe “mwich mi fakkun lapalap . . . seni ekkewe mu meinisin” ewe aposel Jon a kuna lon an we langepwi. (Pwarata 7:9-14) Seni 1935 tori ikenai, a watte ewe angangen ionfengenni ewe mwich mi lapalap.
4. Io ekkewe “king” me ekkewe “mwu” lon Aisea 60:3?
4 An Aisea we oesini a ekis weneiti ei angangen ionfengen lupwen a apasa: “Chon ekewe mwu repwe feito ren saramom, nge ekkewe king repwe feito ren saramen tinom we mi usun saramen mallen ran.” (Aisea 60:3) Io “ekkewe king” lon ei wokisin? Lusun ekkewe 144,000, me Jises Kraist, ir meinisin chon alemwir lon ewe Muun lang me ra fen emmweni ewe angangen afalafal. (Rom 8:17; Pwarata 12:17; 14:1) Ikenai, ewe fite ngerou lusun mi kepit ra kisikis seni chochoon ewe “muu,” chokkewe mi eani apilukulukun manau won fonufan mi kukkutta emmwen seni Jiowa me etiwa ekkewe ekkoch le fori ussun we chok.—Aisea 2:3.
Noun Jiowa Kewe Chon Angang Mi Tinikken
5. (a) Ikkefa ekkewe poraus mi pwarata pwe achochoon noun Jiowa kewe aramas ese kisikisilo? (b) Ikkefa ekkewe fonu mi fokkun amwarar ar feffeita lon 1999? (Nengeni ewe repot lon pekin taropwe 17-20.)
5 Mwa met ren achochoon noun Jiowa kewe Chon Pwarata lon unusen ei 20en senturi! Me inaamwo ika a fen lapalo osukosuk, nge ar tinikken ese kisikisilo atun warotoon ewe ier 2000. Ra chuen alamota an Jises we alluk: “Oupwe feilo asoulangalo chon fonu meinisin.” (Mattu 28:19, 20) Eu minefoon chochoon chon afalafala ewe kapas allim lon ewe saingoon service ier lon ei 20en senturi a tori 5,912,492. Ra aea ukuukun 1,144,566,849 awa le fos ngeni aramas ussun Kot me an kewe kokkot. Ra fori 420,047,796 return visit won ekkewe aramas mi mochen auseling me asukula 4,433,884 chon kaeo nge rese kamo. A ifa me ochchun porausen ar achocho lon ewe angangen afalafal!
6. Ifa ewe minefoon kokkot fan iten ekkewe pioneer, me ifa mwiriloon?
6 Lon ewe January, ewe Mwichen Pwungupwung a aronga ewe minefoon kokkotun awa fan iten ekkewe pioneer. Chommong ra muttir fiti ewe angangen regular me auxiliary pioneer. Awewe chok, lon ekkewe ruaanu maram le poputaan 1999, chochoon ekkewe application a tori ewe branch ofes lon Netherlands fan iten regular pioneer a lapalo fan ruaanu lap seni ewe ier me mwan. Ghana a repotei: “Seni ewe fansoun a poputa ei minefoon kokkotun awa fan iten ekkewe pioneer, chochoon ekkewe regular pioneer a feffeita.” Lon ewe 1999 service ier, chochoon ekkewe pioneer won unusen fonufan a tori 738,343—eu minen pwarata mi amwarar ussun ‘achocho ngeni fofor-murinno.’—Taitos 2:14.
7. Ifa ussun Jiowa a efeiochu angangen noun kewe chon angang mi tinikken?
7 Jiowa a fen efeiochu ei angang mi tinikken? Ewer. A nounou Aisea le apasa: “Kopwe nenefeil o kuna mine a fis: Noum aramas ra chufengen pwe repwe feito reom. Noum mwan repwe feito seni toau, nge aramas repwe ekieto noum fefin.” (Aisea 60:4) Ekkewe “nau mwan” me “nau fefin” mi kepit mi fen ionfengen ra chuen achocho le angang ngeni Kot. Me iei, noun Jises kewe ekkoch siip ra ionfengen pwe repwe chufengen me noun Jiowa kewe “nau mwan” me “nau fefin” seni 234 fonu.
