“Kot Mi Tong”
“Are emon ese meefi tong, iwe, ese mo sinei Kot, pwe Kot mi tong.”—1 JON 4:8.
1-3. (a) Met ewe Paipel a apasa ussun an Jiowa we lapalapen tong, iwe, ifa ussun an a sokkolo aucheaan? (b) Pwata ewe Paipel a apasa pwe “Kot mi tong”?
LAPALAPEN Kot kkewe meinisin ra fokkun amwarar, unusoch, me murinno. Nge ewe lapalalapen tong, ina ewe lapalap mi murinno seni meinisin. Ese wor pwal eu lapalap epwe tongeni luki aramas ngeni Kot ussun chok an tong. Sia pwapwa pwe ewe lapalapen tong a nampa eu me lein lapalapen Kot kkewe meinisin. Ifa ussun sia silei ena mettoch?
2 Ewe Paipel a apasa och mettoch ussun tong ese apasa fan eu ussun ekkewe ekkoch lapalapen Kot kkewe. Ewe Paipel ese apasa pwe Kot a wewe ngeni manaman are pwung are pwal mwo nge tipatchem. A lapalapeni ekkena sokkun lapalap me I populapen ekkena ulungat lapalap. Iwe nge, ussun tong, 1 Jon 4:8 a eani eu poraus mi sokko seni, a apasa: “Kot mi tong.” Ewer, an Jiowa we tong a wesewesen alollol. A ur ren tong; i popun tong. Eni a iei ussun sipwe tongeni weweiti ena poraus: An Jiowa we manaman a atufichi i an epwe fori och mettoch. An pwung me an tipatchem ra emmweni ifa ussun epwe fori och mettoch. Iwe nge, an Jiowa tong a amwokutu i pwe epwe fori. Iwe, fansoun meinisin an tong epwe pwapwalo ren ifa ussun epwe aea ekkewe ekkoch lapalapan kkewe.
3 Fan chommong aramas ra apasa pwe Jiowa, i ewe leenien appiru mi murinno seni meinisin ren tong. Ina minne, ika sia mochen kaeo ussun tong, epwe lamot ach sipwe kaeo ussun Jiowa. Ina minne, sipwe atittina ifa ussun Jiowa a pwarata tong.
Ewe Fofforun Tong mi Lapalap Seni Meinisin
4 Lon chommong mettoch Jiowa a pwarata tong, nge a wor eu mi lapalap seni meinisin. Ifa ewe? Iwe, ina ewe fansoun a tinatiu Noun we pwe epwe kuna riaffou me malo fan asengesich. Epwe pwung ach sipwe apasa pwe ina ewe fofforun tong mi lapalap seni meinisin lon uruwoon aramas. Pwata sipwe tongeni apasa ena mettoch?
5 Ewe Paipel a eita ngeni Jises “ewe mwanichien forien Kot kewe meinisin.” (Kolose 1:15) Ekieki mwo—Noun Kot we a nonnom mwen forien lang me fonufan. Iwe, ifa langattamen ewe fansoun ewe Sam me Noun we ra nonnomfengen? Ekkoch sou sile ra ekieki pwe a 13 pillion ierin unuselapen lang. Nge meit ika a pwung ekiekir, nge esap ina chok ukukun ttamen manauen Noun Kot we mwanichi! Iwe, met a fori lon ekkena fansoun mi langatattam? Ewe Nau a pwapwaesini wisan we wisen noun Seman we “sou silei angang.” (An Salomon Fos 8:30; Jon 1:3) Jiowa me Noun we ra angangfengen pwe ekkewe ekkoch mettoch repwe fisita. A ifa me watten ar fansoun pwapwafengen! Iwe, ion leich epwe tongeni unusen weweiti pochokkulen ewe ririfengen lefiler lon ekkena fansoun mi fokkun langatattam? A ffat pwe Jiowa Kot me Noun we ra pachefengen ren eu ririin tong mi pochokkul seni meinisin.
