Kúna Pwapwa lón Óm Angang Weires
1. Met epwe tongeni ekisikisaaló ach tinikken lón ewe angangen afalafal?
1 Aramas ra ffér pwe repwe kúna ‘pwapwa lón ar angang weires.’ (SalAf. 2:24) Iwe nge, ika ese uwaéch ach angangen afalafal, iwe letipengaw a tongeni efisi péútúlóón ach pwapwa me ekisikisaaló ach tinikken. Met epwe tongeni álisikich le akkamwéchú eú ekiek mi pwúng?
2. Pwata sipwe eáni ekiek mi pwúng ren meefien aramas usun ach angangen afalafal?
2 Eáni Ekiek mi Pwúng Usun Ekkewe Uwa: Chechchemeni pwe inaamwo ika a chókúkkún chókkewe mi etiwa Jesus nge a fókkun sópwéch an angangen afalafal. (Joh. 17:4) Lón án Jesus we kapas áwewe usun ewe chón amwora pwikil, a oesini pwe lap ngeni letipen aramas resap etiwa pwóróusen ewe Mwú mi usun ewe féún pwikil. (Mat. 13:3-8, 18-22) Inaamwo ika a ina, nge ach achocho le tinikken epwe uwa chómmóng.
3. Ifa usun sipwe “ua” inaamwo ika chókisikis chék ra etiwa ach afalafal?
3 Usun Ach Sipwe Uwa Chómmóng: Me ren án Jesus we kapas áwewe, chókkewe mi etiwa ewe pwóróus repwe “ua.” (Mat. 13:23) Ika efóch iráán wit epwe mááritá, epwe uwaani mineféén féún pwikil, nge esap kúkkún iráán wit. Ina popun, ewe uwa Chón Kraist mi sópwéch ra uwaani ese wewe ngeni mineféén chón káé nge a áwewe ngeni ach fóffót chómmóngun féún pwikil ren ach akkafalafala usun ewe Mwú. Mwirilóón, epwe chómmóng ach “pwapwa” pwe sipwe tongeni menemenéch, ese lifilifil ika aramas ra etiwa are rese. Sia álisatá pinilóón iten Kot we, Jiowa. (Ais. 43:10-12; Mat. 6:9) Pwal och, sia pwapwaiti feiéchún ach akkangangfengen me Kot. (1 Korint 3:9, TF) Me ekkena sókkun uwaan “tinawach” ra apwapwaai Jiowa.—Ipru 13:15, 16.
4. Met sókkun uwa ach angangen afalafal a tongeni uwaani nge sise silei?
4 Pwal och, sise silei pwe ach angang weires a fen uwa. Neman a fis pwe ekkóch me lein chókkewe mi rongorong án Jesus afalafal ra wiliti néún chón káé mwirin chék an we a máló. Pwal ina usun pwikilin ewe Mwú sia fótukatiw, eli epwap mááritá lón letipen emén me té waran me epwe etiwa ewe enlet nge sise silei. Pwúngún, ach angangen afalafal a tongeni uwaéch. Ina popun, amwo sipwe “uani ua mi chomong” me pwáraaló pwe kich néún Jesus kewe chón káé.—Joh. 15:8.