“Sokkun Fofor Murinno Meinisin”
8. Chon Pwarata Jiowa ra achocho lon menni ‘angang murinno’?
8 Ekkewe chon Kraist ra wiisen afalafala ewe kapas allim ussun ewe Muu me alisi ekkewe mi mochen auseling ar repwe wiliiti chon kaeo. Nge ra “lipwakoch ngeni sokkun fofor murinno meinisin.” (2 Timoti 3:17) Ina popun, ra tumunu ar kewe famili fan tong, awasolaochu aramas, me chuuri ekkewe mi semmwen. (1 Timoti 5:8; Ipru 13:16) Me ekkoch ra awora ar alillis awewe chok fan iten kautaan ekkewe Kingdom Hall—eu angang mi pwal weneiti ach angangen afalafal. Lon Togo, mwirin a fen kauta eu leenien mwich, ekkewe chon emmwen lon eu lamalamen charismatic ra mochen silei met popun ekkewe Chon Pwarata Jiowa ra tongeni pwisin aueta ar leenien mwich nge ir ra mooni aramas le fori ar angang! Ewe repot seni Togo a aporausa pwe kautaan ekkewe Kingdom Hall mi murinno a alingalo ekkewe sopw ina popun ekkoch aramas ra sotun rent are aueta imwer mi kan ngeni ekkewe leeni repwe kauta ekkewe Kingdom Hall ie.
9. Ifa ussun ekkewe Chon Pwarata Jiowa ra awora ar alillis lupwen a fis feiengau?
9 Fan ekkoch, pwal eu sokkun angang mi murinno epwe lamot. Lon ewe service ier chommong fonu ra feiengau, me fan chommong ekkewe Chon Pwarata Jiowa ra akkom le awora alillis. Awewe chok, arapakan unusen Honduras a feiengeu ren Hurricane Mitch. Muttir chok, ewe branch a forata emergency committees pwe repwe akkota ewe alillis repwe awora. Chon Pwarata lon Honduras me pwal chommong fonu ra liffangelo uf, mongo, safei, me pwal ekkoch pisek. Ekkewe Regional Building Committee ra aea ar tufich le forsefalli ekkewe imw. Ekiselo mwirin, pwiich kewe mi osukosuk seni ewe feiengau ra kuna alillis pwe repwe otasefalli ar kewe kokkot. Lon Ecuador, Chon Pwarata Jiowa ra awora ar alillis ngeni pwiir kewe lupwen nooter watte a ataielo ekkoch imwer kewe. Mwirin emon nouwisin muu a atola lipwakochun pwiich kewe le pwakini ewe osukosuk, a apasa: “Ika upwe tongeni nouni ei mwich nei chon angang, upwe tongeni fori mettoch mi amwarar! Epwe och ika aramas ussumi epwe nom won kinikinin fonufan meinisin.” Ena esin angang mi murinno a alinga Jiowa Kot me a pwarata ach “manau mi fich ngeni Kot, iei mi lamot ren mettoch meinisin.”—1 Timoti 4:8.
Ra “As Usun Kuchu”
10. Inaamwo ika chochoon ekkewe mi kepit a kisikisilo, nge met popun ewe angangen esilefeili iten Jiowa we a lallapalo?
10 Iei Jiowa a kapas eis: “Meni kana sip ra as usun kuchu, pwal usun lisom mi liwin ngeni faser? Iwe, ekewe fanuen lematau ra witiwitiei. Ekkewe sip watte ra akkom o uwato noum mwan seni toau . . . Chon ekis repwe aueta tittin telinimwom, nge ar kewe king repwe angang ngonuk.” (Aisea 60:8-10) Noun Jiowa kewe “nau mwan,” ekkewe Chon Kraist mi kepit ra akkom le mwokutukut fan ‘tinen an saram.’ Mwirin ekkewe “chon ekis,” ewe mwich mi lapalap, ir mi tuppwol le awora ar alillis ngeni pwiir kewe mi kepit me tapwelo mwirin ar emmwen lon ewe angangen afalafala ewe kapas allim. Ina popun, inaamwo ika chochoon ekkewe mi kepit a kisikisilo, nge iten Jiowa a choufetal won unusen fonufan lap seni me loom.
