Lükülük woon Jiowa, ewe “Koten Sokkun Aururu Meinisin”
“Kot epwe feioch, Semen ach Samol Jises Kraist, i mi Semen umoumoch, o Koten sokkun aururu meinisin.”—2 KOR. 1:3, TF.
1. Met aramas meinisin ra osupwangan?
SENI le uputiwach sia osupwangen auruur. Emön mönükol a kechiw me a mochen emön epwe echipa. Eli a echik are a mochen emön epwe eki. Pwal mwo lupwen sia watte, fän chommong a lamot emön epwe aururukich. Äkkäeüin atun sia nom lon osukosuk.
2. Met Jiowa a pwonei ngeni chokkewe mi lükülük woon i?
2 Chon ach famili me chiechiach kewe ra tongeni aururukich. Nge rese tongeni älisikich lon meinisin ach kewe osukosuk. Kot chök a tongeni awora ngenikich auruur fansoun meinisin. An we Kapas a pwonei ngenikich: “Ewe Samol mi Lapalap a arap ngeni ir meinisin mi köri, . . . a rong ar siö o amanaueer.” (Kölf. 145:18, 19) Ewe Paipel a pwal apasa pwe “ewe Samol mi Lapalap a mamasa ekewe chon pwüng, selingan a rongorong ngeni ar siö.” (Kölf. 34:15) Ika sia mochen Kot epwe aururukich, mi lamot sipwe lükülük woon i. Tafit a erä: “Ewe Samol mi Lapalap eu lenien op mi pöchökül fän iten ekewe mi riaföü, eu lenien manau lon fansoun riaföü. Chokewe mi silei en ra anomu ar apilükülük womw, pun en, ai Samol mi Lapalap, kosap kul seni chokewe mi feito reöm.”—Kölf. 9:9, 10.
3. Ifa alon Jises we mi älisikich le weweiti ükükün än Jiowa tongekich?
3 Jiowa a fokkun aücheani ekkewe chon fel ngeni. Jises a apasa: “Ifa usun, aramas resap amömöla limman nichok ren ruoföü kapa? Iei mwo nge sap eman ekewe nichok Kot a manlükala. Nge meten möküremi kewe mwo nge ra lea meinisin. Iei mine ousap niuokus, oua aüchea seni chomong nichok.” (Luk 12:6, 7) Jiowa a ereni ekkewe chon Israel: “Üa pwä ngeniir me toau o apasa: Üa echenikemi ren ewe chen esemüch, iei mine üpwe sopwela le pwäri ngenikemi ai tong ellet.”—Jer. 31:3.
4. Pwata sipwe lükülük woon än Jiowa kewe pwon?
4 Ika sia lükülük woon Jiowa me an kewe pwon sipwe tongeni küna auruur atun sia nom lon riäfföü. Sipwe eäni ewe esin lükü Josua a eäni. Iei met a apasa: “Iteiten ekewe pwon [Kot] a eäni ngenikemi ra pwönüetä, nge esap wor eu me leir esap pwönüetä.” (Jos. 23:14) Sia pwal tongeni lükülük pwe inaamwo ika sia riäfföü pokiten sokkopaten osukosuk lon ei fansoun, nge ewe “Kot mi tuppwel” esap tongeni likitalo nöün kewe mi tuppwöl.—Älleani 1 Korint 10:13,TF.
5. Pwata sia tongeni aururu ekkewe ekkoch?
5 Ewe aposel Paul a apasa pwe Jiowa i ewe “Koten sokkun aururu meinisin.” “Aururu” a wewe ngeni ach sipwe atoto kinamwe ngeni emön mi küna riäfföü. Ina met Jiowa a föfföri. (Älleani 2 Korint 1:3, 4, TF.) Jiowa a fokkun manaman, esap wor emön are och mettoch epwe tongeni eppeti. Ina popun, a tongeni föri minne chök mi lamot pwe epwe aururu chokkewe mi tongei i. Pokiten Kot a aururukich, sia pwal tongeni aururu pwich kewe mi “nonnom lon sokkun riaffou meinisin” ren ewe auruur sia angei seni Kot. Ese pwal wor emön me lükün Jiowa a tongeni unusen aururukich!
Ekkewe Popun Sia Meefi Riäfföü
6. Ikkefa ekkoch popun sia meefi riäfföü?
6 A lamot ngenikich auruur lupwen a torikich sokkopaten weires. Eü populapen ach meefi riäfföü, ina ren mäloon emön attongach, äkkäeüin pwülüwach are nöüch. Ren ekkoch pokiten ra küna aapaap a lamot ngeniir auruur. Pwal och, apwangapwangen inis, chinnap, mwelele, me mettoch mi ngaw a fiffis lon ei fönüfan ra tongeni eriäfföükich.
