Oupwe “Ukkuwa Chommong”
1 Lon än Jises nöünöü ewe kapas monomon, ewe irään wain a liosuetä Jises, ewe Chon Tümünü ewe tännipi a liosuetä Seman, me ekkewe chon tapwelo mwirin Jises, ir mi kepit, ra ussun palen ewe irään wain. Lon an aweweei ussun an ewe Chon Tännipi angang, Jises a apöchökküla lamoten pachapachach ngeni ewe irään wain. (Jon 15:1-4) Sia käeö pwe emön me emön epwe wor an pacheöch me Jiowa epwe ussun efoch palen mi uwa, palen ewe “irä mi enlet,” Jises Kraist. Sipwe achocho le uwaani ir mi ruu, “uwan ewe Ngun” me uwaan ewe Mwu.—Kal. 5:22, 23; Mt. 24:14; 28:19, 20.
2 Uwaan ewe Ngün: Aükükün ach feffeitä lon pekin ngün, epwe pwälo ren uwaan ewe ngün mi fel. En mi kan ämääraatä uwaan ngün mi fel ren om käkkäeö me ekkekiekifichi än Kot we Kapas? (Fil. 1:9-11) Kosap pireir le iotek fän iten ewe ngün mi fel, an epwe tongeni awora ngonuk napanap mi alingalo Jiowa me alapalo om feffeitä lon pekin ngün.—Luk 11:13; Jon 13:35.
3 Ach äkkämääraatä uwaan ewe ngün epwe pwal älisikich ach sipwe emön chon afalafal mi tinikken me lipwäköch. Awewe chök, tong me lükü ra amwökütükich ach sipwe fiti ewe angangen afalafal iteitan. Ekkewe napanap ussun chök kinamwe, mosonottam, kirekiröch, tipetekison me nemeniöchü pwisin kich repwe älisikich ifa ussun sipwe pölüeni chon u ngeni ewe kapas. Chengel a älisikich ach sipwe meefi pwapwa inaamwo ika aramas rese etiwakich.
4 Uwaan ewe Mwu: Sia pwal mochen epwe wor uwach lon ewe Mwu. Ren ei uwa mi pachelong ach isetä “asoren mwareiti Kot, iei ewe asor: uwan tinauach mi mwareiti itan [Jiowa].” (Ipru 13:15) Sia föri ena ren ach tinikken me tipeppos le esilefeili ewe pworaus allim. En mi achocho le ukkuwani uwaan ewe Mwu ren om amürinnölo pwisin om angangen afalafal?
5 Jises a apasa pwe nöün kewe chon käeö repwe uwaani sokkopaten aükükün uwa. (Mt. 13:23) Ina popun, sisap apöpöfengenni ach tufich ngeni an ekkoch, nge sipwe ngeni Jiowa unusen ach tufich. (Kal. 6:4) Ren ach wenechar le etittina pwisin nonnomuch me ren älillisin än Kot we kapas, epwe älisikich le akkalingalo Jiowa ren ach “ukkuwa chommong.”—Jon 15:2, 8.