6 Iwe nge, Jiowa a tinatiu ngeni fonufan Noun we pwe epwe uputiu emon monukol. An fori ena mettoch a wewe ngeni pwe ukukun lap seni 30 ier, Jiowa esap chuen nonnomfengen ren Noun we mi achengicheng lon lang. Fan an tong, A katol seni lang atun Jises a mammarita ngeni emon mwan mi unusoch. Lupwen a tori orun 30 ierin, Jises a papataiselo. Lon ena fansoun ewe Sam a pwisin fosetiu seni lang, a era: “Iei nei at mi achchengicheng rei; ua unusen pwapwa ren.” (Mattu 3:17) Ese mwaal, lupwen a kuna pwe Jises a apwonueta meinisin mi fen oesini me mettoch meinisin a awisa ngeni, Seman we a fokkun pwapwa!—Jon 5:36; 17:4.
7 Iwe nge, met meefien Jiowa lon Nisan 14, 33 C.E., lupwen Jises a kuna riaffou atun an Jutas afangema i me ewe mwichen chon rang ra aresini? Lupwen ekkewe aramas ra esiita, ottufeiti, me opuni Jises ren pour? Lupwen a kilas watte sokurun Jises seni ar ra awata? Lupwen poun me pechen kkewe ra chufolueta me won efoch ira me aramas ra esiita? Ifa meefien ewe Sam lupwen Noun we mi achengicheng a leuwommong le koko ren riaffoun inisin? Iwe, met meefien Jiowa lupwen Jises a malo, iwe, ina a keran fis seni poputaan an a forata mettoch meinisin, ese chuen manau Noun we mi achengicheng?—Mattu 26:14-16, 46, 47, 56, 59, 67; 27:26, 38-44, 46; Jon 19:1.
8 Pokiten a wor meefien Jiowa kkewe, ukukun watten ewe riaffou a meefi ussun maloon Noun we a lu seni ach tufichin pwaralo ren kapas. Nge sipwe tongeni pwaralo ewe popun an a mut ngeni an epwe fis. Pwata ewe Sam a mutata an epwe pwisin kuna ena watten riaffou? Jiowa a pwarata och mettoch mi amwarar ngenikich lon Jon 3:16—eu wokisin lon Paipel mi fokkun lamot pwe ekkoch ra eita ngeni menlapen ewe Kapas Allim. A apasa: “A chok iei ussun an Kot tongei fonufan, pwe a fangelo Noun we Alaemon pwe iteiten aramas meinisin mi luku i esap poutmwalilo, nge epwe kuna manau esemuch.” Iwe, ina an Kot popun: tong. Esor an emon och tong epwe lap seni ei tong.
Ifa Ussun Jiowa A Alukuluku Ngenikich An We Chen
9 Iwe nge, a piita eu kapas eis mi lamot: Kot a kan tongei emon me emon leich? Ekkoch repwe tipeeu pwe Kot a tongei aramas, ussun a mak lon Jon 3:16. Nge a iei ussun ar memmeef, ‘Kot esap tongeni tongeiei won inisi.’ Pwungun pwe Satan ewe Tefil a fokkun mwotores le ameef ngenikich pwe Jiowa ese tongeikich are aucheanikich. Iwe nge, ese lifilifil ika kich mi meefi pwe sia chok lamotengau are lamot-kisikis, nge Jiowa a alukuluku ngenikich pwe emon me emon lein noun kkewe chon angang mi tuppwol mi auchea ngeni.
10 Awewe chok, ekieki alon Jises kkewe mi mak lon Mattu 10:29-31. Ren an epwe awewei aucheaan noun kkewe chon kaeo, Jises a era: “Esap liwinin ruuemon litchok senis eu? Nge emon leir esap turutiu won pwul lukun tipen Sememi. Nge meten mokuremi meinisin ra fen allea. Iei minne, oute niuokus, pun ami mi auchea lap seni chommong litchok.” Ekieki met alon kana ra ameef ngeni ir mi auseling ngeni Jises lon ewe aeuin senturi.