11. (a) Met a chuen sopwosopwolo me ifa mwiriloon lon 1999? (b) Ikkefa ekkewe fonu mei wor chommong ra papatais me ie lon ei 1999? (Nengeni ewe repot lon pekin taropwe 17-20.)
11 Iwe, mwiriloon, fite milion ra kito “usun lisom mi liwin ngeni faser,” ra kuna tumun lon ewe mwichefelin Chon Kraist. Fitepuku ngerou ra pachelong iteiten ier, me ewe aal mi chuen suuk ngeni pwal chommong. Aisea a apasa: “Asamalapom kewe repwe suk fochofoch, resap fokun kapungula leran me lepwin, pwe aramas repwe uwato reom woun ekewe mwu.” (Aisea 60:11) Lon ewe ier 323,439 ra papatais fan iten esissinnen ar fangelo manauer ngeni Jiowa, me i esaamwo apwungalo ekkewe asamelap. “Wour meinisin epwe tori ei leni,” ekkewe mi choni ewe mwich mi lapalap, ra chuen etiepachelong lon. (Akai 2:7) Esor me lein ekkewe mi mochen su seni ewe rochopwak epwe pinepin seni ar repwe tolong. (Jon 12:46) Amwo ese poutulo seni chokkeei ar aucheani ewe saram!
Pwora Fan Riaffou
12. Ifa ussun ekkewe mi tongei ewe rochopwak ra sotun le kunu ewe saram?
12 Chokkewe ra tongei ewe rochopwak ra oput an Jiowa we saram. (Jon 3:19) Ekkoch ra pwal mwo nge sotun le kunu ena saram. Ei mettoch esap eu minen amairu. Pwal mwo Jises, “ewe saram enlet, ewe mi asarama iteiten aramas,” a kuna esiit, u ngeni, me mwirin a ninniilo ren aramasen fonuan. (Jon 1:9) Lon unusen ewe 20en senturi, a pwal ina ussun ren ekkewe Chon Pwarata Jiowa, aramas ra amangauer, kalapuser, pinei ar angang, pwal mwo nge nnirelo, lupwen ra tuppwol le etina an Jiowa saram. Lon ekkewe ier mi kanoto chok, ekkewe chon oput ra sotun le aporausa poraus mi chofona ussun chokkewe mi etina an Kot saram lon leenien esilesil poraus. Ekkoch ra mochen etipetipa aramas le eani ewe luku pwe Chon Pwarata Jiowa mi efeiengau me epwe och ika epwe allukulo are pinepin ar angang. Ekkeei chon u ngeni ra sopwoch?
13. Met a fisita seni ach aporausa lon pwotete ewe enlet ussun ach angang ngeni ekkewe chon aporausa porausen fonufan?
13 Aapw. Fan ekkoch, Chon Pwarata Jiowa ra chuuri ekkewe ra kan aporausa porausen fonufan pwe repwe awewe ngeniir ekkewe poraus mi enlet. Mwiriloon ei, iten Jiowa a esilefeili lon ekkewe simpung me chassi me won retio me TV. Ei mettoch a alisata ach angangen afalafal. Awewe chok, lon Denmark, eu prokram lon national TV a poraus won ewe itelap “Ewe popun an Chon Denmark luku a kisikisilo.” Ra kapas eis ngeni Chon Pwarata Jiowa, kapachelong pwal ekkoch mi tupuni ekkoch lamalam. Mwirin, emon fefin mi fen katon ewe prokram a apasa: “A fokkun ffat menni leir a wor ewe ngunun Kot.” Iwe, a poputa le kaeo ewe Paipel.
