Ia Sipwe Tongeni Kuna Me Ie Auruur Mi Enlet?
“Kot epwe feioch, Semen ach Samol Jises Kraist . . . mi aruru letipach lon sokkun ach riaffou meinisin.”—2 KORINT 1:3, 4.
1. Met sokkun mettoch a tongeni efisata an aramas osupwangen auruur?
SEMMWEN mi chou a tongeni ammeef ngeni emon pwe manauan ese chuen wor lamotan. Chechchechin fonu, molumol, me lengita ra tongeni awoungauaalo aramas. Maun a tongeni nnielo chon famili, ataielo imw, are eriani aramas ar repwe likitalo pisekir meinisin lupwen ra su seni ewe maun. Pokiten pwungungau, aramas mi tongeni ekieki pwe resap kuna alillis. Chokkewe mi toriir ena esin riaffou ra osupwangen auruur. Ia repwe tongeni kuna auruur me ie?
2 Ekkoch aramas me mwicheich ra sotun awora auruur. Aramas ra aucheaani kapas mi kirokiroch. Kaworen mongo, imw, me uf an epwe alisiir. Nge emon chok, Jiowa Kot, a tongeni siwili meinisin ewe feiengau me awora ewe sokkun alillis mi efisi an esap fissefal ewe feiengau. Ewe Paipel a apasa ussun Jiowa: “Kot epwe feioch, Semen ach Samol Jises Kraist, i mi Semen umoumoch, o Koten sokkun aururu meinisin, i mi aururu letipach lon sokkun ach riaffou meinisin, pwe sipwe pwal tongeni aururu letipen ir ekkewe mi nonnom lon sokkun riaffou meinisin ren ewe aururu me ren Kot, ewe sia kuna ach aururu me ren.” (2 Korint 1:3, 4) Ifa ussun Jiowa a auruurukich?
Kukkutta Ewe Popun Sia Osukosuk
3 Aramas meinisin ra fen alemwiri tipis me apwangapwang pokiten an Atam we tipis, me a ina met a efisata ekkewe chommong osukosuk mi emmwen ngeniir malo. (Rom 5:12) Ei osukosuk a ngauolo pokiten Setan ewe Tefil ewe “samolun ei fonufan.” (Jon 12:31; 1 Jon 5:19) Jiowa ese chok apasawu an letipechou ussun ei osukosuk mi fokkun aosukosuka aramas. Nge a fen tiinato Noun we alaemon ren an epwe awora ewe moon kepichilo mi tongeni awora ach amanau, me Kot a erenikich pwe sipwe tongeni ngaseseni ewe feiengau seni an Atam we tipis ika sipwe anganga ach luku lon Noun we. (Jon 3:16; 1 Jon 4:10) Kot a pwal oesini pwe Jises Kraist, ewe emon a wiisen nemeni lang me fonufan, epwe ataielo Setan me unusen an we otot mi ngau won ei fonufan.—Mattu 28:18; 1 Jon 3:8; Pwarata 6:2; 20:10.
4 Ren an epwe apochokkula ach lukuluk won an kewe pwon, Kot a fen awora chommong pisekin annet mi anneta pwe met a oesini epwe fisita. (Josua 23:14) Ewe poraus lon Paipel a kapachelong ekkewe porausen an amanaua noun kewe chon angang seni ekkewe osukosuk aramas rese tongeni pwakini. (Ekistos 14:4-31; 2 King 18:13–19:37) Ren Jises Kraist, Jiowa a aiti ngenikich pwe an we kokkot a kapachelong pochokkuleloon aramas seni “sokkun samau meinisin” pwal mwo nge amanauen ekkewe mi malo. (Mattu 9:35; 11:3-6) Ineet ekkeei mettoch meinisin repwe pwonueta? Ewe Paipel a polueni ena kapas eis ren eu aweween ekkewe ranin le sopwoloon ei otot minen loom mwen epwe war an Kot lang sefo me fonufan sefo. Met Jises a awewei won a wewe chok me met a fiffis lon ei fansoun sia nonnom lon iei.—Mattu 24:3-14; 2 Timoti 3:1-5.