11 Lon ranin Jises we, ewe litchok a mokukkun seni matchang meinisin fan iten mongo. Ren senis eu, ewe chon kamo a tongeni moni ruuemon litchok. Nge Jises a apasa mwirin lon Luk 12:6, 7, pwe senis ruu epwe moni, sap fomon litchok, nge nimon. Ewe animuen matchang a kapachelong, ussun ita nge esor aucheaan. Neman ekkena matchang ra lamotongau mwen mesen aramas, nge met meefien ewe Chon Forireta ussur? Jises a apasa: “O Kot esap monuki emon leir” (pwal mwo nge ewe animuan mi kapachelong). Iei sipwe tongeni poputa le weweiti ewe lesen Jises a aiti ngenir. Ika Jiowa a aucheani emon litchok, a ifa me watten an aucheani emon aramas! Ussun Jises a apasa, Jiowa a silei titchikin porausen manauach meinisin. Pwungun pwe meten mokurach meinisin ra fen allea!
12 Eni ekkoch repwe ekieki pwe Jises a tunommong ussun ena mettoch. Iwe nge, ekieki ussun ewe manausefal. Jiowa epwe sileifichi titchikin porausen manauach fan iten an epwe forsefallikicheta! A kon lien aucheanikich pwe a chechemeni mettoch meinisin mi titchik, pachelong ewe minen are mapen anapanapa kifetin inisich meinisin me chemeniach kkewe me kunaen manauach meinisin. An alleani meten mokurach—nge lap ngeni aramas meinisin ra amarata orun 100,000—epwe fen mecheres lap seni ena. A fet murinnoon alon Jises kkewe ra alukuluku ngenikich pwe Jiowa a acheni emon me emon leich!
13 Ewe Paipel a pwarata pwal eu mettoch mi alukuluku ngenikich an Jiowa chen. A kukkutta me aucheani ekkewe mettoch mi murinno lon kich. Awewe chok, ekieki ussun King Jehosafat mi murinno. Lupwen ewe king a foffor-mwaal, noun Jiowa we soufos a ereni: “Pokiten ei fofor ka fori, Jiowa a song ngonuk.” Mwa met ren aniuokusun ena poraus! Nge ese mwo wes an Jiowa poraus. A sopweilo: “Nge a wor ekkoch foffor mi murinno ka fori.” (2 Kronika 19:1-3) Weween, an Jiowa we song mi pwung ese pinei an epwe kuna ekkewe “mettoch mi murinno” Jehosafat a fori. Ese aururukich pwe ach Kot a kutta minne mi murinno lon kich inaamwo ika sise unusoch?
Emon Kot mi “Omusalo Tipis”
14 Lupwen sipwe tipis, ewe lichipung, sau, me letipeta sia meefi epwe tongeni efisi ach ekiek pwe ese fich ngenikich ach sipwe angang ngeni Jiowa. Iwe nge, chechemeni pwe Jiowa a “omusalo tipis.” (Kol Fel 86:5) Ewer, ika sipwe aier seni ach kkewe tipis me achocho pwe sisap liwinitiir, eni sipwe kuna feioch seni an Jiowa omusomus. Ekieki ifa ussun ewe Paipel a awewei ussun ena kinikinin an Jiowa chen mi amwarar.
15 Ewe sou makkei kol fel Tafit a aea eu poraus mi achungu letipach pwe epwe alollo ngeni an Jiowa omusomus, a era: “Usun touaufesenen meseiran o apilen, iei ussun a atouaualo senikich ach kewe foffor ingau.” (Italics ours; Kol Fel 103:12, The Amplified Bible) Ifa ukukun touauen meseiran seni apilen? Ekieki mwo pwe fansoun meinisin meseiran a touau seni apilen ukukun mei tufich; resap tongeni ar repwe kanfengen. Emon sou sile a era pwe a wewe ngeni “ukukun an a tufich ruu mettoch repwe touaufesen; ukukun ach tongeni anchangei.” Alon Tafit mi mak fan emmwenien ngun mi fel a erenikich pwe lupwen Jiowa a omusalo tipis, a atouaualo senikich ach kkewe tipis ukukun ach tongeni anchangei.