14. Ekkewe chon u ngeni repwe miritiiti met ren ar lolilen?
14 Chon Pwarata Jiowa ra silei pwe chommong aramas lon ei fonufan repwe u ngeniir. (Jon 17:14) Iwe nge, an Aisea oesini a apochokkuleereta: “Noun chokewe mi ariafouuk repwe feito o pworotiu mwom, nge meinisin mi turunufaseek repwe chapetiu arun pecheom. Repwe aita ngonuk telinimwen ewe Samol mi Lapalap, pwal Sion telinimwen Ewe mi Pin lon Israel.” (Aisea 60:14) Ekkewe chon u ngeniir repwe mengiringir lupwen ekisilo chok repwe miritiiti pwe ra fen wesewesen fiu ngeni Kot. Io epwe tongeni win lon ena esin maun?
15. Ifa ussun Chon Pwarata Jiowa repwe “wouni woun ekewe mwu,” me ifa ussun ei mettoch a pwapwpwalo lon ar asukula aramas me ar angangen afalafal?
15 Jiowa a pwal pwonei: “Upwe fokun atekiokota feilfeilachok . . . Kopwe wouni woun ekewe mwu, nge ekewe king repwe amongok usun eman fefin a aoupu noun. Murin kopwe silei pwe ngang ewe Samol mi Lapalap om Chon Amanau.” (Aisea 60:15, 16) Ewer, Jiowa ewe Chon Amanaua noun kewe aramas. Ika ra apilukuluk won i, repwe nonnom tori “feilfeilachok.” Me repwe “wouni woun ekewe mwu,” ren ar nouni ekkoch pisek fan iten feffeitan fel mi enlet. Awewe chok, ach nounouochu computer me communications technology a amuttiri forun Ewe Leenien Mas lon 121 fos me Awake! lon 62 lon chok eu fansoun. Eu computer software prokram a fen ffor pwe epwe alisata chiakun ewe New World Translation ngeni pwal ekkoch fos, me ena esin angang a wato chengel watte. Lupwen ewe Christian Greek Scriptures lon fosun Croatia a katowu lon 1999, chommong ra kechiu ren pwapwa. Emon pwiich mi chinnap a apasa: “Ua fen witiwit fan iten ei Paipel ren fansoun langattam. Iei upwe tongeni malo lon kinamwe!” Chochoon kapiin ewe New World Translation mi fen ainetfetal a fen lu seni 100 milion lon 34 fos.
Alluk Mi Tekia Ussun Minne Mi Pwung Me Mwaal
16, 17. (a) Inaamwo ika a weires, nge met popun mi lamot ach foffori allukun Jiowa mi tekia? (b) Menni poraus a pwarata pwe ekkewe kukkun ra tongeni su seni limengauen ei fonufan?
16 Jises a apasa: “Iteiten aramas meinisin mi fori minne mi ingau a chok oput saram.” (Jon 3:20) Nge, ekkewe ra nonnom lon ewe saram ra tongei an Jiowa kewe alluk mi tekia. Jiowa a apasa me ren Aisea: “Noun aramas meinisin repwe fori mine a pwung.” (Aisea 60:21a) Mi weires ach sipwe foffori minne mi pwung ika sia nonnom ren aramas mi foffori lisou mwaal, kapas chofona, tipemmong, me lamalam tekia. Awewe chok, lon ekkoch fonu, ekkewe business ra sopwoch me a mecheres an emon kkuf fan chechchei woun. Iwe nge, Paul a ouroura kich: “Ir mi mochen pisekisekilo repwe turutiu lon sosot, lon ser, lon chommong sokkun mochenia mi umwes o afeiengau, ekkewe sokkun mochenia mi akokatiu aramas lon feiengau o kiteter.” (1 Timoti 6:9) A ifa me alolilen lupwen emon a kon akkomwa an we business lap seni ekkewe mettoch mi fokkun lamot, ussun an chiechi ngeni ekkewe Chon Kraist, angang mi fel, alluk ussun minne mi pwung me mwaal, me ekkewe wiis lon famili!