Auruur Fan Iten Aramas Mi Riaffou
5 Seni lapalapen an Jiowa kewe foffor ngeni Israel me loom, sia kaeo ifa ussun a fen auruuruur lupwen ra riaffou. A achema ngeniir ussun lapalapan kewe. Iei ussun a fen pochokkulelo ar lukuluk won an kewe pwon. Jiowa a fen efisi an noun we soufos an epwe nounou kapas awewe mi affata mwaalfesennin ewe Kot mi enlet me manau me ekkewe uluulun rese tongeni alisi pwisin ir are chokkewe ra fel ngeniir. (Aisea 41:10; 46:1; Jeremaia 10:2-15) Lupwen Jiowa a fen ereni Aisea, “Auruuru, auruuru nei aramas,” Jiowa a amwokutu noun we soufos an epwe nounou kapas awewe me awewe ussun forian kewe ren an epwe menlapei pwe Jiowa, ewe emon chok Kot mi enlet, mi lapalap chapur.—Aisea 40:1-31, NW.
6 Fan ekkoch, Jiowa a awora auruur ren an affata ewe fansoun, mi arap ngeniir are towau lon mwach kkan, lupwen epwe angasalo noun kewe aramas. Lupwen ewe fansoun Israel epwe towu seni Isip a arapoto, Jiowa a ereniir: “Mi chuen wor eu feiengau upwe awarato won Farao pwal won chon Isip. Murin epwe mwut ngenikemi pwe oupwe feila.” (Ekistos 11:1) Lupwen ulungat muu ra tooki Juta lon ranin King Jehosofat, Jiowa a ereni chon Juta pwe epwe alisiir “lesor.” (2 Kronika 20:1-4, 14-17) Porausen ar ngaselo seni Papilon a sokkolo pun a akkom kawor 200 ier me mwan, me pwal ekkoch porausan a kawor ren Jeremaia arapakan 100 ier mwen epwe fisita. A ifa me watteen ewe apochokkul ekkena oesini ra fen kawor ngeni noun Kot kewe chon angang lupwen a arap ngeni ewe fansoun repwe ngaselo!—Aisea 44:26–45:3; Jeremaia 25:11-14.
7 A lamot ach sipwe chechchemeni pwe fan chommong ekkewe pwon mi auruuru noun Kot kewe aramas ra fen kapachelong porausen ewe Messaia. (Aisea 53:1-12) Seni eu tappin aramas tori eu tappin, porausen ewe Messaia a fen awora apilukulukun aramas mi tuppwol lupwen a toriir sossot. Lon Luk 2:25, sia alleaani: “Iwe, a wor emon mwan lon Jerusalem, itan Simion. Atewe emon mi pung o mi tuppwel. A chok witiwiti ewe aururu [warotoon ewe Messaia] an Israel, o ewe Ngun mi Fel a nonnom won i.” Simion a silei ewe apilukuluk mi alongolong won ewe Messaia a makketiu lon ewe Paipel, me an ekkekieki pwonuetaan ena apilukuluk a fokkun etipetipa manauan. Ese fen weweiti ifa ussun epwe pwonueta, me ese fen manau tori ewe fansoun fisitaan ewe amanau mi pwonetiw, nge a chengel lupwen a esinna ewe Emon epwe wiliiti an Kot minen “amanau.”—Luk 2:30.
Auruur Mi Kawor Ren Kraist
8 Atun an Jises angangen afalafal won fonufan, esap fansoun meinisin a awora ngeni aramas ewe sokkun alillis ra ekieki pwe ra osupwang ren. Ekkoch ra mochen pwe ewe Messaia epwe angaseerelo seni fan nemenien muun Rom, ewe nemenem ra oput. Nge Jises ese pesei aramas ar repwe u ngeni muun Rom. Nge a fen ereniir pwe repwe “ngeni Sisar minne an Sisar.” (Mattu 22:21) An Kot we kokkot esap chok ngaseloon aramas seni fan nemenien eu muu. Aramas ra mochen pwe Jises epwe wiliiti ar King, nge a apasa pwe epwe “fangelo manauan pwe epwe penmanauen aramas mi chommong.” (Mattu 20:28; Jon 6:15) Esaamwo tori ewe fansoun Jises epwe wiliiti king, me Jiowa, esap mut ngeni Jises an epwe angei an nemenem seni eu pwiin aramas mi oputa ewe muu mi nemenemeniir.