16 En mi fen achocho le toluelo och niwangir seni echo uf? Neman inaamwo ika ka achocho ukukun om tufich, nge mei chuen pwalo ewe niwangir. Nengeni ifa ussun Jiowa a awewei an tufichin omusalo tipis: “Oua limengau ren tipis usun eman a limengau ren cha [mi ussun chok scarlet ika crimson]. Nge ngang upwe limetikemi pwe oupwe limoch ussun pwechepwechen sno. Inaamo are oua limengau usun mangaku mi fotopwul, oupwe fokun limoch.” (Aisea 1:18) Ewe fos “scarlet” a wewe ngeni parachon.a “Crimson”, eu aluwan lefilen parachon me forket, ina aluwan mangaku mi intiko. Esap tufich ach sipwe pwisin limetikich seni limengauen tipis. Iwe nge, Jiowa a tongeni omusalo tipis mi ussun chok chcha are parachon me alimochu pwe epwe ussun pwechepwechen sno are unuchen siip ese intiko. Iwe, lupwen Jiowa epwe omusalo tipisich, esor lamoten ach sipwe meefi pwe sia limengau ren tipis ukukun lusun manauach.
17 Lon echo kolun kilisou Hesekia a makkei mwirin an a ngas seni eu semmwen mi chou, a ereni Jiowa: “Ai kkewe tipis meinisin ka poutalo lukisokurum.” (Aisea 38:17) Weween, ussun ita nge Jiowa a angei tipisin emon chon foffor-mwaal mi aiersefal me a poutalo lukisokurum ikkewe ie ese chuen kuner are ekiekir ie. Me ren eu puken sile, a pwal tongeni wewe ngeni: “Ka fori pwe ussun ita nge tipisi kkewe rese mwo fis.” Esap ina eu poraus mi aururukich?
18 Lon eu pwonen forsefal, ewe soufos Mika a pwarata an achifoua pwe Jiowa epwe omusalo tipisin noun kkewe aramas mi aier, a era: “Io emon Kot ussun chok en, . . . ka pwoluelo tipisin lusun om we alemwir? . . . O kopwe aturatiu am kkewe tipis lealololun matau.” (Mika 7:18, 19) Anchangei minne ekkena kapas ra wewe ngeni aramas mi manau lon fansoun Paipel. A ita tufich an emon epwe angeisefalli och mettoch mi fen koturulong “lealololun matau”? Alon Mika a pwarata pwe lupwen Jiowa a omusalo tipis, a unusen amoielo ach kkewe tipis.
“Umoumochun Ach Kot ngeni Ekkewe mi Attong”
19 Umoumoch, ina pwal eu kinikinin an Jiowa we tong. Meta umoumoch? Lon ewe Paipel, tong me umoumoch ra ririfengen. Ekkoch kapasen Ipru me kapasen Krik ra affou ngeni umoumoch. Awewe chok, fan chommong ewe kapasen Ipru verb ra·chamʹ a affou ngeni “pwaralo umoumoch” are “tongeasini.” Ei kapasen Ipru Jiowa a akku ngeni pwisin i, a kan ngeni ewe kapas fan iten “leenien monukol”, iwe, a tongeni wewe ngeni “an emon inelap kirokiroch.”
20 Ewe Paipel a aea meefien emon inelap ussun noun we monukol pwe epwe aiti ngenikich ussun an Jiowa we chen. Aisea 49:15 a apasa: “Ifa usun, eman fefin epwe tongeni manlukala noun monukol, pwe esap tongeasini [ra·chamʹ] noun won inisin. Nge are epwe fen manlukala, ngang usap manlukuk.” (The Amplified Bible) A weires ach ekieki pwe emon inelap epwe monukalo an epwe amongouni me tumunu noun we mi okoup. Popun, pun emon monukol a lipwakingau; le ran me lepwin a lamot ngeni emon monukol an inan we tumun. Nge solapan, mei wor ekkoch in mi tumunungaua nour kkewe, akkaeuin lon ei “fansoun weires.” (2 Timoti 3:1, 3) Jiowa a era, “Nge usap manlukuk.” An Jiowa umoumoch mi tong fan iten noun kkewe chon angang a fokkun watte seni ewe memmeef mi wewe ngeni umoumoch kich mi tongeni ekieki—ewe tong emon in a kan meefi fan iten noun we monukol.