17 Foffori mettoch mi pwung epwe akkaewin weires ngeni ekkewe kukkun, lupwen chommong chiechier ra aea safeien opuchopuch me lisowu mwaal. Lon Suriname, emon aluwon chon sukul mi atoch a pesei emon fopwul 14-ierin pwe repwe lisowu mwaal. Ewe fopwul a apasa aapw, me a awewei pwe ewe Paipel a pinei ena sokkun mettoch lukun pupulu. Ekkoch chienan kewe fopwul ra esiita i me ra sotun le etipetipa i le siwili an ekiek, ren ar apasa ngeni pwe meinisin ra mochen onnut ren ena aluwon. Nge, ewe fopwul a tipeppos. Fitu wiik mwirin, a affat pwe ewe aluwon a uri HIV me a fokkun semmwen. Ewe fopwul a pwapwa pwe a alleasochisi allukun Jiowa le ‘tumunu seni lisou.’ (Fofor 15:28, 29) Chon Pwarata Jiowa ra fokkun ingeiti nour kewe kukkun mi uppos fan iten minne mi pwung. Ar luku, me pwal an semer me iner kewe luku, a ‘alinga’ iten Jiowa Kot.—Aisea 60:21b.
Jiowa Ewe A Alapalo
18. (a) Met sokkun mettoch mi amwarar Jiowa a fen fori fan iten noun kewe aramas? (b) Ifa ewe pisekin annet mi pwarata pwe ar chommongolo epwe sopwosopwolo, me ifa ewe apilukuluk epwe tori ekkewe mi nonnom lon ewe saram?
18 Ewer, Jiowa a asarama noun kewe aramas, a efeiochuur, a emmweniir, me a apochokkuleereta. Atun ewe 20en senturi, ra fen kuna pwonutaan kapasen Aisea: “Ewe mi tekison leimi epwe wiliti eu cho, nge ewe mi kis epwe wiliti eu mwu mi pochokkul. Ngang ewe Samol mi Lapalap, upwe muttir apwonueta ai pwon lon fansoun ua filata.” (Aisea 60:22) Seni ekkewe mi chokkis seni 1919, “ewe mi kis” a fen wiliiti “eu cho.” Me ar lapelo esaamwo wes! Lon ewe ier 14,088,751 ra fiti ewe Achechchemenien maloon Jises. Chommong leir esap ir Chon Pwarata Jiowa. Sia pwapwa pwe ra fiti ena achechchem mi fokkun auchea, me sia etiwer le feffeita ngeni ewe saram. Jiowa a chuen tittinoch won noun kewe aramas. Ewe asam ngeni an we mwicheich a chuen suuk. Amwo meinisin repwe uppos le nonnom lon saramen Jiowa. A ifa me watteen ekkewe feioch epwe torikich seni ena mettoch iei! Me mwa met ren ewe chengel lon mwach kkan lupwen forien Jiowa meinisin repwe mwareiti i me repwe pwapwa fan amwararen an we ling!—Pwarata 5:13, 14.
Kopwe Tongeni Awewei?
• Io a fen pwarata lingen Jiowa lon ekkeei ranin le sopwoloon?
• Met a pwarata pwe achochoon noun Jiowa kewe aramas ese kisikisilo?
• Ikkefa ekkewe sokkun angang mi murinno Chon Pwarata Jiowa ra achocho ngeni?
• Inaamwo ika sia kuna riaffou watte, nge met sia apilukuluku?
[Lios lon pekin taropwe 17-20]
1999 SERVICE YEAR REPORT OF JEHOVAH’S WITNESSES WORLDWIDE
(See hard copy)
[Sasing lon pekin taropwe 15]
Aramas ra chuen kito ngeni an Jiowa mwicheich
[Sasing lon pekin taropwe 16]
Sia pwapwa pwe Jiowa a likitalo ewe asam an epwe suuk fan iten ekkewe mi tongei ewe saram