9 Ewe auruur Jises a wato a fen kapachelong lon “ewe kapas allim ussun ewe muun Kot.” Iei ewe poraus Jises a esileifeili ese lifilifil ia a fen feilo ie. (Luk 4:43) Jises a menlapei ifa ussun ena poraus a weneiti ar kewe osukosuk me met i, ewe Messaia me Sou Nemenem, epwe fori fan iten aramas. A fen alapalo an aramas meefi aucheaan manauer ren an alisi chokkewe mi chun me aumwoch, (Mattu 12:22; Mark 10:51, 52), me, ren an alisi chokkewe mi pechema (Mark 2:3-12), ren an tolu seni aramas semmwen mi annioput (Luk 5:12, 13), me sokkopaten semmwen mi chou. (Mark 5:25-29) A fen angasalo ekkewe famili mi riaffou ren an amanaua nour kewe mi malo. (Luk 7:11-15; 8:49-56) A pwarata pwe a tongeni nemeni molumol me awora nafochchun mongo fan iten ekkewe pwiin aramas. (Mark 4:37-41; 8:2-9) Pwal och, Jises a aiti ngeni aramas ekkewe kapasen alongolongun alluk mi weneiti manauer me iei ussun a fen alisiir ar repwe sopwoch lon manauer fan sokkopaten osukosuk me a ngeniir apilukulukoch fan iten ewe nemenem mi pwung fan ewe Messaia. Iei ussun Jises ese chok auruuru chokkewe mi auseling fan luku atun an angangen afalafal, nge a pwal isetiu eu longolong fan iten an epwe pesei aramas ren fite ngerou ier.
10 Lap seni 60 ier mwirin an Jises asor me manausefal ngeni manau lon lang, ewe aposel Jon a mwokut fan nemenemen ngun mi fel me a makkei: “Ua makkou remi ekkeei mettoch, nei kena semirit, pwe ousap tipis. Nge are emon epwe fori och tipis, iwe, mi wor ach pengosi ren Semach, iei i Jises Kraist, atewe mi pung. Iei i ewe minen omusamus ren ach tipis, nge sap ach chok, pwe pwal tipisin fonufan meinisin.” (1 Jon 2:1, 2) Pokiten feiochun an Jises asor mi unusoch, sia angei auruur wachemuk. Sia silei pwe ach kewe tipis mi tongeni musolo, mwelien letipach a limoch, sia tongeni chiechioch me Kot, me a wor rech ewe apilukulukun manau esemuch.—Jon 14:6; Rom 6:23; Ipru 9:24-28; 1 Piter 3:21.
Ewe Ngun Mi Fel A Auruuru Kich
11 Lupwen Jises a nonnom ren noun kewe aposel lon ewe pwinin mwen an malo, a fos ussun pwal eu kokkotun Seman we fan iten an epwe auruuruur. Jises a apasa: “Ngang upwe tingor ngeni ewe Sam, o i epwe fangelo ngenikemi pwal emon Chon Aururu [fosun Krik, pa·raʹkle·tos] pwe epwe nonnom remi feilfeilo chok, ewe Ngunun enlet.” Jises a alukulukuur: “Ewe Chon Aururu, ewe Ngun mi Fel, ewe Semei epwe tinato fan itei, epwe aiti ngenikemi mettoch meinisin, o epwe pwal achema ngenikemi mettoch meinisin minne ua fen apasa ngenikemi.” (Jon 14:16, 17, 26) Ifa ussun ewe ngun mi fel epwe auruuruur?
12 A ekis watte aitien Jises ngeni ekkewe aposel. Resap monuki pwe Jises a fen asukuleer nge, repwe chechchemeni titchikin ewe poraus Jises a fen aporauseer? Epwe poutulo ekkewe kapasen emmwen mi lamot pokiten rese tongeni chechchemeni mettoch meinisin? Jises a alukulukuur pwe ewe ngun mi fel epwe ‘achema ngeniir mettoch meinisin a fen ereniir.’ Ina ewe popun, walu som ier mwirin an Jises malo, Mattu a tongeni makketiu ewe aewin Kapas Allim, mi kapachelong an Jises Afalafal Won Ewe Chuuk mi achungu letipach, chommong lein an kewe kapas monomon ussun ewe Muu, me poraus mi titchik ussun esissinnen nonnomun Jises. Lap seni 50 ier mwirin, ewe aposel Jon a tongeni makkei poraus mi pwung ussun ekkewe saingoon ranin manauen Jises won fonufan. A ifa me watteen ewe apochokkul ekkeei poraus mi pop seni ngunun Kot ra ngeni aramas, pwal mwo nge tori ach ei fansoun!