21 Ifa ussun Jiowa, ussun emon in mi tong, a pwaralo an umoumoch? Ena lapalap a pwapwalo lon an foffor ngeni Israel lom lom. Chechemeni ewe fansoun lupwen fitu million chon Israel ir chon kichiniwel lon Isip, ikkewe ra fokkun riaffou ie. (Ekistos 1:11, 14) Lon ar riaffou, ekkewe chon Israel ra pupuchor ngeni Jiowa. Ifa ussun ewe Kot mi umoumoch a poluenir?
22 A kku letipen Jiowa. A apasa: “Ua kuna riaffoun nei aramas mi nonnom Isip o rongorong ar sio . . . ua pwal silei ar weires meinisin.” (Ekistos 3:7) Esap tufich Jiowa epwe kuna riaffoun noun kkewe aramas are rongorong ar sio ika ese tongeasinir. Jiowa emon Koten tong. Iwe, ena esin tong—ewe tufichin meefi riaffoun ekkewe ekkoch—a kan ngeni umoumoch. Iwe nge, JIowa ese chok meefi meefien noun kkewe aramas; nge a pwal achungu an epwe mwokutukut fan asengesir. Aisea 63:9 a era: “Ren an chen me tong ngeniir a angaseer.” Ren “poun we mi pochokkul,” a angasalo ekkewe chon Israel seni lon Isip. (Tuteronomi 4:34) Mwirin, a awora ngenir mongo ren eu manaman me emmwenir ngeni eu fonu mi uwaoch pwe repwe fonueni.
23 Jiowa ese chok pwaralo umoumoch ngeni eu mwichen noun kkewe aramas. Ach Kot mi tong a fokkun tongeasini emon me emon leich. A silei ekkewe riaffou mi tottorikich. Ewe sou makkei kol fel a apasa: “Mesen Jiowa ra nengeni ekkewe aramas mi pung, o selingan kewe ra rong ar pupuchor. Jiowa a chok arap ngeni chon letipeta, a pwal amanaua ekkewe mi ta lon ngunur.” (Kol Fel 34:15, 18) Ifa ussun Jiowa a kan alisi emon me emon leich? Sap minne epwe chok amoielo minne a efisata ach riaffou. Nge a awora chommong minen alillis fan asengesin ir kkewe mi sio ngeni. An we Kapas a awora kapasen fon mi awora watten alillis. Lon ewe mwichefel, a awora ekkewe overseer mi fich ngeni lon pekin ngun, iwe, ir mi achocho le pwarata an Jiowa umoumoch le alisi aramas. (Jemes 5:14, 15) I ewe “Chon Auseling ngeni Iotek,” iwe, Jiowa a liffang “ngun mi fel ngeni ir mi tingorei i.” (Kol Fel 65:2; Luk 11:13) Ekkena minen alillis meinisin ra pwarata “umoumochun ach Kot.”—Luk 1:78.
24 Ese apwapwa ach sipwe ekiekifichi ussun an Semach we lon lang tong? Lon ewe lesen me mwan, a achema ngenikich pwe Jiowa a pwaralo an manaman, an pwung, me an tipatchem ren tong pwe epwe efeiochukich. Iwe, lon ei lesen, sia fen kuna pwe Jiowa a pwarata an we tong fan asengesin aramas meinisin—me pwal emon me emon leich—lon ekkoch lapalap mi amwarar. Iei, epwe och emon me emon leich epwe eis, ‘Ifa ussun upwe polueni an Jiowa we tong?’ Amwo kopwe polueni ren om tongei ren unusen letipom, ekiekum, ngunum, me om pochokkul. (Mark 12:29, 30) Amwo lapalapen om manaueni manauom iteiten ran epwe pwarata om mochen arap ngeni Jiowa seni lon letipom. Iwe, amwo Jiowa, ewe Kot mi tong, epwe arap ngonuk—tori feilfeilo chok!—Jemes 4:8.