7. (a) Lon fansoun osukosuk, met sia osupwangan? (b) Met Jiowa a tongeni föri pwe epwe apöchökküla “chokewe mi luketatakis?”
7 Lon fansoun osukosuk, a lamot ngenikich auruur pokiten letipach, ekiekich, ach memmeef ra küna weires. A pwal kküü pöchökkülen inisich, pwal mwo nge ach lükü. Äwewe chök, ekieki usun letipach. Än Kot we Kapas a erä pwe letipach a tongeni tatakkis. (Kölf. 34:18) Jiowa a tongeni älisikich lon ena atun pun a “apöchöküla ir mi tatakis leluker o filiti kinaser.” (Kölf. 147:3) Pwal mwo lon fansoun mi kon weires, Kot a tongeni ekinamwei letipach mi tatakkis ika sia iotek ngeni, lükü i me älleasochisi an kewe allük.—Älleani 1 Jon 3:19-22; 5:14, 15.
8. Ifa usun Jiowa a älisikich lupwen ekiekich a osupwangen auruur?
8 Pokiten sia küna chommong sossot, epwe lamot pwe ekiekich epwe küna auruur. Sise tongeni engilo fän ekkeei sossot ren pwisin ach pöchökkül. Iei alon ewe sou makken Kölfel 94:19: “Lupwen a wor chomong ai öürek, en ka achipaei o apwapwai lelukei.” Pwal och, Paul a makkeei: “Ousap aurek ren och mettoch, pwe ren mettoch meinisin oupwe chok esinei ngeni Kot ami mochen ren iotek o tingor o pwal eti kilisou. Iwe, an Kot we kinamwe, ewe mi somelo seni ach ekiek meinisin, epwe mamasa letipemi o ami ekiek lon Kraist Jises.” (Fil. 4:6, 7) Ika ekiekich a osupwangen auruur, mi lamot sipwe älleani Paipel me ekilonei, epwe fokkun aururukich.—2 Tim. 3:15-17.
9. Met a tongeni älisikich lupwen sia eäni memmeef ese pwüng?
9 Fän ekkoch, sia fokkun letipechou ina popun sia eäni memmeef ese pwüng. Neman sia ekieki pwe sise tongeni föri met Jiowa a kütta senikich are föri wisach lon ewe mwichefel. Lon ei mettoch, Jiowa a pwal tongeni aururukich me älisikich. Äwewe chök, lupwen Jiowa a ereni Josua an epwe emmweni chon Israel le maun ngeni chon koputan kewe mi pöchökkül, iei alon Moses ngeni Josua: “Kopwe apöchökülok o tipepwora. . . . Iwe, ewe Samol mi Lapalap i epwe akom mwom, epwe etuk, nge esap tümwününgau ngonuk, esap pwal likituk.” (Tut. 31:7, 8) Ren än Jiowa älillis, Josua a tufichin emmwenaalong nöün Jiowa kewe aramas lon ewe Fönüen Pwon me akkufu meinisin chon koputer. Moses a küna pwal ena esin älillis seni Jiowa lon ewe Setipar.—Eks. 14:13, 14, 29-31.
10. Ika weiresin nonnomuch a kküü pöchökkülen inisich, met epwe tongeni älisikich?
10 Ika a weires nonnomuch, iwe, a tongeni kküü pöchökkülen inisich. Möngö mi mürinnö, naföchün asösö, taiso iteitan me tümünü limöchün imwach me inisich ra tongeni älisikich. Pwal och, ach ekieki met Paipel a apasa usun mwachkkan epwe pwal tongeni apöchökküla inisich. Ina minne, ika sia nonnom fän sossot are osukosuk, ach chechchemeni pwe aposel Paul a pwal küna riäfföü me ach lefareni alon ei epwe tongeni älisikich, a erä: “Sia nonnom fan sokkun riaffou meinisin, nge sise mo talo; sia pwal nonnom fan fitikoko, nge sise mo tori apilukuluk ingau; sia kuna ninni, nge sise mo tamepichelo; sia turutiu ren ninni, nge sise mo talo.”—2 Kor. 4:8, 9.