13 Ewe ngun mi fel ese chok achema ngeni ekkewe chon kaeo ekkoch kapas nge, a asukuleer me emmwen ngeniir weweochchun an Kot kewe kokkot. Lupwen Jises a nonnom ren ekkewe chon kaeo, a ereniir ekkoch mettoch rese kon lien weweiti. Mwirin, fan mwokutukutun ngun mi fel, Jon, Piter, Jemes, Juta, me Paul ra makkei aweween feffeitaan an Kot kewe kokkot. Iei ussun ewe ngun mi fel a eani angangen emon sense me a fen alukulukuur pwe an Kot emmwen a nonnom reer.
14 Ekkewe liffangen ngun mi fel mi amwarar ra pwal affata pwe Kot ese chuen efeiochu Israel lon futuk nge a efeiochu ewe mwichefelin chon Kraist. (Ipru 2:4) Ekkewe uwaan ngun mi fel mi pwalo lon manauen aramas a pwal alisata ar esinna noun Jises chon kaeo. (Jon 13:35; Kalesia 5:22-24) Ewe ngun mi fel a pwal apochokkula emon me emon lon ewe mwichefel pwe repwe tongeni pwora me resap niuokkus le afalafal.—Fofor 4:31.
Alillis Fan Osukosuk Watte
15 Aramas meinisin mi tuppwol ngeni me tongei Jiowa repwe kuna riaffou. (2 Timoti 3:12) Iwe nge, chommong chon Kraist ra fen likiitu fan sokkun riaffou mi fokkun chou. Lon ei fansoun, ekkewe pwiin aramas mi mwanesol ra cheer me ra fen koturulong lon ekkewe concentration camp, kalapus, me leenien slave, ikkewe ese fich ngeni aramas ar repwe nonnom ie. Ekkewe muu ra fen eriaffour, are ra fen mut ngeni aramas fan nemenier ar repwe eriaffou ekkewe chon Kraist. Pwal och, chon Kraist ra fen semmwenilo are osukosuk lon famili. Ekkewe chon Kraist mi asimau mi tongeni osukosuk mwirin ar alisi chiener chon luku ar repwe angang won sokkopaten osukosuk. Ina popun ewe emon a kan apochokkula aramas a pwal osupwangen an emon epwe apochokkula i.
16 Lupwen King Saul a chei Tafit ren an epwe nnielo, Tafit a kutta Kot, noun we chon Alillis me a tingor: “Kot, kopwe chok rong ai iotek, . . . ewe Samol mi ewe chon amwochu manauei.” (Kol Fel 54:2, 4; 57:1) Tafit a kuna alillis? Ewer, a kuna. Lon ena fansoun, Jiowa a nounou ewe soufos Kat me ewe samol fel Apiater ren an epwe awora emmwen ngeni Tafit, me a nounou Jonatan noun Saul ren an epwe apochokkula Tafit. (1 Samuel 22:1, 5; 23:9-13, 16-18) Jiowa a pwal mut ngeni chon Filistia ar repwe maunei Israel, me iei ussun a arikalo Saul seni an chei Tafit.—1 Samuel 23:27, 28.
17 Jises Kraist a riaffou watte lupwen a arap ngeni muchuloon manauan won fonufan. A silei ifa ussun an kewe foffor mi tongeni kku iten seman me manauen chon fonufan meinisin lon mwach kkan. A achocho ngeni iotek tori a “weires chapur.” Kot a awora ewe alillis mi lamot ngeni Jises lon ena fansoun.—Luk 22:41-44.
18 A mmen watte riaffoun chon Kraist mwirin fisitaan ewe mwichefel lon ewe aewin senturi. Meinisin chinon chok ekkewe aposel ra fen su seni Jerusalem. Aramas ra atekinaawu chon Kraist seni me lon imwer. Met sokkun auruur Kot a fen awora? A alukulukuur ren an we Kapas, pwe a nonnom reer “sokkun pisek mi murinno seni,” eu alemwir ren Kraist lon lang, eu alemwir ese tongeni kkuf. (Ipru 10:34; Efisus 1:18-20) Lupwen ra afalafal, ir mi tongeni kuna pwe ngunun Kot a nonnom reer, me ra pwal chengel pokiten ekkewe aramas mi auselingeer.—Mattu 5:11, 12; Fofor 8:1-40.