[Footnotes]
a Emon sou sile a era pwe parachon, “ina och aluwan ese kan tenino. Sap amurenipwin, ut, sop, are fansoun langattam epwe atapa.”
En Mi Chechemeni?
• Ifa ussun sia silei pwe tong, ina lapalapen Jiowa mi nampa eu?
• Pwata sipwe tongeni era pwe an Jiowa tinato Noun we pwe epwe riaffou me malo fan asengesich, ina ewe fofforun tong mi lapalap seni meinisin?
• Ifa ussun Jiowa a alukuluku ngenikich pwe a tongei emon me emon leich?
• Ifa ussun ewe Paipel a awewefichi an Jiowa omusomus?
4, 5. (a) Ifa ewe fofforun tong mi lapalap seni meinisin lon uruwoon aramas? (b) Pwata sipwe tongeni era pwe Jiowa me Noun we ra pachefengen ren ewe ririin tong mi pochokkul seni meinisin?
6. Lupwen Jises a papataiselo, ifa ussun Jiowa a pwaralo meefian ussun Noun we?
7, 8. (a) Met Jises a kuna lon Nisan 14, 33 C.E., iwe, ifa ussun an a kku Seman we lon lang? (b) Pwata Jiowa a mut ngeni Noun we an epwe kuna riaffou me malo?
9. Met Satan a mochen asonakich ussun meefien Jiowa ussuch, nge met Jiowa a alukuluku ngenikich?
10, 11. Ifa ussun an Jises we kapas monomon ussun ekkewe litchok a pwaralo pwe kich mi auchea mwen mesen Jiowa?
12. Pwata sipwe tongeni luku pwe Jises ese tunommong lupwen a era pwe meten mokurach a allea?
13. Ifa ussun porausen King Jehosafat a pwaralo pwe Jiowa a kukkutta minne mi murinno lon kich inaamwo ika sise unusoch?
14. Lupwen sia tipis, met sokkun memmeef mi chou sipwe tongeni meefi, nge ifa ussun sipwe kuna feioch seni an Jiowa omusalo tipisich?
15. A ifa ukukun touauan an Jiowa anomu tipisich kkewe?
16. Lupwen Jiowa a omusalo tipisich, pwata sipwe lukuluk pwe kich mi limoch mwen mesan?
17. Ifa ussun Jiowa a poutalo tipisich lesokurun?
18. Ifa ussun ewe soufos Mika a aiti ngenikich pwe lupwen Jiowa a omusalo tipis, A unusen amoielo tipisich?
19, 20. (a) Met weween ewe kapasen Ipru mi affou ngeni “pwarata umoumoch” are “tongeasini”? (b) Ifa ussun ewe Paipel a aea meefien emon inelap ngeni noun we monukol pwe epwe aiti ngenikich ussun an Jiowa we umoumoch?
21, 22. Met ekkewe chon Israel ra kuna lon Isip lom lom, iwe, ifa ussun Jiowa a polueni ar sio?
23. (a) Ifa ussun alon ewe sou makkei kol fel a alukuluku ngenikich pwe Jiowa a fokkun tongeasini emon me emon leich? (b) Ifa ussun Jiowa a kan alisikich?
24. Ifa ussun kopwe polueni an Jiowa we tong?
[Picture on page 15]
“Kot . . . a liffangeto Noun we alaemon”
[Credit Line]
© J. Heidecker/VIREO
[Picture on page 16]
“Ami mi auchea lap seni chommong litchok”
[Picture on page 18]
Meefien emon in ussun noun we monukol epwe tongeni aiti ngenikich ussun an Jiowa umoumoch