11. Met sipwe tongeni föri lupwen sia meefi pwe a apwangapwangolo ach lükü?
11 Ekkoch sossot ra tongeni kküü ach lükü. Jiowa a pwal tongeni älisikich ren ei mettoch. An we kapas a erä: “Ewe Samol mi Lapalap a aütäi ir meinisin mi turula, a awenätä sokürün ir mi pworotiu.” (Kölf. 145:14) Ika sia meefi pwe a apwangapwangolo ach lükü, mi lamot sipwe tingor älillis seni ekkewe elter. (Jem. 5:14, 15) Ach ekiekifichi ewe äpilükülükün manau esemuch a tongeni apöchökkülakich atun sia küna sossotun ach lükü.—Jon 17:3.
Än Kot Awora Auruur
12. Ifa usun Jiowa a aururu Eperiam?
12 Lon Kölfel 119, iei alon ewe sou mak ngeni Jiowa: “Kopwe chechemeni om kapas ngeniei ngang noum we chon angang, ewe kapas mi ngeniei apilükülüköch. Iei ai chip lon ai riaföü, pwe om pwon a ngeniei manau.” (Kölf. 119:49, 50) Ikenäi a nom rech än Kot we Kapas, ewe Paipel, a masou ren chommong pworausen än Jiowa aururu nöün kewe chon angang. Äwewe chök, Eperiam a fokkun lolilen lupwen a silei pwe Jiowa epwele atai Sotom me Komora. A eisini Kot: “Ifa usun, kopwe wesewesen niela chon pwüng fiti chon pwüngingau?” Jiowa a aururu Eperiam ren an pwon ngeni pwe esap ataielo Sotom ika a wor 50 chon pwüng mi nom ie. Nge Eperiam a pwal eisinisefäl fän nimu: Ifa usun ika a wor chök 45 aramas mi pwüng? 40? 30? 20? 10? Jiowa a mosonottam me kirekiröch le pwon ngeni Eperiam pwe esap atai Sotom inaamwo ika a wor engol chök chon pwüng ie. Jiowa a amanaua Lot me nöün kewe nengngin inaamwo ika ese mwo nge wor engol chon pwüng.—Ken. 18:22-32; 19:15, 16, 26.
13. Ifa usun Hana a pwäratä pwe a lükü Jiowa?
13 Hana, pwülüwen Elkana we, a wesewesen mochen nöünöü. Nge ese tongeni pwe a rit, iwe a letipengaw. A iotek ngeni Jiowa, iwe, ewe Samol Fel Eli a ereni: “Amo ewe Goden Israel epwe ngonuk met ka tingorei.” Ei mettoch a aururu Hana, iwe “ese chuwen noninen.” (1 Sam. 1:8, 17, 18, Ewe Kapasen God) Hana a lükü pwe Jiowa epwe pwäkini an we osukosuk. Inaamwo ika ese silei met epwe fis, nge a meefi kinamwe lon letipan. Lo, lo, lo Jiowa a pölüweni an iotek. A pwopwo me nöüni emön ät, a eita ngeni Samuel.—1 Sam. 1:20.
14. Pwata Tafit a osupwangen auruur? A kütta auruur seni iö?
14 King Tafit a pwal küna auruur seni Kot. Jiowa a “nenengeni leluken aramas.” Ina popun, a silei pwe Tafit a mochen föri minne mi pwüng me a tongei fel mi enlet lupwen a seikaatä pwe epwe kingen Israel. (1 Sam. 16:7; 2 Sam. 5:10) Nge mwirin, Tafit a lisowu mwääl ngeni Patsipa me a sotun opalo an tipis. Lupwen Natan a älisi le mirititi wesewesen ükükün choun an we tipis, iwe a iotek ngeni Jiowa. A erä: “Kopwe amoela ai pupungau lon om ümöümöch mi lapalap. Kopwe fokun talü seniei ai föföringau o limetiei seni ai tipis. Pun üa mefi ai pupungau, nge ai tipis a nonom fochofoch fän mesei.” (Kölf. 51:1-3) Tafit a enletin aier seni an tipis me Jiowa a omusaalo. Iwe nge, Tafit a chüen meefi riäfföü ren pwününgawen minne a föri. (2 Sam. 12:9-12) Nge än Jiowa ümöümöch a aururu i.
15. Met sokkun älillis Jiowa a ngeni Jises me mwen an we epwele mälo?
15 Lupwen Jises a nom woon fönüfan a küna chommong weires. Kot a mutatä ekkeei sossot nge Jises a tuppwöl fansoun meinisin. I emön mi unusöch, a unusen lükülük woon Jiowa me anomu fän an nemenem. Me mwen än emön afangemä i pwe epwe ninniilo, Jises a iotek ngeni Jiowa, iei alon: “Esap fis letipei pwe letipom. Iwe, eman chon läng a pwä ngeni o apöchöküla.” (Luk 22:42, 43) Kot a ngeni Jises ewe auruur, pöchökkül, me älillis mi osupwangan lon ena atun.