19 Feil, feil, Saul (Paul), emon mi eriaffou ekkewe chon Kraist, a kuna riaffou lupwen a wiliiti chon Kraist. Won ewe fonu Saipros emon sou roong a sotun pinei an Paul angangen afalafal ren rauangau me kapas mwakel. Lon Kalesia, ra monei ngeni Paul fau tori ra ekieki pwe a fen malo. (Fofor 13:8-10; 14:19) Lon Macedonia ra wichi ren wok. (Fofor 16:22, 23) Mwirin Paul a osukosuk ren ewe mwichen aramas mi mwanesol lon Efisus, a makkei: “Am chourek mi lap seni am tufich, ina popun am aua fakkun apilukulukingau ngeni manauem. Ewer, am aua chok meefi pwe am aua fen esisinatiu ngeni malo.” (2 Korint 1:8, 9) Nge lon ena taropwe, Paul a pwal makkei ekkewe kapasen auruur lon ei lesen mi makketiu lon parakraf 2.—2 Korint 1:3, 4.
20 Ifa ussun kopwe pwal tongeni awora ena esin auruur? Mei wor chommong aramas mi osupwangen auruur pokiten riaffou seni feiengau watte are pokiten eu osukosuk mi chok kkuur. Lon ewe lesen mwirin ei, sipwe porausfengen won ifa ussun sipwe auruuruur.
En Mi Chechchemeni?
• Met popun ewe auruur seni Kot mi auchea seni meinisin?
• Ifa ewe auruur mi kawor ren Kraist?
• Ifa ussun ewe ngun mi fel emon sou auruuru?
• Awewei ifa ussun Kot a fen auruuru noun kewe chon angang lupwen ra fokkun osukosuk.
2. Met popun ewe auruur Jiowa a awora a murinno seni meinisin?
3. Ifa ussun ewe auruur Kot a awora a wesewesen alilisoch?
4. (a) Met Jiowa a fen awora ren an epwe apochokkula ach lukuluk won an kewe pwon fan iten amanau? (b) Ifa ussun Jiowa a alisata ach miritiiti ineet ach ngaselo epwe feito?
5. Lupwen Jiowa a auruuru Israel, a emmweni ar ekiek ngeni met?
6. Fan ekkoch Jiowa a ngeniir met sokkun poraus ussun ineet repwe ngaselo?
7. Fan chommong met a fen kapachelong ren ewe pwon fan iten ar ngaselo, me ifa ussun ena poraus a fen kku ekkewe aramas mi tuppwol lon Israel?
8. Ifa sokkofesennin ewe alillis Jises a awora me ewe sokkun alillis chommong aramas ra ekieki pwe ra osupwang ren?
9. (a) Ifa ewe porausen auruur Jises a esileifetalei? (b) Ifa ussun Jises a pwarata lamoten ewe poraus ngeni ekkewe osukosuk aramas ra kukkuna? (c) An Jises angangen afalafal a isetiu eu longolong fan iten met?
10. Met a pwal tufich pokiten an Jises we asor?
11. Menni kaworen Kot fan iten ach auruur Jises a pwonei mwen an malo?
12. Ifa ussun ewe ngun mi fel, lon wiisan sou achema ngeni noun Jises kewe chon kaeo, a auruuru chommong aramas?
13. Ifa ussun ewe ngun mi fel a fen asukula ekkewe chon Kraist loom?
14. Ifa ussun ewe ngun mi fel a fen alisi noun Jiowa kewe aramas?
15. (a) Ikkefa ekkewe osukosuk ra fen aosukosuka chon Kraist me loom me ikenai? (b) Met popun chokkewe mi kan apochokkula chiener kewe repwe pwal tongeni osupwangen apochokkul?
16. Lupwen Tafit a fokkun osukosuk, ifa ussun a fen angei alillis?
17. Lupwen Jises a meefi watteen an osukosuk, ia a kutta me ie an alillis?
18. Menni auruur Kot a ngeni ekkewe chon Kraist loom lupwen ra riaffou mwaal?
19. Ifa ussun ekiekin Paul ussun ewe auruur Kot a awora lupwen aramas ra eriaffou i?
20. Met sipwe kaeo ussun lon ewe lesen mwirin ei?
[Pictures on page 23]
Ewe Paipel a aiti ngenikich pwe Jiowa a auruuru noun kewe aramas ren an angaseerelo
[Pictures on page 24]
Jises a auruuru aramas ren an asukuleer, ren an apochokkuleer, me ren an amanaueereta seni malo
[Picture on page 26]
Jises a angei alillis seni lang