16. Ifa usun Jiowa a tongeni älisikich pwal mwo nge tori mälo pokiten ach lükü?
16 Jiowa a tongeni älisikich ach sipwe tuppwöl ngeni pwal mwo nge tori mälo pokiten ach lükü. Ewe äpilükülükün manausefäl epwe aururukich. Sia fokkun äneänei ewe rän lupwen “ewe amüchülan chon oputan epwe mola, iei mäla”! (1 Kor. 15:26) Jiowa a chechchemeni nöün kewe chon angang mi tuppwöl ra fen mälo, kapachelong ekkewe pwal ekkoch chon mälo. I esap tongeni mönükireelo, epwe amanaueretä. (Jon 5:28, 29; Fof. 24:15) Ach lükü ewe manausefäl a aururukich me apöchökküla ach äpilükülük atun sia küna riäfföü mwääl.
17. Ifa usun Jiowa a tongeni aururukich lupwen emön attongach a mälo?
17 Ach silei pwe attongach kewe repwe manausefäl lon ewe otot sefö mi lingemwarar a fokkun aururukich. Esap chüen wor met epwe efisatä riäfföü. A eü feiöch ngeni ewe “mwich mi fokun chocho” nöün Jiowa kewe chon angang mi manauewu seni ewe sopwoloon le souni chokkewe mi manausefäl me asukuler!—Pwar. 7:9, 10.
Fän än Kot Tümün Feilfeilo
18, 19. Ifa usun Kot a aururu nöün kewe chon angang atun ra küna riäfföü mwääl?
18 Ewe soufos Moses a makkeei echö köl mi apöchökküla me aururu ekkewe aramasen Israel. Iei met a makkeei: “Ewe Kot mi nom lon fansoun esemüch om lenien op, a iseni fomw pöün mi nom tori feilfeilachök.” (Tut. 33:27) Ewe soufos Samuel a ereni ekkewe chon Israel: “Ousap chök kul seni ewe Samol mi Lapalap, nge oupwe angang ngeni ren unusen lelukemi. . . . Ewe Samol mi Lapalap esap pöütikemiila pokiten itan mi tekia.” (1 Sam. 12:20-22) Jiowa esap likitikichelo ika sia akkangang ngeni fän tuppwöl. Epwe äkkälisikich iteitan.
19 Kot a kan älisi me aururu nöün kewe aramas lon ekkeei ränin lesopwoloon mi weires. Lon ekkeei fansoun, chommong pwich kewe ra küna riäfföü mwääl me kalapus pokiten ra angang ngeni Jiowa. Pworauser a ännetatä pwe Jiowa a wesewesen aururu nöün kewe chon angang atun ra nom lon weires. Äwewe chök, emön pwich lon Russia a kalapus 23 ier pokiten an lükü. Nge pwal mwo lon kalapus, a chüen akkangei ekkewe puken äweween Paipel mi apöchökküla me aururu i. Iei alon: “Lon ekkena fansoun ua kalapus, ua käeö ai upwe lükülük woon Jiowa me angei pöchökkül seni i.”—Älleani 1 Piter 5:6, 7.
20. Pwata sia lükülük pwe Jiowa esap likitikichelo?
20 Ese lifilifil ika met epwe fis ngenikich lon mwachkkan, nge a lamot sipwe chechchemeni ei kapasen auruur: “Ewe Samol mi Lapalap esap likitala nöün aramas.” (Kölf. 94:14) Sia tongeni aururu ekkewe ekkoch inaamwo ika sia pwisin osupwangen auruur. Lon ewe lesen mwirin ei, sipwe käeö ifa usun sia tongeni aururu chokkewe mi küna weires lon ei otot mi ngaw.
Ifa Usun Kopwe Pölüweni?
• Ikkefa ekkoch popun sia meefi weires?
• Ifa usun Jiowa a aururu nöün kewe chon angang?
• Inaamwo ika sipwe mälo, nge met epwe tongeni aururukich?
[Pwoor lon pekin taropwe 26]
IFA USUN SIPWE ENGILO FÄN EKKEWE METTOCH MI KKÜÜ . . .
▪ letipach Kölf. 147:3; 1 Jon 3:19-22; 5:14, 15
▪ ekiekich Kölf. 94:19; Fil. 4:6, 7
▪ ach memmeef Eks. 14:13, 14; Tut. 31:6
▪ pöchökkülen inisich 2 Kor. 4:8, 9
▪ pöchökkülen ach lükü Kölf. 145:14; Jem. 5:14, 15